Matiu 24 - Buka Blahi Ka Cheke Holo

Mae Jisas cheke eidi puhi kmana nei naꞌau papara

¹ Mae Jisas jifla ka Sugablahi na nolo ne tei. Aonu nogna mae fanomhore mei ne falalase ka mana bukrei suga biꞌo te au ke lamnagna vido te au Sugablahi na.

² Mana ne cheke eghu ka mare, “Uve, ghotilo filodi suga igre. Nu tutuani fara te chekeni iara ka ghotilo na, gringni thina igre ginauna kafe koko pari. Nu ginauna theo kaisei thina nate au ka vido te au teu gognaro gne.”

³ Kate gnokro mae Jisas ka Thogele Gaju Olivi, hatimare mae fanomhore mei ne ghusna poru eghu ka mana, “Ghema, niha nau thoke meidire glepo igrea? Eghuteuna unha nafnata fagaglana narane mala ke pulo meimu nei narane mala huigna teu nauthoglu igne?”

⁴ Mae Jisas ne cheke eghu ka mare, “Fiofilo ghami, na eghunu mei chaghi ghami mare eghu.

⁵ Naugna kmana naikno ginauna mei ka nanghagu iara. Mare ginauna cheke eghu, ‘Iara ngala mae Kraes na!’ Eghuteuna kmana naikno ginauna fatutuanidi mare.

⁶ Ghotilo ginauna nomhidi naogladi magra ka namono kmana te namo, nei thoutonudi magra ka namono delei. Nu thosei nanga nomi eghu. Naugna glepo tuare eghu nodiu ngala, nu narane leghu lahu na theome thoke mei ngau.

⁷ Naiknogna kaisei namono na ginauna kegra haghe magra ka naiknogna keha namono na. Eghuteuna naiknogna kaisei nohi na ginauna kegra haghe magra ka naiknogna keha nohi na, heva heva kau nauthoglu igne. Namono te kmana ka nauthoglu na igre ginauna nghali tongana ka nakheu biꞌo. Eghuteuna naiknogna nauthoglu igne ginauna theome naba ghedi gano te mala ghamu na.

⁸ Glepo igre na jateula khabru ululahu te eni gaꞌase te namo fakarha sua majaghani ia eghu.

⁹ “Aonu naiknore ginauna loki ghami ghotilo mala hata tei ghami ka fate. Mare ginauna para ghami nei falehe ghami eghu ghotilo. Eghuteuna naikno ka namono te kmana ke lamnagna nauthoglu igne ginauna tirodi ghami ghotilo naugna ghotilo ne fatutuani ghau iara.

¹⁰ Ka narane tuana kmana naikno teke fatutuanire ginauna nake theome fatutuani. Mare ginauna majora fari thedi, eghuteuna kehare ginauna theome magnahaghedi kehare.

¹¹ Kmana profet chaichaghi ginauna thakle mei. Mare na batu fadiꞌadi naikno kmana mala fatutuanidi kolho glepo te chaichaghire.

¹² Ginauna kmana kmana nakhibo. Eghuteuna namha teke brana ka nagnafadi naikno te kmanare ginauna nake rifu.

¹³ Nu God ginauna fakarhidi iheire te au famaku ka nodi fatutuani na te ghilei thokeni narane leghu lahu gna naꞌau papara na.

¹⁴ Mare ginauna jifla tei toutonuni Nonomho te Keli eigna nafnata puhi God nate funei frunidi nogna naiknore. Mare ginauna toutonuni igne heva heva ke lamnagna nauthoglu igne ka naikno te gnafare. Aonu, ame thoke mei nga narane leghu lahu na eghu.”

Mae Jisas ne chekeni unha nate thoke mei ka namono Jerusalem

¹⁵ Mae Jisas ne cheke eghu, “Ghotilo ginauna filoni kaisei mumuju biꞌo te diꞌa fara kegrau jare ka Sugablahi na. Glepo tuana fathonani nogna Sugablahi God na. Mumuju igne neke kulu chekeni mae profet Daniel tifa.”(Iagho mae ihei te iu'ijuni igne jame laseni u gaoghathogna igne.)

