Naba 18 - Buka Blahi Ka Cheke Holo

Nodi gloku mae pris nei nodi gloku mae Livaet

¹ Lord ne cheke eghu ka mae pris Eron, “Jame kaisei glepo diꞌa thokedi glepo blahi igre ba Sugablahi igne na, iagho baludi thumure nei ihei ka vikegna mae Kohat teure, ghotilo tangomana au papara eigna igne. Nu iagho nei mae thumure eghu kolho mala mae pris na, eghuteuna jame te loku fadiꞌa ghotilo eigna nodi gloku mae pris na, ghotilo kolho ginau jaola au papara eigna igne.

² Mae kheramu iagho, mae Livaet gre nate togho nigho iagho kate loku iagho baludi thumure ke ulugna Suga Tapuale te blahi na.

³ Mae ka vikegna Livae gre ginau loku ke parimu iagho, eghuteuna reireghini Suga Tapuale te blahi igne. Nu mare mala thosei tei namo ka olta mala fafara na, ba ka keha glepo blahi are. Jame te habo mare ka keha glepo tuare na, ghotilo te gnafa na ginauna kafe lehe.

⁴ Mare ginauna loku balumi ghotilo mala reireghigna Suga Thapuale te blahi igne, mala edi mare nodi gloku re tagna, mala theome tangomana keha maei te mei namo tagna na.

⁵ “Iagho nei mae ka vikemu iaghore eghu kolho te mala loku ka chogho te blahi nei ka olta na, mala theome tangomana iara te diꞌatagu ka naiknodi Israel re.

⁶ Iara ngala teke vahidi mae kheramu iagho, mae ka vikegna Livae gre. Iara ngala teke vahi fajifladi mare ka keha vikegna Israel are. Mare nogu iara, eghume iara tusu ari ka ghotilo mae pris mala togho ghami ghotilo nei mala edi nodi gloku mare ka Suga Thapuale te blahi igne.

⁷ Nu iagho nei mae thumu iaghore eghu kolho te mala loku nei reireghidi teu glepo blahi ka olta nei glepo te au ka chogho te blahi na. Iara ginauna tufa ari keha glepo blahi ka nomi gloku ghotilo mae pris are, mala kaikalitidi ghotilo glepo blahi ka Suga Thapuale te blahi gne. Nu jame te mei namo keha mae te theo nogna nolaghi te mei rhegna glepo blahi igre na, ghotilo ginau faleheni mae tuana.”

⁸ Aonu Lord neke cheke eghui ngala ka mae Eron, “Uve, fafara te blahi te funu ka naiknodi Israel te theome raꞌe gahu te knoro igre, iara ginauna tufa ari fafara igre ka iagho nei thumu iaghore eghu. Eghuteuna glepo tuare ginauna nomi ghotilo fabrahu.

⁹ Glepo te blahi teke theome gahu ghotilo ka olta na are, nomi ghotilo. Neuba neke fafara ka flaoa, ba fafara mala ke doglo kaisei mae ka tathagu iara na, ba kaisei fafara eigna poloru, keha vidodi glepo blahi teke theome gahu te knoro re nomi ghotilo.

¹⁰ Eghume mae ka ghotilore kolho tangomana te mala imadi gobigna lepo te blahi tuare. Nu ghotilo ginau ima kolho ka vido blahi na.

¹¹ “Keha nafnata fafara te ginau tufa mei naikno gre ka iara na, tuare jaola nou iagho. Iara ginauna tufa ari glepo tuare ka iagho baludi thumu nalhaꞌu nei thumu gaꞌase teu iaghore. Eghuteuna iheire te klino ka tathagu iara te au ka sugamu iagho are kolho te tangomana ima na.

¹² “Iara ngala teke tufa ari oliv oel nei waen majaghani nei famane gano teu ka ghotilo are. Eghume leuleghu finogha na, ghotilo ginauna tufa mei gano saro uludi ka nagare re ka iara Lord.

¹³ Eghuteuna gano saro ulu teke atha naikno ka nagare te fafara mei ka iara Lord igre, gobigna lepo tuare nomi ghotilo. Eghuteuna iheire naikno te gnafa te klino ka tathagu iara te au ka sugamu iagho are ngala te tangomana imadire.

¹⁴ “Eghuteuna glepo nga ne fablahi mare mala tufa mei ka iara Lord nga nu, glepo tuare jaola nomi ghotilo.

¹⁵ Eghuteuna mae sua nalhaꞌu te gnafa teke kulu karha, nei glepo te tautagu te gnafa teke kulu karha teu te mala tufa mei ka iara Lord teure, glepo tuare jaola nomi ghotilo. Nu iagho ginau snakredi mala foli fajifladi mae sua nalhaꞌu teke kulu karha, nei glepo te tautagu teu te theome klino ka tathagu iara re.

