Naba 30 - Buka Blahi Ka Cheke Holo

Puhi mala eni nhaꞌa cheke kaLord

¹ Aonu mae Moses ne cheke eghu ka mae lida te gnafa ka vikegna Israel, “Igne unha te chekeni Lord na:

² Jame kaisei mae eni kaisei nhaꞌa cheke mala tufa keha glepo ka Lord, ba mala edi keha glepo teuna, mana thosei ke thodo. Mana mala edi ngala unha teke nhaꞌa cheke mala edi teku mana re.

³ “Uve, jame kaisei gaꞌase majaghani au balugna kmagna ka suga na, nu naꞌa neke nhaꞌa cheke ka Lord.

⁴ Eghuteuna kmagna naꞌa na nomhini u nhaꞌa cheke igne, nu theome fapholai ka naꞌa, gaꞌase igne ginauna edi ngala gobi lepo teke nhaꞌa cheke mala edi teku naꞌa re.

⁵ Nu jame kmagna gaꞌase igne nomhini u nhaꞌa cheke igne, eghuteuna mana lhotini naꞌa te mala edi keha glepo teke nhaꞌa cheke mala edi teku naꞌa re, gaꞌase igne ginau theome tangomana te tathajini nhaꞌa cheke igne. Eghuteuna Lord ginauna hata fadelei nakhibogna naꞌa na, naugna kmagna na neke lhotini naꞌa.

^6-7 “Jame kaisei gaꞌase majaghani tolaghi ke leghugna te nhaꞌa cheke ka Lord na. Eghuteuna jame te nomhini mae nalhaꞌu gne eigna nhaꞌa cheke igne, nu theome fapholai ka naꞌa, neubane ghathoni ba theome ghathoni neu naꞌa u nhaꞌa cheke igne na, naꞌa ginauna ediu ngala gobi lepo teke nhaꞌa cheke mala edi teku naꞌa re.

⁸ Nu jame mae nalhaꞌu gne nomhini u nhaꞌa cheke igne, eghuteuna lhotini mana gaꞌase gne mala theome loku teuna, gaꞌase igne theome tangomana tathajini u nhaꞌa cheke igne. Eghuteuna Lord ginauna hata fadelei nakhibogna naꞌa re.

⁹ “Jame kaisei naikno biꞌo glehe kokoi, ba kaisei gaꞌase koko khetogna na, nu nhaꞌa cheke ka Lord teuna, naꞌa mala ediu ngala gobi lepo teke nhaꞌa cheke mala edi teku re.

¹⁰ “Jame kaisei gaꞌase tholaghi, gaꞌase igne nhaꞌa cheke ka Lord.

¹¹ Eghuteuna mae nalhaꞌu na nomhini nhaꞌa cheke igne, nu theome fapholai ka naꞌa, gaꞌase igne ginauna ediu ngala gobi gna lepo teke nhaꞌa cheke mala edi teku naꞌa re.

¹² Nu jame mae nalhaꞌu gne nomhini u nhaꞌa cheke igne, eghuteuna lhotini khetogna na te mala edi gloku re teuna, gaꞌase igne theome tangomana te tathajini u nhaꞌa cheke igne. Eghuteuna Lord ginauna hata fadelei nakhibogna naꞌa re, naugna nalhaꞌu na ne lhotini naꞌa.

¹³ Neubane edi ngau gaꞌase gne keha nafnata nhaꞌa cheke re, nalhaꞌu gne au nolaghi te lisani te mala edi naꞌa nogna nhaꞌa cheke re, ba theo teuna.

¹⁴ Jame kaisei mae nomhini nhaꞌa cheke teke eni khetogna mana gne, eghuteuna theome fapholai ka naꞌa ka narane tuana teuna, gaꞌase igne ginauna ediu ngala gobigna lepo teke nhaꞌa cheke mala edi teku naꞌa re, naugna mae nalhaꞌu gne ne kaisei gaoghatho balugna naꞌa.

¹⁵ Nu ka keha narane na, jame mae nalhaꞌu gne lhotini khetogna na mala theome tathajini naꞌa u nhaꞌa cheke tuana teu na, mana nabagna kolho te faparani na naugna mana ne fadiꞌani khetogna na mala theome leghudi naꞌa u nhaꞌa cheke re.”

¹⁶ Eghume igre ngala u vetula teke chekedi Lord ka mae Moses eidi u nhaꞌa cheke re. Eghuteuna vetula igre thofno nabadi fara iheire goro gaꞌase majaghani te theome tolaghi te au teu kolho baludi kmadira eghu, eghuteuna vetula igre jaola nabadila keha goro gaꞌase te kulu tolaghire.