Matiu 25 - Buka Blahi Ka Cheke Holo

Cheke nabadi nabotho gaꞌase

¹ Mae Jisas ne cheke eghu, “Ka narane leghu lahu na, nafnata puhi God te funei frunidi nogna naiknore igne jateula cheke nabadi nabotho gaꞌase te mala loku sisi ka tholaghi ia eghu. Uve, nabotho gaꞌase igre neke tei ofoni mae mala tolaghi na. Rehati ne hata nodi jutare baludi.

² Keha glima gaꞌasere theome lalase, eghuteuna keha glima gaꞌasere lalase.

³ Aonu glima gaꞌase te theome lalase igre hata nodi jutare, nu rehati theome hata naba keraseni baludi.

⁴ Aonu, glima gaꞌase te lalase igre hata nodi jutare nei hata nodi kmana keraseni baludi.

⁵ Uve, mae tholaghi igne ne theome ghosei mei. Eghuteuna rehati kafe thuru doka ne ghilei thuru iho.

⁶ “Fari hotei bongiro, ka bongi tuana kaisei mae ne poapola eghu fabiꞌo, ‘Mae tholaghi na la meihi! Mei ghotilo mala thafoni mana!’

⁷ “Rehati kafe dofra haghe ne tarabana nodi jutare.

⁸ Thau te theome lalase igre ne cheke eghu ka thau te lalase re, ‘Famei keha nomi keraseni. Nomi juta ghehati gre namo lehe.’

⁹ “Rehati ne cheke eghu ka reꞌe, ‘Theo. Keraseni ghehati gre jame theome kafe nabada tahati. Tei si ghotilo ka naikno te foli keraseni are mala foli keha nomi themi.’

¹⁰ “Nu glima gaꞌase te theome lalase igre ne tei foli keraseni. Ke leghudi reꞌe te tei foli keraseni na, mae te mala tholaghi na ne mei. Keha glima gaꞌase teke kulu tarabana nodi jutare ne tei balugna mana ka suga te mala ghamu gaghamu tholaghi na. Aonu grengatha na bobotho ne bibilakhi.

¹¹ “Theome raugha ke leghugna igne, keha glima gaꞌasere neke pulo mei. Rehati mei ne eha eghu ke kosi suga, ‘Mae funei! Mae funei! Tothora grengatha gne mala ruma ghehati!’

¹² “Nu mae tholaghi na ne cheke eghu, ‘Tutuani fara te chekeni iara ka ghotilo na, iara theome lase ghami ghotilo, naugna ghotilo theome nogu iara.’ ”

¹³ Aonu, gnafa thonu tuana mae Jisas ne cheke eghu ka mare, “Eghume, ghotilo tarabana nomi koba. Naugna ghotilo theome laseni narane mala ke pulo meigu iara na.”

Kaisei cheke naba di thilo mae gloku

¹⁴ Mae Jisas ne cheke eghu, “Ka narane leghu lahu na, nafnata puhi God te funei frunidi nogna naiknore jateula cheke naba di thilo mae gloku igre eghu. Kaisei fata, kaisei mae funei tarabana mala jifla ka namono na mala tei ka keha namono delei. Ame jifla nga teuna, mana ne cheke ka nogna mae glokure. Mana ne cheke ka mare mala reireghidi nogna gobigna lepore kate tei mana na.

¹⁵ Aonu mana tusu lao sileni kmana ka thilomare leghuni nodi glalase na. Mana ne tusu lao ka kaisei mae gloku glima duku sileni. Ka keha mae gloku na, phei duku sileni. Eghuteuna, ka fatilo mae gloku na, kaisei duku sileni. Mana jifla ka namono na ne tei.

¹⁶ Aonu mae gloku teke hata glima duku sileni igne ghosei ne tei loku ne tangomana teke horo haghe keha glimai.

¹⁷ Ke jaola ngau mae teke hata phia duku na. Mana tei ne loku neke tangomana teke horo haghe keha phei duku sileni.

¹⁸ Nu mae gloku teke hata kaisei duku sileni ia, mana jifla na tei ne dokha kaisei khora lamna glose. Aonu mana ne titifuni nogna sileni mae funei na lamna khora.

