Matiu 8 - Buka Blahi Ka Cheke Holo

Mae Jisas fasalhuni kaisei mae te thubu biꞌo fara

¹ Kate getu teke soru mae Jisas funu ka thogele na, kmana naikno fara ne leghuni mana.

² Aonu kaisei mae te thubu biꞌo fara ka thinigna na, khabru te kiloi leprosi, mana mei ne tuturupuku soru ke ulugna mae Jisas. Mana ne cheke eghu, “Mae funei, ne magnahagheni nga iagho nu, iagho tangomana teke fasalhu ghau iara na.”

³ Aonu mae Jisas ne habo lao ka mana ne cheke eghu, “Uve, iara magnahaghei, ke salhu silagho!” Kau chekegna mae Jisas tuana, thubu ka thinigna mana re ghosei neke salhu fapulo.

⁴ Aonu mae Jisas ne cheke eghu ka mana, “Thosei toutonu tafri eigna igne ka ihei nga. Nu iagho doglo tei ka mae pris mala kulu filoni mana thinimu na. Eghuteuna ke leghugna igne iagho tei eꞌei fafara leghuni unha te chekeni mae Moses ia, mala laseni naiknore teke la keli fapulohi iagho na.”

Nogna fatutuani kaisei mae funeidi hatimare mae armi di Rom

⁵ Kate posa mae Jisas ka namono Kapanam, kaisei mae funeidi hatimare mae armi di Rom mei ne tore ka mae Jisas, ne cheke eghu ka mana,

⁶ “Mae biꞌo, kaisei nogu mae gloku iara te au ka sugagu na. Mana kabru biꞌo fara thuru au kolho ka sape na. Naugna mana blughu theome tangomana te tugha tafri na.”

⁷ Mae Jisas ne cheke eghu ka mana, “Uve, keli fara. Iara ginauna ari ka sugamu iagho na mala fakelini mana.”

⁸ Mae funei na ne cheke eghu ka mae Jisas, “Mae biꞌo, iara theome nabagu te mei iagho ka nogu suga na. Nu ka chekemu kolho mala ke keli fapulo nogu mae gloku na.

⁹ Tutuani fara, iara gne kaisei mae au la mae biꞌo te mala kuru ghau na. Nu au kmana mae soldia langau te mala kurudi iara re. Eghuteuna, te cheke eghu iara ka mae igne, ‘Tei sagho,’ mana na tei. Nu te cheke eghu iara ka keha mae ana, ‘Mei sagho agne!’ mana na mei. Nu te cheke eghu iara ka nogu mae gloku na, ‘Eni sagho igne!’ mana na eni tuana.”

¹⁰ Kate nomhini cheke igne, mae Jisas ne jaglo nogna fara ka mana. Mana figri ne cheke eghu ka naikno teke leghuni mana re, “Icho idomi! Tuani fara, te chekeni iara ka ghotilo na, iara neke theome filodeni kaisei naikno te biꞌo nogna fatutuani na jateula mae igne eghu agne Israel.

¹¹ Nu te chekeni iara ka ghotilo na, kmana naikno ginauna na mei funudi ke maghati ba ke mosu mala gleale'a balugna mae Ebraham, mae Isak nei mae Jekop kau nogna nauthoglu majaghani God na.

¹² Eghuteuna mae Jiu te theome fatutuani gre, God ginauna na chekedi nogna engel re mala koko fajifladi ka namono te romno te theome au thegna mana na. Mare ginauna naꞌau papara jare mala tanhi nei diꞌanagnafa eghu fara.”

¹³ Aonu, mae Jisas ne cheke eghu ka mae funeidi hatimare mae armi di Rom gre, “Ke pulo sagho ka sugamu na. Naugna ka nou fatutuani iagho na nou mae gloku iagho na mana ginauna nake keli fapulo.” Aonu nogna mae gloku mana teke fogra na ghosei neke keli fapulo ka vido narane tuana.

Mae Jisas ne fakelidi kmana naikno

¹⁴ Mae Jisas tei ne ruma ka suga mae Pita na. Mana filoni nanghogna mae Pita na fogra thuru neu ka sape na.

¹⁵ Mae Jisas lao ne habo ka khamegna naꞌa na, eghuteuna fogra na ghosei neke ghaota. Aonu, naꞌa kegra haghe ne tarabana gano malagna mana.

¹⁶ Rafi, ke leghugna te pluluhi naprai na, naiknore hata ne mei ka mana kmana naikno te au naiture. Mae Jisas ne cheke kolho ka bukrei naiture ne kuru fajifladi. Nu naikno teke fogra re ghosei neke kafe keli fapulo.

