Naba 20 - Buka Blahi Ka Cheke Holo

Khoꞌu jifla mei ka thina biꞌo

¹ Ka nhigra ululahu ka finogha tuana, naiknodi Israel re ne mei thokei ka namono nagou Sini ne mei au Kades. Ka vido tuana, Miriam ne lehe, aonu mare ne giugiluni naꞌa jare.

² Uve, vido te au mare na theome au khoꞌu. Aonu naiknore mei ne bara faligohodi mae Moses ghe mae pris Eron.

³ Mare ne cheke eghu, “Jame keli kolho teke lehe ghehati baludi iheire naikno teke lehe ke ulugna Lord ra!

⁴ Naugna unha si ghopa te tathalei fajifla ghami ghehati ka namono nagou gnea? Ba, mala lehe ghehati agne baludi nomi buluka igre?

⁵ Naugna unha si ghopa te atha fajifla ghami ghehati Ijep mala mei au ka namono te diꞌa igne ia? Vido igne theo kaisei glepo te karha tagna na. Theo kaisei gano, nei theo kaisei sisi fig, ba sisi grep, ba sisi pomegranet te au tagna na. Eghuteuna theo khoꞌu la te mala koꞌu na.”

⁶ Aonu mae Moses ghe mae Eron ne jifla farihoteidi naiknore ne tei ka grengatha gna nogna Suga Thapuale te blahi Lord na. Phiamare pogho soru ne thoke phaꞌudire ka glose na. Aonu siasigla gna nogna nolaghi Lord ne thakle ka phiamare.

⁷ Lord ne cheke eghu ka mae Moses,

⁸ “Ghopa atha khodo te au ke ulugna bokis blahi te nhaꞌa cheke ana, aonu ghopa ginauna kilo meidi naikno te gnafa re. Eghuteuna ghopa ginauna cheke lao ka thina biꞌo are kate filo teu naiknore, eghuteuna khoꞌu na ginauna loloro mei ka thina biꞌo tuana. Iagho ginauna fajifla khoꞌu ka thina na mala koꞌu naikno te gnafa baludi nodi buluka.”

⁹ Aonu mae Moses tei ne atha khodo na, jateula teke chekeni Lord na.

¹⁰ Aonu phiamare kilo meidi naiknore mala khapru ke ulugna thina biꞌo na, aonu mae Moses ne cheke eghu ka mare, “Ghotilo mae te fabiꞌobiꞌo fara ra, fanomho ghotilo ia! Ba, ghepa na fajifla khoꞌu ka thina biꞌo igne mala koꞌu ghotilo?”

¹¹ Aonu mae Moses ne loku haghe khodo na ne phia fata cha lao ka thina biꞌo na, eghuteuna khoꞌu ne loloro mei, aonu naikno baludi glepo te tautagu re ne koꞌu.

¹² Nu Lord ne cheke eghu ka mae Moses ghe mae pris Eron, “Naugna te theome au nomi grouronu ghopa te theome fakakhana ka naiknore te au nolaghi biꞌo iara na, ghopa theome tangomana te batudi naikno igre te tei ka vido teke nhaꞌa chekeni iara ka ghotilo tifa ia!”

¹³ Khoꞌu tuana mare kiloni, “Meriba” gaoghathogna na, “Khuru cheke” naugna ka vido tuana, mare neke khuru cheke balugna Lord, eghuteuna Lord ne fakakhanani te mae blahi thegna na ka mare.

Mae funei gna Idom na ne theome magnahaghei te tei salaꞌu naiknodi Israel gre ka nogna vido na

¹⁴ Kate au teu mare Kades na, mae Moses ne kuru teidi keha mae mala tei cheke ka mae king gna Idom na. Mare ne cheke eghu ka mana, “Ghehati vikegna Israel gre kherami ghotilo. Eghuteuna ghotilo la lasedi hila eidi kmana puhi te thoke ghami ghehati ra.

¹⁵ Eghuteuna ghotilo jaola lasedi kuꞌemi ghehati teke tei au Ijep tifa ra. Ghehati neke au jare kmana finogha eghuteuna ghotilo jaola lasedi eidi mae Ijep teke goigoni ghami ghehati.

¹⁶ Eghuteuna kate tanhi lao ghehati ka Lord na, mana nomhidi nomi natanhi ghehati re ne kuru meini kaisei engel mala batu fajifla ghami Ijep. “Nu gognaro na ghehati au Kades ka namono te fofotagna nou vido iagho gne.

¹⁷ Eghume ghehati tore nigho iagho mala snakre ghami ghehati mala tei salaꞌuni nou vido iagho gne. Ghehati ginauna theome tei tafri ka nomi thobi nei nagare teu ghotilore. Nei ghehati theome tangomana te koꞌu ka nomi seu ghotilore. Ghehati ginauna leghuni kolho nogna nabrou biꞌo mae king na ghilei jifla kokoni ghehati nou vido iagho gne.”

¹⁸ Nu mae king gna Idom na ne cheke eghu, “Theo! Ghehati theome snakreni te mei salaꞌu ghotilo na! Ne mei nga ghotilo nu, ghehati ginauna magri ghami ghotilo eghu.”

¹⁹ Aonu maedi Israel ne cheke eghu, “Ghehati na leghuni kolho nabrou biꞌo na, eghuteuna jame te koꞌu, ba nomi gobi lepo te tautagu ghehati igre koꞌu ka seu ghotilo re, ghehati ginauna foli ka ghotilo. Ghehati magnahaghei tei salaꞌuni kolho nou vido iagho gne.”

²⁰ Nu mae king na neke cheke eghu ka mare, “Theo! Ghehati theome tangomana te snakre ghami ghotilo na!” Aonu mae king na ne kurudi kmana mae soldia mala tei magra ka mae Israel mala lhotidi mare.

²¹ Eghume naugna te theome snakredi mare te mala tei salaꞌuni nodi vido na, mae Israel gre neke figri ne leghuni keha nabrou na.

Glehegna mae Eron

²² Aonu naiknodi Israel gre ne jifla kokoni vido Kades ne mei ka thogele Hor.

²³ Jare ka thogele Hor, rhegna vido te fofotagna nohi Idom, Lord ne cheke eghu ka mae Moses ghe mae Eron,

²⁴ “Mae Eron gne ginauna theome tangomana te tei thoke ka vido te nhaꞌa chekeni iara mala tufa ka naiknodi Israel gre, nu mana ginauna lehe, naugna ghopa ne theome leghudi nogu cheke iara re jare ka Khoꞌu Meriba.

²⁵ Eghume iagho ginauna athani mae Eron nei mae thugna Eliesa na eghu mala haghe ka thogele Hor.

²⁶ Jare ka thogele na, iagho ginauna atha koko nogna pohe blahi mae pris te fahaghe mae Eron na, eghuteuna ke fahaghe lao ka mae Eleasa. Mana ginauna lehe jare.”

²⁷ Aonu mae Moses ne leghuni unha teke chekedi Lord re. Kate filo teu naiknore, mare jifla ne haghe ka thogele na.

²⁸ Kate thoke lao mare ka thogele na, mae Moses ne atha koko pohe te fahaghe mae Eron re ne fahaghe lao ka mae Eleasa. Mae Eron ne lehe jare ka thogele na, aonu mae Moses ghe mae Eleasa neke pulo nodi.

²⁹ Aonu kate nomhini naiknore eigna te lehe mae Eron na, mare ne diꞌanagnafa nei tanhini mana nabagna tolufulu narane.