Naba 23 - Buka Blahi Ka Cheke Holo

Nogna cheke ululahu mae Balam

¹ Mae Balam ne cheke eghu, “Iara magnahaghei te edi iagho fitu olta ka vido igne, eghuteuna iagho ginauna atha mei fitu buluka nalhaꞌudi nei fitu sipu nalhaꞌudi ka iara.”

² Aonu mae Balak ne edi unha te chekedi mae Balam re, eghuteuna phiamare ne fafara buluka nei sipu teure ka fitu olta re.

³ Aonu mae Balam ne cheke eghu ka mana, “Kate tei iara kosi na, iagho na au agne rhedi nou fafara igre, jau na Lord ginauna mei mala thafo ghau iara. Unha glepo te chekedi mana re, iara nake mei cheke ka iagho.” Aonu mae Balam ne tei thegna ke holo ka vido te theo gaju nei buburu teu tagna na.

⁴ God mei ne thafoni mana, aonu mae Balam ne cheke eghu, “Iara neke edi fitu olta, eghuteuna kaisei olta teuna, iara fafara buluka nei sipu eghu.”

⁵ Aonu Lord ne tufa lao kaisei nonomho ka phepeogna mae Balam ne cheke eghu, “Iagho ke pulo ka mae Balak eghuteuna toutonu lao ka mana nonomho igne eghu.”

⁶ Aonu mae Balam neke pulo ne filoni mae Balak te kegra teu rhedi nogna fafara re, baludi tothoghei mae lidadi Moab.

⁷ Aonu mae Balam ne cheke fajiflani u nonomho igne, “Mae funei Balak na neke atha fajifla ghau iara funu Siria mala mei agne neku. Mana cheke ka iara mala tibridi iara tharakna gna mae Jekob na. Mae funei gna Moab na neke atha fajifla ghau iara funu ka thogele ke maghati. Mana cheke ka iara mala cheke fadiꞌadi naiknodi Israel re.

⁸ Faꞌunha eghu tangomana tibridi iara mare te theome tibridi God naikno igre? Eghuteuna faꞌunha eghu tangomana cheke fadiꞌadi iara mare te theome cheke fadiꞌadi Lord naikno igre?

⁹ Kate kegra iara ka thogele goro na, iara tangomana filodi mare. Uve, iara filo fakelidi mare kate kegra iara ka thogele na. Mare au kolho thedi. Mare laseni eigna te naikno blahi thedi ke tulaodi keha naiknore.

¹⁰ Naiknodi Israel gre thono kmana fara, theo kaisei tangomana te kahadire. Tutuani, vikegna mae Jekob na jateula gaughavu glose, theo kaisei tangomana te kahadire eghu. Kate thokeni iara narane leghu lahu na, keli fara jame nakarhagu iara na te jateula nakarhadi naikno te doglo ka tathagna God teuna. Uve, lisa ghau mala lehe ka pharikeli jateula naikno te doglo ra eghu.”

¹¹ Aonu mae Balak ne cheke eghu ka mae Balam, “Ghema, unha site eni iagho ka iara gnea?! Iara tali mei nigho iagho agne mala tibridi iagho nogu mae naoka igre sia, nu unha te eni iagho na, iagho ke fablahidi kolho mare!”

¹² Mae Balam ne cheke eghu, “Iara chekedi kolho unha te cheke meidi Lord ka iara re.”

Nogna fapea cheke mae Balam

¹³ Aonu mae Balak neke cheke eghu ka mae Balam, “Tapa nake age ka kaisei vido, jare iagho na tangomana te filodi keha naiknodi Israel re. Ka vido tuana iagho na togho ghau iara mala tibridi iagho naikno tuare.”

¹⁴ Aonu mana tathaleini mae Balam ne tei ka vido te snagla jare ka vido Sofim ka thogele Pisga. Eghuteuna jare ka thogele na, mana neke edi fitu olta ne fafara kaisei buluka nei sipu neu ka fitu olta te gnafa igre.

