Nonomho Te Keli Teke Risoi Mae Mak 6 - Buka Blahi Ka Cheke Holo

Naiknogna namono Nasaret ne theome fatutuani ni mae Jisas

¹ Mae Jisas jifla jare neke pulo ka thofno namonogna na baludi nogna mae fanomhore.

² Kau narane Sabat na mae Jisas ne funu farirhiudi naiknore ka suga tharai na. Kmana naikno nomhini mana ne jaglo nodi fara. Mare ne cheke eghu, “Tore, neke hata aheva si mana farirhiu igrea? Unha nafnata glalase si God teke tusu lao ka mae ignea? Ne faꞌunha si mana te au nolaghi te mala edi kofubobhoi igrea?

³ Tahati laseni mae kapenta igne, mana thugna Meri kolho. Eghuteuna mae tahigna mana re mae Jemes, mae Josep, mae Judas nei mae Simon. Eghuteuna, greghagnare kafe au teu ngala igre. Mana kaisei mae kolho, mana neke theome mei funu ka God.” Aonu naiknore ne filo faparini kolho mana.

⁴ Mae Jisas ne cheke eghu ka mare, “Kmana naikno heva te heva na ghatho tahuni nogna mae profet God na. Nu iheire te au ka namonogna nei vikegna teu thegna mana re tirodi ghatho tahuni mana.”

⁵ Mae Jisas ne theome tangomana te edi kmana kofubobhoi jare. Nu kofubobhoi te edi mana re ngala te habo lao ka keha naikno kolho teke fogra re teke keli fapulore.

⁶ Mae Jisas ne jaglo nogna fara te theome fatutuani naiknore. Ke leghugna igne mae Jisas ne tei ka keha namono te au ka nohi tuana ne farirhiudi naiknore.

Mae Jisas ne kuru fajifladi nabotho phei mae fanomhore

⁷ Aonu mana kilodi nabotho phei mae nogna fanomhore ne cheke eghu ka mare, “Iara na kuru fajifla ghami ghotilo mala phei mae kaisei namono, eghuteuna keha phei re ka keha namono na eghu. Iara na tusu ari ka ghotilo nolaghi te mala bruedi naiture.”

^8-9 Mae Jisas ne cheke faheta eghu ka mare, “Ne tei nga ghotilo nu thosei hata kaisei glepo balumi. Thosei hata gano ba gloi ba sileni balumi. Nu ghotilo tangomana te hata khodo nei fahaghe sadol nei kaisei pohe eghu kolho.

¹⁰ Kate ruma ghotilo ka kaisei suga na, au jare ghilei ke jifla kokoni namono tuana.

¹¹ Eghuteuna ne posa nga ghotilo ka kaisei namono ne theome magnahaghei ghami naiknogna namono tuana ba tirodi fanomho ka chekemi ghotilo re, jifla kokoni namono tuana. Kate jifla ghotilo na, ghiha koko gnagnapa te au ka ghahemi are ke uludi eghu. Igne kaisei fagaglana te mala falalaseni ghotilo ka naiknore God ginauna na fatedi.”

¹² Mae fanomhore jifla ne tei toutonu ka naiknore ne cheke eghu, “Ghotilo gnafa lilisei puhimi te diꞌare.”

¹³ Mare ne bruedi kmana naitu nei ghiha oel ka kmana naikno te fogra re neke keli fapulo.

U glehegna mae Jone Apublahi

¹⁴ Mae King Herod nomhidi kmana thoutonu eigna mae Jisas, naugna mana gognarona fnakno fara heva te heva na. Keha naiknore ne cheke eghu, “Mae igne mae Jone Apublahi. Mana kela karha fapulo! Naugna tuana te au nolaghi mana te edi kofubobhoi igre.”

¹⁵ Keha naiknore ne cheke eghu, “Mae igne mae Elija.” Kehare ne cheke eghu, “Mae igne kaisei mae ka hatimare mae profet tifa ra.”

¹⁶ Kate nomhidi mae Herod thoutonu igre, mana ne cheke eghu, “Mae Jone Apublahi teke kusu iara pha'ugna na tifa ia kela karha fapulo!”

¹⁷ Mae Herod gne ngala teke chekedi mae soldiare teke lokini mae Jone teke haruni mana kau chen teke liliseini mana ke lamna suga sosolo na. Mae Herod neke eni igne mala keli tagna Herodias, khetogna na. Tifa na Herodias gne neke khetogna mae Filip, thabusigna mae Herod nu mae Herod hata Herodias ne tolaghi ka naꞌa.

