Nehemaea 12 - Buka Blahi Ka Cheke Holo

Mae pris nei mae Livaet

¹ Kmana mae pris nei mae Livaet eghu jifla Babilonia neke pulo mei Jerusalem balugna: mae Serababel thugna mae Sealtiel, nei mae pris biꞌo Jesua. Nanghadi mae pris re igre: mae Seraea, mae Jeremaea, mae Esra,

² mae Amaraea, mae Maluk, mae Hatus,

³ mae Sekanaea, mae Rehum, mae Meremot,

⁴ mae Ido, mae Gineton, mae Abaeja,

⁵ mae Mijamin, mae Madaea, mae Bilga,

⁶ mae Semaea, mae Joarib, mae Jedaea,

⁷ mae Salu, mae Amok, mae Hilkaea, nei mae Jedaea. Mae igre nodi lida hatimare mae pris ka narane mae Jesua teke mae pris biꞌo na.

⁸ Hatimare mae Livaet mae iheire teke pulo mei baludi mae Serababel ghe mae pris biꞌo Jesua, nangahadire igre: mae Jesua, mae Binui, mae Kadmiel, mae Serebaea, mae Juda, nei mae Matanaea mae ihei batuni kwaea mala koje mala kilo fnaknoni God.

⁹ Mae Bakbukaea ghe mae Uni baludi mae kheradi igre, mare koje cheke tughu ka khoje igne.

¹⁰ Mae pris biꞌo Jesua gne kmagna mae Joeakim, eghuteuna mae Joeakim gne, kmagna mae Eliasib, eghuteuna mae Eliasib gne kmagna mae Joeada,

¹¹ eghuteuna mae Joeada gne kmagna mae Jonatan, eghuteuna mae Jonatan gne kmagna mae Jadua.

¹² Ka narane te mae pris biꞌo mae Joeakim igre, mae iheire teke phaꞌudi vikedi mae pris re, igre nanghadire: Ka vikegna mae Seraea: mae Meraea. Ka vikegna mae Jeremaea: mae Hananaea.

¹³ Ka vikegna mae Esra: mae Mesulam. Ka vikegna mae Amaraea: mae Jehohanan.

¹⁴ Ka vikegna mae Maluk: mae Jonatan. Ka vikegna mae Sebanaea: mae Josef.

¹⁵ Ka vikegna mae Harim: mae Adna. Ka vikegna mae Heraeot: mae Helkae.

¹⁶ Ka vikegna mae Ido: mae Sekaraea. Ka vikegna mae Gineton: mae Mesulam.

¹⁷ Ka vikegna mae Abaeja: mae Sikri. Ka vikegna mae Miniamin: kaisei mae pris. Ka vikegna mae Moadaea: mae Piltae.

¹⁸ Ka vikegna mae Bilga: mae Samua. Ka vikegna mae Semaea: mae Jehonatan.

¹⁹ Ka vikegna mae Joearib: mae Matenae. Ka vikegna mae Jedaea: mae Usi.

²⁰ Ka vikegna mae Salae: mae Kalae. Ka vikegna mae Amok: mae Eba.

²¹ Ka vikegna mae Hilkaea: mae Hasabaea. Ka vikegna mae Jedaea: mae Netanel.

²² Mae igre teke mae pris biꞌo ka narane tuare: mae Eliasib, nei mae Joeada, nei mae Johanan, nei mae Jadua, mare neke rioriso soru ka kaisei buka nanghadi phaꞌu maedi ka vikedi hatimare mae Livaet nei hatimare mae pris. Mare neke loku fahui gloku igne ka narane te funei King Darius ka kantri Pesia.

²³ Mare neke rioriso soru ka kaisei buka nanghadi phaꞌu maedi vikedi mae iheire teke karha mei ka vikedi mae Livaet tifara. Mare neke rioriso soru nanghadi mae igre ka buka neke ghilei posa ka naranegna mae pris biꞌo Johanan, gragna mae Eliasib.

