Matiu 23 - Buka Blahi Ka Cheke Holo

Nodi chaghi hatimare mae velepuhi nei mae Farasi

¹ Ke leghugna igne, mae Jisas ne cheke eghu ranghidi naiknore nei nogna mae fanomhore,

² “Mae velepuhi nei mae Farasi teugre, mare au nodi nolaghi te mala ruruthani ka ghotilo gaoghathogna nogna vetula mae Moses.

³ Eghume ghotilo mala famane leghudi unha te chekedi mare ka ghotilo re. Nu thosei leghudi ghotilo puhidi mare re eghu. Naugna mare thedi na theome leghudi kolho unha te farirhiudi ka ghotilo igre.

⁴ Hatimare lilisei kmana vetula te ninhigrana ke klignami ghotilo. Nu mare thedi na ginauna theome tangomana te fariuriu leghuni kaisei vetula ka igre.

⁵ “Gaoghatho te edi mare glepo te keli igre mala filo naiknore eghu kolho. Mare hohoro fabiꞌo bokisidi grioriso te blahi igre ne haru ka greredi nei khamedi teure. Eghuteuna mare jaola hohoro fabrahu nodi phoko mala tarai re.

⁶ Mae Farasi nei mae velepuhigna vetula nogna mae Moses teu igre magnahaghei gnokro ka sape nafnakno ka gaghamure. Eghuteuna mare magnahaghei gnokro ka sape te keli fara ke lamnadi suga tharai.

⁷ Mare magnahaghedi naiknore te ghatho tahudi nei kilodi ‘Mae Velepuhi’ ke lamna glalaba. Gaoghatho te edi mare glepo te keli igre mala filo naiknore eghu kolho.

⁸ “Nu te chekeni iara ka ghotilo na, thosei jateula mare eghu snakreni kaisei naikno mala kilo ghami ‘Mae Velepuhi’. Naugna ghotilo kafe thabusigna nei thabureghagna eghu ngala. Eghuteuna iara ngala nomi mae velepuhi ghotilo na.

⁹ Thosei kiloni kaisei mae biꞌo ka nauthoglu igne ‘Mama,’ naugna ghotilo kaisei mae Kmami kolho, mae ihei te au kligna.

¹⁰ Eghuteuna thosei snakre dila mare mala kilo ghami ‘Mae Funei,’ naugna nomi funei ghotilo te hui na kaisei mae Kraes ngala.

¹¹ Mae ihei te mala mae biꞌo ka ghotilo na, mana mala nomi mae gloku ghotilo hui.

¹² Mae ihei te fahaehagheni thegna na, God nake nhaꞌa faparini mana. Mae ihei te nhaꞌa faparini thegna na, God nake nhaꞌa hagheni mana.

¹³ “Puhi biꞌo ka ghotilo mae Farasi nei mae velepuhigna vetula nogna mae Moses teu igre! Ghotilo chaghi fara! Naugna ghotilo fanagra nabrou te mala tei ka God na. Ghotilo themi na tiromi ruma eghuteuna ghotilo fanagradi naikno te magnahaghe ruma fari hoteidi naikno te funei frunidi God re.

¹⁴ Puhi biꞌo ka ghotilo mae Farasi nei mae velepuhigna vetula nogna mae Moses teu igre! Ghotilo chaghi fara! Naugna ghotilo fakokhoanadi nei blaudi eghu koba nodi gobigna lepo goro naikno biꞌo te lehe khetodire. Eghuteuna ghotilo tarai brahu koba mala ne mae blahi eghu kolho. Tutuani, God ginauna para ghami fara ghotilo!

¹⁵ “Uve, puhi biꞌo ka ghotilo mae velepuhi nei mae Farasi teu igre! Ghotilo chaghi fara! Naugna ghotilo tei kasa nhorora ba moumolu mala harini ihei te mala leghudi puhimi ghotilo re. Ke leghugna te leghudi puhimi ghotilo re, mana ginauna diꞌa fara ke tulaomi ghotiloi, eghuteuna naba te tei Gehena jateula ghotilo themi eghu.

¹⁶ “Puhi biꞌo ka ghotilo mae velepuhi nei mae Farasi teu igre! Ghotilo baubatudi naiknore, nu ghotilo mae baubatu dofu! Naugna nomi farirhiu ghotilo themi ia eghu agne, ‘Mae ihei te baubahu ka Sugablahi na, mana tangomana te huhughuni baubahu tuana. Nu mae ihei te baubahu kau sesere te au ke lamna Sugablahi na, baubahu tuana te mala leghuni na.’

