Matiu 9 - Buka Blahi Ka Cheke Holo

Mae Jisas ne fakelini kaisei mae te blughu Kapanam

¹ Mae Jisas saghe ka mola na, kasa neke pulo ka nogna namono na.

² Keha naiknore pala ne mei ka mana kaisei mae te blughu ka sape na. Kate laseni mae Jisas nodi fatutuani mare na, mana ne cheke eghu ka mae te blughu na, “Ghema kheraguo, thosei nanga nou, iara la hata fadeleihi nakhibomure.”

³ Keha mae ka hatimare mae velepuhigna vetula nogna mae Moses igre, mare ne cheke eghu fari thedi, “Tore, mae igne te chekeni na ne God thegna eghu! Cheke tuana cheke faparini God!”

⁴ Aonu, mae Jisas ne lasedi nagnafadi mare re ne cheke eghu, “Naugna unha site au mei ka nagnafami ghotilo re nafnata gaoghatho te diꞌa tuana ia?

⁵ Thono bligi fara te cheke eghu na, ‘Thuguo, iara la hata fadeleihi nakhibomu iagho re teuna’, naugna theo kaisei naikno tangomana te filoni te au nolaghi iara te mala eni gloku igne. Nu ninhigrana fara te cheke eghu na, ‘Kegra haghe, hata nou sape na tei teuna,’ naugna naikno na tangomana te filoni jame te au nolaghi iara te mala eni tuana.

⁶ Nu gognarona iara na falase arini ka ghotilo, iara mae teke mei funu ka God na au nolaghi ka nauthoglu igne te mala hata fadeleidi nakhibore!” Aonu, mae Jisas ne cheke eghu ka mae te blughu na, “Kegra haghe, hata nou khifra na tei ka sugamu na!”

⁷ Mana kegra haghe ne tei ka nogna suga na.

⁸ Naiknore filoni igne ne jaglo nodi fara balu mhaghu. Mare ne kilo fnaknoni God naugna God ne tusu lao nafnata nolaghi te biꞌo igne ka naiknore.

Mae Jisas ne kiloni mae Matiu mala leghuni mana

⁹ Mae Jisas jifla ka vido tuana ne mei filoni kaisei mae mala salo takis, nanghagna na mae Matiu, mana gnokro neu ka vido mala foli takis naiknore. Mae Jisas ne cheke eghu ka mana, “Ghema, mei leghu ghau iara, iagho mala nogu mae fanomho iara.” Aonu mae Matiu ghosei ne kegra haghe ne leghuni mae Jisas.

¹⁰ Ke leghugna igne, mae Jisas ne tei ghamu ka sugagna mae Matiu na. Kmana mae te diꞌa te salo takis nei keha mae te diꞌa langau eghu ne kafe mei gnokro ka tevo na baludi mae Jisas nei nogna mae fanomhore.

¹¹ Kate filoni igne, keha mae ka hatimare mae Farasi gre ne cheke eghu ka nogna mae fanomho mana re, “Naugna unha si mana te ghamu baludi mae te diꞌa te mala salo takis nei keha naikno te diꞌa teu igrea?”

¹² Mae Jisas nomhidi nodi cheke mae Farasi igne ne cheke eghu ka mare, “Ghotilo laseni igne, naikno te kelire tirodi tei filoni mae dokta. Nu naikno te fogra re ngala te magnahaghei tei filoni mae dokta na.

¹³ Jateula tuana eghu, iara gne theome mei mala kilodi naikno te doglohi ke ulugna God te mala leghu ghau iara na. Nu iara gne mei mala kilodi kolho naikno te diꞌare mala hogri nagnafa. Ke pulo si ghotilo mala hironi u gaoghathogna chekegna God igne, ‘Iara theome magnahaghedi nomi fafara ghotilo re, nu iara magnahaghei ghami ghotilo te kokhonidi nei taji fakelidi teu naiknore!’ ”

Farirhiu eigna dangna

¹⁴ Nogna fanomho mae Jone Apublahi igre mei ne ghusna eghu ka mae Jisas, “Velepuhi, ghehati nei mae Farasi gre eghu dangna gano koba. Naugna unha si nou mae fanomho iagho gre te theome dangna gnea?”

¹⁵ Mae Jisas ne cheke eghu, “Kheragna mae te mei kau gaghamu tolaghi na mare theome tangomana te diꞌanagnafa na, naugna mae te tolaghi na au baludi ngala mare. Nu narane te mala tei kokodi mae te tolaghi na kheragnare ginauna mei. Aonu ame tangomana nga mare te dangna nei diꞌanagnafa teuna eghu. Jateula tuana eghu kate au teu iara agne baludi nogu mae fanomhore, mare ginauna na theome dangna nei diꞌanagnafa eghu.”

Cheke naba eigna u farirhiu te tifa nei majaghani

¹⁶ “Theome tangomana tahati te hata nabreku pohe majaghani na te susuki ka pohe tiatifa tela korahi na. Te eghu tahati na, kate titihi tahati na, nabreku pohe majaghani tuana ginauna nake rerheku ngala keha pohe tiatifa tuana. Eghuteuna khora tuana nake biꞌo lao gnai teke ului na.

¹⁷ Nu theome naba langau naikno na te totoho waen majaghani ka duku tiatifa teke horo kau guli buluka na. Naugna lao te raha waen na, guli tuana ginauna poha. Nu waen na ginauna thofa, eghuteuna guli te mala totoho waen na ginauna breku diꞌa. Nu te keli na, mana jame totoho waen majaghani na ka guli te majaghani na, mala phia glepo igre kafe au fakeli.”