¹⁸ Mae Jone Apublahi neke cheke eghu fabrahu ka mae Herod, “Theome doglo ka vetula na teke tolaghi iagho khetogna mae thabusimu na!”

¹⁹ Eigna igne te thono diꞌatagna fara Herodias te magnahaghei faleheni mae Jone Apublahi na. Nu naꞌa theome tangomana naugna mae Herod.

²⁰ Mae Herod mhaghu fara te faleheni mae Jone na, naugna mana laseni mae Jone gne kaisei mae keli nei mae blahi eghu. Eghume mae Herod ne famane reireghi fakelini mae Jone. Mae Herod keli tagna te fanomho ka nogna farirhiu mae Jone re neubane fadiꞌani kau cheke te edi mana re.

²¹ Aonu kaisei fata na mae Herod ne eni kaisei gaghamu biꞌo mala ke ghatho fapuloni narane teke karhagna na. Mae Herod ne kilodi hatimare mae biꞌo ka gavman nei hatimare mae biꞌodi armi nei hatimare mae funeidi Galili mala mei kau gaghamu na. Ka narane igne Herodias ne ludeni nogna puhi te mala faleheni mae Jone na.

²² Thugna gaꞌase Herodias na ne mei kau gaghamu na ne ragi ke uludi mare. Kate ragi naꞌa na mae Herod nei hatimare mae kheragna mana re eghu ne fifilo ne keli tadi fara ka naꞌa. Aonu mae King Herod ne ghusna eghu ka sua gaꞌase na, “Unha glepo te magnahaghei iagho na? Iara ginauna na tusu ari ka iagho unha te magnahagheni iagho na.”

²³ Mana ne baubahu ka sua gaꞌase na ne cheke eghu ka naꞌa, “Unha te toreni iagho ka iara na, neubane thofno vidogna gobigna lepo te reireghini iara na, iara na tusu ari ka iagho.”

²⁴ Ka vido tuana sua gaꞌase na jifla ne tei ghusna eghu ka idogna na, “Unha nate toreni iara ginau ka mae king na?” Idogna na ne cheke eghu ka naꞌa, “Iara magnahaghe nigho iagho te toreni pha'ugna Jone Apublahi.”

²⁵ Sua gaꞌase na ghosei neke pulo ka mae king ne cheke eghu ka mana, “Iara magnahaghe nigho iagho te tusu mei ka iara pha'ugna Jone Apublahi ana kau tapera gognaro la!”

²⁶ Mae king ne thono diꞌanagnafa fara. Mana theome magnahaghei teke fatheꞌoni nogna nhaꞌa cheke teke eni ka thugna gaꞌase na. Naugna mana neke nhaꞌa chekehi ka naꞌa ke uludi hatimare mae kheragna nafnaknore.

²⁷ Mae king ghosei ne kuruni kaisei mae soldia mala tei hata mei pha'ugna mae Jone na. Mae soldia tuana tei ne kukusu pha'ugna mae Jone na ka suga sosolo na.

²⁸ Eghuteuna, hatimare hata ne mei kau tapera pha'ugna mae Jone na ne tusu lao ka thugna gaꞌase Herodias. Naꞌa hata ne tei ka idogna.

²⁹ Nogna mae fanomho mae Jone re nomhini igne ne mei hata thinigna mae Jone na ne tei giugilu.

Mae Jisas ne faghamudi glima thogha mae

³⁰ Nogna khuru mae Jisas teke tei toutonu re neke pulo mei ka mana. Mare ne toutonu ka mana unha teke edi nei farirhiudi teku mare re.

³¹ Kmana naikno ne mei nei ke tei neu ka mana. Mae Jisas nei mae fanomhore ne theo kaisei vido narane te snagla te mala ima na. Aonu mana ne cheke eghu ka mae fanomhore, “Tahati gne na jifla tei ka kaisei vido te nagou mala ke gnafa katha vido.”

³² Mare saghe ka mola na ne tei ka namono te theo naiknogna na.

³³ Ne eghu ba ngau, kmana naikno ne filodi teidi mare re, eghuteuna naiknore filo glanidi mare. Aonu naiknore jifla funu ka namonodire chari ne tei ka vido aheva te tei mae Jisas na. Mare kulu au neu jare ne posa nga mae Jisas baludi nogna mae fanomhore.

³⁴ Kate longa mae Jisas mata na, mana ne filoni kaisei nakhapru biꞌo ofo neu jare. Mae Jisas ne kokhoni nognadi, naugna mare ne jateula sipu te theo kaisei naikno te reireghidi ra neu. Aonu mana ne funu farirhiudi kmana glepo naba te mala lasedi mare re.

