Nehemaea 3 - Buka Blahi Ka Cheke Holo

Mare neke babana fapulo gringni thina igne

¹ Igre mae iheire teke babana fapulo gringni thina igne: Mae pris biꞌo Eliasib baludi keha mae pris igre teke babana fapulo Grengatha Sipu na. Mare ne fablahi grengatha igne ka Lord, eghuteuna mare ne fagefe haghe phei grengatha biꞌo gnare. Kligna ka gringni thina igne au suga mala toetoe, eghuteuna hatimare mae pris gre ne fablahi ka gringni thina igne ne tei posa ka nogna suga mala toetoe mae Handred nei nogna suga mala toetoe mae Hananel.

² Eghuteuna maedi Jeriko igre neke babana fapulo keha vidogna gringni thina igne. Eghuteuna mae Sakua thugna mae Imri, mana ne loku keha vidogna na.

³ Vikegna mae Hasena igre, mare neke babana fapulo grengatha te kiloi Grengatha Sasa aheva te mala foli sasa naiknore igne. Mare lilisei thaba biꞌo ka grengatha na, eghuteuna famaku lao phei bobotho biꞌo igre. Aonu mare lilisei aean biꞌo ka phei bobotho igre, eghuteuna mare jaola hata thaba biꞌo mala bibilakhi phei bobotho igre.

⁴ Mae Meremot thugna mae Iuraea gragna mae Hakos igne, mana babana fapulo keha vidogna gringni thina igne. Mae Mesulam thugna mae Berekaea gragna mae Mesesabel, mana loku keha vidogna na. Mae Sadok thugna mae Bana, mana loku keha vidogna na.

⁵ Maedi Tekoa igre neke babana fapulo keha vidogna na, nu goro mae biꞌo gna namono igne tirodi eni kaisei gloku, naugna te ghathoni mare na nafnata gloku igre theome nabadi goro mae biꞌo te edi re.

⁶ Mae Joeada thugna mae Pasea, balugna mae Mesulam thugna mae Besodea, phiamare babana fapulo Grengatha Jesana. Mare lilisei thaba biꞌo ka phei gerigna grengatha na, eghuteuna famaku lao phei bobotho biꞌore. Eghuteuna mare lilisei aean ka phei bobotho igre, eghuteuna mare jaola hata thaba biꞌo mala bibilakhi phei bobotho ka grengatha igre.

⁷ Mae Melataea maegna Gibeon ghe mae Jadon maegna Meronot, baludi maedi ka namono Gibeon ghe Mispa, mae igre neke babana fapulo keha vidogna gringni thina igne, tei posa Mispa ka namono aheva te au gavana gna provins ke mosu Khoꞌu biꞌo Iufretis.

⁸ Mae Usiel thugna mae Hahaea, mae ihei te horo glepo ka gol igne, mana ke babana fapulo keha vidogna gringni thina igne. Hananaea, mae ihei te lase horo insens igne, mana ne loku keha vidogna na, ne ghilei posa ka gringni thina te kiloi Gringni Thina Krepa.

⁹ Mae Refaea thugna mae Hua, mae ihei te mae biꞌo ka kaisei vido ka nohi te lithui Jerusalem igne, mana loku keha vidogna na.

¹⁰ Mae Jedaea thugna mae Harumafi igne mana ne loku keha vidogna gringni thina rhegna sugagna mae Jedaea igne. Mae Hatus thugna mae Hasabnea igne mana loku keha vidogna na.

¹¹ Mae Malkaeja thugna mae Harim, balugna mae Hasub thugna mae Pahat-Moab igne phiamare loku keha vidogna na, balugna nodi suga mala toetoe mare ka vido te mala kuki bret na.

¹² Mae Salum thugna mae Halohes, mae ihei te mae biꞌo ka kaisei vido ka nohi lithui Jerusalem igne, baludi thugna gaꞌase mana re, mare loku keha vidogna gringni thina igne.

¹³ Mae Hanun baludi maegna ka namono Sanoa igre mare babana fapulo Grengatha Glogu na. Mare famaku lao phei bobotho biꞌo, eghuteuna mare jaola lilisei aean ka phei bobotho igre, eghuteuna mare jaola hata thaba biꞌo mala bibilakhidi phei bobotho ka grengatha igne. Mare jaola loku keha vidogna gringni thina igne. Brahugna vido gringni thina igne, te tei posa ka Grengatha mala Koko Chara na glima gobi mita.

¹⁴ Mae Malkaeja thugna mae Rekab, mae ihei te mae biꞌo ka nohi Bet-Hakerem igne mana neke babana fapulo Grengatha mala Koko Chara igne. Mana famaku lao phei bobotho biꞌo, eghuteuna mana jaola nhaꞌa lao aean biꞌo ka phei bobotho igre, eghuteuna mare jaola hata thaba biꞌo mala bibilakhi phei bobotho ka grengatha igne.

¹⁵ Mae Salum thugna mae Kolose, mae ihei te mae biꞌo ka nohi Mispa, mana neke babana fapulo Grengatha Glokha khoꞌu igne. Mana ghaghata ke kligna gna, eghuteuna famaku lao phei bobotho biꞌo, eghuteuna mare jaola lilisei aean biꞌo ka phei bobotho igre, eghuteuna mare jaola hata thaba biꞌo mala bibilakhi phei bobotho ka grengatha igne. Mana jaola babana fapulo gringni thina lithuini Kholo Siloa, rhegna nogna nagare king. Eghuteuna mana loku keha vido ka gringni thina te tei posani lada biꞌo te soru funu ka nogna namono biꞌo King Devet tifa.

