Naba 32 - Buka Blahi Ka Cheke Holo

Vikegna Israel te au ka geri Khoꞌu biꞌo Jordan ke maghati

¹ Vikegna mae Ruben, nei vikegna mae Gad teure au nodi kmana buluka, sipu, nanigot, nei dongki neu. Mare ne filoni nohi Gilead te keli fara na nei keha vido te au faligohoni namono Jasea teure ne keli fara la te mala faghamudi buluka, sipu, nei nanigot teure.

² Aonu mare ne tei filodi mae Moses ghe mae pris Eleasa nei keha mae lida teure ne cheke eghu ka mare,

^3-4 “Ka namono biꞌo Astarot, Dibon, Jasea, Nemra, Hesbon, Eleale, Sebam, Nebo, nei Beon teke uludi Lord malada tahati tekura, thofno keli fara maladi glepo te tautagu igre, eghuteuna iagho jaola laseni te au nomi kmana buluka, sipu, nei nanigot teu ghehati gre.

⁵ Eghume te gleꞌa iagho ka ghehati na, ghehati tore nigho iagho mala tusu mei vido igne mala au ghehati tagna. Eghuteuna thosei lisa ghami ghehati mala kasa ka khoꞌu Jordan gne.”

⁶ Aonu mae Moses ne cheke eghu, “Ba, ghotilo magnahaghei au ka vido igne, mala nu tei kolho kherami ghotilore ka magra kate au teu ghotilo agne na?

⁷ Jame te eghu na, ghotilo ginauna faglaꞌe gaoghathodi mare re, mala tei salaꞌuni vido glose teke tufa Lord ka mare na.

⁸ Puhi igne ngala teke eni la kmami ghotilo tifara, kate kuru ghau iara funu namono Kades Banea mala filoni vido glose Kenan gne.

⁹ Ke leghugna teke haghe thoke ka gloha Eskol, mare ne tei filo tonganadi namono tuare. Nu kate pulo dire, mare ne faglaꞌe gaoghathodi mare mala tei ka vido glose Kenan teke tufa Lord ka mare na.

¹⁰ Ka narane tuana, Lord ne diꞌatagna fara, ne cheke eghu ka ghehati,

¹¹ ‘Naugna te theome ghatho tahu ghau iara ghotilo gne, mae iheire te funu ka varadaki finogha te haghe ba iheire teke jifla Ijep tekura ginauna theome tangomana tei thoke ka vido teke nhaꞌa cheke iara ka mae Ebraham, Aesak nei mae Jekob tifara!

¹² Nu mae Kaleb thugna mae Jefune, ka tharaknagna mae Kenas nei mae Josua thugna mae Nun eghu kolho te tangomana tei jugru ka vido tuana. Naugna phiamare ne ghatho tahu ghau iara.’

¹³ Lord ne diꞌatagna fara ka naiknodi Israel ne fanolo tafridi mare ka namono nagou na nabagna phiatutu finogha ghilei lehe thudi, nei gradi teu mae iheire teke edi puhi te diꞌa tifara.

¹⁴ “Nu ghotilo gne, jateula te magnahaghei edi ngala puhi te diꞌa teke edi mae kmami ghotilo tifara. Eghuteuna ghotilo gne magnahaghei te mala diꞌatagna fara Lord ka tahati!

¹⁵ Jame te figri tagruni ghotilo mana gognarona, mana ginauna jifla koko ghita tahati ka namono nagou gne, eghuteuna kmana hoholo ginauna thoke ghami ghotilo fabrahu.”

¹⁶ Aonu mare mei ne cheke eghu ka mae Moses, “Ghehati magnahaghei te horo bara agne maladi nomi glepo te tautagu igre nei namono biꞌo maladi naikno biꞌo nei goro sua teu igre.

¹⁷ Eghuteuna ke leghu na, ghehati ginauna atha nomi glepo mala magra re mala kulu tei ke ulumi ghotilo ka magra ghilei au ghotilo ka nodi namono na. Ghehati ginauna tei balumi ghotilo ghilei thokeni te au fakeli ghotilo ka vido tuana.

¹⁸ Ghehati theome tangomana teke pulo agne na, ghilei uludi naikno te gnafa Israel gre ka nodi vido thedire na.

¹⁹ Eghuteuna ghehati theome tangomana te uluni vido ka keha phile khoꞌu Jordan, naugna nomi vido ghehati na au ka file mosu.”

²⁰ Aonu mae Moses ne cheke eghu ka mare, “Jame te cheke tutuani ghotilo na, ghotilo ginauna mei balumi ghehati, eghuteuna jame te kaikaliti ghotilo nomi glepo mala magra re, ghotilo ginau tei ke ulugna nogna Bokis Blahi Lord na.

