Nonomho Te Keli Teke Risoi Mae Mak 12 - Buka Blahi Ka Cheke Holo

U cheke nabadi naikno te diꞌa te loku ka kaisei nagare

¹ Ka narane tuana mae Jisas ne funu cheke ranghidi ka keha cheke naba. Mana ne cheke eghu, “Kaisei fata, kaisei mae khoto glose ne joꞌu kaisei nagare. Mana bara faligohoni nagare na nei dokha kaisei khora mala poji sisi grep mala eni waen. Aonu, mana babana kaisei suga ikoi kligna mala toetoe. Gnafa teuna, mana snakre lao nagare igne ka hatimare mae greireghi nagare mala loku. Aonu, mana jifla ne tei au ka keha namono delei fara.

² Kate thokeni ghanogna nagare na, mana ne kuru teini kaisei nogna mae gloku mala tei ka mae greireghi nagare gre mala hata keha ghegna sisi.

³ Nu mae greireghi nagare igre kegra haghe ne aknini mae gloku igne ne tirodi tusu lao kaisei grep ka mana neke kuru fapuloni kolho.

⁴ Ke leghugna igne mae funei na neke kuru teini keha nogna mae gloku na. Gognaro na mare ne faghorehoni mana ka pha'u na, eghuteuna goigoni ni mana.

⁵ Ke leghugna igne mae funei na neke kuru teini la kaisei nogna mae gloku, nu mare faleleheni kolho mana. Kmana nogna mae gloku mana re kafe eghudi ne gnafa ngala, kehare puphuri nei kehare falelehe.

⁶ “Aonu mae funei na au kaisei mae ngala mala kuruni na. Tuana ngala thofno mae thugna te namhani fara mana na. Leghu lahu na mae funei na ne kuru teini mae thofno thugna na ka mare, ne cheke eghu, ‘Uve, mare ginauna ghatho tahuni mae thugu iara gne.’

⁷ “Nu mae greireghi nagare igre ne cheke eghu fari thedi, ‘Igne thofno thugna mae khoto nagare ia. Mei ghotilo mala falehe nodani, mala ke khotogna theda u nagare igne!’

⁸ Aonu, mare ne lokini mae igne ne faleheni mana. Eghuteuna mare ne koko fajiflani mana ke kosigna nagare na.”

⁹ Mae Jisas ne ghusna eghu ka mare, “Eghume, unha nate eni mae khotogna nagare na? Mana ginauna na tei ka nagare na mala falehedi mae greireghi nagare igre. Aonu mana ginauna na snakre lao nagare igne ka keha mae greireghi nagare delei ngau mala reireghi mare.

¹⁰ Ghotilo neke iu'ijunihi grioriso te blahi te cheke eghu ia: “ ‘U thina teke tirodini mae iheire te horo suga na, kela kegra haghe kaisei thina ulu fara ka suga na.

¹¹ Glepo igne Lord teke eni gna na, thofno keli fara ka tahati filogna na.’ ”

¹² Mae biꞌodi mae Jiu gre magnahagheni fara te lokini mae Jisas, naugna mare laseni cheke naba te eni mana igne chekedi kolho mare. Nu mare ne mhaghudi naiknore, aonu mare jifla kokoni mana ne tei nodi.

Gusna eigna foli takis

¹³ Ke leghugna igne, mae biꞌodi mae Jiu gre ne kuru meidi keha mae Farasi nei keha mae te leghuni mae King Herod eghu, ne mei ka mae Jisas. Mare magnahaghei te saosagroni mae Jisas mala cheke fajafra mana.

¹⁴ Aonu, mare mei ne ghusna eghu ka mana, “Mae Velepuhi, ghehati lase nigho iagho kaisei mae te cheke koba kate tutuani. Iagho theome mhaghudi unha nafnata gaoghatho te edi naiknore eimu iagho na. Neubane mae biꞌo, iagho farirhiuni ngala unha te tutuani eigna God. Ba, keliu ngala te foli takis tahati ka mae Sisa na? Ba theo?” Mae Sisa gne mae king biꞌo gna Rom.

¹⁵ Nu mae Jisas ne laseni unha mae igre te magnahaghei saosagro na. Mana ne cheke eghu ka mare, “Naugna unha site magnahaghei saosagro ghau iara ghotilo gnea? Hata mei sileni na mala filoni iara.”

