Nonomho Te Keli Teke Risoi Mae Mak 3 - Buka Blahi Ka Cheke Holo

Kaisei mae te lehe keha khamegna na

¹ Kaisei fata mae Jisas ne tei ka suga tharai na. Eghuteuna kaisei mae te lehe keha khamegna na aula jare.

² Aonu keha naiknore magnahagheni te fathoethokeni mae Jisas. Mare ne thono filo leghuni mana glahula me fakelini mana mae te lehe khamegna na kau narane Sabat.

³ Mae Jisas ne cheke eghu ka mae te lehe khamegna na, “Mei sagho, kegra haghe agne ke ulumi ghehati gnafa.”

⁴ Mae Jisas ne ghusna eghu ka naiknore, “Ba, unha gne te snakreni ka vetula na te mala eni tahati kau narane Sabat na? Snakre ghita tahati mala toghoni naikno na ba mala fadiꞌani naikno? Mala fakarhani naikno na ba lisa laoni mala lehe naikno na?” Nu mare ne theome chekeni kaisei glepo.

⁵ Mae Jisas ne filo ka naiknore ne diꞌatagna fara, naugna mare ne maku fara pha'udire. Nu neuba ngau, mana ne kokhoni nognadi fara. Mana ne cheke eghu ka mae te lehe khamegna na, “Ngafa haghe khamemu ana.” Mana ngafa haghe khamegna na neke keli fapulo.

⁶ Aonu ka vido tuana mae Farasi gre jifla ka suga tharai na ne funu roghe baludi nogna tothoghei mae Herod, eigna puhi te mala faleheni mae Jisas.

Nakhapru biꞌo rhegna Kholo Galili

^7-8 Aonu, mae Jisas jifla baludi nogna mae fanomhore ne tei ka Kholo Galili. Eghuteuna kmana naikno ne tei balugna mana. Naikno igre neke mei funudi Galili, Judia, Jerusalem, Idumia nei ka namono te au ka keha phile Kho'u Jordan, nei funudi ka nohi Taea nei Saedon. Naikno igre mei ka mae Jisas naugna mare nomhidihi thoutonu eidi gobigna lepo teke edi mana re.

⁹ Naugna te kmana fara naikno na, mae Jisas ne chekedi nogna mae fanomhore mala tarabana kaisei mola ka mana, na eghunu kafe thugha mei naiknore me khapru tafruni eghu.

¹⁰ Mana neke fakelidi kmana naikno te fogra. Naugna igne naikno te fogra igre ne kafe thugha mei ka mana mala haboni mana.

¹¹ Keha naiknore au naitu tadi. Kate filoni mae Jisas na mare mei tuturupuku ke ulugna mana balu eha fabiꞌo, “Iagho thofno Thugna God.”

¹² Nu mae Jisas cheke faheta fara ka naiture mala thosei cheke thakleni mana mae ihei.

Mae Jisas ne vavahi nabotho phei mae khuru

¹³ Aonu, mae Jisas haghe ka kaisei thogele ne kilodi mae te magnahaghedi mana re. Kate mei mare ka mana na,

¹⁴ mana ne vavahi nabotho phei mae. Mae Jisas kilodi mae igre, mae khuru. Mana ne vahidi mae igre mala au balugna mana fabrahu. Eghuteuna mana kuru fajifladi mare mala tei toutonuni Nonomho te Keli na.

¹⁵ Mana jaola ne tusu ranghidi nolaghi te mala brue fajifladi naiture.

¹⁶ Igre nanghadi nabotho phei mae teke vavahi mana re: Mae Simon, mae ihei mana te kiloni mae Pita;

¹⁷ Mae Jemes ghe mae Jone, phia thugna mae Sebedi, mae Jisas kilodi phia mae igre Boanejis, gaoghathogna na, “Mae ihei te ghosei diꞌatagna”;

¹⁸ Mae Aduru, mae Filip, mae Batolomiu, mae Matiu, mae Tomas, mae Jemes thugna mae Alfius, mae Tadius, mae Simon mae ihei ka tothoghei te magnahaghei fajifladi mae Rom,

¹⁹ nei mae Judas Iskariot. Mae Judas gne mae ihei teke snakreni mae Jisas ka khamedi nogna mae naokare.

Mae Jisas au nolaghi ke kligna gna mae Satan

²⁰ Mae Jisas neke pulo mei ka nogna suga na. Ka vido tuana kmana naikno fara ne khapru mei ka mana. Aonu mae Jisas baludi nogna mae fanomhore ne theo kaisei vido narane te snagla te mala ima na.

²¹ Kate nomhini thoutonu igne, keha thabusigna mae Jisas re ne mei mala tathaleini mana, naugna keha naiknore ne cheke eghu, “Mae Jisas na la ghilei noli tutuani.”

²² Keha mae velepuhigna vetula nogna mae Moses funudi Jerusalem ne cheke eghu, “Filoni si ghotilo, mae Satan mae te kiloi Bielsebul na au ka mana. Mae Bielsebul gne mae funeidi naiture, mana tusu ranghini mana nolaghi te mala bruedi naiture.”

²³ Aonu, mae Jisas ne kilodi naiknore mala mei rhegnai mala toutonu ranghidi kau cheke naba. Mana ne cheke eghu ka mare, “Mae Satan na theome tangomana te bruedi nogna naikno thegna re.

²⁴ Filo si ghotilo, jame naiknogna kaisei namono magra fari thedi, namono tuana theome tangomana te au raugha.

²⁵ Ba, jame kaisei tharakna magra fari thedi, tharakna tuana ginauna theome au fakeli kolho.

²⁶ Eghume jateula tuana eghu, jame mae Satan magra baludi nogna naikno thegna re, mare na theome au raugha. Tuana ngala leghu lahu gna mae Satan na.

²⁷ Jateula tuana eghu theome tangomana kaisei naikno te ruma ka nogna suga mae te nheta na te blau nogna glepore. Mana na kulu haru famaku mae te nheta na ame tangomana nga mana te ruma ka suga na te blau nogna famane glepo manare.

²⁸ Tutuani fara, te chekeni iara ka ghotilo na. God tangomana te hata fadelei thua nakhibo nei thua nafnata cheke te diꞌa te edi naiknore ranghini God.

²⁹ Nu ihei te cheke faparini mae Tharunga te Blahi na, God ginauna na theome hata fadelei nakhibogna mana re, nu nakhibo tuare na au fabrahu ka mana tifa tifa.”

³⁰ Mae Jisas ne chekeni igne, naugna keha mae velepuhigna vetula nogna mae Moses gre neke cheke eghu, “Kaisei naitu au ka mana.”

Iheire te thofno idogna nei tahigna mae Jisas

³¹ Aonu, idogna nei tahigna teu mae Jisas gre ne posa mei. Mare kegra kosi ne kurudi keha naikno ne tei lamna suga mala fachekeni mana jifla mei kosi.

³² Kmana naikno te gnokro ligohoni mana. Mare ne cheke eghu ka mana, “Idomu nei thabusimu teu iagho re ofo nighou kosi.”

³³ Mae Jisas ne ghusna eghu ka mare, “Ihei idogu iara na? Iheire mae thabusigu iara re?”

³⁴ Aonu mae Jisas ne filo ka naikno te gnokro faligohoni teu mana re ne cheke eghu, “Igre ngala jateula idogu nei mae thabusigu teu iara re!

³⁵ Ihei te eni unha te magnahagheni God na ngala te thofno thabusigu nei greghagu nei idogu teu iara na.”