Nonomho Te Keli Teke Risoi Mae Mak 4 - Buka Blahi Ka Cheke Holo

U cheke naba eigna joꞌu sisi

¹ Keha fata na mae Jisas ne farirhiudi naiknore ka geri Kholo Galili. Kau narane tuana kmana naikno mei ne khapru faligohoni mana. Aonu mana saghe ka mola sobo teu ka kholo na. Eghuteuna naiknore kegra neu mata ka gratha na.

² Mae Jisas ne farirhiudi kmana glepo kau cheke naba. Mana ne cheke eghu ka naiknore,

³ “Fanomho fakeli ghotilo ia! Igne thoutonu gna kaisei mae te joꞌu sisi na. Kaisei fata, mana tei ne joꞌu sisire ne toatofa tafri kau nagare na.

⁴ Kate toatofa tafri mana sisire, keha sisire ne khoko soru ka nabrou na. Nanghajire mei ne ghamu fateo sisire.

⁵ Keha sisire ne soru ka glose te theome thuta, naugna ne au ke kligna thina biꞌo. Sisi igre ghosei ne kotu jare naugna glose na ne theome tei pari.

⁶ Nu kate brana naprai na sisire ne kafe brango. Sisire ne lehe naugna glathidire ne theome soru pari.

⁷ Keha sisire ne khoko soru ka vido aheva te au kmana glathi buburu te fachuchuru. Glathidi buburu te fachuchuru igre ne kafe gri haghe ne thafru sophore. Sophore ne theome kotu ne theo sisidi.

⁸ Eghuteuna kehare soru ka glose te keli, aonu reꞌe ne famane kotu ne ure. Kehare thokeni kaisei gobi sisi, kehare namno salei sisi, aonu kehare tolufului sisi.”

⁹ Aonu mae Jisas ne cheke eghu, “Uve, ghotilo naikno te fanomho ka iara igre, hiro fakeli gaoghathodi cheke igre!”

Gaoghathogna cheke naba igne

¹⁰ Kate au sopa teu mae Jisas na, keha naikno teke nomhidi nogna cheke mana igre, mare ne mei baludi nabotho phei mae fanomho gre, ne ghusna ka mana gaoghathodi cheke naba igre.

¹¹ Mae Jisas ne cheke eghu ka mare, “God neke tusu ari kolho ka ghotilo glalase te mala lase fakelidi thofno glepo te au poru ka nakarha God te funei frunini. Nu iara cheke ranghidi keha naiknore ka cheke naba kolho.

¹² Kate eni iara igne, ne horoghoto ka unha teke chekeni mae profet Isaia tifa ia, “ ‘Neubane hiro ne hiro mare, nu mare ginauna theome laseni kolho. Neubane fanomho ne fanomho mare, nu mare ginauna theome nomhi fakelini kolho. Eghume mare theome koko puhi te diꞌare eghuteuna naugna igne God theome hata fadelei nakhibodire.’ ”

Gaoghathogna u cheke naba eigna sisi

¹³ Aonu mae Jisas ne ghusna eghu ka mare, “Ba, theome laseni si ghotilo gaoghathogna cheke naba ignea? Te theo ghotilo na, faꞌunha ghotilo me lasedi keha cheke naba re eghu?

¹⁴ Uve, mae te joꞌu sisi igne jateula kaisei mae te joꞌu chekegna God ka naiknora eghu.

¹⁵ Keha naiknore jateula igne eghu. Keha fata farirhiu na soru ka nagnafa naikno te jateula nabrou teuna. Eghuteuna mare nomhini chekegna God na, nu mae Satan ghosei mei hata fadelei cheke teke lilisei ke lamnadi.

¹⁶ Keha naiknore jateula sisi te soru ka glose ke kligna thina biꞌo ra eghu. Mare nomhini cheke na, eghuteuna ghosei me hatini balu gleale'a.

¹⁷ Eghuteuna mare theome snakreni farirhiu na mala tei au ka nagnafadire. Mare tathaji ka katha vido kmoꞌei kolho. Kate mei puhi biꞌo nei naꞌau papara naugna u cheke na teuna, mare ginauna na ghosei lisa kokoni nodi fatutuani na.

¹⁸ Keha naiknore jateula sisi te soru ka glathi buburu te fachuchuru ra eghu. Mare nomhini farirhiu na,

¹⁹ nu mare ngagudi fara eidi thua nafnata glepo re. Eghuteuna mare magnahaghei fara dedei gna nauthoglu igne nei mamagna di keha glepoi. Eghume farirhiu na theome tangomana te tughu nakarhagna mana na.

²⁰ Keha naiknore jateula sisi te soru ka glose te keli ra eghu. Mare nomhini farirhiu na eghuteuna mare thono fatutuani fara. Naikno tuana God ginauna na edi kmana glepo te keli ka nakarhagna na jateula sisi te kotu te ure ra eghu. Keha fata tangomana te thokei kaisei gobi sisi, keha fata tangomana te thokei namno salei sisi, nu keha fata tangomana te thokei tolufului sisi.”

