Nonomho Te Keli Teke Risoi Mae Mak 15 - Buka Blahi Ka Cheke Holo

Mae Jisas ke ulugna mae Paelat

¹ Hamerane boibongi hatimare mae pris ulu, hatimare mae velepuhigna vetula nogna mae Moses nei hatimare goro mae biꞌo nei hatimare mae tothoghei fate eghure ne rogheni unha nate eni ka mae Jisas na. Aonu hatimare haru fodu phia khamegna mae Jisas re ne hata ne tei snakre lao ka mae Paelat.

² Mae Paelat ne ghusna eghu ka mae Jisas, “Ba, iagho thofno nodi King mae Jiu gre sia ghema?” Mae Jisas ne cheke eghu ka mana, “Uve, te chekenihi iagho tuana.”

³ Aonu hatimare mae pris ulu gre kmana glepo te fathoro lao ka mana na.

⁴ Eghuteuna mae Paelat neke ghusnai ka mae Jisas, “Naugna unha site theome cheke tughu iagho gnea? Filo sagho, kmana glepo naikno igre te fathoro ari ka iagho na!”

⁵ Nu mae Jisas ne theome ghagrini kaisei cheke. Aonu mae Paelat ne jaglo nogna fara ka igne.

Mae Paelat ne fateni mae Jisas

⁶ Leuleghu Gaghamu Ghasa-Polho na, naiknore tangomana te tore ka mae Paelat te mala hata fajifla kaisei naikno sosolo. Eghuteuna mana eni koba tuana leuleghu finogha na.

⁷ Kaisei mae, nanghagna na Barabas, mana au ka suga sosolo baludi iheire teke falehe naikno kau magra teke eni mare ranghini gavman.

⁸ Naiknore ne mei tore ka mae Paelat mala hata fajifla kaisei mae sosolo, leghuni nafnata puhi te eni koba mana na.

⁹ Mae Paelat ne ghusna eghu ka mare, “Ba, ghotilo magnahaghei ghau iara te mala hata fajifla ranghi ghami ghotilo nodi King mae Jiu gre sia?”

¹⁰ Mae Paelat lasenihi mae pris ulu gre hatani mae Jisas teke mei ka mana na, naugna mare neke goghotuni mae Jisas.

¹¹ Nu hatimare mae pris ulu gre ne huhurudi naiknore mala toreni mae Paelat mala hata fajiflani mae Barabas ranghidi.

¹² Mae Paelat neke ghusna eghui ka naiknore, “Jame te hata fajiflani iara mae Barabas gne na, na faꞌunhani eghu si iara mae te kiloni ghotilo nodi King mae Jiu teu ignea?”

¹³ Mare ne eha eghu fapulo ka mae Paelat, “Tupijuruni ka gaju fafatha!”

¹⁴ Aonu, mae Paelat ne ghusna eghu ka mare, “Naugna unha te mala faleheni iara mae igne? Unha najafra biꞌo teke eni mana na?” Mare ne kafe thagru eghu fabiꞌo fara, “Tupijuruni ka gaju fafatha!”

¹⁵ Mae Paelat magnahaghei te keli tadi naiknore ne hata fajiflani mae Barabas. Eghuteuna mae Paelat ne chekedi mae soldiare mala purini mae Jisas. Aonu mae Paelat ne snakre laoni mae Jisas mala tupijuru ka gaju fafatha.

Mae soldiare ne maꞌeni mae Jisas

¹⁶ Nogna soldia mae Paelat igre hatani mae Jisas ne tei ka glalabagna suga biꞌo mae Paelat na. Mare ne kafe kilo fodudi tothoghei mae soldia te gnafare.

¹⁷ Mare ne fapoko lao kaisei phoko ukru ka mae Jisas. Aonu, mare ne horo kaisei khepi fifiriulu ne lilisei lao ka pha'ugna mae Jisas na.

¹⁸ Ke leghugna igne mare ne eha eghu fabiꞌo ka mana, “Cheke fakeli nigho, iagho nodi King hatimare mae Jiu!”

¹⁹ Mare ne hata kaisei gaju ne puphuri kmana fata ka pha'u mae Jisas na. Mare ne kmisu ka mana. Aonu mare ne maꞌeni mana, eghuteuna mare tuturupuku ne pogho soru ke ulugna mana.

²⁰ Ke leghugna te maꞌeni mana na, mae soldiare ne salo koko phoko ukru na ka mana, eghuteuna ke falao nogna phoko thegna re. Aonu mare ne tathalei fajiflani mana ka suga biꞌo na hata ne tei mala tupijuruni kau gaju fafatha.

Mare ne tupijuruni mae Jisas

²¹ Kate tei ka nabrou na, mare tei ne thafoni kaisei mae gna Saerini, mana mei funu ke kosi Jerusalem. Mae igne nanghagna na mae Simon, kmadi mae Aleksada ghe mae Rufas. Eghuteuna mae soldiare ne huhuruni mana mala pala nogna gaju fafatha mae Jisas.

²² Mare hatani mae Jisas ne tei thoke ka kaisei vido te kiloi Golgota. Ka cheke tahati na “Vido Korongosa”.

²³ Jare mae soldiare ne fako'uni mae Jisas ka waen te ngigno balu meresin te kiloi mur. Nu mae Jisas ne tirogna ko'uni.

