Nonomho Te Keli Teke Risoi Mae Mak 13 - Buka Blahi Ka Cheke Holo

Mae Jisas ne cheke eigna u Sugablahi nate paꞌe mare na

¹ Kate jifla mae Jisas ka Sugablahi na, kaisei mae ka nogna mae fanomho mana re ne cheke eghu ka mana, “Velepuhi, filo sagho ka famane suga balu thina biꞌo ka Sugablahi na are!”

² Mae Jisas ne cheke eghu ka mana, “Filo sagho ka suga biꞌo are! Nu te chekeni iara ka iagho na, thina biꞌo are ginauna na phaꞌe soru thofa tafri. Eghuteuna ginauna na theo kaisei thina nate au teu ka teke au gna gognaro gne.”

Kmana puhi biꞌo fara ginauna mei

³ Ke leghugna igne, mae Jisas ne gnokro neu ka Thogele Gaju Olivi, fei te kakhana Sugablahi na. Mana au sopa neu baludi mae Pita, mae Jemes, mae Jone, nei mae Aduru. Mare ne cheke eghu ka mana,

⁴ “Ba, niha nau si thoke meidire glepo igrea? Unha fagaglana nate edi te mala laseni glepo igre la namo meihi teuna?”

⁵ Mae Jisas ne cheke eghu ka mare, “Fiofilo ghami, na eghunu mei chaghi ghami mare eghu.

⁶ Naugna kmana naikno ginauna na mei ka nanghagu iara, na cheke eghu ka ghotilo, ‘Iara ngala mae Kraes na!’ Eghuteuna kmana naikno ginauna na fatutuanidi mare.

⁷ Kate nomhidi ghotilo naogladi magra rhemi re, thosei nanga nomi fara. Glepo igre mala kulu thoke mei, nu narane leghu lahu na theome thoke mei au.

⁸ Naiknogna kaisei namono na ginauna na kegra haghe magra ka naiknogna keha namono na. Eghuteuna naiknogna kaisei nohi na ginauna na kegra haghe magra ka naiknogna keha nohi na, heva heva kau nauthoglu igne. Namono te kmana ka nauthoglu na igre ginauna nghali tongana ka nakheu biꞌo. Eghuteuna naiknogna nauthoglu igne ginauna theome naba ghedi gano te mala ghamu na. Glepo igre na jateula khabru ulu lahu te eni gaꞌase te namo fakarha sua majaghani ia eghu.

⁹ “Fiofilo fakeli ghami ghotilo ia. Naugna naiknore ginauna na hata ghami ghotilo tei ka fate. Mare ginauna na puri ghami ghotilo ke lamna suga tharai. Mare ginauna na huhuru ghami ghotilo mala kegra ke uludi mae funei ba hatimare mae King. Mare ginauna na edi glepo igre ka ghotilo, naugna ghotilo ne leghu ghau iara. Eghuteuna ghotilo ginauna na toutonuni Nonomho te Keli na ka mare.

¹⁰ Nu ghotilo kulu toutonu Nonomho te Keli gne ka naikno te gnafare ame thokei mei nga narane leghu lahu na eghu.

¹¹ Nu kate hata ghami mare te kegra ka fate na, thosei kulu nanga nomi eigna unha nate chekeni na. Chekeni kolho unha te tusu ari God ka ghotilo te mala chekeni ka narane tuana. Naugna theome ghotilo themi te mala cheke na, nu mae Tharunga te Blahi ginauna togho ghami ghotilo te mala cheke na.

¹² Eghuteuna naiknore ginauna na snakre lao kheradi thedire ka mae naokare mala falelehe mare. Eghuteuna mae kmadire na eghu dila thudire, nei thudire na eghu dila kmadi nei idodi teure kau glehe.

¹³ Naikno te gnafa gre ginauna tirodi ghami ghotilo, naugna ghotilo ne nogu iara. Nu God ginauna na fakarhidi iheire te au famaku ka nodi fatutuani na ghilei thokeni narane nate gnafa gna naꞌau papara na.”

Unha glepo nate eni ka namono Jerusalem

¹⁴ Mae Jisas ne cheke eghu, “Ghotilo ginauna filoniu kaisei glepo te diꞌa fara ginauna kegra ka vido aheva te theome nabagna te mala au na.” (Iagho mae ihei te iu'ijuni igne lase fakelini gaoghathogna na.) “Kau narane tuana naikno te au ka Provins Judia are na rikha tei mala poru ka thogele gro.

¹⁵ Ihei te au teu ka thagrugna nogna suga na, thosei soru pari mala tei hata fajifla kaisei glepo ka nogna suga na.

