Matiu 5 - Buka Blahi Ka Cheke Holo

Nogna farirhiu mae Jisas ke kligna thogele

¹ Kate filodi mae Jisas nakhapru biꞌo te leghuni mana re, mana haghe ka thogele na ne gnokro soru pari. Nogna mae fanomhore ne kafe mei khapru faligohoni mana.

² Mana funu farirhiudi ne cheke eghu:

³ “Keli tadi iheire te laseni te fnota ka God na, mare ginauna theome ludeni nakarha te tutuani na. Naugna God ginauna funei frunidi nafnata naikno igre.

⁴ Keli tadi iheire te au diꞌanagnafa, mare ginauna nake gleꞌau. Naugna God ginauna fameomegodi.

⁵ Keli tadi iheire te au faparidi thedi, mare ginauna nake gleꞌau. Naugna mare na au nodi glepo te keli teke kulu nhaꞌa cheke ranghidi.

⁶ Keli tadi iheire te magnahagheni fara te eni unha te keli te magnahagheni God. Naugna God ginauna toghodi mare te mala eni igne.

⁷ Keli tadi iheire te namhadi nei lolokelidi teu keha naiknore. Naugna God ginauna jaola nake namhadi nei lolokelidi eghu mare.

⁸ Keli tadi iheire te thofno namhani God. Naugna mare ginauna au balugna God.

⁹ Keli tadi iheire te loku eigna na au muana ke lamnadi iheire te magra. Naugna God ginauna kilodi goro thugna.

¹⁰ Keli tadi iheire te au papara eigna te eni unha te magnahagheni God na. Naugna God ginauna funei frunidi nafnata naikno igre.

¹¹ “Uve, ghotilo keli tami fara kate cheke fapari ghami nei para ghami. Mare ginauna chaghi chekedi thua nafnata cheke te diꞌa eimi ghotilo, naugna ghotilo nogu iara.

¹² Neuba, ghotilo gleꞌa nei keli tami eghu, naugna ginauna Kmada na taba fabiꞌo ghami ghotilo kligna. Naiknore ginauna para ghami ghotilo jateula teke edi hatimare mae Jiu ka nogna mae profet God tifa ra eghu.”

Tahi nei juta

¹³ Mae Jisas ne cheke eghu ka mare, “Nu ghotilo lasenihi tahi ia. Ghotilo mala jateula tahi te mala fakelidi ganora eghu ka naiknogna nauthoglu igne. Nu te khoko grahagna na, ghotilo ginauna theome tangomana teke eni fakeli na. Te eghu na nabagna na koko fakosi mala tapla kolho naikno ke kligna gna.

¹⁴ “Ghotilo mala jateula juta eghu mala baubatuni nakarha te keli na ka naiknogna nauthoglu igne. Namono te au ka thogele na, theome tangomana te poru ka tathagna naikno na.

¹⁵ Jame kaisei mae fakasa juta, mana theome tangomana te lilisei ke pari khara'o na, theo. Nu mana na lilisei haghe kligna, mala kafe phae ka iheire te au kau suga na.

¹⁶ Eghume, jateula tuana eghu, ghotilo mala falalase nakarhami na mala laseni naiknore te nogna naikno God ghotilo na, nei filo glani unha te keli te eni ghotilo na. Eghuteuna mare ginauna cheke fakelini mae Kmami, mae ihei te au kligna.”

Farirhiu eigna nogna vetula mae Moses

¹⁷ Mae Jisas ne cheke eghu ka mare, “Na mei iara kau nauthoglu igne mala hata koko nogna vetula mae Moses nei nodi cheke hatimare mae profet gre eghu ghotilo gaoghathomi na. Theo, iara gne mei mala horoghoto nei laseni eghu ghotilo gaoghathogna unha teke chekeni mare ia eghu.

¹⁸ Nu tutuani fara te chekeni iara ka ghotilo na, kate au nga teu nauthoglu ghe maloa gre baludi gobigna lepo igre, ginauna theome hata koko kaisei phugra cheke ikoi kau nogna vetula mae Moses na, ghilei horoghoto ka gaoghathodire.

¹⁹ Eghume, ihei te huhughuni kaisei phugra cheke ka vetula na, eghuteuna jaola meke farirhiudi keha naiknore mala ke huhughunila vetula na teuna, naikno tuana ginauna pari lahu ka naikno te funei frunidi God re. Eghuteuna ihei te leghuni vetula na eghuteuna jaola meke farirhiudi la keha naiknore mala leghuni la vetula na teuna, naikno tuana ginauna mae biꞌo lahu ka naikno te funei frunidi God re.