¹⁵ Mae Balam ne cheke eghu ka mae Balak, “Khegra agne rhedi nou fafara igre, iara ginauna tei mala thafoni Lord agno.”

¹⁶ Aonu Lord mei ne thafoni mae Balam, ne toutonu ka mana unha te mala tonudi mana re, eghuteuna ke kuru fapuloni mana ka mae Balak mala tonu ka mana nogna thonu re.

¹⁷ Aonu mae Balam neke pulo ne filoni mae Balak te kegra teu rhedi nogna fafara re baludi tothoghei mae lidadi Moab re. Mae Balak ne ghusna ka mana unha te chekedi Lord re,

¹⁸ aonu mae Balam ne cheke eghu ka mana, “Uve, ghema Balak, thugna mae Sipoa, fanomho fakeli iagho ka nogu cheke iara gne:

¹⁹ God na theome jateula naikno te lase chaghi ra eghu. Mana theome jateula tahati te lase tughu gaoghatho ra eghu. Unha glepo te nhaꞌa chekedi mana re, mana ginauna edi. Eghuteuna unha te chekedi mana re, ginauna thoke mei tutuani.

²⁰ Uve, mana neke cheke ghau iara mala fablahidi naiknodi Israel. Aonu God ne fablahidi mare, eghuteuna iara theome tangomana teke lhotini nogna fablahi mana na.

²¹ Iagho na theome filoni kaisei glepo te thokedi kokhologna mae Jekob ginauna. Eghuteuna theo kaisei hoholo te ginau thokedi naiknodi Israel gre. Lord na nodi God mare, eghuteuna leuleghu fata mana au baludi mare. Leuleghu fata na mare eha eigna God ngala nodi king mare na.

²² God neke batu fajifladi mare funu Ijep. Mare nheta fara jateula buluka mata te fakaukathu te theome tangomana kaisei naikno te lokuni ra eghu.

²³ Theo kaisei naikno te tangomana ei naitudi vikegna mae Jekob na. Eghuteuna theo kaisei mae te au nolaghi te mala goigonidi naiknodi Israel re. Gognaro na naiknore mala tonu eidi kokhologna mae Jekob, naiknodi Israel igre. Mare ginauna cheke eghu, ‘Mei ghotilo mala filoni nogna gloku God igne!’

²⁴ Naikno igre nheta fara jateula lion biꞌo ra eghu. Uve, mare jateula lion te falehedi keha glepo mhata te mala ghamu nei koꞌu fahui teu dadaradi ra eghu.”

²⁵ Aonu mae Balak ne cheke eghu ka mae Balam, “Ghema! Iagho te theome tibridi mare mala thokedi hoholo teuna, iagho jaola thosei ke fablahidi mare!”

²⁶ Nu mae Balam ne cheke eghu ka mana, “Iara neke chekehi ka iagho te iara ginauna chekedi kolho unha te cheke mei Lord ka iara re.”

Nogna fatilo cheke mae Balam

²⁷ Aonu mae Balak neke cheke eghu ka mae Balam, “Mei iagho, tapa nake age ka kaisei vido ngau. Glahu ke keli tagna God ke snakre nigho iagho mala togho ghau iara, mala ke tibridi iagho mare mala thoke hoholo.”

²⁸ Aonu phiamare neke tei ka thogele Peo te tangomana filo tei ka namono nagou na.

²⁹ Aonu mae Balam ne cheke eghu ka mae Balak, “Iara magnahaghei te edi iagho fitu olta ka vido igne, eghuteuna iagho ginauna atha mei fitu buluka nalhaꞌudi nei fitu sipu nalhaꞌudi ka iara.”

³⁰ Eghuteuna mae Balak ne edi unha teke chekedi mae Balam re, ne fafara kaisei buluka nei sipu neu ka fitu olta re.