Nonomho Te Keli Teke Risoi Mae Mak 5 - Buka Blahi Ka Cheke Holo

Mae Jisas longa ne ludeni kaisei mae te noinoli

¹ Mae Jisas nei nogna mae fanomhore eghu ne kasa ka Kholo Galili ne thoke ka nohi Gerasa.

² Kate soru mae Jisas ka mola na kaisei mae ne mei ka mana funu ka gluma aheva te mala giugiluidi naikno te lehere. Mae igne au kaisei naitu tagna.

³ Mae igne au fabrahu ka gluma na. Eghuteuna theome tangomana kaisei mae te haru famakuni mana ka phukri ba chen, naugna mana thono nheta fara.

⁴ Kmana fata mare fariuriu haru ghahegna nei khamegna teu mana re ka phukri, nu leuleghu fata na mana kukusu kolho phukri nei chen te au ka ghahegnare. Theo kaisei mae nheta nabagna te famuanani mana na.

⁵ Bongi narane na mana tei tafri ka gluma nei ka thogele balu eha fabiꞌo nei vavahe thinigna thegna na kau thina.

⁶ Kate gaꞌu teu mae Jisas na, mana ne filo teini mae Jisas. Aonu mana chari ne tei tuturupuku ke ulugna mae Jisas.

^7-8 Eghuteuna mae Jisas ne cheke eghu, “Iagho naitu, jifla mei ka mana!” Aonu, mana ne eha eghu fabiꞌo, “Jisas, Thugna God ka maloa kligna! Iagho ginauna na faꞌunha ghau iara sia? Ka nanghagna God iara tore mala thosei para ghau iara!”

⁹ Aonu mae Jisas ne ghusnani mana, “Ihei nanghamu na?” Mana ne cheke eghu ka mae Jisas, “Iara nanghagu na, ‘Mae Thara’ naugna ghehati kmana fara!”

¹⁰ Mana toreni fara mae Jisas mala thosei bruedi naiture ka nohi tuana.

¹¹ Kmana bosu humeu ka thogele na rhegna vido tuana.

¹² Aonu naiture toreni mae Jisas ne cheke eghu ka mana, “Jisas, kuru tei ghami ka bosu gro, mala tei ruma ghehati ka reꞌe.”

¹³ Aonu mae Jisas ne snakredi naiture mala jifla mei ka mana mala tei ruma ke lamnadi bosure. Aonu, bosure kafe chari ne soru funu ka thogele na ne tei lamna kholo ne knoho. Namo phei thogha bosu te kafe lehe ka kholo na.

¹⁴ Naikno teke ohodi bosure ne rikha. Mare ne tei ka namono biꞌo nei ka keha namono te au falithuini namono biꞌo tuana ne toutonu eigna igne. Aonu naiknore mei ne filoni unha teke eni mae Jisas jare na.

¹⁵ Eghuteuna naiknore mei ka mae Jisas ne filoni mae ihei teke au kmana naitu tagna tifa na. Nu gognarona gaoghathogna mana na kela keli fapulo, eghuteuna mana pipichi gnokro kmu neu jare. Naiknore ne thono mhaghu fara.

¹⁶ Keha naikno au teu jare teke filoni unha lepo teke eni mae Jisas na. Mare ne toutonu ka keha naiknore eigna unha teke eni ka mae teke au naitu tagna tifa na, eghuteuna mare jaola toutonu eidi bosure.

¹⁷ Naiknore mei ka mae Jisas ne kuruni mana mala jifla kokoni nodi nohi na.

¹⁸ Kate saghe mae Jisas ka mola na te mala tei teuna mae teke au naitu tagna tifa na mei ne cheke eghu ka mae Jisas, “Ghema, iara magnahaghei tei balumu iagho!”

¹⁹ Nu mae Jisas ne theome magnahaghei ne cheke eghu ka mana, “Iagho ke pulo ka tharaknamu nei kheramu teure mala ke toutonu ranghidi unha teke eni God ka iagho na, naugna mana neke kokhoni nigho.”

²⁰ Mae igne jifla ne tei heva heva ka nohi Dikapolis ne toutonu ka naikno te gnafare unha teke eni mae Jisas ka mana na. Kate nomhidi glepo igre naiknore ne kafe jaglo nodi fara.

Kaisei gaꞌase nei kaisei naikno biꞌo

²¹ Mae Jisas saghe ka mola na kasa neke pulo ka keha phile kholo na. Kate longa mana ka gratha na, kmana naikno mei ne khapru faligohoni mana.

²² Kaisei mae biꞌogna suga tharai na ne mei mala filoni mae Jisas, nanghagna mae igne, mae Jaerus. Mana mei ne tuturupuku ke ulugna mae Jisas.