²¹ Eghuteuna jame kasa te tei nomi mae soldia ghotilo gre ka keha philegna khoꞌu Jordan, eghuteuna tei ke ulugna Lord, ghilei brue fajifladi Lord mae naokare ka vido tuana.

²² Eghuteuna kate khotogna ghehati vido tuana, ghotilo tangomana teke pulo mei ka namono igne, naugna ka narane tuana ghotilo ginauna fagnafahi gobigna lepo teke nhaꞌa chekedi ghotilo ka Lord nei ka keha vike te gnafa Israel ra. Aonu Lord ginauna tusu ari vido glose igne ka ghotilo.

²³ “Nu jame te theome edi ghotilo na, ghotilo jateula te eni puhi te diꞌa ranghini Lord eghu. Eghuteuna ghotilo jaola thofno laseni eigna Lord te ginau para ghami ka puhi te diꞌa te edi ghotilo re.

²⁴ Ghotilo tangomana te tei edi haghe gringni thina ka nomi namono na, nei nodi bara nomi glepo te tautagu ghotilo re eghu, nu ghotilo ginauna edi kolho gobigna lepo teke nhaꞌa cheke mala edi teku ghotilo re.”

²⁵ Aonu vikegna mae Gad nei mae Ruben teure ne cheke eghu ka mana, “Ghema, ghehati ginauna edi ngala jateula te chekedi Lord re.

²⁶ Eghuteuna khetomi, thumi nei nomi glepo te tautagu teu ghehatire, ginauna au kolho ka nohi Gilead.

²⁷ Nu ghehati gne la kaikaliti mala tei magra hila. Ghehati ginauna tei kasa ka khoꞌu Jordan mala magra ke ulugna Lord jateula te chekeni iagho ia eghu.”

²⁸ Aonu Moses ne cheke eghu ka mae pris Eleasa, nei mae Josua nei ka mae funeidi vike te gnafa Israel,

²⁹ “Mae iheire ka vikegna Gad nei vikegna mae Ruben teure la kaikaliti mala magra nei kulu tei ke ulugna Lord. Jame te kasa mare ka khoꞌu Jordan balumi ghotilo na, uve, ghotilo ginauna uludi naiknodi Kenan. Eghuteuna ghotilo ginauna tusu lao vido glose Gilead gne mala khotogna mare.

³⁰ Nu jame te theome tei mare balumi ghotilo na, mare ginau tangomana au keha vido ka vido biꞌo Kenan gne balumi ghotilo.”

³¹ Aonu mae ka vikegna Gad nei vikegna Ruben teure ne cheke eghu, “Mae biꞌo, ghehati ginauna edi ngala jateula te chekedi Lord re.

³² Ghehati ginauna tangomana atha gobigna lepo mala magra gre eghuteuna kulu tei ke ulugna nogna bokis blahi Lord ghilei jugru ghehati Kenan, mala nu uluni ghehati vido glose ke maghati khoꞌu Jordan.”

³³ Aonu Moses ne tufa lao ka vikegna mae Gad nei vikegna mae Ruben, nei keha mae ka vikegna Manase teure u namono biꞌo teke funei fruni mae king Sihon gna Amoa nei namono biꞌo te funei fruni mae king Og gna Basan.

³⁴ Aonu vikegna mae Gad re neke eni fakeli gringni thina biꞌo te bara ligohodi namono Dibon, Atarot, Aroa,

³⁵ Atrot-Sofan, Jasea, Jogbeha,

³⁶ Bet-Nimra, nei namono Bet-Haran. Mare jaola ne edi bara maladi glepo te tautagu re.

³⁷ Eghuteuna vikegna Ruben re jaola ne eni fakeli gringni thina biꞌo te bara ligohodi namono Hesbon, Eleale, Kiriataem,

³⁸ Nebo, Baal-Meon, nei namono Sibma. Kate edi te gnafa mare namono igre, mare neke tughu nanghadi namono re.

³⁹ Aonu vikegna mae Makia, thugna mae Manase re ne tei thoke ka nohi Gilead, ne brue fajifla naiknodi Amoa teke au ka vido tuana.

⁴⁰ Aonu mae Moses ne tusu lao rijon Gilead gne ka vikegna mae Makia mala fabrahu mare tagna.

⁴¹ Kaisei mae, nanghagna na Jaea mae ka vikegna Manase, mana tei ne magra ka keha namono re, mana ne uludi mare, aonu mana ne kilodi namono tuare “Havot-Jaea.”

⁴² Eghuteuna kaisei mae, nanghagna na mae Noba, mana tei ne magra ka namono Kenat nei ka keha namono ikodi te au faligohoni namono na. Mana ne uludi mare, aonu mana ne kilodi namono tuare “Noba.”