Naba 6 - Buka Blahi Ka Cheke Holo

Nodi vetula naiknodi Nasaraet

¹ Lord ne cheke eghu ka mae Moses,

² “Cheke ka naiknodi Israel are, ne magnahaghei mei fablahidi nei mei nhaꞌa cheke ka iara mala kaisei baludi ka tothoghei Nasaraet neu nga ghotilo nu,

³ uve, ghotilo thosei koꞌu waen ba koꞌu keha khoꞌu te mala dranga are. Eghuteuna thosei koꞌu keha khoꞌu te edi mare ka grep, nei jaola thosei ghamu sisi grep te muita ba te mojadi are.

⁴ Ihei nga ne kaisei baludi ka tothoghei Nasaraet gre nu, ghotilo thosei ke ima kaisei glepo te edi mare ka gaju grep are, neubane khatugna nei guligna teu gaju tuana.

⁵ “Eghuteuna kate kaisei ghotilo baludi tothoghei Nasaraet gre na, ghotilo thosei kuchi nei thosei ghoighori khakla mire eghu. Uve, ghotilo thosei kuchi ghilei salaꞌu narane teke nhaꞌa cheke themi ka iara na, lisa lao mala brahu khakla ka phaꞌumi are.

⁶ “Eghuteuna leghu fata na thosei tei namo ka naikno te lehe re.

⁷ Neubane lehe kmami, idomi, thabusimi, ba greghami teure, ghotilo thosei tei rhedi thinidi naikno te lehe tuare neke fathonani thegna ke ulugu iara, naugna khakla ghotilo te brahu tuare fagaglanagna teke nhaꞌa cheke themi ka iara na.

⁸ Eghume te kaisei tothoghei Nasaraet ghotilo na, ghotilo nogu naikno gloku blahi iara Lord.

⁹ “Jame kaisei mae lehe ka dei hoholo rhegna kaisei mae ka tothoghei Nasaraet na, puhi igne ginauna fadiꞌani khaklagna mae gna Nasaraet na. Eghume mana na ofo nabagna fitu narane, ke leghu ame ke kuchi nga mana khaklagna re eghu mala klino ka tathagu iara na.

¹⁰ Ka fa nhana narane na, mana ginauna atha mei phei balhu nei phei khoio ka mae pris ka grengatha gna Suga Thapuale te blahi igne.

¹¹ Aonu mae pris ginauna atha kaisei balhu mala fafara mala ke klino mae tuana ka tathagu iara na, eghuteuna ke atha keha na mala fafara gahu te knoro ia eghu. Mae pris ginauna edi glepo tugre mala ke klino mae Nasaraet gne ka tathagu iara na, naugna diꞌa fara te tei mare rhedi naikno te lehe re. Aonu ka narane tuana la, mana ginau ke fabrahu khaklagna re mala ke klino mana ka tathagu iara na.

¹² Mana ginauna ke nhaꞌa cheke ranghini thegna ka iara jateula teke eni mana ululahu ia eghu. Nu nogna fablahi mana igne ginau ke fufunui naugna glehe gne ne fadiꞌani mana. Eghuteuna mana nake atha mei kaisei sua sipu te kaisei finogha gna mala ke fafara mei ka iara.

¹³ “Uve, igne vetula te mala leghuni mae Nasaraet gne kate gnafa gna nogna narane teke nhaꞌa cheke na, mare ginauna tathalei meini mana ka grengatha gna Suga Thapuale te blahi igne.

¹⁴ Jare mana ginauna mei fafara kaisei sipu nalhaꞌu gna te kaisei finogha te theome au thubu ka guligna na. Sipu igne mala fafara nei gahu eghu. Eghuteuna jaola ke fafara kaisei sipu gaꞌase gna te kaisei finogha te theome au thubu ka guligna na. Sipu igne fafara mala fa glaglanagna te doglo mana ka tathagu iara na. Eghuteuna jaola ke fafara kaisei sipu nalhaꞌu gna te theome au thubu ka guligna na. Sipu igne fafara mala fa glaglanagna te au fakeli mana balugu iara na.

¹⁵ Mana jaola mala fafara mei kaisei kharaꞌo balu thilo nafnata bret te theo isi. Ululahu bret na te edi koba ghotilo leghu fata are. Fapea bret na te ngingo ghotilo balu oliv oel ame beka nga teu are. Eghuteuna fatilo bret na te kuki muita ame ke ghiha oel nga ghotilo teu ia. Eghuteuna mana jaola mala fafara mei keha wit nei waen te famanedi are.

¹⁶ “Mae pris na ginauna fafara mei gobi lepo tuare ka iara. Mana ginauna eni fafara tuana nei fafara te gahu te knoro ka khaꞌaghi ia eghu mala ke doglo mae tuana ka tathagu iara na.

¹⁷ Mana ginauna atha mei kharaꞌo bret na, eghuteuna fafara kaisei sua sipu nalhaꞌu baludi keha wit nei waen teu are ke ulugna Lord. Sipu igne fafara mala fa glaglanagna te au fakeli mana balugu iara na.

¹⁸ “Eghuteuna ne tei nga mae Nasaraet gne ka grengathagna Suga Thapuale te blahi igne nu, mana ginauna kuchi ghu khakla ka phaꞌugna na eghu, eghuteuna gnhuri ka khaꞌaghi ke parigna sipu nalhaꞌugna te fafara teu mana na mala faglaglana gna te au fakeli mana balugu iara na.

¹⁹ “Eghuteuna mare ginauna ke kuki keha vido gna sipu nalhaꞌu gna na balu khoꞌu. Kate kuki te gnafa na, mae pris ginauna atha fajifla fafra gna na, eghuteuna tufa lao ka mae Nasaraet igne balugna kaisei bret te theo isi gna na, nei kaisei bisket eghu.

²⁰ Ke leghugna tuana, mae pris ginauna atha glepo tuare, eghuteuna fafara mei ka iara Lord. Gobigna lepo nogna mae pris tuare ginauna kafe blahi gnafa, baludi gahegna nei gagarogna teku sipu nalhaꞌu teke fafara mare na. Eghuteuna kate edi te gnafa mare gobigna lepo tuare, ame tangomana nga mae Nasaraet igne te koꞌu waen na eghu.

²¹ “Igne nodi vetula maladi iheire naikno te magnahaghei kaisei mae Nasaraet re. Nu jame mae ihei teke nhaꞌa cheke mala fafara keha glepoi kate blahi teu hila thegna na, mana mala edi ngala jateula teke nhaꞌa cheke mala edi teku thegna re.”

Nogna cheke mae pris kate fablahidi naikno re

²² Lord ne cheke eghu ka mae Moses,

²³ “Iagho ginauna cheke ka mae pris Eron nei thugna teu mana re, kate fablahidi mare naiknodi Israel re, mare ginauna cheke eghu:

²⁴ “ ‘Lord ginauna fablahi ghami nei reireghi fakeli ghami!

²⁵ Lord ginauna gleꞌa fara ka ghotilo nei kokhoni ghami ghotilo!

²⁶ Lord ginauna au balumi ghotilo mala au ghotilo ka nakarha te keli!’

²⁷ “Eghume te chekeni mare nanghagu iara mala fablahidi naiknodi Israel gre teuna, iara ginauna fablahidi naikno tuare.”