Naba 22 - Buka Blahi Ka Cheke Holo

King gna Moab ne fatei nonomho ka mae profet Balam

¹ Aonu naiknodi Israel gre tei ne au ka vido sare biꞌo jare Moab rhegna Khoꞌu biꞌo Jordan ka keha philegna khoꞌu te funu Jeriko na.

² Ka vido tuana, mae Balak thugna mae Sipoa gne ne nomhidi nei filodi neu unha glepo teke edi naiknodi Israel gre ka naiknodi Amoa re.

³ Eghuteuna mae king baludi nogna naiknore ne mhaghu nei fififri nodi fara, naugna mana laseni te kmana fara naiknodi Israel gre.

⁴ Aonu naiknodi Moab gre ne cheke eghu ka mae lidadi Midian re, “Tore, naikno igre thono kmana fara, eghuteuna theome raugha mare ginauna goigoni noda namono tahati gre, jateula buluka te ghamu fahui buburu ra eghu.” Eghume mae Balak mae ihei te king teu Moab ka vido tuana,

⁵ ne fatei kaisei nonomho ka mae profet Balam, thugna mae Beo jare ka namono Petoa, rhegna Khoꞌu biꞌo Iufretis. Nonomho igne ne cheke eghu agne, “Iara magnahaghei nigho iagho te laseni eigna kaisei vike biꞌo neke jifla mei funu Ijep. Mare mei au rhegu iara, eghuteuna mare la khotodi hila namono te gnafa re.

⁶ Iagho na mei mala togho ghau iara. Iagho ginauna tibridi mare mala thokedi hoholo. Naugna mae igre thofno nheta fara eghuteuna iara theome tangomana te uludi mare ka magra na. Jame te eni iagho na iara ginau tangomana ke chekedi mare mala ke jifla mare ka kantri igne. Naugna iara laseni, naikno te fablahi iagho re ginauna gleꞌa nodi, eghuteuna naikno te tibridi iagho re ginauna thokedi hoholo.”

⁷ Aonu mae lidadi Moab ghe Midian re tei ne atha sileni mala folini mae Balam. Mare tei ne filoni Balam ne facheke nogna cheke mae Balak re ka mana.

⁸ Aonu mana ne cheke eghu ka mare, “Uve, ghotilo ginauna au agne bongi na. Nathui ame tangomana cheke ari nga iara ka ghotilo unha te chekedi Lord ka iara re.” Aonu mare ne au balugna mana bongi tuana.

⁹ Ka bongi tuana, Lord ne mei ka mana ne ghusna eghu ka mana, “Maedi heva site au balumu iagho igrea?”

¹⁰ Nu mae Balam ne cheke eghu, “Mae igre neke mei funudi Moab. Mae king Balak teke kuru meidi mae igre balugna nonomho igne:

¹¹ ‘Uve, kaisei vike biꞌo neke jifla funudi Ijep. Eghuteuna mare la au ka namono te gnafa igre. Iagho ginauna mei mala togho ghau iara. Iagho ginauna tibridi mare mala thokedi puhi biꞌo. Jame te eni iagho igne na, iara ginauna tangomana te magra nei brue teidi teu mae igre.’ ”

¹² Aonu Lord neke cheke eghu ka mana, “Iagho thosei tei baludi mare. Eghuteuna iagho thosei ke tibridi mare mala thokedi hoholo, naugna iara neke fablahidi naikno igre.”

¹³ Ka hamerane gna keha rane na, mae Balam tei ne filodi keha nogna mae funei mae Balak re, ne cheke eghu ka mare, “Ghotilo ke pulo ka nomi kantri na, naugna Lord na theome magnahaghei te tei iara balumi ghotilo na.”

¹⁴ Aonu mare neke pulo ka mae Balak ne cheke eghu ka mana, “Mae Balam na theome mei kolho balumi ghehati.”

¹⁵ Aonu mae Balak neke fateidi keha mae biꞌo, mae teke au nangha ke biꞌodi mae teke kulu tei ra. Nu mare jaola ke kmanadi tothoghei ulu lahu ra.

¹⁶ Mare tei ne thoke ka mae Balam ne cheke eghu ka mana, “Igne unha te chekeni mae Balak thugna mae Sipoa na, thosei leghudi keha glepo are mala lhoti nigho mala mei ka iara na,

¹⁷ naugna iara ginauna foli nigho mala dedei iagho, eghuteuna jaola edi unha te chekedi iagho re. Eghume iara tore nigho mala mei togho ghau iara mala tibridi iagho mare mala thokedi hoholo.”

¹⁸ Nu mana neke cheke eghu ka mare, “Neubane tufa mei mae Balak nogna suga te fodu ka silva nei gol teure ka iara, iara theome tangomana te huhughuni chekegna nogu Lord God na.

¹⁹ Iara tore ghami ghotilo mala au agne bongi na jateula mae teke kulu mei ra eghu, glahu cheke mei Lord keha glepo ka iara ba theo.”

²⁰ Ka bongi tuana God ne mei ka mae Balam, ne cheke eghu ka mana, “Eghume te mei mae igre te cheke ka iagho mala tei baludi teuna, iagho tei baludi mare, nu edi kolho iagho unha te chekedi iara ka iagho re eghu.”

