Naba 11 - Buka Blahi Ka Cheke Holo

Khaꞌaghi biꞌo funugna kaLord

¹ Aonu naiknore ne funu cheke faparini Lord, naugna mare ne au mei fara kmana puhi tadi. Kate nomhini igne, Lord ne thofno diꞌatagna fara, ne fasoru khaꞌaghi na ka mare, eghuteuna keha naikno ka mare ne lehe, eghuteuna keha vido, nei suga teu te au mare re ne nhako ka khaꞌaghi biꞌo na.

² Naiknore ne tanhi ka mae Moses mala toghodi, aonu mana ne tarai ka Lord, eghuteuna khaꞌaghi biꞌo na ne lehe soru.

³ Eghume mare kiloni vido tuana na Tabera. Gaoghathogna cheke igne te “nomhini na ne gnubra eghu.” Naugna ka vido tuana ngala teke soru nogna khaꞌaghi biꞌo Lord na te nhako hoteidi mare na.

Moses ne vahidi fitusalei mae lida

⁴ Ka vido tuana, keha naikno te diꞌare ne au baludi naiknodi Israel. Eghuteuna naikno te diꞌa igre magnahaghei te ima gano te keli, nafnata gano teke ima mare Ijep. Aonu naiknodi Israel re ne diꞌanagnafadi fara, ne funu cheke faparini Lord ne cheke eghu, “Ghehati magnahaghei te ima nafnahi sia!

⁵ Ka teke au teku Ijep ia, ghehati neke ima ghemi sasa te magnahaghei ghehati re! Jaola, leuleghu fata re ghehati tangomana te ghamu ghemi kiukamba, melen, sulate, onioni, nei galiki eghu sia.

⁶ Nu gognaro na ghehati la theome nheta hila naugna leghu narane ghehati kaisei filo fabrahuni ngala wefa te kiloi ‘Manna’ igne!”

⁷ Manna igne jateula khatu ikodi te vegha ra eghu.

^8-9 Eghuteuna leghu fata na naiknore salo koba “manna” te khoko soru balu buabubla khoꞌu leghu hamerane re ka vido te au mare na. Aonu mare ginauna tei graigrahi mala jateula flaoa eghu, eghuteuna kuki fa ikodi. Eghuteuna kate ima te famaimani mare na ne jateula bret te kuki ka oliv oel ra neu.

¹⁰ Aonu mae Moses ne filodi naikno te tanhi kegra teu ka grengathadi nodi suga thapuale re. Nu Lord neke diꞌatagna fara ka mare, nei mae Moses jaola ne diꞌanagnafa gna fara.

¹¹ Mana ne cheke eghu ka Lord, “Ne unha ne famei sagho puhi igne ka iara nou mae gloku gnea? Unha site eni fadiꞌa iara ka iagho te famei iagho puhi igne ranghidi naikno grea?

¹² Iara theome kmadi naikno igre! Iara theome neke fakarhadi naikno igre! Ne unha ne vahi ghau iara mala batudi tei naikno igre ka vido teke nhaꞌa cheke iagho ka kuꞌemi ghehati tifa ra? Ne unha ne vahi ghau mala paladi naikno igre jateula idogna te pala sua ikoni ia eghu sagho gnea?

¹³ Heva te tangomana tei atha nafnahi iara maladi naikno igre na? Naikno igre tanhi fabrahu ka iara, ‘Ghehati magnahaghei ghemi nafnahi!’

¹⁴ Iara theome tangomana te reireghidi naikno igre naugna mare thono kmana fara!

¹⁵ Eghuteuna jame te eghu fabrahu iagho puhi igne ka iara na, falehe ghau iara gognarola. Nu te reireghi ghau iara iagho na, thofno lisa ghau iara ka glehe mala theome thoke ghau puhi!”

Lordneke tusu lao kmana nafnahi ka naiknore

¹⁶ Lord ne cheke eghu ka mae Moses, “Iagho na kilo meidi fitusalei mae lidadi Israel are, eghuteuna mare ginauna kegra balumu iagho ke ulugna nogu Suga Thapuale te blahi iara na.

¹⁷ Iara ginauna soru mala cheke balumu iagho jare. Eghuteuna iara ginauna atha keha nolaghi gna nogu Tharunga te Blahi ka iagho ra, mala ke tufa lao ka mare. Mala tangomana mare te togho nigho mala reireghidi naiknore, mala nu theome nanga nou iagho eghu.

¹⁸ “Nu gognaro na, iagho na tei chekedi naiknore, mala kaikaliti nei mala gae eghu mare ka tathagu iara na, naugna nathui na mare ginauna ima nafnahi. Iara ne nomhidi nodi natanhi nei nodi cheke teu te cheke eghu mare re, kani au teku Ijep ia ghehati neke ima ghemi gano te keli gnai te au ka vido igne. Uve, iara ginauna tufa lao ghedi gano mala ima mare.