¹⁹ “Keha finogha ke leghugna igne, mae funei na neke pulo mei. Aonu mana ne kilodi nogna mae glokure ne ghusna eghu ka mare, ‘Faꞌunhadi si ghotilo nogu sileni iara ra?’

²⁰ Mae gloku teke hata glima duku sileni na, hata ne mei balugna ka mae funei na keha glima duku silenire. Mae gloku igne ne cheke eghu, ‘Mae funei, filo sagho! Iagho neke tusu mei glima duku sileni mala reireghi iara. Aonu iara neke loku ka nou glima duku sileni iagho ra neke horo haghe keha glima duku aro.’

²¹ “Aonu, mae funei na ne cheke eghu ka nogna mae gloku na, ‘Ghema, iagho kaisei mae gloku keli fara! Eghuteuna iagho ghathodi koba unha te chekedire. Eghume, naugna te ghatho branani iagho nou gloku na ka sileni ikoi teke tusu ari iara ia, gognarona iara na tusu ari kmana glepo ke biꞌodi igrei ka iagho mala reireghidi iagho. Aonu iagho mei mala gleale'a balugu iara.’

²² “Mae teke hata phei duku silenire ne mei ka mae funei na. Mana ne cheke eghu, ‘Mae funei, filo sagho! Iagho neke tusu mei phei duku sileni mala reireghi iara. Aonu iara neke loku ka nou phei duku sileni iagho ra neke horo haghe keha phei.’

²³ “Aonu, mae funei na ne cheke eghu ka nogna mae gloku igne, ‘Ghema, iagho kaisei mae gloku keli fara! Iagho ghathodi koba unha teke chekedi iara ra. Eghume, naugna te ghatho branani iagho nou gloku na ka sileni ikoi teke tusu ari iara ia, gognaro na iara na tusu ari kmana glepo ke biꞌodi igrei ka iagho mala reireghidi iagho. Aonu iagho mei mala gleale'a balugu iara.’

²⁴ “Aonu mae gloku teke hata kaisei duku sileni igne ne mei ka mae funei na. Mana mei ne cheke eghu, ‘Mae funei, iara lase nigho iagho kaisei mae ninhigrana fara. Naugna iagho jateula kaisei mae te rouronu te mala tei hata gano ka nagare aheva teke theome joꞌu thegna na.

²⁵ Eghume iara mhaghu nogu nigho ne tei titifuni nou sileni iagho re ke lamna glose. Igne duku sileni iagho te tusu mei ka iara tifa ia.’

²⁶ “Nogna mae funei na ne cheke eghu ka mana, ‘Ghema, iagho kaisei mae gloku diꞌa fara, nei mae thodo eghu! Uve, te chekeni iagho ia, iagho lase ghauhi iara ne jateula kaisei mae te rouronu te mala tei hata gano ka nagare aheva teke theome joꞌu thegna teuna.

²⁷ Naugna unha neke theome lilisei nogu sileni iara gre ka banki sagho ia? Jame eghu iagho na, kate pulo mei na, iara jame hata fapulo keha sileni te kotu nei bruara teu ka duku sileni teke tusu ari iara ka iagho ia.’

²⁸ “Aonu mae funei na ne cheke eghu ka nogna mae glokure, ‘Hata ka mana duku sileni tuana mala ke tusu lao ka mae ihei te au nabotho duku sileni are.

²⁹ Eghume ihei te loku fakeli ka unha te tusu ranghini iara na, iara nake fabruara ranghini. Eghuteuna ihei te theome loku fakeli ka unha teke tusu ranghini iara na, iara nake hata fadelei ka mana.’

³⁰ Eghuteuna mae funei na cheke eghu, ‘Koko fakosi mae gloku te theo nafugna tuana mala au mana ka vido te romno ana baludi keha naikno te diꞌa are. Mare ginauna au papara fara jare mala tanhi fabiꞌo nei diꞌanagnafa fara eghu.’ ”

Mae teke mei funu ka God na ginauna fatedi naiknore

³¹ Aonu mae Jisas ne cheke eghu, “Ka narane na teke pulo mei iara na, iara na mei balu nogu nolaghi biꞌo. Nogu tothoghei engel iara re ginauna mei balugu iara. Eghuteuna iara mae King na ginauna gnokro ka sape nafnakno.