²⁴ Eghuteuna jaola ka narane tuare, nanghadi phaꞌu maedi vikegna mae Livaet na igre: mae Hasabaea, mae Serebaea nei mae Jesua thugna mae Kadmiel. Mae igre kegra ka kaisei phile ka Sugablahi na mala koje kilo fnaknoni God, eghuteuna kheradi mae igre, mare kegra ka keha phile na mala cheke tughugna khoje igne balu tegioni mana, leghuni nogna cheke King Devet nogna mae gloku God ranghidi hatimare mae Livaet tifa ra.

²⁵ Mae Matanaea, nei mae Bakbukaea, nei mae Obadaea, nei mae Mesulam, nei mae Talmon, nei mae Akub, mae igre mala reireghi gna chogho te au gobi lepogna Sugablahi te au namo rhedi grengathare.

²⁶ Mae igre neke loku kani teke mae pris biꞌo teku mae Joeakim thugna mae Jesua, gragna mae Josadak, nei ka narane teke gavana mae Nehemaea, nei ka narane gna Pris Esra, mae ihei teke velepuhigna nogna Vetula God.

Mae Nehemaea neke fablahi gringni gna namono na

²⁷ Kate tarabana ghehati te mala fablahi gringni gna namono biꞌo Jerusalem gne teuna, mare tei ne hirodi hatimare mae Livaet ka namonodi re, mala mei Jerusalem ka narane biꞌo igne. Mare mei mala koje kilo fnakno nei mala koje ka simbol nei ka thua nafnata gita.

²⁸ Mae Livaet te koje ka Sugablahi na igre mare au ka namono rhegna Jerusalem, mare jaola mei ka narane biꞌo igne. Mare mei funudi ka namono rhegna Netofa,

²⁹ nei Bet-Gilgal, nei Geba, nei Asmavet. Mae te au ka kwaea na igre neke ei namono ikodi faligohoni Jerusalem, mala tangomana mare te au namo ka Sugablahi igne.

³⁰ Aonu mae pris nei mae Livaet teu igre ne fagaedi thedi ka tathagna God, eghuteuna ke leghugna igne, naiknogna namono na, nei gringni thina na, baludi grengatha re mala jaola gae ka tathagna God.

³¹ Iara neke chekedi mae biꞌodi Juda igre mala kafe haghe ke kligna gna gringni igne. Eghuteuna iara ne vavahi phei tothoghei mala koje kilo fnaknoni God. Tothoghei ulu lahu na tei ke mata leghu nabrou tei ka Grengatha mala Koko Chara na.

³² Mae Hosaea ne tei ke leghugna tothoghei ululahu igne ka khoje na, balugna kaisei vido ka hatimare mae biꞌodi Juda.

^33-34 Mae Asaraea, mae Esra, mae Mesulam, mae Juda, mae Benjamin, mae Semaea, nei mae Jeremaea, mare jaola ne tei ka tothoghei igne.

³⁵ Ke leghudi mae igre, keha mae pris te ifu trampet ne tei ke leghu. Kaisei ka mae igre mae Sekaraea, thugna mae Jonatan. Mae Jonatan, thugna mae Semaea, thugna mae Matanaea, thugna mae Mikaea, thugna mae Sakua, nei thugna mae Asaf.

³⁶ Kheragna mana re nanghadire, mae Semaea, mae Asarel, mae Milalae, mae Gilalae, mae Mai, mae Netanel, mae Juda, nei mae Hanani, mare tei ke leghugna mana. Mae igre pala glepo mala koje, jateula King Devet nogna mae gloku God tifa ia eghu, mana neke farirhiudi hatimare mae Livaet mala lalahu ka glepo igre. Pris Esra, mae velepuhi gna nogna Vetula God igne, mana tei ke ulugna tothoghei igne.

³⁷ Kate tei te posa mare ka Grengatha Glokha Khoꞌu na, mare apla ne haghe ka lada te haghe ka vido namono tifa te kiloni mare nogna Namono Devet. Aonu mare tei ne salaꞌu ka nogna suga biꞌo King Devet tifa igne, aonu mare ke figri ke tagrugna gringni thina igne ke maghati namono te au tagna Grengatha Khoꞌu na.