¹⁶ Kate thokeni kaisei nhigra mae sua nalhaꞌu na, mae kmagna na ginau foli fajiflani mana ka iara. Eghuteuna foligna mana te nanhaꞌa lao iara na glima silva koen teke skel mare ka nodi skel mae pris ra. Tahugna silva koen igne jateula varadaki koen ikodi te kilodi mare ‘gera.’

¹⁷ “Nu buluka, sipu nei nanigot teu te kulu karha re theome tangomana te foli fajifladire. Naugna glepo tuare thono blahi fara nei jaola nogu iara. Nafnata glepo te tautagu igre, iagho ginauna atha dadaradire, eghuteuna frusa lao ka gerigna olta na, eghuteuna iagho ginauna gahu garofadire ke kligna gna olta na mala blahi u fafara tuana, eghuteuna gagahugna te siri famane na te ginau fagleꞌa ghau iara na.

¹⁸ Nu nafnahidire nomi ghotilo. Eghuteuna nafnahi ka gagarodi glepo te tautagu teke tusu haghe ghotilo ke ulugu iara, balugna ghahe phile nhetagna teke tufa mei naiknore ka fafara ra eghu.

¹⁹ Eghuteuna leuleghu fata na, unha glepo teke nhaꞌa fadelei ka fafara te blahi teke tufa mei naikno ka iara Lord na, gobi lepo tuare, iara na tufa ari ka iagho baludi naikno te gnafa ka vikemu iagho are. Igne ngala kaisei nhaꞌa cheke te eni iara balumu iagho nei ka vikemu iagho re. Igne ngala kaisei nhaꞌa cheke balumu iagho nei vikemu iagho te theome tangomana iara huhughuni na.”

²⁰ Lord ne cheke eghu ka mae Eron, “Iagho nei mae ka vikemu iagho teure, ginauna theome tangomana te khotodi kaisei vido glose kate tufa iara ka naikno te gnafa Israel re, naugna gobigna lepo te magnahagheidi ghotilore mei funudi ka iara.”

Nodi fafara naikno ka vikegna mae Livae

²¹ Lord ne cheke eghu ka mae Eron, “Nodi fafara naiknodi Israel te tufa igre, iara ginauna tufa tei ka vikegna mae Livae. Igne jateula te folidi eghu mare naugna mare reireghini Suga Tapuale te Blahi na.

²² Naikno ka keha vikegna Israel igre theome tangomana te mei namo nei haboni teu Suga Tapuale te Blahi na, jame te mei namo mare na mare naba te papara te mala lehe na.

²³ Vikegna Livae kolho te mala reireghini Suga Tapuale te Blahi na. Eghuteuna jame kaisei mae theome leghuni vetula gna Suga Tapuale te blahi na, vikegna Livae igne naba te papara na. Mare mala leghuni fabrahu vetula igne. Vikegna Livae igre ginauna theome khotogna kaisei vido glose.

²⁴ Naugna fabothodi unha te atha te mei naiknodi Israel te tusu mei jateula fafara teu ka iara Lord, iara la tusu laohi ka vikegna Livae mala khotogna mare. Eigna iara la chekenihi te vikegna Livae igne theome tangomana te khotogna kaisei vido glose ka nomi glose ghotilo naiknomi Israel.”

Fafara nodi vikegna Livae

²⁵ Lord jaola ne cheke eghu ka Moses,

²⁶ “Iagho tei cheke eghu ka vikegna Livae, ‘Kate hata ghotilo fabotho igne ka naiknodi Israel, ghotilo mala jaola mala fafara mei fabotho di glepo igre mala kilo fnakno ghau iara.

²⁷ Eghuteuna ka tathagu iara na, fafara igne jateula gano saro ulu nei saro ulu fuꞌa grep te hata mei ka nagare ra eghu.

²⁸ Ka puhi igne, ghotilo ginauna jaola tangomana te tufa fabotho na ka iara ka glepo te tufa keha naiknore. Fabothodi glepo te tufa ghotilo igne mala tei ka pris biꞌo Eron.

²⁹ Ka glepo te tufa naiknore ka ghotilo are, ghotilo mala fafara mei famane glepo te gnafa are nogna Lord.

³⁰ “ ‘Eghuteuna ke leghu kate fafara fahui ghotilo fabotho di famane glepore, ghotilo tangomana te tathaji keha vido na malami themi jateula te atha mei ka nomi nagare themi ra eghu.

³¹ Glepo igre jateula nomi taba eghu ghotilo ka gloku te edi ghotilo ka Suga Tapuale te Blahi ia. Ghotilo baludi tharaknami are tangomana te ghamu gano ka vido aheva te magnahagheni ghotilo na.

³² Kate fafara mei ghotilo famane glepo ka iara na, doglou kolho ghotilo te ghamu keha vido na, eghuteuna ghotilo ginauna theome tangomana te papara tagna na. Nu jame kaisei ka ghotilo hata kaisei nodi glepo blahi naiknodi Israel, ame tufa nga ghotilo fabotho na ka iara, te eghu na, mana goigoni glepo blahi na eghume mana mala lehe.’ ”