Nonomho Te Keli Teke Risoi Mae Mak 16 - Buka Blahi Ka Cheke Holo

Mae Jisas neke karha fapulo

¹ Kate gnafa narane Sabat na, Meri gna Makidala nei Salome nei Meri idogna mae Jemes ne foli keha sedi mala tofa ka thinigna mae Jisas na.

² Hamerane boibongi kau narane Sade, kate phage naprai na, goro gaꞌasere ne tei mala thoke ka gluma na.

³ Rehati ne ghusna eghu fari thedi, “Ba, ihei nate togho ghita tahati te mala pili fadelei thina biꞌo teke fofothogna gluma na?”

⁴ Nu kate posa lao rehati kau gluma na, rehati ne filoni thina te biꞌo fara na la kulu pili fadeleihi.

⁵ Rehati ruma ka gluma na ne filoni kaisei mae majaghani te fahaghe phoko vegha gnokro neu ka gluma na. Mana gnokro neu fei nhetadi reꞌe. Rehati filoni mana ne mhaghu nodi fara.

⁶ Mae majaghani igne ne cheke eghu ka reꞌe, “Thosei mhaghu. Iara lase ghami ghotilo, ghotilo mei hironi mae Jisas gna Nasaret, mae ihei teke tupijuruni mare kau gaju fafatha ia. Mana theome au agne, mana na kela karha fapulohi. Mei si ghotilo agne mala filoni vido aheva mare teke liliseini mana na.

⁷ Gognarona ghotilo ke pulo ka mae fanomho ra mala cheke eghu ka mare nei ka mae Pita, ‘Mae Jisas na tei ke ulumi ghotilo Galili. Ghotilo ginauna na filoni mana jare, jateula teke chekenihi mana ka ghotilo tifa ia eghu.’ ”

⁸ Rehati rikha ne jifla ka gluma na, naugna reꞌe ne faꞌihodi fara ne fififri balu mhaghu. Nu reꞌe ne theome toutonuni kaisei glepo ka ihei nga, naugna reꞌe ne mhaghu nodi fara.

Mae Jisas ne thakle ka nogna mae fanomhore

⁹ Kate karha fapulo hamerane Sade na, mae Jisas ne kulu thakle ka Meri Makidala. Thau teke brue fajifladi mana fitu naitu teke au ka naꞌa tifa ra.

¹⁰ Ke leghugna te filoni mae Jisas na, Meri tei ne toutonu ka mae fanomhore. Ka vido tuana mare au diꞌanagnafa nei tanhini mae Jisas.

¹¹ Kate nomhini mare cheke naꞌa ne filoni mae Jisas na kela karha fapulohi teu igne, mare ne theome fatutuani ni kolho naꞌa.

¹² Aonu, ke leghugna igne, mae Jisas ne thakle ka phia nogna mae fanomhore, kate nolo te tei phiamare ka nabrou ke kosi gna namono na. Nu mae Jisas na theome jateula teke tifa ia neu fifilogna na.

¹³ Phiamare figri neke toutonu ka keha mae fanomhore. Eghuteuna mae fanomhore jaola ne theome fatutuanidi kolho nodi cheke phiamare re.

¹⁴ Ke leghu na mae Jisas mei ne thakle ka nabotho kaisei mae fanomhore, ka vido te ima teu mare na. Mana mei ne cheke faheta ka mare, naugna mare ne theome biꞌo nodi fatutuani na. Mare ne maku fara nagnafadire ne theome fatutuanidi iheire teke filoni mana ke leghugna teke karha fapulo mana ka glehe na.

¹⁵ Mae Jisas ne cheke eghu ka mare, “Ghotilo jifla tei heva heva kau nauthoglu gne, mala toutonuni Nonomho te Keli na ranghidi naikno fateote'o.

¹⁶ Ihei te fatutuani ni Nonomho te Keli na, eghuteuna apublahi teuna ginauna na hatini karha fei tifa na. Nu ihei te theome fatutuani na, God ginauna na fate faleheni mana.

¹⁷ Eghuteuna iheire te fatutuanire, God ginauna tusu ranghidi nolaghi, mala tangomana mare ei kofubobhoi. Mare ginauna tangomana te brue naitu ka nanghagu iara. Eghuteuna mare ginauna cheke ka keha nafnata cheke majaghani teke theome laseni mare tifa na.

¹⁸ Mare ginauna na loku mogo te faghughumhu, ba koꞌu phinu raha, mare ginauna na theome lehe. Mare ginauna habo khamedire ke klignadi naikno te fogra re, eghuteuna naikno te fogra re ginauna nake keli fapulo.”

Mae Jisas neke pulo kligna

¹⁹ Kate gnafa cheke Lord Jisas ka nogna mae fanomhore, God ne hata hagheni mae Jisas kligna. Eghuteuna mana gnokro fei nhetagna God.

²⁰ Ke leghugna igne, mae fanomhore jifla ne tei heva heva ka nauthoglu gne ne toutonuni Nonomho te Keli na ka naiknore. Eghuteuna Lord thegna ne loku baludi mare, mala farerheta unha te cheke mare re, ka thua nafnata kofubobhoi ka nogna nolaghi na.