³⁸ Fapea tothoghei mae mala koje igne, ne haghe ke tagrugna gringni thina igne ne tei ke raru. Iara balugu keha naikno ne tei ke leghudi mare. Ghehati tei ne salaꞌuni thoa vido aheva te mala kuki bret mare na, mala tei thokeni Gringni Krepa na.

³⁹ Aonu ghehati tei ne salaꞌuni Grengatha Efrem, nei Grengatha Jesana, nei Grengatha Sasa, nei nogna Thoa Hananel, nei Grengatha gna Gobi, tei posani Grengatha Sipu. Aonu ghehati nolo ne tei ne gnafa rhegna nodi Grengatha mae Greireghi.

⁴⁰ Aonu phei tothoghei igre koje ne kilo fnaknoni God ne mei posa ke ulugna nogna Sugablahi God na. Iara baludi keha mae biꞌo, ghehati jaola ne tei ka nomi vido re ka Sugablahi na.

⁴¹ Aonu mae pris re ifu trampet ne mei ka nodi vido re. Nanghadire, mae Eliakim, mae Masea, mae Miniamin, mae Mikaea, mae Elioenae, mae Sekaraea nei mae Hananaea.

⁴² Keha mae pris teke mei ke leghudi mare re nanghadire, mae Masea, mae Semaea, mae Eleasa, mae Usi, mae Jehohanan, mae Malkaeja, mae Elam nei mae Esa. Mae Jesrahaea te batudi mare ka nodi khoje mare na.

⁴³ Ka narane igne, ghehati neke edi kmana fafara, eghuteuna ghehati te gnafa na thofno glealeꞌa fara, naugna God neke faglealeꞌa ghami ghehati. Goro gaꞌase nei goro sua teure jaola ne glealeꞌa, eghuteuna ghehati te gnafa na glealeꞌa ne uareghe tongana, iheire te au teu deleire tangomana te nomhi ghami ghehati na.

Hatimare mae Livaet igre ne salo unha teke hata mei naiknore ka Sugablahi na

⁴⁴ Ka narane igne, mare ne vahini kaisei tothoghei ka hatimare mae Livaet mala fiofiloni chogho stoa ka Sugablahi na. Jare te lilisei mare gano majaghani teke hata mei ka nagare nei fabothodi nodi gobigna lepore teuna. Glepo igre maladi hatimare mae pris nei hatimare mae Livaet, ka puhi igne mare tangomana te au ghedi gano nei glepo teuna, leghuni unha te chekeni ka nogna Vetula God na. Mae Livaet igre, mare jifla tei ka nagare te au faligoho ka namono na igre mala salo glepo igre, nei hata mei ka chogho te mala lilisei glepo ka Sugablahi na. Naiknodi Juda igre thofno kelitadi fara te eni igne, naugna mae pris nei mae Livaet teu igre mare loku fakeli fara.

⁴⁵ Mare eni gloku igne mala tangomana naikno nei glepo teu igre te gae ka tathagna God na, mare jaola edi keha nakhapru biꞌo teke chekedi God mala edi mare tekure. Eghuteuna mae Livaet gre te koje ka Sugablahi na baludi mae Livaet te reireghigna grengathagna ka Sugablahi na, mae igre jaola mala loku fakeli, leghuni nodi vetula King Devet ghe King Solomon tifa ra.

⁴⁶ Ka naranedi King Devet ghe mae Asaf tifa igre, mare neke au mae lida te mala koje te kilo fafnaknoni God nei mala cheke fakelini mana.

⁴⁷ Eghume, ka naranegna Serababel nei ka naranegu iara mae Nehemaea teku igre, naiknodi Israel igre neke hata neke mei gano leuleghu narane mala toghodi mae te koje ka Sugablahi na, nei maladi mae te reireghi grengathagna Sugablahi na. Eghuteuna naiknore jaola namha glepo te keli ranghidi mae Livaet. Eghuteuna mae Livaet jaola tufa vidogna unha teke hata mare na maladi mae pris teke karha mei ka vikegna Eron, leghuni unha te chekeni ka nogna Vetula God na.