¹⁷ Nogna cheke mae profet Isaia igne ne horoghoto fara ka narane tuana, “Mana ne hata fahui fogra te fanigra ghita na, nei hata fadeleihi khabruda tahati re.”

Mae ihei te nabagna te mala leghuni mae Jisas

¹⁸ Mae Jisas ne filodi kmana naikno ne mei khapru faligohoni mana. Aonu mana ne cheke ranghidi nogna mae fanomhore mala tarabana ke kasa ka keha phile kholo na.

¹⁹ Kaisei mae velepuhigna vetula nogna mae Moses ne mei ne cheke eghu ka mana, “Mae velepuhi, iara magnahaghei te mala kaisei nou mae fanomho iagho, mala tei balumu iagho ka namono aheva nate tei iagho na.”

²⁰ Mae Jisas ne cheke eghu ka mana, “Gauhare au nodi vido te mala thuru na eghuteuna nanghajire au nodi gnoku. Nu iara mae teke mei funu ka God na, theo kaisei namono te mala augu na.”

²¹ Kaisei mae ka hatimare nogna mae fanomho Jisas re ne cheke eghu ka mana, “Mae funei, snakre ghau iara mala kulu tei giugiluni mae kmagu ia.”

²² Nu mae Jisas ne cheke eghu ka mana, “Gognarona iagho mei leghu ghau iara, lisa laodi naikno te tirodini nakarhagna God na mala giugiludi mare thedi naikno te lehere.”

Mae Jisas ne fabeatani u maraghata na

²³ Mae Jisas ne saghe ka mola na, eghuteuna nogna mae fanomhore ne kafe tei balugna mana.

²⁴ Kate kasa mare ka kholo na, kaisei nuri blahi ne thoke mei ka mare fari hotei nhorora. Kholo na ne funu diꞌa, ne galo biꞌo fara, kholo na ne funu haghe ka mola na. Nu mae Jisas ne thuru iho.

²⁵ Mae fanomhore tei ka mana ne fadofrani mana, ne cheke eghu, “Lord, fakarhi ghita sagho, tahati gne na lodu knoho!”

²⁶ Ka vido tuana mae Jisas ne cheke eghu ka mare, “Thosei mhaghu, theo kaisei nafugna te mhaghu ghotilo na! Ghotilo theome biꞌo kolho nomi fatutuani na ka God.” Mana kegra haghe ne cheke eghu faheta ka nuri na, “Beata sagho!” Eghuteuna ke jaola ka galore mala sola. Ka vido tuana nhorora na ne lehe soru ne beata fara.

²⁷ Mare te gnafa na ne jaglo nodi fara, ne cheke eghu, “Tore, unha nafnata mae si ignea? Nuri ba ne galo faꞌuveni ngala chekegna mana na!”

Mae Jisas ne fakarhidi phei mae te au naiture

²⁸ Hatimare tei ne longa ka keha phile kholo na, ka nohi te kiloni Gadara. Phei mae te au naiture mei ne ludeni mae Jisas. Phei mae igre au ka gluma aheva te mala giugiludi naikno te lehere. Eghuteuna, naiknore theome tangomana te liu ka vido te au phiamare na, naugna phiamare thono diꞌa tadi fara ka naiknore.

²⁹ Phiamare ne filo teini mae Jisas ne eha eghu ka mana, “Thugna God, mei mala faꞌunha ghami ghehati sagho ia? Ba, mei mala para ghami ghehati ame thokei mei nga narane teke kulu lilisei God te mala fate ghami ghehati na neku sagho ia?”

³⁰ Rhegna vido au teu mare na, kaisei tothoghei bosu humeu.

³¹ Eghuteuna naiture ne toreni mae Jisas, ne cheke eghu ka mana, “Jame te brue ghami ghehati na, iagho kuru ghami ghehati tei ke lamnadi bosu gro eghu.”

³² Mae Jisas ne cheke eghu ka naiture, “Tei nomi!” Aonu, naiture jifla ne tei ruma ke lamnadi bosure. Eghuteuna tothoghei bosu na kafe chari ne soru ka thabafe na ne tei krofu ka Kholo Galili na ne kafe knoho.

³³ Mae teke ohodi bosure ne kafe rikha ne posa ka namono Gadara, ne toutonuni unha te eni mae Jisas ranghidi phia mae te au naiture.

³⁴ Naiknogna namono na ne kafe jifla mala tei ludeni mae Jisas. Kate tei te filoni mana na, mare ne toreni mana mala jifla mana, mala thosei au ka nodi nohi na.