Nonomho Te Keli Teke Risoi Mae Mak 2 - Buka Blahi Ka Cheke Holo

Mae Jisas neke fakelini kaisei mae te blughu

¹ Keha narane ke leghugna igne mae Jisas neke pulo Kapanam, naiknore nomhini mana au teu ka nogna suga na.

² Aonu kmana naikno ne khapru mei ka suga na, theo kaisei vido te snagla. Naiknore fodu funu ka grengatha na posa kosi. Eghuteuna kate toutonu mae Jisas chekegna God na ka naiknore,

³ hatimare fati mae pala ne mei kaisei mae te blughu.

⁴ Nu mare theome tangomana te palani mana te mei ka mae Jisas na naugna ne kmana fara naikno na. Aonu mare pala ne haghe ke tagru suga ne hohoro kaisei khora ghoghodogna te au mae Jisas na. Eghume mare ne farurhu soruni mana balugna nogna sape na ke ulugna mae Jisas.

⁵ Kate filo glanini mae Jisas nodi fatutuani biꞌo mare na, mana ne cheke eghu ka mae te blughu na, “Ghema kheraguo, iara la hata fadeleihi nakhibomu iagho re.”

⁶ Aonu ka vido tuana keha mae velepuhigna vetula nogna mae Moses te kegra la teu jare ne ghaoghatho eghu ka nagnafadi thedire,

⁷ “Tore! Eigna unha si mae igne te thono cheke faparini God gnea? Theo kaisei naikno te tangomana te hata fadelei nakhibo na, kaisei thegna God ngala!”

⁸ Mae Jisas ghosei ne lasedi unha te ghathoni mare ka nagnafadire ne cheke eghu ka mare, “Naugna unha site au mei nafnata gaoghatho igre ke lamnami ghotilo ia?

⁹ Thono bligi fara te cheke eghu na, ‘Thuguo, iara la hata fadeleihi nakhibomure’, naugna theo kaisei naikno tangomana te filoni te au nolaghi ka iara te mala eni gloku igne. Nu ninhigrana fara te cheke eghu na, ‘Kegra haghe, hata nou khifra na tei,’ naugna naikno na tangomana te filoni jame te au nolaghi iara te mala eni igne.

¹⁰ Nu gognarona iara na falase arini ka ghotilo, iara mae teke mei funu ka God na au nolaghi ka nauthoglu igne te mala hata fadeleidi nakhibo!” Aonu mae Jisas ne cheke eghu ka mae te blughu na,

¹¹ “Te chekeni iara ka iagho na, kegra haghe. Hata nou khifra na tei ka sugamu na!”

¹² Mae te blughu igne ghosei kegra haghe kate kafe filo teu naiknore. Aonu mana hata nogna khifra na ne jifla ka suga tuana. Kate filoni glepo igne, naiknore thono jaglo nodi fara ne kilo fnaknoni God. Mare ne cheke eghu, “Icho idomi, tifa te mei na tahati neke theome filoni kaisei glepo jateula igne teuna!”

Mae Jisas ne kiloni mae Livae

¹³ Mae Jisas neke puloi rhegna Kholo Galili. Kmana naikno ne kafe khapru mei ka mana, eghuteuna mana ne farirhiudi jare.

¹⁴ Kate ratha te tei na, mana ne filoni mae Livae thugna mae Alfius gnokro neu ka vido mala foli takis na naugna mana loku jare. Mae Jisas ne cheke eghu ka mana, “Ghema, mei leghu ghau iara, iagho mala nogu mae fanomho iara.” Mae Livae kegra haghe ne leghuni mae Jisas.

¹⁵ Ke leghu, ka narane tuana mae Jisas ne ghamu ka sugagna mae Livae. Kmana mae te diꞌa mala salo takis nei keha mae te diꞌa langau te leghuni fabrahu mae Jisas, nei keha mae te diꞌa teu igre mei ne ghamu balugna mana, eghuteuna hatimare nogna mae fanomhore.

