Naba 10 - Buka Blahi Ka Cheke Holo

Phei nifu teke edi mare ka silva

¹ Lord ne cheke eghu ka mae Moses,

² “Ghotilo ginauna eni phei nifu ka silva te tutu te maku mare are. Leghu fata na ghotilo ginauna atha phei nifu igre te mala kilo meidi naiknore, nei mala fagaglana kate kaikaliti ghotilo te mala tei ka keha vido re.

³ Eghuteuna kate ifu fodu mare phei nifu igre na, gaoghathogna na ghotilo naikno ra mala mei khapru ka grengatha gna suga thapuale gne.

⁴ Nu jame te ifu kolho mare kaisei na, ghotilo mae funei ka vikemi ghotilo ra kolho te ginau mei khapru ka namono te au teu iagho tagna na.

⁵ Eghuteuna jame te thilo fata ifu faghose mare ka phei nifu igre na, ululahu vike te au ke file maghati gre te mala jifla na.

⁶ Eghuteuna kate nomhini mare fapea naoglagna nifu na, vike te au ke file mata gre te mala jifla na.

⁷ Nu kate kilo fodudi iagho naiknore, mare ginauna ifu ka naogla te nhogri.

⁸ “Eghuteuna thugna mae pris Eron gre kolho te mala ifudi phei nifu tuare. Nu igre phei vetula te mala tathaji fabrahu ghotilo ginauna:

⁹ Kate tei ghotilo te magradi nomi mae naoka te magnahaghei goigoni ghami ghotilo are, ghotilo ginauna ifu faghose thilo fata. Eghuteuna kate nomhini iara Lord nomi God ghotilo gne, iara ginauna togho ghami, nei fakarha ghami ka nomi mae naoka ghotilo are.

¹⁰ Eghuteuna kate gleale'a ghotilo na, ghotilo ginauna eni gaghamhu khafa nei keha gaghamhu are, eghuteuna ghotilo jaola mala ifu phei nifu are ke klignadi glepo te fafara te knoro nei fafara fagaglana gna te au fakeli ghotilo balugu iara na. Naoglagna nifu gne mala ke ghathoni ghotilo eigna iara te nomi Lord God ghotilo na.”

Naiknodi Israel re ne vuha jifla Sanai

¹¹ Ka fa varadaki narane ka fapea nhigra gna fapea finogha na, ke leghugna teke jifla mare Ijep na, nogna gromno Lord na ne thugha tei ke kligna gna Suga Thapuale te blahi na,

¹² eghuteuna naikno Israel re ne funu jifla kokoni namono nagou Sanai na. Gromno igne mei ne snoto jare Paran.

¹³ Igne ululahu narane te jifla mare te tei ka keha namono re leghuni unha teke chekeni Lord ka mae Moses na.

¹⁴ Aonu naikno teke au ke parigna nodi flagi vikegna mae Juda gre ngala te mala kulu tei na. Eghuteuna mae Nason, thugna mae Aminadab gne te batudi vikegna mae Juda na.

¹⁵ Eghuteuna mae Netanel, thugna mae Sua gne te batudi vikegna mae Isaka na.

¹⁶ Eghuteuna mae Eliab, thugna mae Helon gne te batudi vikegna mae Sebulun na.

¹⁷ Eghuteuna mae ka vikegna mae Geson ghe mae Merari gre te mala atha kokogna Suga Thapuale te blahi na, te mala pala te tei ke leghudi naikno te tei baludi vikegna mae Juda re.

¹⁸ Aonu fapea tothoghei te mala nolo te tei re, naikno te au ke parigna nodi flagi vikegna mae Ruben. Eghuteuna mae Elisua, thugna mae Sedeua gne te mala batudi vikegna mae Ruben na.

¹⁹ Eghuteuna mae Selumiel, thugna mae Surisadae gne te mala batudi vikegna mae Simion na.

