Naba 5 - Buka Blahi Ka Cheke Holo

Naikno te theome doglo ka tathagnaLord

¹ Lord ne cheke eghu ka mae Moses,

² “Cheke ka naiknodi Israel mala kuru fajifladi iheire naikno te au khabru ka guli, ba khabru te jifla glotho, ba iheire te habo lao ka thinidi naikno te lehe ka namono igne.

³ Neubane nalhaꞌu ba gaꞌase, ghotilo na fajifla naikno te theome keli ka tathagu iara tuare, naugna iara au balumi ghotilo. Ghotilo eni unha te chekeni iara gne na eghunu fadiꞌa mare namono igne.”

⁴ Aonu naiknodi Israel gre ne edi unha teke cheke Lord re, ne kuru fajifla naikno te diꞌare ka namono na.

Puhi mala ke tufa fapulo glepo teke blau re

⁵ Lord ne cheke eghu ka mae Moses,

⁶ “Cheke ka naiknodi Israel are, ne eni fadiꞌa nga mae nalhaꞌu ba gaꞌase gre kaisei glepo ranghini keha naikno na nu, mana eni nakhibo biꞌo fara ke ulugu iara.

⁷ Eghuteuna ne au nakhibo nga mana nu, mana ke cheke fajifla nakhibognare nei ke poloru eghu: Nu jame blau kaisei gobi glepo ka kaisei mae, mana ke foli fapulo kaisei gobi, eghuteuna ke leghugna igne mana ke nhaꞌa lao varadaki glepo ka kaisei gobi teke blau mana re.

⁸ Te lehe mae teke khotogna glepo igne, nu theo kaisei ka mae thabusigna, nei kmagna teu te mala folidi poloru igre, poloru tuare mala famei ka iara Lord mala nodi mae pris. Eghuteuna mae ihei nga ne au nakhibo nu, mana jaola falao kaisei sipu nalhaꞌu gna ka mae pris mala fafara mala atha koko nakhibogna mana re.

⁹ “Eghume nodi glepo naiknodi Israel mala fafara te atha te mei ka mae pris igre, tuare nodi mae pris.

¹⁰ Mae pris kolho te au nodi nolaghi te mala lokudi glepo blahi te atha te mei naiknore.”

Unha nate eni kate goghotu mae nalhaꞌu na ka khetogna na

¹¹ Lord ne cheke eghu ka mae Moses,

¹² “Cheke ka naiknodi Israel, jame gaꞌase na tei kokoni khetogna na, eghuteuna tei eni unha puhi te diꞌa na,

¹³ eghuteuna tei naꞌa me thuru fodu balugna kaisei mae, nu theome laseni khetogna na, eghuteuna theo kaisei naikno filoni te ei puhi gaꞌase igne.

¹⁴ Eghuteuna jame mana goghotuni khetogna na, ba jame gaꞌase gne theome ke ei puhi ngala nu jame mana theome filoni unha te eni naꞌa, nu mana fiti goghotuni kolho khetogna na eghu. Puhi igne tangomana te eghu ka puhi tolaghi na.

¹⁵ Ne thoke mei nga nafnata puhi tugre nu, mana ginauna tathaleini tei khetogna na ka mae pris mala fadoglini puhi tuana eghu. Eghuteuna atha kaisei kilo flaoa te eni mare ka bali re mala fafara mei ka iara jateula te chekedi ka vetula ra eghu. Nu thosei tofa lao oliv oel ka flaoa te mala eni bret na, eghuteuna thosei lisei lao insens tagna. Naugna flaoa tuana mala fafara eigna te goghotu mana na, nei mala hironi te tutuani ba theome tuani ghu eigna puhi tuana.

¹⁶ “Mae pris na ginauna tathaleini gaꞌase na tei fakegra rhegna olta ke ulugna Lord.

¹⁷ Eghuteuna tofa lao keha khoꞌu blahi ka dis teke horo mare ka glose na, ne haglu ne atha kakatha gaughavu glose te au ka Suga Thapuale te blahi na mala tofa lao ka khoꞌu na.

¹⁸ Ke leghugna tuana, mae pris ginauna atha koko pini ka khakla gna gaꞌase na, aonu fa loku lao flaoa mala fafara na ka khamegna gaꞌase na, naugna mae nalhaꞌu gne ne goghotu fara ne magnahaghei filoni tutuani gna na. Aonu mae pris ginauna louloku khoꞌu te tangomana goigoni nakarhadi iheire naikno te theome doglo puhidire.

¹⁹ Aonu mae pris ginauna nhaꞌa cheke ka naꞌa ne cheke eghu, ‘Ne tutuani nga teke theome tei ei puhi iagho balugna keha nalhaꞌu na nu, khoꞌu blahi igne ginauna theome tangomana te fadiꞌa nigho iagho na.

²⁰ Eghuteuna ne tuani nga teke tei iagho balugna keha mae na, ne ei puhi ghopa nu,

^21-22 uve, Lord ginauna para nigho iagho, eghuteuna naiknore ginauna cheke fadiꞌani nanghamu iagho na. Lord ginauna tibri nigho iagho, eghuteuna iagho ginauna theo sua kate koꞌuni khoꞌu blahi igne te tei lamna ka thiꞌamu iagho na.’ “Aonu gaꞌase na ne cheke eghu, ‘Uve, keliu ngala.’

²³ “Mae pris na ginau riso soru facheke tuana, eghuteuna ke ghiha koko grioriso tuana ka khoꞌu blahi te tangomana goigoni nakarhadi naikno te theome keli re.

^24-26 Nu ame koꞌu nga naꞌa khoꞌu blahi na teuna, mae pris ginau atha fajifla flaoa mala fafara na ka khamegna gaꞌase na, eghuteuna tusu haghe kligna ka iara mala fa gaglanagna te nogu iara na. Mana ginau ke atha keha flaoa mala gahu ke kligna olta. Ke leghudi tuare, mana ginau ke atha khoꞌu blahi te tangomana goigoni nakarhadi iheire naikno te theome kelire, me fa koꞌuni gaꞌase na ka khoꞌu blahi igne eghu.

²⁷ Eghuteuna ne tuani nga teke tei ei puhi naꞌa balugna kaisei mae ngau na, naꞌa ginauna goigonini thegna, uve, khoꞌu blahi te koꞌu naꞌa tuana ginauna paparani, au khabru, eghuteuna naꞌa ginauna theome tangomana te au thugna na. Eghuteuna naiknore ginauna cheke fadiꞌani nanghagna gaꞌase igne.

²⁸ Nu te laseni naꞌa teke theome tei ei puhi na te doglo kolho na, khoꞌu blahi igne ginauna theome tangomana te fadiꞌani naꞌa na, eghuteuna naꞌa tangomana te au thugna na.

^29-30 “Igne vetula mala edi kate goghotu mae nalhaꞌu na ne ei puhi gaꞌase na teuna, ba kate fiti goghotuni mana khetogna na. Ka vido tuana mae khetogna ginauna athani gaꞌase igne mala mei fakegra ke ulugu iara Lord, eghuteuna mae pris edi gobi lepo te chekedi ka vetula na are eghu.

³¹ Mae ihei te fiti goghotu kate theome tutuani na, mana theome tangomana te papara na. Nu te edi tutuani gaꞌase gne puhi tuare, iara Lord ginauna parani naꞌa.”