¹⁶ Mae Nehemaea thugna mae Asbuk, mae ihei te mae biꞌo ka nohi Bet-Sua, mana neke babana fapulo keha vidogna gringni thina te tei posa ka bekugna King Devet nei tharakna, nei tangk biꞌo nei nogna Suga mae ihei te Nheta ka Magra.

¹⁷ Hatimare mae Livaet ne loku ka keha vidogna gringni thina igne, eghuteuna mae Rehum thugna mae Bani, mae ihei te nodi mae funei gloku mare na. Mae Hasabaea, mae ihei te mae biꞌo ka kaisei vido ka nohi Keila, mana loku keha vidogna gringni thina igne maladi naiknogna nohi igne.

¹⁸ Mae Binui thugna mae Henadad, mae ihei te mae biꞌo ka kaisei vido ka nohi Keila, mana baludi maedi ka nohi igne, mare babana fapulo kaisei vidogna gringni thina igne.

¹⁹ Mae Esa thugna mae Jesua, mae ihei te mae biꞌo ka namono Mispa, mana loku kaisei vidogna. Mana fufunu rhegna lada te haghe ka chogho te mala liliseidi glepo mala magra re, tei posa ka sulukhugna gringni thina igne.

²⁰ Mae Baruk thugna mae Sabae, mana loku heta fara mala babana fapulo keha vidogna gringni thina igne. Mana fufunu loku ka sulukhugna gringni thina igne tei posa ke ulugna nogna suga Pris Eliasib.

²¹ Mae Meremot thugna mae Iuraea gragna mae Hakos, mana loku ka keha vidogna na. Mana fufunu loku ke ulugna nogna suga mae Eliasib tei posa ke delagna suga igne.

²² Hatimare mae pris te au ka nohi te lithui Jerusalem, mare babana fapulo keha vidogna gringni thina igne. Vido ulu lahu na, mae pris di namono te lithui Jerusalem te loku na.

²³ Ke leghudi mae igre, Benjamin ghe mae Hasub, phiamare loku ke uludi nodi sugare keha vidogna gringni thina igne. Mae Asaraea thugna mae Masea, gragna mae Ananaea, mana loku rhegna nogna suga na keha vidogna gringni thina igne.

²⁴ Mae Binui thugna mae Henadad, mana loku keha vido na, funu ka nogna suga mae Asaraea tei posa ka keha sulukhugna gringni thina igne.

^25-26 Mae Palal thugna mae Usae, mana loku keha vido na, mana fufunu loku ka gringni thina ka keha sulukhugna thoa aheva te au nogna fapea suga king. Thoa igne au rhegna nodi suga mae iheire te mala toetoe gre. Mae Pedaea thugna mae Paros, baludi mae gloku ka Sugablahi na mae iheire te au ka thogele Ofel, mare babana fapulo keha vidogna gringni thina igne tei posa rhegna Grengatha Khoꞌu nei nodi thoa biꞌo hatimare mae te loku ka Sugablahi na.

²⁷ Eghuteuna maedi ka namono Tekoa igre ne loku ka keha vidogna gringni thina igne, fufunu ka thoa biꞌo igne, tei posa ka gringni thina rhegna thogele Ofel.

²⁸ Kaisei tothoghei mae pris ne loku ka keha vidogna gringni thina igne, funu ka Grengatha Hose na tei posa ke raru. Vido gringni thina igne au ke ulugna nodi suga mae pris gre, eghuteuna kaisei mae teu ka mare na, mana ke babana fapulo katha vido ikoi te au rhegna nogna suga na.

²⁹ Ke leghudi mae igre na, mae Sadok thugna mae Ima, mana loku keha vidogna gringni thina te au rhegna nogna suga na. Ke leghugna mana, mae Semaea thugna mae Sekanaea, mae ihei te reireghigna Grengatha ke Maghati igne, mana loku ka nogna vido na.

³⁰ Ke leghugna mana na, mae Hananaea thugna mae Selemaea, balugna mae Hanun, fafamno thugna nalhaꞌu mae Salaf, phiamare ne loku fapea vido na. Ke leghugna mana na, mae Mesulam thugna mae Berekaea, mana loku keha vido gringni thina te au ke ulugna nogna suga na.

³¹ Ke leghugna mana na, mae Malkaeja, mae ihei te horo glepo ka gol igne ne babana fapulo keha vidogna gringni thina igne. Vido gringni thina ke ulugna nodi suga mala gnafa mae te loku ka Sugablahi na igre, nei mae te loku ka bisnis teu rhegna nodi Grengatha mae Sekiuriti igne. Mana neke babana fapulo gringni thina igne ne tei thokeni suga te au kligna ke rarugna sulukhugna gringni thina igne.

³² Eghuteuna vido leghulahugna gringni thina te funu ka suga te au kligna ke rarugna sulukhugna na te tei thokeni Grengatha Sipu igne, mae te horo glepo ka gol baludi mae te loku ka bisnis igre, mare neke babana fapulo gringni thina igne.