Naba 27 - Buka Blahi Ka Cheke Holo

Thugna gaꞌase mae Selofehad

^1-2 Glima gaꞌase igre neke mei mala filodi mae Moses ghe mae pris Eron nei mae lida, eghuteuna naiknodi Israel te au ka grengatha gna Suga Thapuale te blahi na. Nanghadire igre, Mala, Noa, Hogla, Milka nei Tiasa. Goro gaꞌase igre neke thugna gaꞌase mae Selofehad mae ihei ka tharakna gna mae Hefa ka tharakna gna mae Gilead ka vikegna mae Makia, thugna mae Manase teke thugna mae Josep.

³ Aonu reꞌe mei ne cheke eghu ka mae biꞌore, “Kmami ghehati na la lehe ka vido te moja na. Mana theome ke leghudi ngala iheire naikno te phile ka mae Kora te mala fadiꞌani Lord na. Mana lehe kolho ka nakhibogna thegna, nei mana theo kaisei thugna nalhaꞌu.

⁴ Ba, te theo thugna kaisei nalhaꞌu mana na, nanghagna mana na ginauna theohi ka tharaknada tahati re sia? Eghume kate tufa vido glose ghotilo ka thabukna ka tharaknami ghehati na, ghotilo jaola tufa mei keha nomi vido ghehati, nu ghehati magnahagheini nanghagna kmami na te karha teuna.”

⁵ Aonu mae Moses tei ne facheke nodi gaoghatho reꞌe re ka Lord.

⁶ Uve, Lord ne cheke eghu ka mana,

⁷ “Unha glepo te toreni reꞌe tuana, doglou kolho. Kate tufa vido glose ghotilo ka kheragna kmadi reꞌe na, ghotilo jaola tufa keha nodi vido maladi reꞌe. Vido teke nogna kmadi reꞌe na, mala ke tufa lao ka reꞌe.

^8-11 “Cheke ka naiknodi Israel mala leghudi fabrahu nogu vetula iara igre: Jame lehe kaisei mae, nu mana theo thugna nalhaꞌu eghu, vido mana tuana nake tufa lao ka thugna gaꞌase mana re. Eghuteuna ne theo thugna gaꞌase nga mana nu, vido mana tuana nake tufa lao ka mae thabusigna thegna re. Eghuteuna ne theo thabusigna nga mana nu, vido mana tuana nake tufa lao ka thabusigna mae kmagna re. Nu te theome au thabusigna kolho mae kmagna na, uve, nogna vido mana tuana nake tufa lao ka mae kheragna te namhani fara mana na. Eghume kheragna fofodu mana igne te ginau ke khotogna vido tuana jateula nogna thegna ra eghu.”

Lordne vahini mae Josua mala tughuni Moses

¹² Lord ne cheke eghu ka mae Moses, “Iagho na tei ka thogele Abarim, eghuteuna filo tei iagho ka namono te gnafa ka vido te ginau tufa ari iara ka ghotilo are.

¹³ Kate gnafa filo iagho ka namono tuare, iagho ginauna lehe jateula mae thabusimu mae pris Eron teke lehe tifa ia eghu.

¹⁴ Iagho ginauna jaola lehe, naugna tifa na, kani au teku ghotilo ka vido te moja ka glokha khoꞌu jare Meriba ia, naiknore neke cheke fadiꞌa ghau iara, eghuteuna ghopa jaola neke theome leghu ghau iara nei theome fakakhana ka naiknore te blahi iara na.” (Glokha khoꞌu Meriba gne neke au ka vido te moja jare Sini, rhegna namono Kades.)

¹⁵ Aonu mae Moses ne tarai,

¹⁶ “Lord, iagho ngala God te funei frunidi iheire naikno te karha igre, eghume iagho vahini kaisei mae mala ke batudi naiknodi Israel gre.

¹⁷ Mala nu kulu ulu mana me batu fajifladi ba ke pulo mei eghu, jateula mae ihei te batudi mare ka magra ra eghu. Na eghunu fiti au tafri nou naikno iagho gre jateula sipu te theo ihei nga reireghidira eghu.”

^18-19 Aonu Lord ne cheke eghu ka mana, “Mae Josua, thugna mae Nun, nolaghi gna nogu Tharunga te Blahi iara na te au balugna mana na. Iagho ginauna tathalei teini mana ka tathadi naiknore nei ka mae pris Eleasa, eghuteuna habo lao khamemu na ka phaꞌu mana na mala taraini. Eghuteuna iagho ginauna cheke ka tathadi naiknore eigna mana teke tughu nigho iagho na.

²⁰ Iagho ginauna tufa lao nou nolaghi re ka mana, mala nu leghuni nei ghatho tahuni eghu naiknore eghu.

²¹ Eghuteuna mana mala lelheghu kolho ka mae pris Eleasa mala tangomana mana te lasedi gaoghathogu iara re. Mae pris igne ginauna eni ka nafnata thina te kiloni Urim nei Thumim mala lalahu khale ke ulugu iara Lord, mala lasedi gobigna lepo te magnahaghedi iara re. Eghume ka puhi igne, iara ginauna batuni mana baludi naiknodi Israel gre ka gobigna lepo te edi mare re.”

²² Mae Moses ne eni jateula teke chekedi Lord ka mana re. Mana ne tathaleini mae Josua mala mei fakegra ka tathagna mae pris Eleasa baludi naiknore,

²³ aonu mana habo lao khamegna na ka phaꞌugna mana ne taraini, nei cheke fajifla eigna mae Josua ginau teke batudi naikno gna Israel na. Tuana unha glepo teke chekeni Lord mala eni mana teku na.