³⁵ Kate figrihi naprai na, mae fanomhore ne mei cheke eghu ka mae Jisas, “Mae biꞌo, igne namono nagou theo kaisei gano te mala faꞌimadi naikno igre. Nu gognaro na la rafihi.

³⁶ Kuru teidi naikno are ka namono te au ka nohi igne mala foli ghedi gano thedi.”

³⁷ Mae Jisas ne cheke eghu ka mare, “Fei ghedi si ghotilo mala ima mare.” Mare neke cheke eghu ka mana, “Tore, jame kaisei mae loku kaisei finogha te nabagna te mala foli gano te mala faghamudi naikno igre!”

³⁸ Mana ne cheke eghu ka mare, “Niha bret te au ka ghotilo na? Tei ba filo!” Kate filo mare kau bret re, mare mei ne cheke eghu ka mana, “Glima bret nei phei sasa langau eghu.”

³⁹ Mae Jisas ne cheke ka nogna mae fanomhore mala cheke mare ka naiknore mala gnokro mare ka tothoghei ke kligna buburu.

⁴⁰ Aonu naiknore ne gnokro ka tothoghei glima fului ba tothoghei kaisei gobi.

⁴¹ Mae Jisas hata glima bret baludi phei sasare. Mana filo haghe kligna ne cheke fakelidi ka God. Mana piepike bret re ne tusu lao ka nogna mae fanomhore mala tufa ka naiknore. Aonu mana ne jaola phei sasare ne tufa fari hoteidi mare hui.

⁴² Naikno te gnafare kafe ghamu ne boho.

⁴³ Mae fanomhore ne fafofodu nabotho phei khara'o ka vido bret nei sasa eghu teke salaꞌui ka naiknore.

⁴⁴ Eghuteuna glima thogha mae teke ghamu ka narane tuana na.

Mae Jisas ne nonolo ke tagru kholo

⁴⁵ Ke leghugna igne mae Jisas ne cheke ka nogna mae fanomhore mala saghe ka mola na tei ka namono Betsaeda ka keha phile kholo na. Mana au faleghu neu mala kuru fapulodi ghu naiknore ka namonodire.

⁴⁶ Ke leghugna te kuru teidi re, mana ne haghe ka thogele na mala tarai.

⁴⁷ Ka grafi tuana mola na la teihi farihotei kholo. Eghuteuna mae Jisas au neu thegna ka thogele na.

⁴⁸ Mae Jisas ne filodi nogna mae fanomhore ne loku manigra ka ghorhagna mola na, naugna nuri na ne au ke uludi mare. Fari hotei tanhi thiloi nei tanhi namnoi eghu hamerane te mei mae Jisas ka mare na, nonolo ne mei ke tagru kholo. Mana nonolo ne mei ne namo sala'udi mare.

⁴⁹ Nu kate filoni mare mae Jisas te nonolo te mei ke tagru kholo na, mare gaoghathodi na ne kaisei naitu mana eghu. Aonu mare ne eha fabiꞌo.

⁵⁰ Naugna mare kafe filoni mana ne mhaghu nodi fara. Mana ghosei ne cheke eghu ka mare, “Thosei nanga nomi! Iara mae Jisas! Thosei mhaghu!”

⁵¹ Ke leghugna te saghe mana baludi mare ka mola na, nuri na ne lehe soru. Mae fanomhore ne thono jaglo nodi fara.

⁵² Mare theome laseniu ngala gaoghathogna kofubobhoi teke eni mana ka glima bret ra. Naugna nagnafadi mare re romno fara.

Mae Jisas baludi nogna mae fanomhore ne mei longa Genesaret

⁵³ Kate kasa mare ka kholo na, mare ne mei longa Genesaret. Mare ne sobo mola na jare.

⁵⁴ Kate jifla mare ka mola na, naikno au teu jare re ne ghosei ne filo glanini mae Jisas.

⁵⁵ Aonu naiknore chari ne tei chekedi keha naikno te au heva heva ka nohi tuana eigna mae Jisas. Naiknore nomhini mae Jisas te au teu jare na ne pala ne mei naikno te fogra re balu nodi sape ka vido aheva te tei mae Jisas na.

⁵⁶ Mae Jisas ne tei ka namono biꞌo, namono ikodi nei mata eghu te au ka nohi tuana. Eghuteuna aheva te tei mana na naiknore hata ne mei ka mana naikno te fogra re ne lilisei farihotei glalaba. Mare toreni mae Jisas mala snakredi habo kolho ka khukrudi nogna pohere, mala ke keli fapulo nodi. Aonu naikno te gnafa teke habo ka nogna pohe mana re neke keli fapulo.