Nehemaea 1 - Buka Blahi Ka Cheke Holo

¹ Thoutonu igne Nehemaea thugna mae Hakalaea teke rioriso na. Ka nhigra Kislev, ka favaradaki finogha te funei fruni King Atasekses Pesia igre, iara au ka namono biꞌo Susa.

Nehemaea ne nangani Jerusalem

² Mae Hanani kaisei mae thabusigu iara baludi keha naiknodi Juda mare mei ne posa ka namono igne. Iara neke ghusna ka mare eidi naiknodi Juda teke au faleghu teku ka narane teke mei mae naoka gre teke hata teke tei naiknore Babilonia ra. Eghuteuna iara jaola ne ghusna eigna namono Jerusalem.

³ Aonu mare ne cheke eghu ka iara, “Naikno karha teku teke figri ka nohi Juda ra, puhi biꞌo thoke ghami ghehati, eghuteuna ghehati thono mamaja nomi fara. Gringni thinagna namono biꞌo Jerusalem ia la diꞌahi, eghuteuna grengathagna ra gnhubrahi ka khaꞌaghi.”

Nogna tharai mae Nehemaea

⁴ Kate nomhini iara cheke igne, iara gnokro pari ne tanhi nogu. Ka phei ba thilo narane, iara ne theome ghamu ne diꞌanagnafa nei tanhi neu kolho. Eghuteuna iara ne tarai fabrahu ka God gna kligna,

⁵ ne cheke eghu, “Lord God gna kligna. Iagho haghe fara, eghuteuna ghehati mhaghu nomi fara te mei namo ka iagho na. Leuleghu fata na iagho tajini nou nhaꞌa cheke na, baludi iheire te namha nigho nei leghudi teu nou chekere.

⁶ Lord, filo mei ka iara eghuteuna fanomho mei ka nogu cheke iara nou mae gloku gne. Ka narane nei bongi teu igre iara tarai fabrahu ka iagho malami ghehati nou mae gloku iagho agne Israel. Ghehati naiknomi Israel gre theome gnafa te tapla jafra ranghi nigho iagho na. Iara nei vikegu iara teu igre, ghehati te gnafa na kafe tapla jafra ka nakhibo.

⁷ Ghehati theome gnafa te leghudi puhi te diꞌa fara ka tathamu iagho gre. Ghehati theome leghudi nou cheke, nei nou vetula teu teke tusu lao iagho ka nou mae gloku Moses tifa ra.

⁸ “Thosei ghatho ihodi cheke teke cheke eghu iagho ka mae Moses tifa ra, ‘Jame te figri tagru ghau iara ghotilo na, iara ginauna khi fajifla ghami ghotilo mala tei au tafri ghotilo ka keha kantri delei.

⁹ Nu jame teke figri mei ghotilo ka iara na, eghuteuna leghudi ghotilo nogu cheke iara gre teuna, iara ginauna nake hata fapulo ghami ghotilo. Neuba ghotilo ne tei au tafri delei fara ka nauthoglu igne, iara ginauna hata fajifla ghami ghotilo ka vido igne mala hata ghami ghotilo mala ke pulo mei ka vido aheva teke kulu vahini iara te mala tarai ghotilo ka iara na.’

¹⁰ “Naikno igre nou naikno gloku iagho nei nou naikno iagho. Iagho fakarhidi ka nou nolaghi biꞌo nei nou nanheta.

¹¹ Lord, fanomho ka nogu tharai iara gne nei ka nodi tharai nou naikno gloku iagho te magnahaghei ghatho tahuni nanghamu iagho gre. Togho ghau gognarogne, mala tangomana king te kokhoni ghau iara na, nei mala eni mana unha te toreni iara na eghu.” Ka narane tuare, iara kaisei nogna mae biꞌo king mae ihei te rouronu ghau iara fara, eghuteuna iara thegu kolho te tangomana te reireghidi ghegna waen mana re.