Naba 13 - Buka Blahi Ka Cheke Holo

Nabotho phei mae tei mala filoni namono Kenan

^1-3 Ka vido teke au teku mare ka namono nagou jare Paran, Lord ne cheke eghu ka mae Moses, “Iagho na vahidi nabotho phei mae lida, kaisei mae eghu ka vikemi ghotilo are. Eghuteuna iagho na kuru teidi mare mala tei filoni namono Kenan teke nhaꞌa cheke mala tufa ka ghotilo teku iara ia.” Aonu mae Moses ne edi jateula teke chekedi Lord re, ne vahidi nabotho phei mae lida mala tei filoni vido tuana.

⁴ Igre nanghadi mae lida teke kuru tei mana re: Ka vikegna mae Ruben na, mana ne vahini mae Samua, thugna mae Sakua.

⁵ Ka vikegna mae Simion na, mana ne vahini mae Safat, thugna mae Hori.

⁶ Ka vikegna mae Juda na, mana ne vahini mae Kelab, thugna mae Jefune.

⁷ Ka vikegna mae Isaka na, mana ne vahini mae Igal, thugna mae Josef.

⁸ Ka vikegna mae Efrem na, mana ne vahini mae Hosea, thugna mae Nun.

⁹ Ka vikegna mae Benjamin na, mana ne vahini mae Palti, thugna mae Rafu.

¹⁰ Ka vikegna mae Sebulun na, mana ne vahini mae Gadiel, thugna mae Sodi.

¹¹ Ka vikegna mae Josef te kiloni mare vikegna mae Manase na, mana ne vahini mae Gadi, thugna mae Susi.

¹² Ka vikegna Dan na, mana ne vahini mae Amiel, thugna mae Gemali.

¹³ Ka vikegna mae Asa na, mana ne vahini mae Setua, thugna mae Mikael.

¹⁴ Ka vikegna mae Naftali na, mana ne vahini mae Nabi, thugna mae Vofsi.

¹⁵ Eghuteuna ka vikegna mae Gad na, mana ne vahini mae Guel, thugna mae Maki.

¹⁶ Igre nabotho phei mae teke kuru tei mae Moses mala tei filoni vido Kenan na. Eghuteuna mana neke tughu nanghagna Hosea thugna mae Nun na, ne kiloni mana Josua.

¹⁷ Nu ame kuru teidi nga mare teuna, mana neke cheke eghu ka mare, “Ghotilo ginauna tei salaꞌuni namono nagou na ke phile raru gna Kenan, eghuteuna ghotilo ginauna doglo tei ke phile holo tei thoke ka thogele gro.

¹⁸ Ghotilo ginauna tei filoni faꞌunha ngau vido tuana. Nihai naikno te au ka namono tuana na? Ba naikno tuare nheta ba theo?

¹⁹ Faꞌunha vido tuana keli ba theome keli? Ba vido tuana au gringni thina gna ba theo?

²⁰ Ba faꞌunha ngau glose na keliu mala jaꞌi gano na ba theo? Ba au gaju ngau ba theo? Eghuteuna kate pulo na ghotilo ginauna atha mei keha sisi grep ka vido tuana eghu.” Naugna jare na la thokeni hila nhigra te vuha muita sisi grep re.

²¹ Aonu nabotho phei mae igre jifla ne tei mala filoni vido tuana. Mare ne funu ka namono nagou Sini ke mata, ne doglo ne tei ka namono Rehob, rhegna vido Lebo-Hamat ke raru Kenan.

²² Ulu lahu na mare doglo ne tei mala filoni keha phile vido glose ke raru na ne ghilei thoke Hebron te au mae Ahiman, mae Sesae, nei mae Talmae. Naikno te au Hebron gre jifla mei ka tharakna gna mae Anak. Eghuteuna namono biꞌo Hebron gne neke eni haghe fitu finogha ke ulugna namono Soan jare Ijep.

²³ Kate thoke lao mare ka gloha Eskol, mare tei ne kato nure gna gaju grep te ure re. Nure gna gaju grep igre tahu fara, eghume keha phei mae te pala gna na eghu. Eghuteuna mare jaola atha keha sisi pomegranet baludi keha sisi gna gaju fig.

²⁴ Mare kiloni gloha tuana na, Gloha Eskol, gaoghathogna na “Nure,” naugna nure gna grep te kato mare jare na biꞌodi fara.

²⁵ Mare ne au Kenan nabagna phiatutu narane, ke leghugna tuana mare neke pulo nodi.

²⁶ Aonu mare neke pulo namono Kades ka namono nagou Paran te au mae Moses ghe mae Eron baludi naikno te gnafa Israel. Aonu mare ne cheke fajifla gobi lepo teke tei filodi thedire, nei jaola fakakhana nure grep te pala te mei thedire.

²⁷ Mare ne cheke eghu ka mae Moses, “Ghehati neke tei ka vido teke kuru tei ghami ghehati iagho ia, eghuteuna glose jare na famane fara nei gano re karha kelidi fara! Filo sagho, aro sisi te atha te mei ghehati re.

²⁸ Nu naikno te au jare re nheta fara, nei namono dire thono biꞌo fara, eghuteuna au gringni thina biꞌo faligohoni namono na. Ghehati jaola filodi mae ka vikegna Anak. Mae iheire te nheta fara, brahu fara nei biꞌo fara.

²⁹ Eghuteuna ghehati filodi vikegna Amalek gre au ke mata, eghuteuna vikegna mae Het, baludi vikegna mae Jebus nei vikegna mae Amoa teure au ka thogele, eghuteuna vikegna mae Kenan gre au ka geri thongna nei ka geri khoꞌu Jordan.”

³⁰ Nu mae Kaleb ne eni fagaglana ka iheire naikno te fodu balugna mae Moses re mala kmu mare, aonu mana ne cheke eghu, “Tahati na tei falehedi mare gognaro gne mala atha tahati vido tuana. Tahati tangomana ngala te uludi mare na!”

³¹ Nu keha mae teke tei balugna mana re ne cheke eghu, “Theo! Tahati theome naba te ari falehedi mare na! Naikno tuare ke nhetada tahati ngala!”

^32-33 Aonu mare ne eni kaisei groghe te diꞌa fara na cheke eghu, “Puhi biꞌo ginau thokedi naikno te au ka vido tuana! Eghuteuna naikno te filodi ghehati re, mare te gnafa na orio mae brahudi gnafa ngala. Eghuteuna ghehati filodi mae ka vikegna mae Anak mae iheire te brahu fara teure. Kate filodi mare re, ghehati ikodi fara jateula sughili eghu kolho.”