Nehemaea 2 - Buka Blahi Ka Cheke Holo

Nehemaea ne tei Jerusalem

¹ Ka nhigra ulu lahu Nisan, ka varadaki finogha gna King Atasekses te funei fruni ni Pesia, King Atasekses gnokro soru ne ghamu, eghuteuna iara hata ne tei ghegna waen mana na. Ka narane igne mana filo glani ghau iara te diꞌanagnafa na, naugna mana neke theome filo ghau iara teke diꞌanagnafa tifa na.

² Aonu mana ne ghusna eghu ka iara, “Nehemaea, naugna unha site theome glealeꞌa iagho gnea? Iara te filo nigho iagho na, iagho theome fogra. Eghume jame kaisei glepo te diꞌanagnafani iagho na.” Iara rhana nogu ka cheke mana igne ne mhaghu nogu,

³ ne cheke eghu ka king, “Iagho king fabrahu tifa tifa! Uve, iara diꞌanagnafagu fara, naugna nogu namono iara aheva teke giugiludi vikegu iara tagnara la groꞌehi. Eghuteuna grengathagna gringni thina na la gnhubrahi ka khaꞌaghi.”

⁴ King nomhini cheke igne ne ghusna eghu ka iara, “Unha te magnahagheni iagho na mala togho nigho iara?” Aonu iara ghosei ne tarai ka God gna Kligna,

⁵ eghuteuna iara ne cheke eghu ka mana, “King, jame te kelitamu iagho ka iara nou mae gloku gne na, iagho snakre ghau iara mala ke pulo iara Juda ka nogu namono teke giugiludi vikegu iara tagnara, mala ke babana fapulo iara namono ia.”

⁶ Ka narane tuana, kuin gnokro neu balugna mana. Aonu king ne ghusna eghu ka iara, “Iagho na theome tei au raugha ba iagho na tei au raugha Juda? Eghuteuna iagho nake pulo mei niha nau?” King kelitagna te snakre tei ghau iara na, aonu iara ne lilisei narane mala teke pulo mei iara ka mana.

⁷ Eghuteuna iara toreni mana mala tusu mei keha letas mala tusu lao iara ka gavana gna provins ke mosu Khoꞌu biꞌo Iufretis. Nogna letas king igne te mala snakreni mare te mala ruma iara ke lamnagna provins igne te mala ghilei tei posa iara ka nohi Juda.

⁸ Iara jaola toreni king mala rioriso kaisei letas ka mae Asaf, mae ihei te mala fiofilodi gaju ka nogna namhata king re, mala alha thaba mala ke horo fakeli grengathagna vido mala toetoegna nogna Sugablahi God, baludi grengathagna namono igne, eghuteuna mala jaola eni kaisei suga mala au iara. King ne famei ka iara gobigna lepo teke toredi iara re, naugna God na au balugu iara.

⁹ Kate jifla iara na, king kurudi keha mae komanda gna armi baludi mae soldia te saghe ka hose, mala reireghi ghau iara ka nabrou. Eghuteuna iara mei ne thoke ka provins ke mosu Khoꞌu biꞌo Iufretis, eghuteuna ka nohi te gnafa aheva te tei iara tagna na, iara tusu lao nogna letas king igne ka gavana, mala tangomana mana te snakre ghau iara te tei salaꞌu na.

¹⁰ Nu mae Sanbalat maegna ka namono Bet-Horon ghe mae Tobaea, maegna ka namono Amon, phei mae biꞌogna provins. Kate nomhini phiamare nonomho te mei iara te mala toghodi naiknodi Israel teuna, phei mare ne diꞌatadi fara.

^11-12 Iara tei ne posa Jerusalem. God ne lilisei nogna gaoghatho na mala ke babana fapulo Jerusalem ka gaoghathogu iara na, nu iara theome toutonuni gaoghatho igne ka ihei nga. Ke leghu thilo narane, farihotei bongiro, iara hata keha mae kheragu ne tei ke kosigna gringni thinagna namono na. Ghehati hata kaisei dongki ne saghe iara tagna.

¹³ Ka bongi tuana, ghehati ne tei salaꞌu ka Grengatha Glogu ke mosu namono. Eghuteuna ghehati tei ke mata leghuni gringni thina na mala tei posa ka Nogna Glokha Khoꞌu Mogo nei Grengatha mala Hata Koko Chara, jare ke mata khukrugna gringni thina na. Ghehati tei ne filodi vido gringni thina teke goigoni mae naoka tifa ra, baludi grengatha teke gnhubra ka khaꞌaghi ra.

^14-15 Aonu ghehati ne leghuni gringni thina igne funu ke raru ne tei ke maghati, dongki na theome tangomana te tei na, naugna nabrou na ne diꞌa. Eghume neubane romno, ghehati soru ka Glogu Kidron mala filo fakelini gringni thina igne. Eghuteuna ghehati tei ne posani Grengatha Glokha Khoꞌu na nei nogna kholo King. Eghuteuna ka vido igne ghehati figri neke pulo ka Grengatha Glogu na mala ke ruma ka namono igne.

¹⁶ Hatimare mae biꞌodi Jerusalem igre theome laseni unha te eni iara na, ba tei aheva, naugna mei te posa ka narane tuana iara theome cheke thakleni nogu gaoghatho na ka mae Jiu gre, neubane mae pris ba mae lida, ba mae biꞌo, ba mae ihei nate lokugna gringni thina igne.

¹⁷ Nu ka narane igne iara ne cheke eghu ka mare, “Ghotilo la lasenihi puhi biꞌo te thoke ghita tahati igne. Gringni thina gna namono Jerusalem igne la nghuja tafri la khoko pari, eghuteuna grengatha igre la gnubrahi ka khaꞌaghi. Tahati nake babana fapulo gringni thina igne, mala theome mamaja noda fabrahu tahati tagna.”

¹⁸ Eghuteuna iara chekeni ka mare eigna God te togho ghau fara iara na, baludi cheke te edi king ka iara re. Aonu mare ne cheke eghu, “Tahati mala fufunu gloku igne!” Eghuteuna mare tarabana mala fufunu gloku igne.

¹⁹ Nu kate nomhini mae Sanbalat maegna Bet-Horon, nei mae Tobaea maegna Amon, nei mae Gesem maegna Arebia eigna glepo igne, thilo mae igre maꞌe ghami ghehati fara ne cheke eghu, “Ei! Unha site ghathoni mala eni teu ghotilo gnea? Ba, ghotilo magnahaghei te magra ka king sia?”

²⁰ Aonu iara ne cheke eghu ka thilo mare, “God gna Kligna ginauna togho ghami ghehati mala loku fagnafa gloku igne. Ghehati nogna mae gloku mana gre kolho nate fufunu gloku igne mala ke babana fapulo gringni thina gna namono igne. Nu ghotilo theome naiknomi Jerusalem, eghume ghotilo theo nomi nolaghi te mala cheke eigna igne.”