¹⁶ Mare ne tusu lao kaisei sileni ka mana, mana ne ghusna eghu ka mare, “Thotoghale gna nei nanghagna eghu mae ihei te filodi ghotilo ka sileni na igrea?” Mare ne cheke eghu ka mana, “Mae Sisa.”

¹⁷ Mae Jisas ne cheke eghu ka mare, “Uve, tusu fapulo ka mae Sisa unha teke nogna mae Sisa na, eghuteuna ke tusu fapulo ka God unha teke nogna God na eghu.” Kate nomhini mare cheke tughu mae Jisas igne, mare ne thono jaglo nodi fara ka mana.

Gusna eigna kegra fapulo

¹⁸ Aonu, keha mae Sadiusi ne mei ka mae Jisas. Mae igre theome fatutuani ni karha fapulo na. Aonu mare ne ghusna eghu ka mana,

¹⁹ “Ghema velepuhi, kaisei vetula teke risoni mae Moses malada tahati ia cheke eghu, ‘Jame kaisei gaꞌase lehe khetogna na, eghuteuna repa theo thudi, mae tahigna na nake tolaghi ka gaꞌase na mala ke au thugna mae tighagna teke lehe na.’

²⁰ Uve, agne na au fitu mae thabusigna, mae teke karha ulu lahu na neke tolaghi nu lehe. Mana theo thugna.

²¹ Aonu mae ke iko na neke tolaghi ka thau glehe kokoi na. Nu mana jaola ne lehe ne theo thugna. Jaola fatilo mae thabusigna na.

²² Fitu mae thabusigna teke kafe tolaghi ka naꞌa igre ne kafe lehe. Theo kaisei mae ka mare te au thugna na. Leghu lahu, gaꞌase igne jaola ne lehe.

²³ Fitu mae thabusigna igre neke kafe tolaghi ka naꞌa. Ba, ginau ka narane karha fapulo na, na khetogna mae ihei si naꞌa gnea?”

²⁴ Mae Jisas ne cheke eghu ka mare, “Tore, thono jafra fara si ghotilo gne! Naugna unha? Naugna ghotilo theome laseni grioriso te blahi na, nei theome lase nila nogna nolaghi God na eghu.

²⁵ Kau narane karha fapulo na mae nalhaꞌu nei gaꞌase teu gre ginauna jateula engel di kligna eghu na theome tolaghi.

²⁶ Tutuani fara ghotilo la iu'ijunihi unha God teke chekeni eigna naikno te karha fapulo ia. Ka buka teke rioriso mae Moses eigna te gnubra kaisei gaju ikoi na ia, God neke cheke eghu ka mae Moses, ‘Iara nogna God mae Ebraham, nogna God mae Isak nei nogna God mae Jekop.’

²⁷ Eghume, neuba naikno igre neke lehehi tifa, God neke chekeni ka mae Moses na mare karhau ngala. Naugna jame theome karha mare na, God jame theome neke chekeni te ‘Iara nogna God mae Ebraham, nogna God mae Isak, nei nogna God mae Jekop.’ Tutuani, God igne theome nodi God naikno te lehera, nu nodi God naikno te karha kolho. Eghume ghotilo mae Sadiusi gre thono jafra fara.”

Eigna u vetula te biꞌo lahu

²⁸ Kaisei mae velepuhigna vetula nogna mae Moses ne mei ka mae Jisas. Mana ne nomhini te famane cheke tughu fadoglo mae Jisas ka nodi gusna mae Sadiusi kate faphoaphola mana baludi mare. Aonu mana ne ghusna eghu ka mae Jisas, “Velepuhi, vetula aheva gne te biꞌo tulao ka nogna vetula mae Moses igre?”

²⁹ Mae Jisas ne cheke eghu ka mana, “Uve, vetula te biꞌo lahu na igne, ‘Ghotilo naiknomi Israel ra, ghotilo famane fanomho fakeli. Lord noda God na mana kaisei Lord kolho.

³⁰ Namhani Lord nou God. Namhani mana ka nagnafamu fateo, nei ka gaoghathomu fateo, nei ka nanhetamu fateo, nei ka nou glalase fateo.’

