Nonomho Te Keli Teke Risoi Mae Mak 1 - Buka Blahi Ka Cheke Holo

U thoutonu eigna nogna gloku mae Jone Apublahi

¹ Igne fufunu gna Nonomho te Keli eigna mae Jisas Kraes Thugna God.

² Tifa na God neke cheke ka mae profet Isaia mala rioriso eghu eigna mana, “Iara ginauna na kuruni nogu mae mala hata nonomho na mala tei ke ulumu iagho. Mana ginauna na tarabana nabroumu iagho.”

³ “Kaisei mae na poapola fabiꞌo ke lamnagna namono nagou, na cheke eghu, ‘Tarabana nabrou gna Lord, eꞌei fakeli nabrou mala tei gna mana!’ ”

⁴ Aonu, mae Jone ne jifla mei ka namono nagou na ne funu faꞌapublahidi naiknore ne toutonu eghu, “Ghotilo lilisei puhimi te diꞌare, nu mala apublahi eghu, eghuteuna God ginauna hata fadeleidi nakhibomi ghotilo re.”

⁵ Ka narane tuana, kmana naiknodi Jerusalem nei naiknodi ka keha namono ka Provins Judia eghu ne mei fanomho ka mana. Mare ne mei cheke thakledi nakhibodire ka mae Jone ne apublahi ka mana ka Kho'u Jordan.

⁶ Mae Jone neke pipichi ka pohe teke hohoro kau khakla kamel, eghuteuna nogna nhugha na guli buluka. Eghuteuna gano te ghamu mana re khupo nei jujurukuli.

⁷ Mae Jone toutonu ne cheke ka naiknore, “Mae ihei nate mei ke leghugu iara na mana mae ke biꞌogu iarai. Iara theome nabagu te pogho soru te rurutha nogna sadol mana na.

⁸ Iara apublahi ghami ghotilo kau khoꞌu kolho, nu mana ginauna na apublahi ghami ghotilo kau Tharunga te Blahi.”

Mae Jone ne faꞌapublahini mae Jisas

⁹ Kau narane tuare mae Jisas mei funu Nasaret ka Provins Galili mala apublahi ka mae Jone ka Kho'u Jordan.

¹⁰ Ke leghugna te apublahi na, mae Jisas te thagra haghe kau khoꞌu na, mana ne filoni maloa na ne thora, eghuteuna mae Tharunga te Blahi na ne soru mei ke kligna gna mana jateula kaisei balhu neu.

¹¹ Ka vido tuanala kaisei naogla ne cheke mei funu kligna ne cheke eghu ka mana, “Iagho thofno mae Thugu iara. Iara thofno namha nigho nei thofno gleꞌa nigho eghu.”

Mae Jisas ne tei ka namono nagou

¹² Theome raugha ke leghugna igne mae Tharunga te Blahi baubatuni mae Jisas ne tei ka namono nagou na.

¹³ Aonu, mana ne au thegna jare phiatutu narane. Eghuteuna ka vido tuana bosu mata re langau eghu te au jare na. Mae Satan mei ne fariuriuni mana, nu engel re mei ne toghoni mana.

Mae Jisas ne kilodi fati mae naugra

¹⁴ Ke leghugna te lilisei mare mae Jone Apublahi kau suga sosolo na, mae Jisas tei Galili ne toutonuni Nonomho te Keli nogna God.

¹⁵ Mana ne cheke eghu, “Thofno narane teke vahini God na la thokei meihi gognarona, eghuteuna narane God nate funei frunidi nogna naiknore la namo meihi. Eghume lilisei puhi te diꞌare nei fatutuani ni ngala Nonomho te Keli gne!”

¹⁶ Kate nolo te tei mae Jisas ka grathagna Kholo Galili, mana ne filodi phei mae thabusigna te ugra sasa, mae Simon ghe mae Aduru. Phiamare ugra sasa ka nodi fangna na.

¹⁷ Mae Jisas ne cheke eghu ka phiamare, “Mei ke leghugu. Iara na falalase ka ghopa te mala salo mei naikno ka iara na.”

¹⁸ Aonu, phiamare ghosei ne lisei soru nodi fangnare ne tei balugna mana.

¹⁹ Mae Jisas ulu neke tei katha vido ne ludedi mae Jemes ghe mae Jone phei thugna mae Sebedi. Mare gnokro lamna mola neke eꞌei fakeli nodi fangnare.

²⁰ Ka vido tuana mae Jisas kilodi phei mae thabusigna igre mala leghuni mana. Phiamare ghosei ne tei kokoni mae kmadi Sebedi ka mola na baludi mae glokure ne tei balugna mae Jisas.

Mae Jisas ne farirhiudi naiknore ka suga tharai na Kapanam

²¹ Mae Jisas baludi nogna mae fanomhore ne mei posa Kapanam. Aonu, kau narane Sabat na mae Jisas ne tei ruma kau suga tharai na ne funu farirhiudi naiknore.