God diꞌatagna ne facheke ka nogna dongki mae Balam na

²¹ Ka keha narane na, mae Balam ne kaikaliti nogna dongki na, aonu mana saghe ka dongki na ne tei baludi phei mae funeidi Moab re.

²² Nu God ne diꞌatagna fara te tei mana na, eghuteuna nogna engel Lord na mei ne kegra neu farihotei gna nabrou na mala fanograni mana. Mae Balam ne saghe ka dongki na, eghuteuna phei nogna mae gloku re jaola tei balugna mana.

²³ Kate filoni dongki gne nogna engel Lord te kegra teu fari hoteigna nabrou te louloku naflahi mala magra teuna, dongki na ne theome leghuni nabrou na, nu naꞌa neke tei mhata neu. Mae Balam ne purini nogna dongki na mala ke pulo ka nabrou na.

²⁴ Aonu nogna engel Lord igne ne kegra neu ka vido te gobro na farihoteidi phei gringni thina gna nagare na.

²⁵ Kate filoni dongki gne nogna engel Lord na, naꞌa nolo neke tei rhegna gringni thina na mala salaꞌuni engel na. Nu kate totokhei mae Balam gahe gna na ka gringni thina na, mana neke purini nogna dongki na.

²⁶ Aonu engel na neke kulu tei kegra ka vido ikoni te theome snagla ka geridire mala theome tangomana dongki gne te tei salaꞌu na.

²⁷ Kate filoni dongki gne nogna engel Lord na, naꞌa ne thuru soru pari. Nu mae Balam ne diꞌatagna fara ka dongki na ne puri ka nogna khodo thegna na.

²⁸ Aonu Lord ne snakreni dongki na mala cheke eghu ka mae Balam, “Unha glepo site eni iara ka iagho te thilo fata puri ghau iara iagho gnea?”

²⁹ Nu mae Balam ne cheke eghu ka dongki na, “Naugna iagho te faꞌeiꞌei fara ka iara gne! Jame loku naflahi iara ka khamegu na meuna, iara jame falehe nigho iagho gognaro la!”

³⁰ Nu dongki na neke cheke eghu ka mana, “Iara ngala nou dongki iagho na. Leuleghu fata na pala nigho kate magnahaghei tei iagho ka keha vidore. Ba, iara neke edi keha glepo jateula tugre neku ka iagho tifa na?” Nu mae Balam ne cheke eghu, “Theo.”

³¹ Aonu Lord ne snakreni mae Balam mala filoni engel te kegra teu jare te loku naflahi mala magra teuna. Kate filoni mana engel na mae Balam pogho soru ne ghilei thoke phaꞌugna na ka glose pari.

³² Aonu engel na ne cheke eghu ka mae Balam, “Ne unha site thilo fata purini iagho nou dongki gnea? Iara ngala teke kegra ka nabrou ia teke fanogra nigho iagho ia, naugna jafra fara unha te eni iagho ka iara ia.

³³ Nu nou dongki iagho gne kolho teke filo ghau iara na, eghuteuna thilo fata figri fadelei dongki na ka iara teku ia. Jame theome ke figri dongki na meuna, iara jame falehe nigho iagho gognaro la eghuteuna dongki iagho gne kolho te karha na eghu.”

³⁴ Nu mae Balam ne cheke eghu ka engel na, “Uve, iara la jafrahi. Iara theome laseni te kegra teu iagho te fanogra ghau iara ka nabrou ia. Jame te theome doglo te tei iara na teu iagho na, iara ginauna ke pulo kolho ka namono eghu.”

³⁵ Nu engel na neke cheke eghu ka mae Balam, “Tei sagho baludi mare, nu chekedi kolho iagho unha teke cheke iara ka iagho ra eghu.” Aonu mae Balam ne tei baludi nogna mae funei mae Balak re.

³⁶ Kate nomhini mae Balak te mei mae Balam na, mana jifla ne tei ka namono Ara mala thafoni mae Balam. Namono igne au rhegna Khoꞌu Anon phile ke raru ka fofotagna kantri Moab.

³⁷ Aonu mae Balak ne ghusna eghu ka mana, “Ne unha site theome mei iagho kate kilo iara ululahu ia? Ba, glahu na theome foli fabiꞌo nigho iara eghu sagho gaoghathomu na ia?”

³⁸ Nu mae Balam ne cheke eghu ka mana, “Uve, iara la meihi gognaro na. Nu iara na theome chekeni kaisei glepo mala togho nigho iagho. Nu iara na chekedi kolho unha teke cheke mei God ka iara re.”

³⁹ Aonu mae Balam ne tei balugna mae Balak ka namono Kiriat Husot.

⁴⁰ Jare mae Balak ne falelehe nogna buluka, sipu teure mala fafara, eghuteuna mana jaola ne tufa lao keha nafnahi ka mae Balam nei keha mae biꞌo teu te au balugna mana re.

⁴¹ Ka hamerane gna keha rane na, mae Balak athani mae Balam ne tei ka thogele Bamot-Baal, jare ka vido tuana, mae Balam ne filodi keha naiknodi Israel re.