²⁰ Te chekeni iara ka ghotilo gognaro na, te jateula nakarhadi hatimare mae velepuhigna vetula nogna mae Moses nei hatimare mae Farasi teu ghotilo te theome keli na, ghotilo ginauna theome nabami te ruma ka naikno te funei frunidi God re.”

Farirhiu eigna te diꞌa tada ka kherada fofodu

²¹ Mae Jisas ne cheke eghu ka mare, “Ghotilo la nomhinihi nodi farirhiu mae kuꞌeda tifa ra, ‘Thosei falehe naikno. Mae ihei te falehe naikno na, mare na hatani mana kau fate.’

²² Nu te chekeni iara ka ghotilo gognarona, mae ihei te diꞌatagna fara ka mae kheragna fofodu na, mare ginau na hatani mana kau fate. Eghuteuna mae ihei te cheke fadiꞌani mae kheragna fofodu na, mare na hatani mana kau fate ke uludi hatimare mae biꞌo. Eghuteuna mae ihei te cheke nolini mae kheragna fofodu na, mana ginauna tei Gehena kau khaꞌaghi te karha fabrahu na.

²³ “Eghume, kate mei pogho soru iagho ka God na, ke ghathoni teke diꞌatagna nigho mae kheramu fofodu ia eghu,

²⁴ thosei kulu mei pogho soru ka God. Iagho tei fadoglini najafra teke fathoro nigho mae kheramu fofodu na, ame ke pulo nga iagho mala pogho soru ka God eghu.

²⁵ “Mae ihei te magnahaghei hata nigho kau fate eigna unha teke eni fadiꞌa iagho ranghini na, iagho ghosei tei fadoglini ka mana puhi tuana. Te theo iagho na, mana ginauna na hata tei nigho ka mae mala fate. Eghuteuna, mae mala fate na ginauna snakre tei nigho ka hatimare mae pulisire. Aonu, mare ginauna hata tei nigho kau suga sosolo.

²⁶ Tutuani fara, te chekeni iara ka ghotilo na, te eghu na, iagho ginauna theome ghosei jifla kau suga sosolo na, ghilei foli fahui iagho sileni leghu lahu gna u nou faen na.”

Farirhiu eigna tholaghi pedo

²⁷ Mae Jisas ne cheke eghu, “Ghotilo la nomhinihi cheke farirhiu te cheke eghu ia, ‘Thosei tolaghi pedo.’

²⁸ Nu te chekeni iara ka ghotilo na, mae ihei te filo lao ka gaꞌase na eghuteuna magnahagheni naꞌa kau gaoghathogna na teuna, mana la enihi puhi te diꞌa na ka naꞌa.

²⁹ Nu, jame te batu nigho tatha fei nhetamu na kau puhi te diꞌa na, iagho bilo koko. Theome keli te lisa lao iagho thinimu fateo na Gehena ka khaꞌaghi te karha fabrahu na. Te keli na iagho koko ngala vido ikoi tuana.

³⁰ Jame te batu nigho khame fei nhetamu na kau puhi te diꞌa na, iagho kusu koko. Theome keli te lisa lao iagho thinimu fateo na Gehena ka khaꞌaghi te karha fabrahu na. Te keli na iagho koko ngala vido ikoi te diꞌa tuana.

³¹ “Nu kaisei na teuna, ghotilo la nomhinihi u farirhiu te cheke eghu ia, ‘Mae ihei te magnahaghei koko khetogna na, keli fara, mana na tusu lao pepa te mala sopa au na ka naꞌa, ame tangomana nga mana te tei kokoni khetogna na eghu.’

³² Nu te chekeni iara ka ghotilo na, mae ihei te koko khetogna na, eghuteuna ke tolaghi naꞌa ka kaisei mae delei ngau teuna, naꞌa na khale ka tholaghi pedo, naugna nakhibogna mae khetogna na. Eghuteuna, mae ihei teke tolaghi ka naꞌa na mana khale la kau tholaghi pedo.”

Farirhiu eigna u nhaꞌa cheke

³³ Mae Jisas ne cheke eghu, “Ghotilo la nomhinihi vetula teke cheke eghu mae kuꞌeda tahati tifa ra, ‘Thosei nhaꞌa cheke chaichaghi. Nu unha teke nhaꞌa chekeni ghotilo ka nanghagna God na tuana ngala te mala eni tutuani ghotilo na.’