¹⁹ Eghuteuna nafnahi igne na theome tangomana mare te ima kaisei narane, ba phei narane, ba glima narane, ba nabotho narane, ba varadaki narane teuna.

²⁰ Thono theo fara, mare ginauna ima nabagna kaisei nhigra. Neubane jifla ka nehudi, foflodi, ba ghilei babaꞌodi neu mare, mare mala ima nafnahi re ghilei gnafa. Puhi igne thoke ghami ghotilo naugna iara au ngala balumi ghotilo, nu ghotilo tiromi ghau iara, nei cheke fapari ghau neke cheke eghu, ‘Mala unha site jifla kokoni tahati Ijep gnea?’ ”

²¹ Aonu mae Moses ne cheke eghu ka Lord, “Lord iagho la laseni hila, namno gobi thogha soldia site tei balugu iara igrea! Eghuteuna te chekeni iagho na, iara na tufa ghedi kmana nafnahi mala ima nabagna kaisei nhigra!

²² Ba, jame te falelehe ghehati bukrei nomi buluka nei sipu teu igre, na boho ghehati eghu sagho ia? Ba, jame atha mei ghehati bukrei sasa ka thongna gro, ginauna theome nanaba la ka ghehati!”

²³ Nu Lord ne cheke eghu, “Ba, ne theome tangomana iara te edi re eghu sagho ia? Filo sagho!”

²⁴ Aonu mae Moses ne jifla kosi, ne cheke ka naiknore mala eidi unha teke cheke Lord ka mana re. Aonu ke leghugna tuana, mana ne kilo meidi fitusalei mae lida re mala mei kegra ke ulugna Suga Thapuale te blahi na.

²⁵ Aonu Lord ne soru mei ka kaisei gromno ne cheke balugna Moses. Lord ne atha keha nolaghi gna nogna Tharunga te Blahi teke tufa ka mae Moses re, ne tufa lao ka fitusalei mae lida re. Kate mei Tharunga te Blahi na te au ka mare na, mare ne cheke jateula mae profet neu, nu kaisei fata kolho eghu.

²⁶ Eghuteuna keha phiamae ka fitusalei mae lida igre neke theome tei ka Suga Thapuale te blahi na. Phiamare au neku kolho ka suga thapuale thedi na. Nu nolaghi gna nogna Tharunga te Blahi Lord na jaola mei ka phiamare, aonu phiamare jaola ne cheke jateula mae profet neu.

²⁷ Aonu kaisei mae majaghani jare ghosei chari ne tei ka mae Moses mala cheke ka mana eigna igne.

²⁸ Mae Josua thugna mae Nun mae ihei teke toghoni mae Moses kani majaghani gna teku na, mana tei ka mae Moses ne cheke eghu, “Nogu mae velepuhi ia, chekedi mare mala kmu!”

²⁹ Aonu mae Moses ne cheke eghu, “Unha site nanga nou iagho ka iara te mala kmu mare teu gnea? Iara magnahagheini Lord te tufa lao nogna nolaghi gna Tharunga te Blahi na ka mare, mala cheke jateula mae profet eghu mare!”

³⁰ Aonu mae Moses baludi mae lida re neke pulo ka nodi suga thapuale thedire.

Lordne kuru soru nanghaji

³¹ Ke leghugna tuana, Lord ne fameini kaisei nuri funugna ka thongna gno balu kmana nanghaji. Nuri igne atha meidi nanghaji re ne koko soru ne ghilei fodu ka vido te au mare na. Nanghaji te khoko igre jame autagna kaisei mita thuta funu ke kligna glose na. Uve, nanghaji igre ne khoko soru kmana kilomita ka vido te gnafa te au mare tagna na.

³² Aonu, naiknore ne salo nanghaji igre nabagna kaisei narane thongana, nei bongi thongana, nei keha narane thongana na. Naikno te gnafa re ne salo fa kmana fara mala ghedi thedi. Aonu mare ne lilisei tafri ghedi nanghaji re mala moja ka naprai.

³³ Kate ima ghedi nafnahi teu keha naiknore, Lord ne diꞌatagna fara ka mare ne famei kaisei khabru te diꞌa fara ne lehe kmana naikno ka mare.

³⁴ Aonu mare kiloni vido tuana Kibrot-Hatava. Gaoghathogna cheke Kibrot-Hatava teu igne, “Bekudi naikno te magnahaghei ghamu nafnahi fara.”

³⁵ Aonu mare jifla kokoni vido tuana ne tei Haserot. Jare mare ne edi haghe nodi suga tapuale re ne au tadi.