¹⁶ Ihei te au teu ka nagare na thosei ke pulo mala tei ke hata nogna pohe na.

¹⁷ Kau narane tuana kokhonidi fara goro gaꞌase te bukla, ba te au thudi te chuꞌu teu!

¹⁸ Nu ghotilo tarai mala theome kahi ghami glepo igre kau nhigra khoburu na.

¹⁹ Naugna puhi igne ginauna na biꞌo fara, ke uludi puhi teke edi tifa funu ka teke vuvuhagna God nauthoglu igne te posa gognaro gne. Eghuteuna ginauna na theo kaisei puhi jateula la igne teuna.

²⁰ Jame theome hata kokohi God keha narane meuna, ginauna na theo kaisei naikno te karha na. Nu naugna God ne ghathodi naikno teke vavahi thegna igre ne hata kokohi keha narane.

²¹ Ka narane tuana, keha naikno jame cheke eghu ka ghotilo, ‘Filo, mae Kraes na igne!’ Ba, ‘Filo, mana na igno!’ Ghotilo thosei fatutuani di naikno tuare.

²² Naugna mae Kraes chaichaghi nei mae profet chaichaghi teure ginauna na thakle mei. Eghuteuna mare ginauna na eꞌei kmana fagaglana, nei kmana kofubobhoi mala fariuriu chaghidi naikno teke vavahi God. Nu theome tangomana te chaghidi.

²³ Eghume fiofilo ghami eghu. Iara kulu chekedi ka ghotilo glepo igre gognaro na ame thoke mei nga reꞌe eghu!”

Ke pulo meigna mae teke mei funu ka God

²⁴ Mae Jisas ne cheke eghu, “Ke leghugna narane te mei puhi biꞌo igne, “ ‘Naprai na ginauna romno soru. Glaba na ginauna theome agha.

²⁵ Nathunure ginauna khoko soru funudi ka maloa na. Aonu gobigna lepo te au ka maloa na are ginauna thugha tafri.’

²⁶ “Ke leghugna igne, mare ginauna filo ghau iara te soru mei ke kligna grokho balu nolaghi nei nafnakno te biꞌo.

²⁷ Iara ginauna kurudi nogu tothoghei engel mala tei ke maghati, nei ke mosu, nei ke raru, nei ke mata. Mare ginauna salo fodu naikno teke kulu vavahi God Mama heva heva kau nauthoglu igne.”

Hata gaoghatho kau gaju fig ia

²⁸ Mae Jisas ne cheke eghu ka mare, “Famane fanomho fakeli ghotilo ia kau farirhiu te laseni tahati kau gaju te kilo fig ia. Kate funu kotu seke gregegnare nei ke fufusa majaghani khaklagnare teuna, ghotilo laseni hila finogha majaghani na la namohi.

²⁹ Eghume jateula tuana teu te filodi ghotilo glepo te edi igre, ghotilo ginauna laseni meigu iara na la namohi.

³⁰ Tutuani fara te chekeni iara ka ghotilo na! Gobigna lepo te gnafa igre ginauna thoke mei kate theome lehe nga teu naikno te karha teu gognaro gre.

³¹ Maloa ghe nauthoglu gre ginauna na hui kolho, nu chekegu iara na ginauna na theo ka huigna.”

Mae Jisas gne nake mei niha nau?

³² “Tuani fara, theo kaisei naikno te raꞌe laseni narane mala ke pulo meigu iara na. Iara nei engel klignare eghu theome laseni la. Kaisei mae Mama thegna ngala te laseni na.

³³ Eghume, fiofilo fakeli ghotilo ia, eghuteuna leuleghu fata na ghotilo tarabana fabrahu naugna ghotilo theome lasedi narane di glepo igre.

³⁴ Ginauna na jateula kaisei mae funei tarabana te mala tei ka keha namono delei ia eghu. Ame tei kokoni nga nogna suga na teuna, mana ne lisa lao gobigna lepore ka khamedi nogna mae glokure mala reireghi mare. Mana ne tufa soasopagna gloku ranghidi mare. Kaisei mae mala reireghi grengatha mala fiofilo fakeli.

³⁵ Jateula tuana eghu ghotilo ia mala fiofilo fakeli, naugna ghotilo theome laseni vido narane mala ke pulo meigna mae khoto suga na. Glahula mei fei grafi, ba fari hotei bongiro, ba tanhi khokorako, ba ka phage naprai.

³⁶ Glahula ghosei mei mana, filo ghami ghotilo kate theome tarabana te thuru iho teu ghotilo na.

³⁷ Eghume unha te chekeni iara ka ghotilo gognaro gne iara na chekeni la ka naikno te gnafare. Fiofilo fakeli ghotilo ia!”