Matiu 7 - Buka Blahi Ka Cheke Holo

Thosei fate naikno

¹ Mae Jisas ne cheke eghu, “Thosei fateni ihei, na eghunu ke fate ghami God eghu.

² Unha puhi teke fateni ghotilo naikno tuana, God ginauna nake fate ghami la ghotilo ka puhi tuana. Unha vetula teke fateni ghotilo naikno na, God ginauna jaola nake fate ghami ghotilo kau vetula tuana.

³ “Naugna unha sagho te au gaoghathomu ka nakhibo ikoi te eni mae kheramu fofodu na, nu theome filo glani nakhibo biꞌo au teu ka themu ana ia?

⁴ Iagho theome tangomana te cheke eghu ka mae kheramu fofodu na, ‘Ghema, lisa mei sagho ka iara, mala hata fadelei iara nakhibo ikoi te au ka iagho ana.’ Nu iagho theome kulu hata koko ghu nakhibo biꞌo te au teu ka themu ana teuna. Iagho kaisei mae chaichaghi! Kulu hata koko ghu sagho nakhibo biꞌo te au ka themu ana, ame tangomana nga iagho te magnahaghei te hata fadelei nakhibo ikoi te eni mae kheramu fofodu ana eghu!

⁵ Ghema, iagho thono jafra tutuani fara! Kulu koko ghu sagho najafra biꞌo jateula phugra gaju biꞌo teu ka tathamu themu ana. Aonu, iagho ginauna tangomana te fifilo fakeli te mala fateni mae kheramu fofodu na, te mala toghoni mana te hata koko iagho najafra ikoi jateula nafrungho gaju teu ka tathagna mana na.

⁶ “Thosei tusu lao glepo blahire ka naikno te diꞌare. Naugna mare jateula bukrei bosu te goigonidi glepo te blahi ra eghu, ba jateula bukrei khuma te mei kathi ghami ghotilo ra eghu kolho.”

Eigna u tharai

⁷ Mae Jisas ne cheke eghu, “Heta, thosei khusu thore na, God ginauna na tusu ari ka ghotilo. Thosei khusu te hiro glepo ka God na, eghuteuna ghotilo ginauna na ludeni. Ghotilo mei mala kikidi ka nogna grengatha mana na, mana ginauna tora ranghi ghami ghotilo.

⁸ Naugna ihei te tore glepo ka God na, God ginauna na tusu ranghini mana, eghuteuna ihei te mei te hiro glepo ka God na, mana ginauna na ludeni, nei ihei te kikidi ka nogna grengatha God na, God ginauna na tora ranghini mana.

⁹ “Ba tore! Jame kaisei mae thumu iagho tore ghegna gano, iagho mae kmagna na tusu ranghini mana kaisei thina? Theome tangomana!

¹⁰ Ba tore! Jame tore ghegna sasa mana ka iagho na, iagho na tusu ranghini mana kaisei mogo? Theome tangomana!

¹¹ Neubane diꞌa jateula unha neu ghotilo, ghotilo tangomana te tusu lao glepo te keli ka thumire. Eghume, jateula tuana eghu mae Kmami ghotilo te au kligna te mae keli fara na. Mana ginauna na tufa glepo te keli ranghini ihei te tore ka mana na.

¹² Unha te magnahagheni ghotilo te mala eni ranghi ghami keha naiknore, glepo tuana la mala teke eni ghotilo ranghidi mare na. Igne gaoghathogna vetula nogna mae Moses nei chekedi hatimare mae profet.”

Grengatha te mala tei thoke kau karha

^13-14 Mae Jisas ne cheke eghu, “Tei ghotilo mala ruma kau grengatha te gobro fara na. Naugna grengatha gna na krepa fara nei nabrou gna na krepa fara teuna, tei thoke kau glehe. Kmana naikno tei kau nabrou tuana. Eghuteuna nabrou te tei thoke kau karha fei tifa na gobro fara, nei nabrou gna na ninhigrana fara nei keha naikno ghu kolho te filo deni na.”

Eidi mae profet chaichaghi

¹⁵ Mae Jisas ne cheke eghu, “Fiofilo ghami ka mae profet chaichaghi are. Ke kosi na jateula te famane sipu eghu filodire. Nu tutuani, mare goigonidi naiknore jateula khuma fakaukathu eghu naugna gaoghathodire jafra fara.

¹⁶ Ghotilo ginauna filo glanidi nafnata naikno igre ka glepo te edi mare re. Naugna tahati theome tangomana te filo deni kaisei sisi khebu kau gnarho fifiriulu, ba sisi khoilo kau gaju nolahi.

¹⁷ Jateula ngau gaju te keli na na ure sisi te keli, eghuteuna gaju te diꞌa na ure sisi te diꞌa na.

¹⁸ Gaju te keli na theome tangomana te ure sisi te diꞌa na, eghuteuna gaju te diꞌa na theome tangomana te ure sisi te keli na.

¹⁹ Eghume, mae khotogna nagare na ginauna kato soru gaju te theome ure sisi te keli na mala koko lao ka khaꞌaghi.

²⁰ Eghume, ghotilo ginauna na filo glanidi mae profet chaichaghi igre ka glepo te edi, ba ka puhidi mare re.

²¹ “Naikno te cheke eghu, ‘Lord, Lord,’ teu ka iara igre ginauna na theome kafe naikno te funei frunidi God re. Nu naikno nate funei frunidi God igre ngala nate edi unha te magnahaghedi mae Kmagu iara te au kligna na.

²² Kau narane leghu lahu nate fatedi God naiknore, kmana naikno ginauna mei cheke eghu ka iara, ‘Lord, Lord! Ghehati neke toutonuni chekegna God na kau nanghamu iagho na. Nu ka nanghamu iagho na ghehati neke bruedi naiture nei edi kmana nafnata kofubobhoi.’

²³ Eghuteuna, iara ginauna na cheke fadoglo eghu ka mare, ‘Tei nomi, iara thono theome lase ghami ghotilo. Ghotilo theome nogu naikno iara, naugna puhimi ghotilo re thono diꞌa fara!’ ”

Naikno te leghuni chekegna mae Jisas

²⁴ Mae Jisas ne cheke eghu, “Eghume, mae ihei te nomhidi chekegu iara igre nei leghudi teuna, mana ginauna jateula kaisei mae te lalase babana nogna suga na ke tagru glose te saesape ka thina ia eghu.

²⁵ Neubane mei nakhete biꞌo na, mei neu nabritha na, nei mei neu nuri blahi na ka suga tuana, suga tuana ginauna theome phaꞌe. Naugna ne babana ke tagru glose te saesape ka thina.

²⁶ Nu mae ihei te nomhidi chekegu iara igre nei thono irogna leghudi teuna, mana jateula ngau kaisei mae te theome lalase ia eghu. Naugna mana ne theome dokha ne tei pari ne babana nogna suga na.

²⁷ Eghuteuna, mei neu nakhete biꞌo na, mei neu nabritha na, nei mei neu nuri blahi na ka suga tuana. Eghuteuna suga tuana grofo gna na thono diꞌa fara!”

Naiknore ne jaglo nodi fara ka nogna farirhiu mae Jisas

²⁸ Kate gnafa mae Jisas chekedi glepo igre, naiknore ne jaglo nodi fara ka nogna nafnata farirhiu te edi mana igre.

²⁹ Naugna mana theome nanaba ka nodi farirhiu hatimare mae velepuhigna vetula nogna mae Moses. Nu mana ne farirhiu balu nolaghi.