Matiu 6 - Buka Blahi Ka Cheke Holo

Farirhiu eigna te toghoni naikno te kuma

¹ Mae Jisas ne cheke eghu, “Fiofilo ghami ghotilo ia, thosei mala filo ghami nga eghu edi gloku te kelire ke uludi naiknore. Naugna mae Kmami ghotilo te au kligna na mana ginauna na theome taba ghami ghotilo.

² “Kate tufa glepo ka naikno te kuma na, thosei jateula mae te chaichaghi ra eghu falalase ka naiknore. Mare edi tuare ke lamna suga tharai nei ke lamna nabrou biꞌo. Mare magnahaghedi naiknore te ghatho tahudi kolho. Nu tutuani fara te chekeni iara ka ghotilo na, mare la kulu hatahi nodi tabare kate cheke fakelidi naiknore.

³ Eghume kate tufa glepo ka naikno te kuma na, iagho eni kau nafnata puhi te mala theome tangomana te laseni mae thofno kheramu fofodu na unha te eni iagho na.

⁴ Te eghu na, iagho themu ngala te laseni unha teke tufa iagho na. Nu mae Kmamu God mae ihei te filoni unha teke eni poru iagho na, nate taba nigho na.”

Farirhiu eigna tharai

⁵ Mae Jisas ne cheke eghu, “Kate tarai na, ghotilo mala thosei jateula mae te chaichaghi ra eghu. Mare magnahaghei fara te tei kegra te tarai ke lamnadi suga tharai ba farihotei glalaba. Mare magnahaghedi naiknore te filodi unha te edi mare re. Nu tutuani fara te chekeni iara ka ghotilo na, mare la kulu hatahi ka naiknore nodi tabare.

⁶ Nu iagho na, kate tarai na iagho ruma ka nou chogho na, eghuteuna bobotho grengatha na, eghuteuna iagho tarai poru ka mae Kmamu te theome tangomana ihei te filoi na eghu. Mana na filoni unha te eni poru iagho na eghuteuna mana ginauna taba nigho iagho.”

⁷ Kate tarai na, ghotilo thosei tarai jateula mae bongihehe te chekedi nafnata cheke te theo nafudi kolho ra eghu. Kate tarai brahu na ame nomhidi nga God eghu mare gaoghathodire.

⁸ Ghotilo thosei jateula mare eghu, naugna ame tore nga ghotilo teuna, mae Kmami ghotilo na la kulu lasenihi unha te magnahagheni ghotilo na.

⁹ “Eghume, kate tarai na, ghotilo tarai jateula igne eghu: “ ‘Mama te au kligna, ghehati magnahaghei te ghatho tahuni nanghamu te blahi.

¹⁰ Ghehati magnahaghe nigho te mei funei fruni ghami, nei snakre meini unha te magnahagheni iagho agne pari jateula ngau kligna.

¹¹ Tusu mei ranghi ghami gano te nabagna narane igne.

¹² Hata fadeleidi tami thua glepo te diꞌa te kela fajafra dihi jateula ngau ghehati te hata fadeleidi unha najafra teke edi fadiꞌa ranghi ghami keha naiknore.

¹³ Thosei snakreni kaisei glepo mala mei fariuriu ghami, nu fakarhi ghami kau nogna nolaghi Satan.’

¹⁴ Uve, te hata fadeleidi ghotilo unha najafra teke edi mare re mae Kmami ghotilo te au kligna na ginauna jaola hata fadelei ranghi ghami najafra teke edi ghotilo re.

¹⁵ Te theome hata fadelei ghotilo najafradi keha naiknore, mae Kmami ghotilo te au kligna na ginauna jaola theome hata fadeleidi najafra teke edi ghotilo re.”

Farirhiu eigna dangna

¹⁶ Mae Jisas ne cheke eghu, “Gognaro na eigna te theome ghamu gano. Kate dangna na, ghotilo thosei filo uchu jateula te edi mae te chaichaghi ra eghu. Mare fadidiꞌa tathadire ka narane te dangna na. Mare eni igne, mala filo naiknore eghu kolho. Nu tutuani fara te chekeni iara ka ghotilo na, mare la kulu hatahi nodi tabare ka naiknore.

¹⁷ Nu iagho na, kate dangna na, dadalu tathamu are nei pore fakeli khaklamu are eghu.

