Matiu 28 - Buka Blahi Ka Cheke Holo

Mae Jisas neke karha fapulo

¹ Ke leghu narane Sabat, ghagra pasa hamerane Sade, Meri Makidala balugna keha Meri na repa ne tei filo ka gluma na.

² Aonu, kaisei nakheu biꞌo ne nghali ne kheu tongana gobigna lepore ka vido tuana. Eghuteuna, nogna engel Lord na ne soru mei funu kligna ne tei ka gluma na, ne pili fadelei thina biꞌo teke fofothogna gluma na ne gnokro ke kligna thina.

³ Tathagna nei foflogna teu mana re ne siasigla jateula nakafli neu. Eghuteuna nogna phoko manare ne thono vegha fara.

⁴ Mae soldia teke reireghi gna gluma na ne mhaghu nodi fara ne uka pari jateula mae tela lehehi ra neu.

⁵ Engel na ne cheke eghu ka phei gaꞌase re, “Thosei mhaghu. Iara lase ghami ghopa hironi mae Jisas, mae ihei teke tupijuru mare ka gaju fafatha ia.

⁶ Mana theome au agne. Mana kela kegra fapulohi glehe, jateula teke chekenihi mana ia eghu. Mei si ghopa filoni aheva teke au thinigna mana na.

⁷ Ghose tei cheke eghu ka nogna mae fanomho mana ra, ‘Mae Jisas na kela karha fapulohi. Mana gognaro kulu tei Galili mala ofo ghami ghotilo. Ghotilo ginauna filoni mana jare.’ Igne nogu cheke iara ka ghopa na.”

⁸ Aonu, repa ghosei chari ne tei funu ka gluma na. Repa mhaghu nodi fara, nu repa jaola thono gleale'a fara. Aonu repa chari ne tei ne toutonu ka nogna fanomho mae Jisas re.

⁹ Nu mae Jisas megei nga ne thakle ka repa ne cheke eghu, “Pharikeli!” Eghuteuna repa tei ne loku ka ghahegna mana re, ne cheke fakelini mana.

¹⁰ Mae Jisas ne cheke eghu ka repa, “Thosei mhaghu! Tei cheke ka nogu mae fanomho iara ra mala tei Galili, eghuteuna mare ginauna filo ghau iara jare.”

Mae soldiare ne toutonu chaghi eigna mae Jisas ka mae biꞌodi mae Jiu

¹¹ Kate tei repa ka nabrou na, keha mae soldia teke reireghi gna gluma na tei Jerusalem ne toutonu ka mae pris ulu re unha teke edire.

¹² Aonu kate faidu mae pris ulu baludi keha mae biꞌodi mae Jiu gre, mare ne tusu lao sileni biꞌo fara ka mae soldia re.

¹³ Mare ne cheke eghu ka mae soldia re, “Ghotilo cheke eghu, ‘Nogna fanomho mae Jisas re thuru neu ghehati ne mei blau thinigna mana na.’

¹⁴ Jame te nomhini gavana Paelat eigna igne, ghotilo thosei mhaghu, ghehati ginauna togho ghami ghotilo mala toutonu ka mana eidi lepo igre.”

¹⁵ Aonu mae soldiare hata fofoli ka mare ne leghuni unha te chekeni mae pris ulu igre. Eghume nodi thoutonu mae soldia igre ne tei krepa tongana fari hoteidi mae Jiu, ne ghilei mei thoke ka narane gognarogne.

Mae Jisas ne cheke ka nogna mae fanomhore

¹⁶ Eghuteuna nabotho kaisei mae fanomho gre jifla ne tei Galili. Mare ne tei ka thogele aheva teke chekeni mae Jisas mala tei mare teku na.

¹⁷ Aonu, kate filoni mana ka thogele na, mare turupuku soru ne kilo fnaknoni ka mana. Nu keha mae fanomhore pogho soru balu ghatho peapea.

¹⁸ Ka narane igne, mae Jisas mei ne cheke eghu ka nogna mae fanomho re, “Mae Mama snakre meihi ka iara nolaghi te gnafa kligna nei pari.

¹⁹ Eghume, ghotilo tei mala farirhiudi naikno ka namono te gnafa ka nauthoglu igne mala nogu mae fanomho iara. Faꞌapublahidi ka nanghagna Mama nei Thugna nei Tharunga te Blahi.

²⁰ Nu farirhiudi mala leghudi mare gobigna lepo te chekedi iara ka ghotilo ra. Ghotilo laseni, iara ginauna na au balumi ghotilo fabrahu ghilei thoke ka huigna nauthoglu igne.”