Kaisei juta ke parigna kaisei khara'o

²¹ Aonu mae Jisas ne ghusna eghu ka mare, “Ba, ihei tangomana te fakasa juta na te lilisei ke pari khara'o ba ke pari sape na? Theome tangomana! Mana na lilisei haghe ka vido mala au gna na.

²² Eghume jateula tuana eghu gobigna lepo te au poru teu gognaro gre, gobigna lepo tuare na thakleu ka vido te snagla. Eghuteuna gobigna lepo te poru na naiknore ginauna na filo fakelini kate jifla mei kate snagla na.

²³ Uve, ghotilo naikno te fanomho ka iara gre, hiro fakeli gaoghathodi cheke igre!”

²⁴ Mae Jisas ne cheke eghula ka mare, “Famane ghatho fakelidi glepo te nomhidi ghotilo igre. Naugna God ginauna na fate ghami ghotilo ka unha nafnata vetula ghotilo teke hata teke fateni keha mae na. Nu God ginauna na tusu ari ka ghotilo fate biꞌo ke tulao gna teke eni ghotilo ranghidi keha naiknore.

²⁵ Mae ihei te au nogna glepo na, God ginauna nake tusu ranghini mana keha glepo. Nu mae ihei te theo nogna glepo na, neubane katha ikoi kolho te au ka mana na, God ginauna nake hata fadelei ka mana.”

Cheke naba eigna sisi te kotu

²⁶ Mae Jisas neke cheke eghu, “U narane God te funei frunidi nogna naiknore jateula kaisei mae te joꞌu sisi ka nagare ia eghu.

²⁷ Bongi, mana thuru eghuteuna hamerane teuna ke dofra haghe leuleghu fata na mana eghu koba, nu sisire funu sublo haghe ne kotu. Eghuteuna mana theome laseni ne faꞌunha ne kotu teuna.

²⁸ Nu glepo tuana thegna glose kolho te fakotudi nei faꞌuredi teure. Glepo te kulu jifla mei ulu lahu na khakla kolho, ke leghu na thakle mei chechenge khakla, nei glepo leghu lahu na sisi ke lamna chechenge.

²⁹ Kate ghano sisi na mae khoto nagare na ukli balu nogna naflahi, naugna thokehi narane te mala pulei gano na.”

³⁰ Aonu, mae Jisas ne ghusna eghu ka mare, “Narane God te funei frunidi nogna naiknore jateula unha eghu ka gaoghathomi ghotilo re? Unha nafnata cheke naba na te falalase tahati te mala famane glola na?

³¹ Uve, jateula sisi gaju mastad te joꞌu tahati ka nagare na ia eghu. Sisi gaju mastad igne thono iko lahu ka keha sisi kau nauthoglu igne.

³² Nu ke leghu na, naꞌa na kotu haghe eghuteuna ginauna na biꞌo lahu ka unha teke joꞌu tahati ka nagare na. Gregegnare ginauna biꞌo fara eghuteuna nanghajire tangomana mei hohoro gnoku ke lamnagna te famane riurifu na.”

³³ Mae Jisas farirhiuni chekegna God na ka kmana nafnata cheke naba igre ka naiknore. Mana farirhiudi naiknore ka unha mare tangomana te nomhidi nogna farirhiure.

³⁴ Mana farirhiudi koba ka cheke naba. Nu kate au sopa teu baludi nogna mae fanomhore mae Jisas rurutha gobigna lepo igre ka mare.

Mae Jisas fabeatani maraghata biꞌo na

³⁵ Ka grafi tuana mae Jisas ne cheke eghu ka nogna mae fanomhore, “Tahati na kasa mala tei ka keha phile kholo gno.”

³⁶ Aonu, mare ne tei kokodi naiknore ne saghe ka mola teke kulu saghe mae Jisas na ne tei balugna mana. Eghuteuna keha mola langau ne tei baludi mare.

³⁷ Aonu kaisei nuri blahi ne funu mei faheta fara ka kholo na. Eghuteuna galo biꞌo re ne funu haghe ka phei philegna mola na ne namo lodu.

³⁸ Nu mae Jisas ne thuru iho fara leghu ka mola na, ne thuru soru pha'u na ka kokhogu. Mae fanomhore tei ka mana ne fadofrani mana. Mare ne cheke eghu ka mana, “Mae velepuhi, naugna unha sagho te theome nanga nou gnea? Tahati gne na lehe!”

³⁹ Mae Jisas kegra haghe ne cheke faheta eghu kau nuri blahi nei galo teure, “Megeu nei muana eghu!” Nuri na ne snoto, eghuteuna kholo na ne beata fara.

⁴⁰ Aonu mae Jisas ne cheke eghu ka nogna mae fanomhore, “Naugna unha site mhaghu fara ghotilo gnea? Theome fatutuani ngala si ghotilo ia?”

⁴¹ Nu neubane eghu ngau, mare thono mhaghu fara ne cheke eghu fari thedi, “Tore, unha nafnata mae si ignea? Nuri ba ne galo ne faꞌuveni ngala chekegna mana na!”