³² Naiknodi namono fateo heva heva ka nauthoglu igne ginauna kafe khapru mei ke ulugu iara. Eghuteuna iara ginauna fofota naikno igre ka phei tothoghei jateula mae greireghi sipu te fofota sipure ka nanigot ra eghu.

³³ Iara ginauna lilisei naikno te doglore fei nhetagu, eghuteuna naikno te diꞌare fei mairigu.

³⁴ “Aonu iara mae King na ginauna cheke eghu ka naikno te keli fei nhetagure, ‘Mei, ghotilo naikno teke fablahi ghamihi mae Mama ra mala ruma ka nogna nauthoglu majaghani mana teke kulu tarabana malami ghotilo teku ka fufunu gna nauthoglu pari igne.

³⁵ Naugna kate rofo iara na, ghotilo faghamu ghau iara. Kate roi koꞌu iara na, ghotilo fakoꞌu ghau iara. Kate jifla kokoni iara sugagu na te tei delei na, ghotilo taji ghau iara ka sugamire.

³⁶ Kate soesole iara na, ghotilo fapipichi ghau iara. Kate fogra iara na, ghotilo taji ghau iara. Kate au iara ka suga sosolo na, ghotilo mei sigho ghau iara.’

³⁷ “Aonu naikno te doglo ke ulugna God igre ginauna cheke eghu ka iara, ‘Lord, niha ghehati teke filo nigho teke rofo nei faghamu nigho teku na? Niha ghehati teke filo nigho teke roi koꞌu nei fakoꞌu nigho teku na?

³⁸ Niha ghehati filo nigho teke posa mei ka sugamire nei taji nigho teku na? Niha ghehati filo nigho teke soesole nei fapipichi nigho teku na?

³⁹ Niha ghehati filo nigho teke fogra nei taji nigho teku na? Niha ghehati filo nigho teke au ka suga sosolo nei ari sigho nigho teku na?’

⁴⁰ “Iara mae King ginauna cheke eghu ranghidi, ‘Tutuani fara, te chekeni iara na. Kate eni ghotilo ranghini kaisei nogu naikno iara te au pari lahu ka igre, ghotilo jateula te eni ranghi ghau la iara eghu!’

⁴¹ “Iara ginauna cheke eghu ka naikno te diꞌa te au fei mairigure, ‘Tei nomi delei! Naugna te chekeni God na ghotilo ginauna mala tei au ka fate! Ghotilo ginauna tei au ke lamna khaꞌaghi te karha fabrahu na. Khaꞌaghi tuana neke kulu tarabana God malagna mae Satan nei nogna tothoghei engel.

⁴² Naugna iara rofo, ghotilo theome faghamu ghau. Iara roi koꞌu, ghotilo theome fakoꞌu ghau.

⁴³ Jifla kokoni iara sugagu na, ghotilo theome taji ghau iara ka sugamire. Iara soesole, ghotilo neke theome fapipichi ghau. Iara fogra, ghotilo neke theome taji ghau. Iara au ka suga sosolo, ghotilo neke theome mei sigho ghau.’

⁴⁴ “Mare ginauna jaola cheke eghu ka iara, ‘Lord, niha ghehati filo nigho teke rofo ba roi koꞌu ba jifla kokoni sugamu na ba soesole ba fogra ba au ka suga sosolo, nei theome togho nigho teku na?’

⁴⁵ “Iara mae King na ginauna cheke eghu ka mare, ‘Tutuani fara te chekeni iara ka ghotilo na. Kate tiromi toghoni ghotilo kaisei nogu naikno iara te au pari lahu ka igre na, ghotilo jateula te tiromi togho ghau iara eghu.’

⁴⁶ “Naikno igre ginauna tei au ka vido mala au papara na bongi narane. Eghuteuna, naikno te doglo ke ulugna God igre ginauna au ka nakarha te theo ka huigna.”