²⁰ Eghuteuna mae Eliasaf, thugna mae Duel gne te mala batudi vikegna Gad re.

²¹ Eghuteuna mae te mala pala te teidi glepo blahi gna suga thapuale re mae ka vikegna mae Kohat. Aonu kate thoke lao mare ka kaisei namono majaghani na, mae ka vikegna mae Geson ghe mae Merari gre mala ke fakegra haghe Suga Thapuale te blahi na mala ke kaikalitidi glepo blahi te pala vikegna mae Kohat re.

²² Aonu fatilo tothoghei te mala nolo te tei re, naikno te au ke parigna nodi flagi vikegna mae Efrem. Eghuteuna mae Elisama, thugna mae Amihud gne te mala batudi vikegna mae Efrem re.

²³ Eghuteuna mae Gamaliel, thugna mae Pedasua gne te mala batudi vikegna mae Manase re.

²⁴ Aonu mae Abidan, thugna mae Gidion gne te mala batudi vikegna mae Benjamin re.

²⁵ Aonu leghu lahu tothoghei te mala nolo te tei re, naikno te au ke parigna nodi flagi vikegna mae Dan. Mare mala au leghu lahu mala reireghidi mare te gnafa na. Eghuteuna mae Ahiesa, thugna mae Amisadae gne te mala batudi vikegna mae Dan re.

²⁶ Eghuteuna mae Pagiel, thugna mae Okran gne te mala batudi vikegna mae Asa na.

²⁷ Eghuteuna mae Ahira, thugna mae Enan gne te mala batudi vikegna Naftali na.

²⁸ Eghume igne puhi te mala leghudi vikegna Israel gre kate jifla te tei ka keha namono re.

Moses ne ghusnani Hobab nanghogna na mala tei baludi

²⁹ Kaisei narane mae Moses ne cheke ka mae Hobab thugna mae Ruel. Mae Ruel gne mae gna Midian, eghuteuna mae Ruel gne nanghogna mae Moses. Moses ne cheke eghu ka mae Hobab, “Ghehati ginauna tei ka vido te keli teke nhaꞌa chekeni Lord mala tufa ka ghehati teku gne. Eghume keli fara jame te mei iagho balumi ghehati na. Jame te mei iagho na, ghehati ginauna reireghi nigho iagho.”

³⁰ Nu mae Hobab ne cheke eghu, “Theo, iara ginauna au kolho ka nogu vido gne baludi thabuknagu thegu gre.”

³¹ Aonu Moses ne cheke eghu ka mana, “Thosei tei koko ghami ghehati. Iagho ngala te thofno lasedi vido ka namono nagou te tangomana au tahati tadire, eghuteuna iagho tangomana te batu ghami ghehati na.

³² Eghuteuna jame te mei iagho balumi ghehati na, keha glepo te keli teke tufa mei Lord ka ghehati re, ghehati ginauna tufa ka iagho.”

Naiknore ne jifla ne tei

³³ Kate jifla kokoni mare Thogele Sanai na, mare ne nolo nabagna thilo narane. Nu mare ne kulu pala ne tei nogna Bokis Blahi Nhaꞌa Cheke Lord na, mala tangomana Lord te falalase namono te mala au mare tagna na.

³⁴ Eghuteuna leuleghu narane kate tei mare ka keha vido re, nogna gromno Lord na au koba ke klignadi mare.

³⁵ Leuleghu fata kate pala te tei mare bokis blahi igne, mae Moses ne tarai eghu, “Lord, snakredi nou mae naoka re mala sopa au mare thedi. Iara tore nigho mala edi iagho keha glepo mala rikha tafri naikno te theome magnahaghei nigho are!”

³⁶ Eghuteuna kate thoke mare ka vido te mala augna bokis blahi igne, mae Moses neke tarai eghu, “Lord, iara toreni nigho iagho mala au balumi ghehati naikno gna Israel te thokeni thogha salaꞌu naikno gre!”