Nehemaea 4 - Buka Blahi Ka Cheke Holo

Hatimare mae naoka ne theome gleꞌani nogna gloku mae Nehemaea igne

¹ Kate nomhini mae Sanbalat teke babana fapulo ghehati mae Jiu gringni thina igne, mana ne thono diꞌatagna fara, ne maꞌe ghami ghehati.

² Eghuteuna mana kegra haghe ke uludi mae kheragna re baludi mae armidi Samaria gre ne cheke eghu, “Tore, unha site eni na mae Jiu te glaꞌe fara igrea? Ba, mare ginauna tangomanadi teke babana fapulo thedi gringni thina tuana? Ba, mare ginauna jaola tangomanadi nate ke fafara na. Ba, mare ginauna tangomanadi nate loku fagnafa gloku igne ka kaisei narane kolho na? Theome tangomana! Thina teke hata teke loku mare tifa gringni thina igne la goigonihi khaꞌaghi. Mare theome tangomana teke hata thina ka chara re.”

³ Aonu mae Tobaea mae biꞌogna Amon igne kegra haghe rhegna mana ne cheke eghu, “Gringni thina te loku mare tuana theome maku! Jame apla haghe kaisei sua khuma ikoi ke klignagna meuna, ginauna tangomanau kolho nate grofo na sana ia tore!”

⁴ Aonu iara ne tarai eghu, “God, fanomho mei ka nogu tharai iara gne. Mae igre thofno filo fapari ghami ghehati. Iagho figri cheke te diꞌa te edi mae Sanbalat ghe mae Tobaea igre mala ke soru ke klignadi thedi. Te keli na iagho snakredi mae naokare mala mei mare khi fajifladi ka nodi namonore mala tei au mare ka keha kantri delei.

⁵ Iagho thosei ghatho ihodi puhi te diꞌa teke edi mare ra, eghuteuna iagho thosei hata fadeleidi nakhibodi re, naugna mae igre neke cheke fadiꞌa ghami ghehati fara mae iheire teke babana fapulo gringni thina igne.”

⁶ Eghume ghehati gognarona loku mala ke babana fapulo gringni thina igne. Eghuteuna na theome raugha, haghegna gringni thina igne la thokeni vido ka fafaja gna na, naugna naiknore sasaꞌa loku heta fara.

⁷ Nu kate nomhini mae Sanbalat ghe mae Tobaea baludi naiknodi Arebia, nei naiknodi Amon, nei naiknodi Asdod teu tekela babana fapulo ghehati vido ka gringni thina gna namono Jerusalem teke groꞌe igne, mare ne thono diꞌatadi fara.

⁸ Aonu mare ghaoghaho fodu ne mei Jerusalem mala magra nei ei puhi biꞌo eghu ka ghehati.

⁹ Nu ghehati tarai ka nomi God, nei lilisei mae sekiuriti mala reireghi fakelini namonomi igne ka bongi nei ka narane, mala tangomana ghehati te tarabana fakeli kate mei mare na.

¹⁰ Kate tudu teu gloku na, gaoghathodi mae Jiu igre ne funu glaꞌe soru, aonu mare ne koje kaisei khoje balu tanhi ne cheke eghu, “Gloku te eni tahati igne tahu fara, eghuteuna nhubrada re la salha. Chara thina gre jaola kmana fara, gognarona tahati theome naba te loku fahui gringni thina igne.”

¹¹ Eghuteuna noda naoka tahati igre cheke eghu ka gaoghathodire, “Mare ginauna theome laseni ba filoni tela meihi ghehati na, tahati ginauna mei aknu falehedi mala gnafa mare gloku na.”

¹² Nu leuleghu fata na mae Jiu te au rhedi mae naoka igre mei cheke eghu koba ka ghehati, “Ghotilo jifla ka namono igne mala mei au balumi ghehati!”

¹³ Aonu iara tufa goru nei naflahi nei phaloho eghu ka mae glokure, eghuteuna chekedi naiknore mala au fodu ka vikedi nei kheradi teure. Eghuteuna iara chekedi mare mala tei kegra balu nodi glepo mala magra igre ke leghugna gringni thina te theome gnafa teu igne, mala reireghi fakelini namono igne ka mae naoka.

¹⁴ Iara filodi naiknore ne mhaghu nodi fara, aonu iara ne eha fabiꞌo ka mae biꞌo, nei ka mae mala baubatu, nei ka keha naikno ka namono na, ne cheke eghu ka mare, “Tore! Ghotilo thosei mhaghudi mae naoka gre! Ghathoni noda Lord mae ihei te au nolaghi fateote'o, nei haghe fara! Tahati kegra haghe mala magra fanogradi mae naoka gre mala theome tangomana mare te mei goigonidi kherada, nei thuda, nei khetoda, nei noda suga la teu igre!”

¹⁵ Kate nomhini mae naoka gre tela lasenihi ghehati nodi gaoghatho poru na, mare laseni God la goigonihi nodi gaoghatho poru mare igne. Aonu ghehati kafe pulo neke loku ka gringni thina igne.

^16-17 Funu ka narane igne, iara ne tufa nogu mae glokure ka phei tothoghei. Kaisei tothoghei mala loku ka gringni thina igne, eghuteuna keha tothoghei na mala reireghi. Mae te reireghi igre mare pipichi ka pohe te maku mala magra, eghuteuna mare hata goru nei phaloho balu greoreo mala tafra ka jata. Hatimare mae lida igre mare kegra ke leghudi mae iheire te loku ka gringni thina igne. Mae iheire te pala thina nei tul mala loku teu igre mare loku ka kaisei khame kolho, eghuteuna keha khame na mala loku glepo mala magra.

¹⁸ Mae iheire te loku kligna ka gringni thina na igre, mare sasara naflahi mala magra ka nodi nhugha re. Eghuteuna mae te mala kufli ka trampet kate mei mae naokare igne mana au rhegu iara.

¹⁹ Eghuteuna iara ne cheke eghu ka mae biꞌo nei mae mala baubatu nei keha naikno teure, “Gloku igne theome au ka kaisei vido kolho, eghuteuna tahati te gnafa na kegra fari fakhabai ka keha mae na ka gringni thina igne.

²⁰ Kate nomhini ghotilo naoglagna trampet na, ghotilo faghose chari mei mala khapru faligoho ghau iara. Noda God tahati na ginauna magra ranghi ghita tahati!”

²¹ Eghume leuleghu narane funu hamerane boibongi te ghilei romno te filoni ghehati nathunu na, ghehati kaisei tothoghei na mala loku ka gringni thina, eghuteuna keha tothoghei na kegra reireghi au balu goru.

²² Iara jaola neke cheke eghu ka naiknore ka narane tuana, “Ghotilo mae nalhaꞌu baludi nomi mae gloku ra, ghotilo au soru Jerusalem bongiro na mala reireghi fakelini namono gne, eghuteuna loku ka gringni thina gne narane na.”

²³ Bongiro nei naranero teuna iara baludi mae kheragu nei nogu mae gloku, nei mae mala reireghi namono teu te leghu ghau iara igre, ghehati te gnafa na theome tughu pohe, eigna ghehati tarabana mala magra. Eghuteuna neuba ghehati ne soru hata khoꞌu, leuleghu fata na ghehati louloku au ngala ka khamere nomi glepo mala magra re.