¹⁶ Nu keha mae velepuhigna vetula te mae Farasi igre ne filoni mae Jisas te ghamu baludi naikno te diꞌa igre. Aonu mare ne cheke eghu ka nogna mae fanomho mana re, “Naugna unha si mana te ghamu baludi mae te diꞌa te salo takis nei keha naikno te diꞌa teu igrea?”

¹⁷ Kate nomhini mae Jisas igne, mana ne cheke eghu ka mare, “Ghotilo laseni igne, naikno te kelire tirodi tei filoni mae dokta. Nu naikno te fogra re ngala te magnahaghei tei filoni mae dokta na. Eghume iara gne theome mei mala kilodi naikno te doglohi ke ulugna God te mala leghu ghau iara, nu iara mei mala kilodi naikno te diꞌa gre mala tughu nagnafa.”

Vetula gna tifa na theome tangomana te nhaꞌa fodu ka vetula majaghani

¹⁸ Kaisei narane, nogna fanomho mae Jone Apublahi nei mae Farasi theome ghamu naugna mare dangna. Aonu keha naiknore ne mei cheke eghu ka mae Jisas, “Nogna fanomho mae Jone Apublahi nei nodi fanomho mae Farasi gre eghu dangna. Naugna unha si nou mae fanomho iagho te theome dangna grea?”

¹⁹ Mae Jisas ne cheke eghu ka mare, “Ba, keliu ngala naikno te au ka gaghamu tholaghi na te theome ghamu na? Theome tangomana! Kate au teu mae tholaghi na baludi mae kheragnare, mare theome tangomana te dangna na.

²⁰ Nu narane te mala tei kokodi mae te tolaghi na mae kheragnare ginauna na mei. Aonu ame tangomana nga mare te dangna eghu. Jateula tuana eghu kate au teu iara agne baludi nogu mae fanomhore, mare ginauna na theome dangna eghu.

²¹ “Theome tangomana tahati te hata nabreku pohe majaghani na te susuki fodu ka pohe tiatifa tela korahi na. Te eghu tahati na, kate titihi na, nabreku pohe majaghani tuana ginauna rerheku ngala keha pohe tiatifa tuana. Eghuteuna khora tuana ginauna na biꞌo uluni tifa na.

²² Eghuteuna igne keha glepo na eghu, tahati theome tangomana te totoho waen majaghani na kau duku tiatifa teke hohoro kau guli buluka te mala tathaji na. Naugna kate raha waen majaghani na duku tiatifa te mala totoho waen tuana ginauna popoto nei breku, eghuteuna waen balugna duku na repa ginauna na kafe diꞌa. Eghume tahati totoho koba waen majaghani na kau duku majaghani.”

Mae Jisas mae funei gna narane Sabat

²³ Kaisei narane Sabat mae Jisas ne tei sala'u kau nagare wit. Eghuteuna nogna mae fanomho mana re ne funu ukli keha wit.

²⁴ Mae Farasi ne filoni igne ne cheke eghu ka mae Jisas, “Sei, filo sagho! Naugna unha si nou mae fanomho iagho gre te eni unha te blahi fara kau narane Sabat gnea?”

^25-26 Mae Jisas ne cheke eghu ka mare, “Ba, ghotilo neke theome iu'ijuni ngala si unha teke eni mae King Devet ka teke mae pris biꞌo mae Abiata ia? Kau narane tuana mae Devet nei mae kheragnare eghu neke theo gano neke rofo. Eghuteuna mae Devet tei ne ruma ka sugagna God na, ne ghamu bret blahi na. Eghuteuna mana ne tusu lao la ka mae kheragnare. Nu ka vetula na kaisei mae pris ngala tangomana te ghamu na bret tuana.”

²⁷ Aonu, mae Jisas ne cheke eghu ka mae Farasi igre, “Narane Sabat gne, God neke eni mala toghodi naiknore. Nu mana neke theome eni narane Sabat na mala funei frunidi naiknore.

²⁸ Eghume iara mae teke mei funu ka God gne ngala mae funei gna narane Sabat na.”