Naba 12 - Buka Blahi Ka Cheke Holo

Lordne parani Miriam

¹ Kate au teu mare ka vido Haserot na, mae Eron ghe Miriam gre ne cheke faparini mae Moses, mae thabusidi na, naugna mana ne tolaghi ka gaꞌase gna kantri Etiopia.

² Aonu repa ne cheke eghu, “Ba, Lord gne tangomana cheke balugna Moses kolho siba gnea? Theome tangomana te cheke baluda tapa na? Uve, Lord na jaola tangomana te cheke baluda tapa!” Nu Lord ne nomhidi nodi cheke repa igre.

³ Uve, mae Moses gne kaisei mae nhaꞌa faparini thegna. Theo kaisei naikno ka nauthoglu gne te tangomana nhaꞌa faparini thegna jateula mana teuna.

⁴ Aonu Lord ghosei ne kilo meidi mae Moses, mae Eron nei Miriam ne cheke eghu, “Ghotilo ginauna na mei ka nogu Suga Thapuale te blahi iara gne.” Kate mei retilo na,

⁵ Lord ne soru mei ka kaisei gromno, ne au neu ka grengathagna suga thapuale na. Aonu Lord ne kilodi Eron ghe Miriam mala mei kegra ke ulugna thegna.

⁶ Aonu Lord ne cheke eghu ka repa, “Ghopa fanomho fakeli ka nogu cheke iara gre! “Ne au nga kaisei mae profet balumi ghotilo nu, iara ginauna mei ka nogna mifi mana re, eghuteuna iara ginauna facheke balugna ka nogna mifi mana tuare.

⁷ Nu iara theome eghu ka mae Moses mae ihei te kaisei nogu mae gloku iara na. Mana kolho mae lidadi nogu naikno iara re.

⁸ Tuana site mei fakakhana iara te facheke teu balugna mana grea, eghuteuna kate facheke teu iara balugna mana na, iara theome chekedi cheke te ninhigrana gaoghathodire. Nu iara facheke balugna mana ka cheke te bligi gaoghathodire. Mana la filo ghauhi iara. Ne unha site theome mhaghu ghopa te cheke faparini nogu mae gloku iara gnea?”

⁹ Lord ne thono diꞌatagna fara ka repa, ne jifla kokodi repa,

¹⁰ eghuteuna gromno na jaola ne jifla kokoni Suga Thapuale te blahi na. Ke leghugna tuana, kaisei khabru te thono diꞌa fara na ne thokeni Miriam ne fadiꞌani thinigna naꞌa na, eghuteuna guligna Miriam na jaola ne vegha fara. Aonu Eron figri lao ka naꞌa ne filodi thubu ka thinigna Miriam na.

¹¹ Aonu mae Eron mei ne cheke eghu ka mae Moses, “Moses, thosei lisa mei papara igne eigna nakhibo teke edi ghepa gre mala au ka ghepa!

¹² Iagho thosei lisani thinigna greghada tapa gne mala diꞌa jateula sua te kulu lehe ame ke karha nga ka idogna teu ia eghu.”

¹³ Aonu Moses ne tanhi tei ka Lord ne cheke eghu, “God, iara tore nigho iagho mala ke fakeli fapulo khabru igne ka naꞌa!”

¹⁴ Aonu Lord ne cheke eghu ka mana, “Nomi kastom ghotilo na eghu agne, jame mae kmagna na kmisu lao ka tathagna nei foflogna teu naꞌa re, naꞌa ginauna mamaja nogna fara, eghuteuna naꞌa ginauna mala au ke kosigna namono na nabagna fitu narane. Eghume iagho ginauna na chekeni greghamu na mala tei au ke kosigna namono na nabagna kaisei wik. Ke leghugna tuana, ame ke tangomana nga ghotilo teke tei atha fapuloni mala ke au naꞌa balumi ghotilo eghu.”

¹⁵ Aonu mare tei ne liliseini naꞌa ke kosigna namono na nabagna fitu narane. Eghuteuna mare ne theome tei kokoni vido tuana ne ghilei thokeni narane mala ke pulo mei naꞌa na.

¹⁶ Ke leghugna tuana, mare ne jifla kokoni vido Haserot na ne tei au ka namono nagou Paran.