¹⁶ “Aonu, ka narane tuana, naikno te au ka Provins Judia ginauna rikha tei ka thogele gro.

¹⁷ Mae ihei te au ka thagrugna nogna suga na, thosei soru tei hata fajifla nogna glepore ka nogna suga na.

¹⁸ Mae ihei te au ka nagare na thosei pulo ka suga na mala hata nogna phoko na.

¹⁹ Ka narane tuana kokhonidi fara goro gaꞌase te buklare, ba te au thudi te chuꞌu teure!

²⁰ Ghotilo tarai ka God mala theome rikha ka nhigra khoburu ba ka narane Sabat.

²¹ Naugna ka narane tuana ginauna kmana naikno au papara fara. Ginauna kmana naikno naꞌau papara fara ke tulaodi teke edi tifa ka fufunu gna nauthoglu igne. Eghuteuna ginauna theo kaisei naꞌau papara te biꞌo fara jateula tuana teuna.

²² “Jame theome hata kokohi God keha narane meuna, ginauna theo kaisei naikno te karha na. Nu naugna God ne ghathodi naikno teke vavahi thegna re ne hata kokohi keha narane.

²³ Ka narane tuana keha naiknore ginauna cheke eghu ka ghotilo, ‘Ghema, igne mae Kraes na!’ ba ‘Mana na au jare!’ Thosei fatutuanidi mare.

²⁴ Naugna ginauna hatimare mae Kraes chaichaghi nei hatimare mae profet chaichaghi teu igre ginauna thakle mei. Mare ginauna edi kmana glepo te biꞌo nei kofubobhoi biꞌo eghu ka naiknore, mala fariuriu chaghidi nei baubatu fadiꞌadi eghu naikno te gnafa teke vavahi God re. Nu theome tangomana eghu.

²⁵ Gognarona iara magnahaghei te kulu cheke faheta ka ghotilo ame thoke mei nga glepo igre eghu.

²⁶ “Eghume mare jame mei cheke eghu ka ghotilo, ‘Mae Kraes na kela pulo meihi, mana na tei kmiru mata,’ thosei tei jare. Ba mare jame cheke eghu ka ghotilo, ‘Mae Kraes na au lamna chogho,’ thosei fatutuanidi.

²⁷ Kate meigu iara mae teke mei funu ka God na, naikno kmana ginauna filo ghau iara. Meigu iara ginauna jateula nakafli te kafli ka maloa na ia eghu. Eghuteuna naiknore ginauna tangomana te filoni heva heva.

²⁸ Tutuani fara, naikno kmana ginauna kafe filo laseni meigu iara na, jateula kate filoni bukrei glango na, mare na filo laseni aheva thuru teu thinigna bosu te lehe na.

Thoke meigna mae teke mei funu ka God

²⁹ “Theome raugha ke leghudi puhi biꞌo te edi ka narane igre, “ ‘Naprai na ginauna romno soru. Glaba na ginauna theome agha. Nathunure ginauna khoko soru funudi ka maloa na. Aonu gobigna lepo te au ka maloa na are ginauna na thugha tafri.’

³⁰ “Ka narane tuana, fagaglana gna meigu iara na ginauna thakle mei ka maloa na. Eghuteuna naikno heva heva kau nauthoglu igne na kafe orio tanhi balu mhaghu. Eghuteuna mare ginauna filo ghau iara na soru mei ke kligna grokho balu nolaghi nei nafnakno te biꞌo.

³¹ Ka naoglagna khufli te inge igne, iara ginauna kurudi nogu engel re mala tei ke maghati, nei ke mosu, nei ke raru, nei ke mata. Mare ginauna salo fodu naikno teke kulu vavahi God Mama heva heva ka nauthoglu igne.”

Thoutonu eigna kaisei gaju te kiloi fig

³² Mae Jisas ne cheke eghu ka mare, “Famane fanomho fakeli ghotilo ia ka farirhiu te laseni tahati ka gaju te kiloi fig ia. Kate funu kotu seke greghe gnare eghuteuna ke fufusa majaghani khaklagnare teuna, ghotilo laseni hila finogha majaghani na la namohi.