³⁴ Nu te chekeni iara ka ghotilo gognarona, thosei nhaꞌa cheke ka kaisei unha nga eghu. Thosei nhaꞌa cheke kligna, naugna kligna na namono mala au gna God mae King.

³⁵ Ghotilo jaola thosei nhaꞌa cheke kau nauthoglu igne, naugna nauthoglu igne mala taplagna God. Eghuteuna ghotilo thosei nhaꞌa cheke ka namono biꞌo Jerusalem, naugna nogna namono God mae King.

³⁶ Eghuteuna kate nhaꞌa cheke na ghotilo, thosei nhaꞌa cheke ka phaꞌumi themi are, naugna ghotilo theome tangomana te eni favegha ba fapipito kaisei khaklami na.

³⁷ Eghume, kate nhaꞌa cheke na ghotilo, chekeni ngala te ‘Uve, iara na eniu’ ba ‘Theo, iara na theome eni tuana.’ Jame te cheke salaꞌui ghotilo na, u nafnata nhaꞌa cheke tuana neke mei funugna ka mae Satan.”

Farirhiu eigna kuikuni

³⁸ Mae Jisas ne cheke eghu, “Ghotilo la nomhinihi u cheke farirhiu te cheke eghu ia, ‘Mae ihei te fadidiꞌa kaisei tathagna mae kheragna fofodu na, mare ginauna nake jaola fadidiꞌa kaisei tathagna mana. Eghuteuna mae ihei te pipisu kaisei kheꞌigna mae kheragna fofodu na, mare ginauna jaola nake pipisu kaisei kheꞌigna mana.’

³⁹ Nu te chekeni iara ka ghotilo na, thosei tughu fapulo unha teke eni fadiꞌa ranghi nigho mae kheramu fofodu na. Nu mae ihei te famamaja nigho te mei te taponi keha phile bakomu na, iagho ke figri lao keha bakomu na mala ke tathapo mana.

⁴⁰ Nu jame kaisei mae magnahaghei hati nigho kau fate mala hata nou phoko iagho na, jateula te pholorugna teke fadiꞌani mana iagho na teuna, jaola ke tusu lao iagho ka mana nou phipichi te brahu na eghu.

⁴¹ Jame kaisei mae soldia kuru nigho mala hata tei nogna glepore nabagna kaisei kilomita teuna, iagho hata tei nogna glepo mana re nabagna phei kilomita.

⁴² Jame kaisei naikno tore glepo ka iagho, fei nogna eghu. Eghuteuna mae ihei te magnahaghei hata ghu kolho kaisei glepo ka iagho teuna, snakre lao ka mana eghu.”

Farirhiu eigna u namha

⁴³ Mae Jisas jaola neke cheke eghu, “Ghotilo la nomhinihi farirhiu te cheke eghu ia, ‘Namhani mae kheramu fofodu na, eghuteuna tirouni nou mae naoka na eghu.’

⁴⁴ Nu te chekeni iara ka ghotilo na, ghotilo mala kafe namhadi nomi mae naokare, nu taraidi naikno te para ghami re eghu.

⁴⁵ Te eghu ghotilo na, ghotilo ginauna goro thugna God mae Kmami te au teu kligna. Naugna God namhadi iheire te diꞌa ranghini. Tutuani, mana neke eni naprai mala phae ke klignadi iheire te keli ba ke klignadi iheire te diꞌa. Mana jaola neke eni nakhete na mala soru ke klignadi iheire te keli ba ke klignadi iheire te theome keli.

⁴⁶ Jame te namhadi kolho ghotilo naikno te namha ghami themire, God ginauna na theome taba ghami ghotilo. Naugna mae te diꞌa te saosalo takis igre mare jaola eni tuana.

⁴⁷ Eghume, te keli ranghidi kolho ghotilo kherami fofodu themire, tuana theo kaisei nafugna kolho. Naugna mae bongihehe re mare edila nafnata puhi tuare.

⁴⁸ Nu te chekeni iara ka ghotilo na, ghotilo te gnafa na mala kafe klino nei doglo eghu fabrahu nakarhamire, jateula mae Kmami te au kligna te klino nei doglo fabrahu teu nakarhagna ia eghu.”