Matiu 27 - Buka Blahi Ka Cheke Holo

Mae Jisas ke ulugna mae Paelat

¹ Hamerane boibongi, hatimare mae pris ulu nei hatimare mae biꞌo teu igre ne kafe roghe mala faleheni mae Jisas.

² Hatimare haru fodu phei khamegna mae Jisas re hata ne tei ka mae Paelat, mae gavana.

Glehegna mae Judas

³ Judas mae ihei te majorani mana igne ne lasedi hatimare te magnahaghei faleheni mae Jisas igne, mana ne diꞌanagnafa gna fara. Aonu mana ne hata fapulo tolufulu sileni teke hata mana ka hatimare mae pris ulu nei hatimare mae biꞌo.

⁴ Mae Judas ne cheke eghu ka mare, “Iara la jafrahi, naugna iara ne majorani mae te theo kaisei nakhibogna na ka glehe.” Mare ne cheke eghu ka mana, “Tuana nou puhi iagho themu kolho, theome nomi puhi ghehati.”

⁵ Mae Judas tei ne koko soru sileni tuana ka Sugablahi na. Aonu mana tei ne froro thegna.

⁶ Hatimare mae pris ulu ne hata haghe sileni igne ke lamnagna Sugablahi na. Mare ne cheke eghu, “Noda vetula tahati na theome snakreni te tathaji sileni igne baludi sileni gna Sugablahi igne. Naugna sileni igne neke taba eigna glehe naikno.”

⁷ Aonu mare kaisei gaoghatho ne hata sileni igne mala foli nogna vido sare mae te mala hohorodi kapu ba tapera, mala bekudi naikno posa te theome Jiu te au jare Jerusalem.

⁸ Naugna igne mare ne kiloni vido sare te au beku tuana, “Sare dadara,” ghilei posa ka narane gognaro gne.

⁹ Igne horoghoto ka unha teke cheke eghu mae profet Jeremaea tifa ia, “Mare ne hata haghe tolufulu sileni, naba teke magnahagheni mare te mala folini mana.

¹⁰ Mare hata tolufulu sileni igne ne foli nogna vido sare mae te mala horo kapu ba tapera, jateula Lord teke cheke ranghi ghau iara.”

Mae Paelat ne ghusnani mae Jisas

¹¹ Mae Jisas ne kegra ke ulugna mae Paelat, mae gavana gna Rome. Paelat ne ghusna eghu ka mae Jisas, “Ba, iagho thofno nodi king mae Jiu gre sia ghema?” Mae Jisas ne cheke eghu ka mana, “Uve, te chekenihi iagho tuana.”

¹² Mae Jisas ne theome cheke tughu ka nodi fathoro hatimare mae pris ulu nei hatimare goro mae biꞌo.

¹³ Aonu mae Paelat ne cheke eghu ka mana, “Theome nomhidi sagho puhi kmana te fathoro nigho naikno igrea ghema?”

¹⁴ Nu mae Jisas ne theome cheke tughu ka mae Paelat. Aonu, mae Paelat ne jaglo nogna fara ka igne.

Mare fate faleheni mae Jisas

¹⁵ Leuleghu finogha ka narane Gaghamu Ghasa-Polho na, mae gavana tangomana te snakre fajiflani kaisei mae sosolo. Ihei te toreni hatimare mae Jiu ka mae gavana igne ngala te snakre fajiflani na.

¹⁶ Ka narane tuana kaisei mae ihei teke eni puhi te thono diꞌa fara na au jare ka suga sosolo. Nanghagna na mae Barabas. Kmana naikno laseni puhigna mana na.

¹⁷ Naiknore ne kafe khapru mei ke kosi suga mae Paelat. Aonu mae Paelat ne ghusna eghu, “Mae ihei ka phei mae igre te magnahagheni ghotilo te mala snakre fajiflani iara tami na? Mae Barabas ba Jisas te kiloi mae Kraes?”

¹⁸ Mae Paelat kulu lasenihi hatimare mae pris ulu nei hatimare mae biꞌo te hatani mae Jisas te mei ka mana na, naugna mare goghotuni mae Jisas.

¹⁹ Mae Paelat chekedi glepo igre kate gnokro mana ka sape fate na. Kate gnokro mae Paelat te fateni mae Jisas na, khetogna gavana igne ne famei kaisei nonomho. Nonomho igne cheke eghu, “Thosei eni kaisei glepo ranghini thau te theo kaisei nakhibogna tuana. Naugna ginei iara ne mifi eigna naꞌa ne theome thuru fakeli nogu.”

²⁰ Nu hatimare mae pris ulu nei hatimare mae biꞌo eghu ne huhurudi fara naiknore mala toreni mae Paelat mala hata fajiflani mae Barabas ka suga sosolo, eghuteuna mala faleheni mae Jisas.

²¹ Mae Paelat ne ghusna eghu ka naiknore, “Mae ihei ka phei mae igre te magnahagheni ghotilo te mala snakre fajiflani iara tami na?” Naiknore ne eha eghu fapulo ka mana, “Mae Barabas!”