³³ Eghume jateula tuana teu te filodi ghotilo glepo te edi igre na, ghotilo ginauna laseni meigu iara na la namohi.

³⁴ Tutuani fara te chekeni iara ka ghotilo na! Gobigna lepo te gnafa igre ginauna thoke mei kate theome lehe nga teu naikno te karha teu gognaro gre.

³⁵ Maloa ghe nauthoglu igre ginauna hui kolho, nu chekegu iara na ginauna na theo ka huigna.”

Mae Jisas gne nake mei niha nau?

³⁶ “Tuani fara, theo kaisei naikno te raꞌe laseni narane mala ke pulo meigu iara na. Iara nei mae engel kligna re theome laseni la. Kaisei mae Mama thegna ngala te laseni na.

³⁷ Kate mei iara na, ginauna jateula teke eni ka narane gna mae Noa tifa ia eghu.

³⁸ Naugna ka narane theome mei tekeu nabritha na, naiknore neke ghamu ghedi, koꞌu ghedi, nei tolaghi nodi. Neku neke ghilei posa ka narane te saghe mae Noa ka vaka na.

³⁹ Eghuteuna mare theome laseni kaisei glepo nate thoke mei ginauna. Aonu nabritha biꞌo na ne mei. Eghuteuna naiknore ne kafe knoho fahui. Ginauna na jateula tuana eghu ka narane meigu iara na.

⁴⁰ Ka narane tuana jame phei mae kafe loku ka nagare. Mare na hata kaisei, nu lilisei faleghu keha na.

⁴¹ Phia gaꞌase loku gano fodu. God ginauna hata kaisei eghuteuna lilisei soru keha na.

⁴² “Eghume ghotilo tarabana fakeli nomi fabrahu. Naugna ghotilo theome laseni narane mala ke pulo meigna nomi Lord na.

⁴³ Nu ghotilo laseni igne, jame mae khotogna suga na laseni narane te mala meigna mae mala blau na, mana ginauna filo fakeli nei theome snakreni nogna suga na mala ruma mana.

⁴⁴ Eghume ghotilo jaola tarabana nomi fabrahu, naugna iara mae teke mei funu ka God na ginauna nake pulo mei kau nauthoglu igne ka narane te theome ghathoni ghotilo mala ke pulo meigu iara na.”

Cheke naba eidi phei nafnata mae gloku

⁴⁵ Te mala laseni mae fanomhore gaoghathogna cheke naba igne, mae Jisas ne cheke eghu ka mare, “Ba, mae ihei si mae gloku te keli tagna mae funei na ia? Mae gloku te lalase fara te leghuni fabrahu teu nogna cheke mae funei na. Igne ngala mae teke vavahi nogna mae funei na te mala reireghidi keha mae glokure kate tei mae funei na. Mae gloku igne ginauna tangomana te tufa nanaba ganore ka keha mae glokure ka thofno narane te mala ghamu mare na.

⁴⁶ Mae gloku igne ginauna keli tagna fara kate mei nogna mae funei na, eghuteuna nogna mae funei na filoni mae gloku na te famane eni fabrahu nogna gloku na.

⁴⁷ Tutuani fara te chekeni iara ka ghotilo na. Mae funei na ginauna na vahini mae gloku tuana mala reireghidi nogna gobigna lepo re.

⁴⁸ Nu jame mae gloku tuana kaisei mae diꞌa, mana na cheke eghu ka gaoghathogna thegna na, ‘Nogu mae funei iara ia ginauna nake theome ghosei ke pulo mei.’

⁴⁹ Aonu, mae gloku tuana ginauna funu puridi keha mae gloku te loku balugna re. Eghuteuna mana ginauna ghamu nei koꞌu eghu baludi keha naikno te khuru koꞌu koba re.

⁵⁰ Eghuteuna nogna mae funei mana na ginauna nake pulo mei ka narane te theome tarabana nei theome ghathoni teu mana na.

⁵¹ Aonu mae funei igne ginauna parani fara mae gloku te diꞌa tuana. Mae funei na ginauna kuru fadeleini mala au papara fara mana baludi mae te chaichaghire. Mare ginauna au papara fara jare mala tanhi fabiꞌo nei diꞌanagnafa fara eghu.”