Nonomho Te Keli Teke Risoi Mae Mak 10 - Buka Blahi Ka Cheke Holo

Mae Jisas ne farirhiu eigna tholaghi pedo

¹ Ke leghugna igne, mae Jisas jifla jare ne tei ka nohi Judia eghuteuna ke kasa ke maghati Kho'u Jordan. Aonu, kmana naikno fara ne mei ka mana jare. Eghuteuna mana jateula nafnata puhi te edi thegna ra neu ne funu farirhiudi naiknore.

² Aonu, keha mae Farasi ne mei funu saosagroni mana. Mare ne cheke eghu ka mana, “Ba, snakreni ka noda vetula tahati na si mae te mala koko khetogna na ia?”

³ Mae Jisas neke ghusna eghu fapulo ka mare, “Unha vetula si teke tusu ari mae Moses ka ghotilo tifa na ia?”

⁴ Mare ne cheke eghu ka mana, “Mae Moses tangomana te snakreni mae nalhaꞌu na te koko khetogna na jame te kulu rioriso mana kaisei vido pepa te mala koko khetogna na.”

⁵ Mae Jisas ne cheke eghu ka mare, “Mae Moses neke rioriso vetula igne malami ghotilo kolho, naugna thono ninhigrana fara te mala farirhiu ghami ghotilo na.

⁶ Nu funu ka vuvuha na, God neke edi repa nalhaꞌu ghe gaꞌase.

^7-8 Tutuani, God neke cheke eghu ka grioriso te blahi, ‘Naugna igne, mae nalhaꞌu na mala jifla kokodi idogna kmagnare mala au fodu balugna khetogna na, repa phei naiknore mala kaisei thini ngala.’ Eghume repa theome mala phei naikno, nu mala kaisei ngala.

⁹ Thono blahi fara kaisei naikno te fotadi repa teke salo fodudihi God re.”

¹⁰ Aonu, ka teke pulo mare ka suga na mae fanomhore ne ghusnani mae Jisas eigna glepo igne.

¹¹ Mana ne cheke eghu ka mare, “Mae ihei te koko khetogna na, eghuteuna ke tolaghi ka keha gaꞌasei teuna, mana khale ka tholaghi pedo.

¹² Jateula tuana eghu gaꞌase te koko khetogna na, eghuteuna ke tolaghi naꞌa ka keha nalhaꞌui teuna. Naꞌa jaola khale ka tolaghi pedo.”

Mae Jisas ne fablahidi goro suare

¹³ Keha naiknore hata ne mei goro suare ka mae Jisas mala fablahidi mana. Nu nogna mae fanomho mana re ne cheke ka naiknore mala thosei hata mei suare ka mana.

¹⁴ Kate filoni mae Jisas igne, mana ne diꞌatagna fara ka mae fanomhore, ne cheke eghu ka mare, “Snakre meidi goro suare ka iara. Thosei lhotidi, naugna naikno te funei frunidi God re jateula sua igre eghu.

¹⁵ Tutuani fara, te chekeni iara ka ghotilo na. Mae ihei te theome magnahaghei jateula sua igne teu te mei ka God na, mana ginauna na theome nabagna te au farihoteidi naikno God te funei frunidire.”

¹⁶ Aonu mae Jisas ne salofodu goro suare rhegnai ne fablahidi.

Farirhiu eigna dedei

¹⁷ Kate jifla te tei mae Jisas na, kaisei mae dedei chari ne mei tuturupuku ke ulugna mana ne cheke eghu, “Mae velepuhi te keli, unha nate eni iara te mala hatini nakarha fei tifa na?”

¹⁸ Mae Jisas ne cheke eghu ka mana, “Ghema, naugna unha site chekeni iagho ne mae keli iara teu gnea? Kaisei thegna God ngala site keli naia, theo hei nga.

¹⁹ Uve, iagho la lasedihi vetulara, ‘Thosei tolaghi pedo. Thosei falehe naikno. Thosei blau. Thosei chaghi eigna kaisei mae kau fate. Thosei chaghi mala blau. Ghatho tahudi idomu kmamure.’ ”

²⁰ Mana ne cheke eghu ka mae Jisas, “Velepuhi, vetula igre iara leghudi mei ngala funu mae majaghani gu.”