²² Eghuteuna kate nomhidi nogna cheke mana re, mare ne jaglo nodi fara ka nafnata farirhiu te edi mana re naugna mana farirhiu balu nolaghi. Nogna farirhiu mana igre theome nanaba ka nodi farirhiu hatimare mae velepuhigna vetula nogna mae Moses re.

²³ Aonu ka narane tuana kaisei mae te au naitu na au jare ka suga tharai na. Mana ne funu eha eghu fabiꞌo,

²⁴ “Jisas, mae gna Nasaret, mala faꞌunha ghami ghehati neku sagho ia? Iagho jau mala mei fadiꞌa ghami ghehati neku sini! Iara lase nighohi iagho thofno mae blahi nogna God!”

²⁵ Aonu, mae Jisas ne cheke faheta eghu ka naitu na, “Megeu! Jifla mei sagho ka mana!”

²⁶ Aonu naitu na fararajani mana ne jifla mei balu eha fabiꞌo.

²⁷ Naiknore jaglo nodi fara ne funu cheke eghu fari thedi, “Tore, unha si gnea? Keha nafnata farirhiu majaghani jau? Mae igne cheke faheta fara jateula mae te au nolaghi eghu. Te cheke faheta mana ka naiture, mare faꞌuveni ngala mana!”

²⁸ Funu ka narane tuana nonomho eigna mae Jisas na ghosei ne tei posa ka namono te gnafa ka Provins Galili.

Mae Jisas ne fakelidi naikno te fogra

²⁹ Mae Jisas jifla mei ka suga tharai na baludi mae Jemes ghe mae Jone nei keha mae fanomhore doglo ne tei ka sugadi mae Simon ghe mae Aduru.

³⁰ Kate posa mae Jisas ka suga na, mare ne cheke ka mana eigna nanghogna mae Simon te fogra biꞌo balu fagrutu te thuru teu ka sape na.

³¹ Aonu mae Jisas tei ne loku ka khamegna na ne fakegra haghe. Eghuteuna fogra igne ghosei ne gnafa ka naꞌa. Ke leghugna igne naꞌa kegra haghe ne tarabana gano ne faꞌimadi mare.

³² Ka grafi tuana, ke leghugna tela pluluhi naprai na, naiknore hata ne mei ka mana naikno te gnafa te fogra ba te au naitu tadi.

³³ Naiknogna namono tuana ne kafe khapru mei ke ulugna suga te au teu mae Jisas na.

³⁴ Mae Jisas ne kafe fakelidi ne gnafa naikno te au kmana nafnata khabru tadi. Eghuteuna mana ne brue teidi la naitu te kmana teke au ka naiknore. Nu mae Jisas theome snakredi naiture te cheke na, naugna mare lasenihi mae Jisas.

Mae Jisas ne tei farirhiu ka namono ke lamnagna Provins Galili

³⁵ Hamerane boibongi ka keha narane na, mae Jisas dofra ne jifla ka suga na. Mana tei ka kaisei vido te nagou ne tarai jare.

³⁶ Aonu, mae Simon nei mae teke au balugna mana re eghu ne tei hironi mae Jisas.

³⁷ Kate filoni mae Jisas na, mare ne cheke eghu ka mana, “Ghema funei, naiknore kafe hiro nigho iagho.”

³⁸ Nu mae Jisas ne cheke eghu ka mare, “Tahati na tei ka keha namono are mala ke farirhiu langau iara jare. Naugna igne God neke kuru mei ghau iara.”

³⁹ Aonu, mae Jisas tei tongana Galili ne farirhiu ka nodi suga tharai mae Jiu ne brue fajifladi naitu te au ka naiknore.

Mae Jisas ne fakelini kaisei mae te lepa

⁴⁰ Kaisei mae te thubu biꞌo, ka khabru te kiloi leprosi ne mei ke ulugna mae Jisas ne tuturupuku soru pari. Mana ne cheke eghu ka mae Jisas, “Mae funei, ne magnahagheni nga iagho nu, iagho tangomana teke fasalhu ghau iara na.”

⁴¹ Mae Jisas ne kokhoni nognani, ne habo lao ka mana ne cheke eghu, “Uve, iara magnahaghei, ke salhu silagho.”

⁴² Kau chekegna mae Jisas tuana, thubu ka thinigna mana re ghosei neke salhu fapulo.

^43-44 Aonu, mae Jisas ne cheke faheta eghu ka mana, “Thosei toutonu tafri eigna igne ka ihei nga. Nu iagho doglo tei ka mae pris mala kulu filoni mana thinimu na. Eghuteuna ke leghugna igne iagho tei eꞌei fafara leghuni unha te chekeni mae Moses, mala laseni naiknore teke la keli fapulohi iagho na.” Eghuteuna mae Jisas ne kuru teini mana.

⁴⁵ Nu mae igne tei ne toutonu tafri eigna thoutonu igne ka naikno te kmanare. Naugna igne mae Jisas ne theome tei tafri ka keha namonore. Mana tei ne au ka vido aheva te theome tangomana kaisei naikno te au tagna na. Neuba, naiknore mei ka mana funudi heva heva ka namono te kmanare.