²² Mae Paelat neke ghusna eghu, “Unha nate eni iara ranghini mae Jisas te kiloi mae Kraes igne?” Mare ne kafe thagru fabiꞌo, “Tupijuruni ka gaju fafatha!”

²³ Mae Paelat neke ghusna eghui ka mare, “Naugna unha te mala faleheni iara mae igne? Unha najafra biꞌo teke eni mana na?” Mare ne kafe thagru eghu fabiꞌo fara, “Tupijuruni ka gaju fafatha!”

²⁴ Mae Paelat laseni mana theome tangomana te eni kaisei glepo eigna igne. Naugna magra na la fufunuhi, mana hata keha khoꞌu ne titihi khame ke uludi naiknore. Aonu mana ne cheke eghu, “Iara theo kaisei nakhibogu ka glehegna mae te doglo igne! Nu nakhibomi ghotilo themi te eni na!”

²⁵ Naiknore ne kafe cheke eghu ka mana, “Uve, glehegna mae igne nomi puhi ghehati themi nei vikemi ghehati ginaure eghu!”

²⁶ Mae Paelat ne leghuni unha te toreni naiknore ne snakre fajiflani mae Barabas. Mae Paelat ne chekedi keha nogna mae soldia mala purini mae Jisas ka phukri. Aonu mana ne snakreni mae Jisas ka mae soldiare mala tei tupijuruni mana ka gaju fafatha.

Hatimare mae soldiare ne maꞌeni mae Jisas

²⁷ Nogna soldia mae Paelat igre hatani mae Jisas ne tei ka sugagna mae gavana. Aonu hatimare mae soldia igre ne kafe mei kegra faligohoni mae Jisas.

²⁸ Mare hata koko nogna phoko mana na neke nhaꞌa lao kaisei phoko ukru ka mana mala tithini mae King.

²⁹ Mare nhaꞌa lao kaisei khepi fifiriulu ka pha'ugna mana na. Eghuteuna mare ne faloku lao kaisei khodo fei khame nheta mala tithini mae king mana fifilogna na. Gnafa teuna, mae soldiare ne kafe pogho soru ke ulugna mae Jisas ne maꞌeni mana. Aonu mare ne cheke eghu ka mana, “Cheke fakeli nigho, iagho nodi king hatimare mae Jiu!”

³⁰ Mae soldia re ne kmisuni mae Jisas. Aonu mare hata khodo na ka mana ne puphuri ne puphuri ka pha'u mana na.

³¹ Ke leghugna te maꞌeni mana igne, mare ne salo koko phoko ukru na ka mana, eghuteuna ke falao nogna phoko thegna re. Aonu mare hata fajiflani mana ka suga biꞌo na mala tei tupijuruni ka gaju fafatha na.

Mare tupijuruni mae Jisas

³² Ka nabrou na, mare mei ne thafoni kaisei mae nanghagna na mae Simon, maegna ka namono biꞌo Saerini. Mae soldia igre ne huhuruni mana mala pala nogna gaju fafatha mae Jisas na.

³³ Eghuteuna mare tei ne thoke ka kaisei vido te kiloi Golgota. (Gaoghathogna Golgota teu igne, “Vido Korongosa”.)

³⁴ Jare mae soldia gre ne tusu lao waen te ngigno balu pophoji raha mala koꞌu mae Jisas. Kate gnaignami na, mana tirogna te ko'u na.

³⁵ Aonu ke leghugna te tupijuruni mae Jisas ka gaju fafatha na, mae soldia re ne tufa nogna pohe mana re fari hoteidi thedi, kate lalahu khale na.

³⁶ Aonu, mare gnokro soru ne reireghini mana kate gefe teu mana jare na.

³⁷ Mare lilisei fagaglana ke kligna pha'ugna mae Jisas ka gaju fafatha na balu fathoro teke edi mare ka mana. Mare ne rioriso cheke igre: “JISAS NODI KING HATIMARE MAE JIU.”

³⁸ Aonu keha phei mae blau jaola ne tupijuru balugna mana ka gaju fafatha na, kaisei fei nhetagna, eghuteuna kehana fei mairigna.

³⁹ Naikno te sala'u jare na, mare ne thono ngingiridi fara ne cheke fadiꞌani mae Jisas ne bliubliu phaꞌudi re, ne cheke eghu,

⁴⁰ “Ghema, iagho mae teke chekeni iagho tangomana te paꞌe soru Sugablahi na, eghuteuna ke babana fapulo ke lamnadi thilo narane teku ia. Jame te Thugna God tutuani iagho na fakarhi nigho themu soru mei ka gaju fafatha na!”

⁴¹ Hatimare mae pris ulu nei hatimare mae velepuhigna vetula nogna mae Moses nei hatimare mae biꞌo teu igre jaola ne maꞌeni Jisas,

⁴² ne cheke eghu, “Tore! Mana fakarhidi keha naiknore, nu theome tangomana te fakarhini thegna na! Eghume mana noda king tahati mae Israel. Te king tutuani mana na, lisani mala soru mei ka gaju fafatha na gognarola, eghuteuna tahati ginauna laseni te mae Kraes tutuani mana na.

