Matiu 4 - Buka Blahi Ka Cheke Holo

Mae Satan ne fariuriuni mae Jisas mala jafra mana

¹ Tharunga te Blahi na batuni mae Jisas ne tei ka namono nagou na mala mei mae Satan mala fariuriuni mala jafra mana.

² Kate theome ima mana ke lamnadi phiatutu narane nei phiatutu bongi teu igre, mae Jisas ne rofo fara.

³ Satan mei ne cheke eghu ka mana, “Ghema, te Thugna God iagho na, iagho chekedi thina igre mala tughu ke vuhai bret.”

⁴ Jisas ne cheke eghu ka mae Satan, “Grioriso te blahi ia cheke eghu, ‘Naikno na theome karha ka gano kolho, nu karha ka cheke te gnafa te jifla mei ka God.’ ”

⁵ Satan batuni Jisas ne haghe ka namono blahi Jerusalem, ne fakegrani mana ka khekelegna Sugablahi na.

⁶ Satan ne cheke eghu ka Jisas, “Ghema, te Thugna God iagho na, krofu soru pari! Naugna te chekeni kau grioriso te blahi ia, “ ‘God ginauna na chekedi nogna engel re mala reireghi nigho. Mare na tako nigho mala theome tothokei iagho ghahemure ka thina.’ ”

⁷ Mae Jisas ne cheke eghu ka mana, “Nu te chekeni la ka grioriso te blahi ia, ‘Thosei fariuriuni Lord nou God!’ ”

⁸ Ke leghugna igne, Satan ne hatani mae Jisas ne haghe kau khekelegna thogele te brahu na. Satan ne tathakle ka mana thuagna namono biꞌo fateo gna nauthoglu igne nei nodi nafnakno fateote'o.

⁹ Eghuteuna Satan ne cheke eghu, “Gobigna lepo igre iara na snakre ari ka iagho, eghu jame te tuturupuku te pogho soru iagho ranghi ghau iara na.”

¹⁰ Mae Jisas ne cheke eghu ka mana, “Tei delei, ghema Satan! Naugna te chekeni teu kau grioriso te blahi na, ‘Iagho pogho soru ranghini Lord nou God, eghuteuna loku ranghini kolho mana.’ ”

¹¹ Aonu, Satan ne tei kokoni mae Jisas. Eghuteuna nogna engel God re mei ne toghoni mae Jisas.

Mae Jisas ne fufunu u nogna gloku na Galili

¹² Kate nomhini mae Jisas au teu mae Jone kau suga sosolo na, mana jifla Judia neke pulo Galili.

¹³ Mana ne kulu tei Nasaret, eghuteuna mana theome au raugha jare. Nu mana jifla neke tei au Kapanam, kaisei namono rhegna Kholo Galili, ke lamnagna nohi Sebulun nei Naftali.

¹⁴ Igne ne horoghoto ka unha teke cheke eghu mae profet Isaia tifa ia,

¹⁵ “Ka namonogna Sebulun nei Naftali, ka nabrou te tei posa ke tongna, ka keha phile Kho'u Jordan, te au Galili namonodi naikno te theome Jiu.

¹⁶ Naikno te theome laseni God, te au kate romno igre ginauna filoniu naphae te biꞌo na. Naphaegna God na ginauna na jateula naprai te haghe hamerane ia eghu na thakle ranghidi naikno te theo tadi nakarhagna God.”

¹⁷ Funu ka narane igne mae Jisas ne funu toutonuni Nonomho te Keli na ka naiknore ne cheke eghu, “Ghotilo lilisei puhimi te diꞌare, naugna narane God te funei frunidi nogna naiknore la namo meihi.”

Mae Jisas ne kilodi hatimare fati mae naugra

¹⁸ Kate lilihi te tei mae Jisas ka grathagna Kholo Galili, mana ne filodi phei mae thabusigna te ugra sasa, mae Simon mae te kiloi Pita ghe mae Aduru. Phiamare ugra sasa ka nodi fangna na.

¹⁹ Mae Jisas ne cheke eghu ka phiamare, “Mei ke leghugu. Iara na falalase ka ghopa te mala salo mei naikno ka iara na.”

²⁰ Aonu, phiamare ghosei ne lisei soru nodi fangnare ne tei balugna mana.

²¹ Mana tei ne filodi mae Jemes ghe mae Jone, phei thugna mae Sebedi. Phiamare saghe neu ka mola na balugna mae kmadi na, ghau neu nodi fangnare. Mae Jisas jaola ne kilodi phiamare.

²² Phiamare ghosei ne tei kokoni mola na balugna mae kmadi na, ne tei leghuni mae Jisas.

Mae Jisas ne farirhiudi nei fakarhidi eghu naikno te fogra

²³ Mae Jisas ne tei tongana ka Provins Galili, ne ruma ka nodi suga tharai mae Jiu ne farirhiu, nei toutonu thakleni Nonomho te Keli eigna narane God nate funei frunidi nogna naiknore, nei fakarhidi naikno te gnafa te fogra nei khabru biꞌo teure.

²⁴ Thoutonu eigna mae Jisas na ne tei tongana heva heva ka Provins Siria, eghuteuna mare hata ne mei ka mana naikno te gnafa te fogra re. Naikno igre au tadi soasopai khabru. Keha au naitu, keha snosnogho, nei keha lehe ghahedi nei khamedi teure. Tutuani, mae Jisas ne kafe fakarhadi.

²⁵ Kmana naikno mei funudi ka Provins Galili, nohi Dikapolis, ka namono biꞌo Jerusalem, ka Provins Judia nei ka keha phile Kho'u Jordan ne tei leghuni mae Jisas.