²³ Mae Jaerus ne toreni fara mae Jisas, “Mae biꞌo, thugu gaꞌase iara na la namo lehehi. Ghosei mei mala habo khamemure mala ke keli fapulo nei karha eghu naꞌa.”

²⁴ Aonu mae Jisas ne tei balugna mana. Kmana naikno langau ne tei balugna mae Jisas. Mare fahuahuta ne tei fari thedi rhegna mana, naugna mare magnahaghei mei ka mana.

²⁵ Aonu kaisei naikno biꞌo jare dadara fabrahu nabagna nabotho phei finogha.

²⁶ Naꞌa au papara fara, eghuteuna kmana mae dokta fariuriu toghoni naꞌa. Naꞌa koko fahui nogna silenire ka mae dokta. Eghuteuna fogra na theome tangomana te gnafa na, nu naꞌa neke diꞌa ne diꞌa fara ngala.

²⁷ Kate nomhini naꞌa eigna mae Jisas, naꞌa ne leghuni mana baludi naiknore ne haboni nogna phoko na.

²⁸ Naugna naꞌa ne cheke eghu ka nagnafagna na, “Jame haboni kolho iara nogna pohe mae Jisas na, iara ginauna tangomana teke keli fapulo.”

²⁹ Kate habo naꞌa ka nogna phoko mae Jisas na dadara na ghosei ne noto. Eghuteuna naꞌa ghosei ne laseni khabru teke au ka naꞌa na kela keli fapulohi.

³⁰ Kau vido tuana, mae Jisas ghosei ne haimini nolaghi te jifla mei ka mana. Aonu mana kegra snoto ne figri faleghu ka naiknore ne ghusna eghu, “Ihei site habo ka nogu phoko iara gnea?”

³¹ Nogna mae fanomhore ne cheke eghu ka mana, “Ghema, filodi sagho naikno te fahuahuta te tei rhemui are. Unha site cheke eghu iagho gnea, ‘Ihei site habo ghau iara gnea’?!”

³² Nu mae Jisas ne efra faligoho mala filodeni ihei teke haboni mana na.

³³ Naikno biꞌo na laseni te kela keli fapulo na. Eghuteuna naꞌa mei ne tuturupuku ke ulugna mae Jisas. Naꞌa mhaghu fara balu fififri. Aonu naꞌa ne toutonudi ka mana unha teke eni ka naꞌa na.

³⁴ Mae Jisas ne cheke eghu ka naꞌa, “Naikno biꞌo, iagho kela keli fapulo naugna iagho ne fatutuani. Iagho tangomana te tei na, eghuteuna thosei nanga nou naugna iagho ginauna nake theome au papara.”

³⁵ Kate facheke nga teu mae Jisas ka naꞌa na, keha naikno ne mei funudi ka sugagna mae Jaerus mae biꞌo gna suga tharai na. Mare mei ne cheke eghu ka mae Jaerus, “Ghema, thumu gaꞌase iagho na la lehehi! Thosei fagloku biꞌoni mae velepuhi na.”

³⁶ Nu mae Jisas ne tirogna fanomho ka unha te chekeni mare na, ne cheke eghu ka mae Jaerus, “Ghema, thosei nanga nou fara, fatutuani ngala.”

³⁷ Mae Jisas ne snakredi kolho mae Pita, mae Jemes nei mae Jone tahigna mae Jemes te tei balugna ka suga mae Jaerus na.

³⁸ Kate posa mare ka suga mae Jaerus na, mae Jisas ne filodi kmana naikno te tanhi nei paopado fabiꞌo teure.

³⁹ Mae Jisas ruma ka suga na ne cheke eghu ka naiknore, “Naugna unha site tanhi nei paopado teu ghotilo gnea? Sua gaꞌase igne theome lehe. Naꞌa thuru kolho.”

⁴⁰ Nu naiknore ne maꞌeni kolho mae Jisas. Mae Jisas ne chekedi naiknore mala jifla ka suga na. Aonu mana hata balugna kmagna, idogna nei thilo mae fanomhore ne ruma ka chogho te thuru teu sua gaꞌase na.

⁴¹ Mae Jisas loku ka khamegna sua gaꞌase na ne cheke eghu ka naꞌa, “Talita kum!” Gaoghathogna na, “Gaꞌase ikoi, te chekeni iara tamu na, kegra haghe gognaro la!”

^42-43 Sua gaꞌase na ghosei ne kegra haghe ne nonolo tafri. Kate filoni igne, kmagna, idogna nei mae fanomhore eghu ne thofno jaglo nodi fara. Mae Jisas ne cheke faheta ranghidi idogna kmagnare mala thosei toutonu tafri ka ihei eigna igne. Aonu mae Jisas ne cheke eghu, “Fei ghegna mala ima naꞌa.” Naꞌa nabotho phei finogha gna.