⁴³ Mana au nogna grouronu ka God chekeni koba ne Thugna God teuna. Eghuteuna te ghathoni mana tutuani God na lisa laoni mala mei God fakarhini mana.”

⁴⁴ Phei mae blau te tupijuru balugna mae Jisas igre jaola ne cheke faparini mana.

Glehegna mae Jisas

⁴⁵ Fari hotei naublatha, namono te gnafa ke lamnagna nauthoglu igne ne kafe romno funu tanhi nabotho phei thoke ka tanhi thiloi.

⁴⁶ Naba tanhi thiloi, mae Jisas ne eha eghu fabiꞌo, “Eli, Eli, lema sabakatani?” Gaoghathogna na, “Nogu God, nogu God, naugna unha sagho te tei koko ghau iara gnea?”

⁴⁷ Keha naikno te kegra teu jare na ne nomhini igne ne cheke eghu, “Tore! Mana kiloni mae profet Elija!”

⁴⁸ Kaisei mae ka mare chari ne tei hata kaisei phocho ne titihi kau waen te raha na ne chuchuru ka fora na ne tusu haghe ka phepeogna mae Jisas na mala koꞌu mana.

⁴⁹ Nu keha naikno ne cheke eghu, “Khudau mala filo nodani glahula mei mae Elija fakarhini mana!”

⁵⁰ Ka vido tuana, mae Jisas neke eha fabiꞌo, ne lehe.

⁵¹ Kate lehe mae Jisas na, pohe biꞌo teke gefe soru ke lamnagna Sugablahi na ne breku pea funu kligna thoke pari. Eghuteuna nakheu biꞌo na ne nghali nauthoglu na, eghuteuna thina biꞌo re ne phike pea.

^52-53 Aonu bekure ne thora, eghuteuna kmana naikno nogna God teke lehe tifa ra ne kafe kegra fapulo ka karha. Eghuteuna mare ne jifla mei ka bekudire. Ke leghugna te kegra fapulo mae Jisas na, naikno teke kegra fapulo igre ne tei Jerusalem. Eghuteuna, kmana naikno ne filodi mare.

⁵⁴ Ka vido tuana kaisei mae biꞌodi hatimare mae armi nei keha mae soldia teke reireghini mae Jisas igre ne mhaghu nodi fara ka nakheu igne, nei gobigna lepo te edi ka narane tuana. Mare ne cheke eghu, “Tutuani fara, mae igne thofno Thugna God!”

⁵⁵ Kmana gaꞌase teke mei funudi Galili balugna Jisas te mala toghoni mana igre filo neu delei.

⁵⁶ Keha ka gaꞌase igre neke, Meri thaugna Makidala, Meri idodi mae Jemes ghe mae Josep, nei idodi mae Jemes ghe mae Jone, phei thugna mae Sebedi.

Giugilugna mae Jisas

⁵⁷ Ka grafi tuana kaisei mae dedei gna Arimatea, nanghagna na mae Josep mei Jerusalem. Mana kaisei nogna fanomho mae Jisas.

⁵⁸ Aonu, mae Josep tei ka mae Paelat ne toreni thinigna mae Jisas. Mae Paelat ne cheke ka hatimare mae soldia mala snakreni ka mae Josep thinigna mae Jisas.

⁵⁹ Mae Josep hata thinigna mae Jisas na ne pipiha ka pohe vegha majaghani.

⁶⁰ Mana lilisei thinigna mae Jisas na ka nogna gluma majaghani thegna teke jou mare ka thina biꞌo na. Aonu ke leghu, mae Josep ne pili kaisei thina biꞌo mala fofotho gluma na ne tei nogna.

⁶¹ Meri Makidala ghe keha Meri na, gnokro rhegna gluma na reireghi neu.

⁶² Narane tuana, narane mala tarabana eigna narane Sabat. Ka keha narane na hatimare mae pris ulu nei hatimare mae Farasi eghu ne tei ka mae Paelat.

⁶³ Mare ne cheke eghu ka mana, “Mae biꞌo, ghehati kela ghathoni teke cheke eghu mae te chaichaghi ia kani karha tekeu mana ia, ‘Iara ginauna nake karha fapulo ka fatilo narane na.’

⁶⁴ Ghehati magnahaghei nigho iagho te chekedi nou mae gloku ra mala reireghi fakeli gluma tuana ghilei thoke ka fatilo narane na. Nogna mae fanomhore jame mei blau thinigna mana na. Eghuteuna mare tangomana te chaghi te cheke eghu ka naiknore, ‘Mana kela karha fapulohi.’ Chaghi tuana na diꞌa fara uluni teke eni tifa ia.”

⁶⁵ Mae Paelat ne cheke eghu ka mare, “Uve, hata keha mae soldia mala reireghi fakeli gluma na.”

⁶⁶ Aonu, mare ne kafe tei ka gluma na ne famane bibilakhi famaku thina biꞌo teke fofothogna gluma na mala theome tangomana kaisei naikno te mei blau thinigna mae Jisas. Eghuteuna mare ne lilisei keha mae soldia mala reireghi fakeli gluma na.