²¹ Mae Jisas filo tutu ka mana balu namha ne cheke eghu, “Nu kaisei glepo na iagho theome eni ngau. Iagho tei fofoli fateo nou gobigna lepo are mala hata sileni tufa ka naikno te kumare. Te eghu iagho na, iagho ginauna au nou dedei keli fara te au teu kligna. Aonu iagho tangomana te mei te leghu ghau iara na.”

²² Kate nomhini cheke igne, mana ne tei kokoni mae Jisas. Mana diꞌanagnafa naugna mana au nogna kmana glepo fara.

²³ Aonu, mae Jisas ne filo lao ka nogna mae fanomhore ne cheke eghu, “Ninhigrana ka naikno te kmana nodi dedeire te au ke baludi naikno God te funei frunidire!”

²⁴ Mae fanomhore ne jaglo nodi fara ka nogna cheke mana igre. Nu mana ne cheke eghu ka mare, “Tore, kheraguro, thono ninhigrana fara ranghini kaisei naikno te au baludi naikno God te funei frunidire.

²⁵ Uve, glepo biꞌo te kiloi kamel na, theome tangomana te ruma ka khoragna nili te ikoi na. Nu ke ninhigragna tuanai ranghini naikno te thono dedei fara na te ruma ka nogna naikno God te funei frunidire.”

²⁶ Mae fanomhore nomhini nafnata cheke te edi mana igre ne thofno jaglo nodi ne faꞌihodi fara. Aonu mare ne cheke eghu fari thedi, “Tore! Te eghu na, mae ihei ngala si nate hatani thofno karha na ia?”

²⁷ Aonu, mae Jisas ne filo tutu ka mare, ne cheke eghu, “Tutuani fara, ka naikno na thono ninhigrana fara, nu ka God na theome ninhigrana eghu, naugna mana tangomanani te edi gobigna lepore.”

²⁸ Mae Pita kegra haghe ne cheke eghu ka mana, “Filo sagho, ghehati gne jifla kokodi nomi gobigna lepore mala leghu nigho iagho.”

²⁹ Mae Jisas ne cheke eghu ka mare, “Uve, tutuani fara te chekeni iara ka ghotilo na. Ihei te jifla kokoni sugagna, ba tahigna ba greghagna ba idogna ba kmagna ba thugna ba nogna vido glose na malagu iara nei Nonomho te Keli gne teuna,

³⁰ mana ginauna na tangomana te thokei kaisei gobi fata ghilei sala'udi gobigna lepo teke jifla kokodi mana re. Ka nauthoglu igne na mana au nogna suga nei tahigna nei greghagna nei idogna nei thugna nei nogna vido glose, eghuteuna mare jaola ginauna na paraniu mana. Nu kau nogna nauthoglu majaghani God nate mei nathuꞌu nauriha na mana na hatini karha fei tifa na.

³¹ Eghuteuna kmana naikno te au ului gognaro gre, mare ginauna nake au leghui. Eghuteuna kmana naikno te au leghui gognaro gre mare ginauna nake au ului.”

Mae Jisas ne fatilo cheke eigna u glehegna na

³² Ka nabrou te haghe mare Jerusalem na, mae Jisas ne kulu tei ke uludi mae fanomhore. Hatimare ne thono jaglo nodi fara ka mana, eghuteuna naikno te leghuni mana re ne mhaghu nodi la. Aonu mae Jisas neke hata fadelei nabotho phei nogna mae fanomhore ne funu cheke ranghidi unha nate eni ka mana ginauna.

³³ Mana ne cheke eghu ka mare, “Famane fanomho fakeli ghotilo ia. Tahati na haghe Jerusalem, eghuteuna ka namono tuana mare ginauna na snakre lao ghau iara mae teke mei funu ka God gne ka khamedi hatimare mae pris ulu nei hatimare mae velepuhigna vetula nogna mae Moses. Mare ginauna fate falehe ghau iara. Eghuteuna mare ginauna snakre lao ghau iara ka khamedi hatimare mae te theome Jiure.

³⁴ Naikno tuare ginauna maꞌe ghau, kmisu ghau, puri ghau ka phukri nei falehe ghau eghu iara. Eghuteuna ka fatilo narane na iara nake karha fapulo.”

Nodi thore mae Jemes ghe mae Jone

³⁵ Mae Jemes ghe mae Jone phei thugna mae Sebedi, phiamare mei ka mae Jisas ne cheke eghu ka mana, “Velepuhi, ghepa magnahaghe nigho te eni ranghi ghami kaisei glepo te toreni ghepa gne.”