¹⁸ Aonu naiknore ginauna theome tangomana te laseni te dangna teu iagho na eghu. Nu kaisei mae Kmamu te theome tangomana kaisei naikno te filoni na ngala te lase nigho iagho na. Eghuteuna mae Kmamu, mae ihei te filoi unha te eni poru iagho na, mana ginauna taba nigho iagho.”

Farirhiu eigna u dedei

¹⁹ Mae Jisas ne cheke eghu, “Thosei salofodu malami themi dedei gna nauthoglu igne, naugna kokorosi nei kukuku eghu tangomana nate fadidiꞌa na. Eghuteuna mae te blaure tangomana te paꞌe suga na mala ruma blau.

²⁰ Nu salo fodu malami themi dedei gna kligna. Kokorosi nei kukuku theome tangomana te fadidiꞌa na. Nu mae te blaure theome tangomana te paꞌe suga na mala ruma blau.

²¹ Naugna aheva te au nomi dedei ghotilo na, igne ngala te mala au gaoghathomi ghotilo tagna na.

Tathamu iagho na jateula kaisei juta eghu

²² “Tathamu iagho na jateula kaisei juta eghu, naugna iagho tangomana te filoni u naphae na. Nu te keli teu iagho tathamure, iagho ginauna kafe fodu kau naphae.

²³ Eghuteuna te diꞌa fara iagho tathamure, thinimu iagho na ginauna romno fara. Eghume te theo kaisei naphae ke lamnamu iagho nu romno kolho teuna, iagho ginauna na romno fara.

Loku ranghidi phei mae funei

²⁴ “Theo kaisei naikno te loku ranghidi phei mae funei na. Mana ginauna magnahagheni kaisei mae funei kolho nei tirognani keha na. Mana ginauna na ghatho tahuni kaisei mae funei kolho nei na theome ghatho tahuni keha na. Eghume iagho theome tangomana te loku ranghidi God ghe dedei gna nauthoglu igne jateula phei nou funei teuna.”

Farirhiu eigna te rouronu ka God

²⁵ Mae Jisas ne cheke eghu, “Naugna igne te chekeni iara ka ghotilo na, thosei nanga nomi eigna gano ba eigna khoꞌu te mala karha teu ghotilo na, ba eigna pohe maladi thinimi are. Naugna karha na glepo ke ulugna ganoi, nu thini na glepo ke ulugna pohei.

²⁶ Filo si ghotilo ka nanghaji te flalo tafri are. Reꞌe theome joꞌu sisi nei theome pulei gano mei mala bubukrei ka suga na. Nu mae Kmami ghotilo te au kligna na te faghamudire. Filo si ghotilo, ghotilo glepo ke uludi nanghaji igrei ka tathagna God na.

²⁷ Nu ghotilo theome tangomana teke nhaꞌa lao kaisei finogha kau nakarhami na mala ke nangani ghu keu tuana.

²⁸ “Nu ghotilo thosei nangani pohe te mala pipichi na. Filodi si ghotilo ka sisi te karha tafri ka namhata na are. Reꞌe theome loku nei theome ei nodi pohe eghu thedi.

²⁹ Nu te chekeni iara ka ghotilo na, sisi are famane khuakhuda fara filodire. Eghuteuna King Solomon, mae ihei teke pipichi pohe te khuakhuda fara tifa na, mana neke theome pipichi kaisei pohe jateula sisi igre neku.

³⁰ Nu thegna God kolho teke falalaonidi sisi ka namhata na are, nu sisi te karha teu gognaro igne nathuꞌu teuna na koko lao ka khaꞌaghi. Ghotilo ke uludi sisi igrei. Ba, na theome falalaoni ghami la God mae Kmami te au kligna na neu si ghotilo ia? Uve! Nu nomi fatutuani ghotilo na thono ikoni fara!

³¹ Thosei nanga nomidi glepo igre, me cheke eghu, ‘Na ghamu unha si tahatia, ba na koꞌu unha, ba na pipichi ka unha?’

³² Mae bongihehe site mala ghatho tahudire glepo igrea. Nu iara magnahaghei ghami ghotilo te mala nhogri ka mare. Tutuani, mae Kmami ghotilo te au kligna na laseniu te magnahaghedi ghotilo glepo igre.

³³ Nu te keli na, kulu hironi ghu u nakarha God te funei fruni na, nei kulu edi unha te magnahaghedi mana re eghu. Eghuteuna, God ginauna tusu ranghi ghami gobigna lepo te magnahaghedi ghotilo re.

³⁴ Thosei nangani eigna nathuꞌu, naugna nathuꞌu na au nogna puhi ngau thegna te nabagna narane tuana.”