²⁴ Mae soldiare ne tupijuruni mae Jisas kau gaju fafatha na. Aonu mare ne tufa nogna pohe manare fari hoteidi thedi. Mare ne lalahu khale mala laseni mae ihei nate hata vido aheva na.

²⁵ Tanhi nhevai hamerane mare ne tupijuruni mae Jisas.

²⁶ Grioriso eigna nodi fathoro mare ranghini mae Jisas na igne, “NODI KING HATIMARE MAE JIU.”

²⁷ Jaola hatimare ne tupijuru balugna mae Jisas phia mae teke blau. Kaisei mae fei nhetagna nei kehana fei mairigna.

²⁸ Igne ne horoghoto ka teke cheke eghu ka grioriso te blahi ia, “Mana ne baludi mae teke blaure.”

²⁹ Naikno te sala'u jare na thono ngingiridi fara ne naghoni mae Jisas. Mare ne bliubliu pha'udire ne cheke eghu, “Ao sao! Ghema, iagho neke chekeni iagho tangomana te paꞌe soru Sugablahi na, eghuteuna ke babana fapulo ke lamnadi thilo narane teku ia!

³⁰ Soru mei sagho ka gaju fafatha na gognarola mala fakarhi nigho themu!”

³¹ Hatimare mae pris ulu nei hatimare mae velepuhigna vetula nogna mae Moses teu igre ne aula neu jare. Mare jaola ne maꞌeni mae Jisas ne cheke eghu fari thedi, “Tore! Mana fakarhidi keha naiknore kolho, nu mana theome tangomana te fakarhini thegna na!

³² Lisa laoni mae Kraes nodi King mae Israel ana, mala soru mei ka gaju fafatha na gognarogne. Jame te filoni tahati igne na, tahati ginauna na fatutuani ni mana!” Keha phia mae teke blau te tupijuru balugna mana re ne jaola ne cheke faparini mana.

Glehegna mae Jisas

³³ Tanhi nabotho phei fari hotei naublatha, namono te gnafa kau nauthoglu igne ne kafe romno soru ne ghilei posa ka tanhi thiloi fei grafi.

³⁴ Tanhi thiloi mae Jisas ne eha eghu fabiꞌo, “Eli, Eli, lema sabakatani?” Gaoghathogna na, “Nogu God, nogu God, naugna unha sagho te tei koko ghau iara gnea?”

³⁵ Keha naikno te kegra teu jare na ne nomhini igne ne cheke eghu, “Fanomho! Mana kiloni mae profet Elija!”

³⁶ Kaisei mae jare chari ne tei balugna kaisei phocho ne titihi ka waen te raha na ne chuchuru ka fora na. Aonu mana ne tusu haghe ka phepeogna mae Jisas na mala koꞌu mana. Mana ne cheke eghu, “Tahati ofou mala filo nodani, glahula me mei mae Elija mala hata soruni mana kau gaju fafatha na!”

³⁷ Mae Jisas ne tanhi fabiꞌo ne lehe.

³⁸ Kate lehe mae Jisas na, pohe biꞌo teke fagegefe ke lamnagna Sugablahi te mala fofotagna vido te blahi fara na ne breku pea funu kligna thoke pari.

³⁹ Kaisei mae funeidi hatimare mae armi na kegra neu jare ke ulugna gaju fafatha na, filoni unha te eni kate lehegna mae Jisas na. Mae funeidi hatimare mae armi gre ne cheke eghu, “Tutuani fara, mae igne ngala mae thofno Thugna God na!”

⁴⁰ Keha gaꞌase langau kegra filo mei neu delei. Baludi Meri gna Makidala nei Salome nei Meri idodi mae Joses ghe mae tahigna Jemes.

⁴¹ Thilo gaꞌase igre neke leghuni mae Jisas mala toghoni mana ka teke tei faligoho mana Provins Galili. Kmana gaꞌase langau teke mei balugna mana Jerusalem.

Giugilu gna mae Jisas

⁴² Igne narane mala tarabana. Naugna keha narane na narane Sabat. Eghuteuna gognaro na la namo romnohi.

⁴³ Kaisei mae nanghagna na mae Josep mae gna Arimatea mana frane ne tei ka mae Paelat ne toreni thinigna mae Jisas na. Mana kaisei mae biꞌo ka tothoghei mala fate na. Eghuteuna mana kaisei mae te ofoni fabrahu teu narane te mala funei frunidi God nogna naiknore.

⁴⁴ Mae Paelat ne jaglo nogna fara kate nomhini ghosei te lehehi mae Jisas na. Aonu, mana ne kiloni mae funeidi mae armi re ne ghusnani mana glahula lehe tutuani hi mae Jisas.

⁴⁵ Mana ne cheke eghu ka mae Paelat, “Uve mana la lehehi.” Kate nomhini mae Paelat nogna cheke tughu mae funeidi mae armi gre, mana ne snakreni ka mae Josep thinigna mae Jisas na.

⁴⁶ Mae Josep ne foli keha pohe vegha, ne hata soru thinigna mae Jisas na ka gaju fafatha na, ne pipiha ka pohe tuana. Mana ne lilisei thinigna mae Jisas na ka gluma teke jou mare kau thina tataba na. Aonu mana ne pili lao kaisei thina biꞌo mala fofothogna gluma na.

⁴⁷ Eghuteuna Meri gna Makidala ghe Meri idogna mae Joses gre neke filoni aheva teke lilisei gna mare thinigna mae Jisas na.