³⁶ Aonu, mae Jisas ne cheke eghu ka phiamare, “Unha te magnahagheni ghopa te mala eni iara ranghi ghami na?”

³⁷ Phiamare ne cheke eghu ka mana, “Ghepa magnahaghei te gnokro ka sape nafnakno rhemu iagho, kaisei fei nhetamu nei kehana fei mairimu eghu kate au iagho balu siasigla ka nogna nolaghi biꞌo God na.”

³⁸ Mae Jisas ne cheke eghu ka phiamare, “Glepo te toreni ghopa ka iara igne, ghopa theome laseniu gaoghathogna na. Ba, ghopa tangomana te au papara ka nafnata nate au papara iara igne?”

³⁹ Phiamare ne cheke eghu ka mae Jisas, “Uve, ghepa tangomana.” Mae Jisas ne cheke eghu ka phiamare, “Tutuani fara, ghopa ginauna au papara jateula nafnata na au papara nate eni iara gne eghu.

⁴⁰ Nu te mala gnokro fei nhetagu nei mairigu teuna theome nogu gloku iara te mala snakreni ka ihei na. God ginauna na tusu lao vido tuare ka naikno teke kulu vavahi mana thegna re.”

⁴¹ Keha nabotho mae fanomhore nomhini igne ne diꞌa tadi fara ka mae Jemes ghe mae Jone.

⁴² Aonu, mae Jisas ne kafe kilo fodudi mare ne cheke eghu, “Ghotilo lasedi nodi funei naikno te theome mae Jiu gre mare magnahaghei te falalase nodi nolaghi na ke klignagna nodi mavitu na. Eghuteuna nodi mae baubature magnahaghei te kafe falalase nodi nolaghi ra.

⁴³ Nu ghotilo thosei jateula tuana eghu fari hoteimi themi. Mae ihei te magnahaghei mae biꞌo ka ghotilo na, mana mala jateula mae gloku eghu ka ghotilo.

⁴⁴ Mae ihei te magnahaghei mae kligna lahu ka ghotilo na, mana mala jateula kaisei mae sneka eghu ka ghotilo gnafa.

⁴⁵ Jateula tuana eghu iara mae teke mei funu ka God, iara theome mei mala loku ranghi ghau naiknore neku. Nu iara gne mei mala loku ranghidi mare nei snakre ghau thegu mala lehe mala folidi nakhibodi naikno te kmanare.”

Mae Jisas ne fakelini tathagna mae Batimeas na

⁴⁶ Mae Jisas nei nogna mae fanomhore eghu ne mei posa Jeriko. Kate jifla mare jare na, kmana naikno langau ne tei baludi mare. Aonu, kaisei mae te dofu, nanghagna na mae Batimeas, thugna mae Timeas. Mana gnokro koba rhegna nabrou na mala tore sileni ka naiknore.

⁴⁷ Aonu kate nomhini mana thoutonu gna mae Jisas gna Nasaret te mei ka nabrou tuana na, mana ne funu eha eghu fabiꞌo, “Jisas! Vikegna mae King Devet! Kokhoni ghau iara!”

⁴⁸ Kmana naikno mare ne cheke faheta ka mana mala megei. Mana ne tirogna fanomho ka mare ne eha eghu fabiꞌo fara, “Vikegna mae King Devet, kokhoni ghau iara!”

⁴⁹ Mae Jisas kegra snoto ne cheke eghu ka mare, “Kilo meini si ghotilo.” Mare tei ne cheke eghu ka mae te dofu na, “Thosei nanga nou sagho ghema, kegra haghe, mae Jisas ne kilo nigho iagho.”

⁵⁰ Mae te dofu na ghosei ne kegra haghe ne koko soru nogna pohe brahu na, ne mei ka mae Jisas.

⁵¹ Mae Jisas ne ghusna eghu ka mana, “Unha te magnahagheni iagho te mala eni iara ranghi nigho na?” Mae te dofu na ne cheke eghu ka mana, “Velepuhi, iara magnahaghei teke fifilo fapulo.”

⁵² Aonu, mae Jisas ne cheke eghu ka mana, “Keliu ngala, tei sagho, naugna nou fatutuani iagho na teke fakeli nigho na.” Ka vido tuana mana ghosei ne fifilo fakeli ne tei ke leghugna mae Jisas ka nabrou na.