Mae Jisas ne fakarhidi phei gaꞌase

¹⁸ Fari hoteigna te facheke teu mae Jisas ka naiknore, kaisei mae biꞌo gna Kapanam ne mei tuturupuku soru ke ulugna mana, ne cheke eghu, “Thugu gaꞌase iara na la lehehi ginei. Nu iagho tangomana te mei habo lao khamemu na, mala ke karha fapulo naꞌa.”

¹⁹ Aonu, mae Jisas kegra haghe ne tei baludi nogna mae fanomhore ke leghugna mae biꞌo na.

²⁰ Kate tei mare na, kaisei naikno biꞌo te dadara fabrahu nabagna nabotho phei finogha na mei ke leghugna mae Jisas, ne mei habo ka nogna khukru pohe mana na.

²¹ Naꞌa neke eni igne naugna naꞌa ne cheke eghu kau gaoghathogna na, “Jame haboni kolho iara nogna pohe mae Jisas na, iara ginauna tangomana teke keli fapulo na.”

²² Nu mae Jisas figri lao ne cheke eghu ka naꞌa, “Naikno biꞌo, thosei nanga nou! Iagho kela keli fapulo naugna iagho ne fatutuani.” Funu ka vido narane tuana naꞌa ghosei neke keli fapulo nogna.

²³ Mae Jisas ne tei ruma ka sugagna mae biꞌo na. Mana filodi kmana naikno te koje ka nifu mala giugilui, nei naikno te tanhi nei paopado fabiꞌo teu jare re,

²⁴ mana ne cheke eghu, “Ghotilo kafe jifla kosi! Naugna sua gaꞌase igne theome lehe, nu naꞌa thuru kolho!” Mare ne kafe maꞌe fabiꞌo ka mana.

²⁵ Ke leghugna te jifla te gnafa naiknore, mae Jisas ruma ka chogho te au sua gaꞌase na ne loku ka khamegna na. Eghuteuna naꞌa ghosei neke kegra haghe.

²⁶ Nonomho gna igne ne tei tongana heva heva ka namono te kmana ke lamnagna provins tuana.

Mae Jisas neke fakelidi tathadi phei mae te dofure

²⁷ Kate jifla mae Jisas ka vido tuana, phei mae te dofu ne funu leghuni mana ne eha eghu ka mana, “Iagho vikegna mae King Devet, kokhoni ghami ghepa!”

²⁸ Kate ruma mae Jisas ka suga na, phei mae te dofu igre ne ruma balugna mana. Mae Jisas ne ghusnadi phiamare, “Phei mae, ghopa fatutuani ghau iara te tangomana mala fakelidi tathamire?” Phiamare ne cheke eghu ka mana, “Uve, mae funei!”

²⁹ Mae Jisas ne habo ka tathadi phei mae te dofure ne cheke eghu, “Unha te fatutuani ni ghopa na, iara na eni ranghi ghami.”

³⁰ Aonu phiamare ghosei neke fifilo fakeli. Nu mae Jisas ne cheke faheta eghu ka phiamare, “Thosei toutonuni igne ka ihei nga ghopa ia!”

³¹ Nu neuba ngau phiamare jifla ne tei toutonu tafrini thoutonu gna mae Jisas na ka nohi tuana.

Mae Jisas ne fakelini kaisei mae te iho cheke

³² Kate jifla phiamare kosi na, keha naiknore tathalei ne mei kaisei mae te iho cheke ka mae Jisas. Mana theome tangomana te cheke na, naugna kaisei naitu au ka mana.

³³ Kate brue fajifla mae Jisas naitu teke au ka mana na, mana neke funu facheke. Naiknore filoni igne ne jaglo nodi fara ne cheke eghu, “Icho idomi! Theo kaisei glepo teke filoni tahati jateula igne teku agne Israel tifa na! Igne ngala kaisei glepo ululahu te filoni tahati na!”

³⁴ Nu hatimare mae Farasi gre ne cheke eghu, “Mana tangomana ni kolho te bruedi naiture, naugna mae Satan, mae funeidi naiture, te tusu ranghini mana nolaghi te mala bruedi naiture.”

Mae Jisas ne kokhonidi naiknore

³⁵ Mae Jisas ne tei tongana ka namono biꞌo ba namono te ikodi ke lamnagna Provins Galili. Mana ruma ke lamnadi nodi suga tharai mae Jiure, ne farirhiudi naiknore. Eghuteuna mana ne toutonuni Nonomho te Keli eigna narane God te funei frunidi nogna naiknore. Mana ne fakarhidi naikno te au thua nafnata khabru nei fogra teu tadire.

³⁶ Kate filodi mae Jisas naiknore, mana ne kokhoni nognadi fara. Naugna mare ne thono nanga nodi fara, nu theo kaisei naikno te toghodi, jateula sipu te theo kaisei naikno te mala reireghidi ra neu.

³⁷ Aonu mana ne cheke eghu ka nogna mae fanomhore, “Naikno igre jateula gano te au ka nagare tela ghanohi ra eghu. Nu theome kmana naikno te mala toghodi mare te mala fatutuani ghau iara na.

³⁸ Ghotilo tore ka God, mae khotogna nagare na, mala kuru mei kmana mae gloku mala toutonuni Nonomho te Keli igne, nei toghodi mare mala fatutuani ghau iara. Kate tei loku na, mare jateula mae te tei pulei gano ka nagare ia eghu.”