³¹ Fapea vetula te biꞌo na igne, ‘Namhani kheramu fofodu na jateula iagho te namha nigho themu eghu.’ Phei vetula igre ngala te thono ulu fara na.”

³² Mae velepuhigna vetula nogna mae Moses igne ne cheke eghu ka mae Jisas, “Mae Velepuhi, thono doglo fara unha te chekedi iagho re. Kaisei God ngala te funei na, nu theo kaisei God te au na.

³³ Te keli na tahati namhani God ka nagnafada fateote'o, ka gaoghathoda fateote'o, ka nhetada fateote'o. Eghuteuna tahati namhadi kherada fofodu gre jateula theda eghu. Phei vetula igre ngala teke uludi te fafara tahati ka God ke kligna olta na.”

³⁴ Mae Jisas filoni mae igne thono lalase fara ne famane cheke tughu. Aonu mae Jisas ne cheke eghu ka mana, “Ghema, iagho gne namo fara te mala ruma baludi naikno God te funei frunidire.” Ke leghugna igne theo kaisei mae te franeni mae Jisas te ghusnani mana na.

Gusna eigna Mesia

³⁵ Kate farirhiu mae Jisas ke lamnagna Sugablahi na, mana ne ghusna eghu ka naiknore, “Naugna unha si mae velepuhigna vetula nogna mae Moses gre te chekeni mae Kraes na ginauna karha mei ka vikegna mae Devet teu ignea?

³⁶ Nu mae Tharunga te Blahi na neke nhaꞌa lao gaoghatho ka mae King Devet neke cheke eghu: “ ‘God ne cheke ranghini nogu mae funei iara na, iagho gnokro agne fei nhetagu iara. Naugna iara ginauna lisei soru nou naoka iagho re ke parigna nou nolaghi na.’

³⁷ Mae Devet thegna neke kiloni mae Mesia gne nogna mae funei thegna. Nu mae Mesia na jaola vikegna mae Devet. Faꞌunha me kafe tutuani eghu si phei glepo igrea?” Naikno te nomhidi nogna cheke mae Jisas igre ne thono keli tadi fara.

Mae Jisas ne cheke faparidi puhidi mae velepuhigna vetula gre

³⁸ Ka narane te farirhiudi mae Jisas naiknore, mana ne cheke eghu, “Fiofilo ghami ghotilo ia ka mae velepuhidi vetula gre, glahula keli mare eghu ghotilo gaoghathomi na. Naugna mare magnahaghei te nolo tafri balu nodi phoko blahi ke uludi naiknore. Eghuteuna mare magnahaghedi naiknore te ghatho tahudi kate thafodi ka glalabare.

³⁹ Mare tei ka suga tharai ba ka gaghamu biꞌo, mare magnahaghei te gnokro ka sape nafnakno koba.

⁴⁰ Nu mare fakokhoanadi nei blaudi eghu koba nodi gobigna lepo goro naikno biꞌo te lehe khetodire. Eghuteuna mare tarai brahu koba mala ne mae blahi eghudi naiknore kolho. Filo si ghotilo, God ginauna paradi fara mae tuare!”

Mae Jisas ne keli tagna ka naikno biꞌo teke lehe khetogna na

⁴¹ Mae Jisas ne gnokro rhegna tapera te mala salo sileni gna Sugablahi na. Mana filo neu ka naikno te mei lilisei sileni ka tapera na. Kmana naikno dedei mei ne lilisei kmana sileni fara.

⁴² Aonu kaisei naikno biꞌo te kuma teke lehe khetogna na mei ne lilisei soru phei senti ka tapera na, jame nabagna kaisei senti ngala ka nodi sileni mae Rom.

⁴³ Mae Jisas ne kilodi nogna mae fanomhore ne cheke eghu ka mare, “Tutuani fara, te chekeni iara ka ghotilo na, naikno biꞌo te kuma igne koko sileni biꞌo fara ke tulaodi mae te dedei igrei.

⁴⁴ Naugna mae te dedei igre au nodi kmana sileni. Mare tusu ranghini God kolho unha te salaꞌui na. Naikno biꞌo igne thono kuma fara, nu naꞌa koko fahui unha teke au ka naꞌa na eghu. Eghuteuna naꞌa magnahagheini fara sileni tuana malagna nakarhagna thegna na.”