Naba 17 - Buka Blahi Ka Cheke Holo

Nogna khodo mae pris Eron

¹ Lord ne cheke eghu ka mae Moses,

² “Iagho ginauna cheke ka naiknodi Israel are mala atha mei nabotho phei khodo ka iagho, nabadi nabotho phei mae lidadi vikegna Israel are. Eghuteuna riso nanghadi nabotho phei mae lida igre ka khodo tuare.

³ Iagho ginauna riso nanghagna mae pris Eron na ka khodo vikegna mae Livae. Mae lida ka vikegna Israel gre mala au nodi soasopai kaisei khodo.

⁴ Aonu iagho ginauna atha mei nabotho phei khodo tuare ka nogu Sugablahi iara igne, eghuteuna iagho ginauna mei lilisei ke ulugu iara ka bokis blahi igne ka vido te fari thafoi koba tapa igne.

⁵ Eghuteuna mae ihei te vahini iara mala edi nogu gloku iara na, nogna khodo mana na ginauna kotu. Ka puhi igne, iara ginauna au baludi naiknore mala theome khuru cheke fabrahu mare.”

⁶ Aonu mae Moses ne cheke ka naiknore, eghuteuna nabotho phei mae lidadi nabotho phei vikegna Israel gre ne atha ne mei nodi khodo re ka mana. Mana atha khodo igre nei jaola nogna khodo mae pris Eron na baludi.

⁷ Aonu mae Moses tei ne lilisei khodo te gnafa igre ke lamnagna Suga Thapuale te blahi na ke ulugna nogna bokis blahi Lord na.

⁸ Ka keha narane na, kate mei mae Moses ka Suga Thapuale te blahi na, mana ne filodi nodi khodo vikegna mae Livae te au nanghagna mae pris Eron tagna na ne kotu. Khodo igne ne au khaklagna nei sisigna neu, nei jaola au keha ganogna gaju amon tela muitahi!

⁹ Aonu mae Moses ne atha ne mei khodo igre, ne fakakhana ka naiknodi Israel. Eghuteuna kate filodi mare glepo igre, mae lida te gnafa ka nabotho phei vikegna Israel gre neke atha fapulo nodi khodo re.

¹⁰ Lord ne cheke eghu ka mae Moses, “Iagho ginauna ke lisei fapulo nogna khodo mae pris Eron na ke ulugna bokis blahi igne. Iagho ginauna tathaji jare mala filo glanidi iheire naikno te khuru cheke fara ka iara igre. Eghuteuna khodo igne ginauna na lilisei au kolho, jame te theome ke hui mare te khuru cheke ka iara na, mare ginauna orio lehe.”

¹¹ Aonu mae Moses ne edi jateula teke chekedi Lord re neu.

¹² Aonu naiknore ne eha eghu ka mae Moses, “Tore! Ghehati ginauna thofno kafe lehe gnafa!

¹³ Mae ihei te mei namo rhegna Suga Thapuale te blahi igne ginauna lehe. Ba ghehati te gnafa na ginauna kafe lehe sia?”