¹⁷ Ghotilo mae noli nei dofu eghu! Aheva gne te glepo ulu na, sesere ba Sugablahi gne? Sugablahi igne glepo ulu te mala fablahidi sesere igre.

¹⁸ Nu te cheke nila ghotilo ia, ‘Mae ihei te baubahu ka olta na, mana tangomana te huhughuni baubahu tuana. Nu mae ihei te baubahu ka fafara te au ke kligna olta na, baubahu tuana te mala leghuni na.’

¹⁹ Ghotilo mae dofu! Aheva gne te glepo ulu na, fafara ba olta? Olta igne te glepo ulu te mala fablahini fafara igne.

²⁰ Eghume, mae ihei te baubahu ka olta na, mana kafe baubahu ka olta nei gobigna lepo te au ke kligna olta tuana.

²¹ Eghuteuna mae ihei te baubahu ka Sugablahi na, mana kafe baubahu ka Sugablahi nei ka mae ihei te au ka Sugablahi tuana.

²² Mae ihei te baubahu kligna na, mana baubahu ka sape nafnakno te mala gnokrogna God nei baubahu la ka God.

²³ “Puhi biꞌo ka ghotilo mae velepuhi nei mae Farasi teu igre! Ghotilo mae chaghi fara! Ghotilo fafara ka God fabothodi ghemi khuromu te ikodi ka nomi thobire. Nu ghotilo theome leghudi kolho glepo te ulu fara ka vetula na igre. Ghotilo mala edi fadoglo gobigna lepo te jafra, nei mala lolokelidi naiknore nei thofno fatutuani ni God. Glepo ikodi igre te mala edi ghotilo re, nu thosei ghatho ihodi langau glepo te biꞌo ka vetula na igre eghu.

²⁴ Ghotilo baubatudi naiknore, nu ghotilo mae baubatu dofu eghu! Naugna ghotilo krisu koko sisimi te thoti ke lamnagna nomi tapera na, nu ghotilo aga soruni ngala kamel biꞌo na ka thi'ami re!

²⁵ “Puhi biꞌo ka ghotilo mae velepuhi nei mae Farasi teu igre! Ghotilo mae chaghi! Ghotilo jateula kapu ba tapera te famane titihi te klino ke kosi na ia eghu. Ghotilo filo fakeli kolho ke kosi na, nu ke lamna na fodu ka puhi magra, nei goghotu, nei chaichaghi eghu.

²⁶ Ghotilo mae Farasi igre, ghotilo mae dofu fara! Kulu famane fagagae ghu si ghotilo nagnafami re. Aonu, ame tangomana nga ghotilo te keli puhimire eghu.

²⁷ “Puhi biꞌo ka ghotilo mae velepuhi nei mae Farasi teu igre! Ghotilo mae chaghi fara! Ghotilo jateula beku te famane simede te klino ke kosi na, eghuteuna keli fara fifilogna na teu ia eghu. Nu ke lamna na fodu ka nhubra nei thinidi naikno te lehe te boto re.

²⁸ Ghotilo jateula tuana eghu blahi fara filomi ka tathadi naiknore. Eghuteuna, ke lamna na ghotilo fodu ka chaichaghi nei ka puhi te diꞌa fara.

^29-30 “Tutuani fara, puhi biꞌo ka ghotilo mae velepuhi nei mae Farasi teu igre! Ghotilo mae chaghi fara! Ghotilo hohoro tuthuana ka bekudi hatimare mae profet teke aknu falehe mae kmami ghotilo ra, nei ghotilo lalaoni bekudi mae teke au doglo ra. Eghuteuna ghotilo cheke eghu, ‘Jame au dedi tahati naranedi mae kmada ra meuna, tahati jame theome toghodi mare ka glehedi mae profet ra.’

³¹ Ka nomi cheke themi tuare ghotilo cheke thakle ghauhi themi, ghotilo ngala thofno vikedi hatimare mae teke falehedi mae profet ra.

³² Eghume ghotilo edi fabrahu ngala unha teke edi mae ku'emi tifa ra!

³³ “Ghotilo chaghi fara jateula pholi eghu! Ghotilo vikegna mogo faghughumhu! Ghotilo ginauna theome tangomana te rikha kokoni diꞌatagna God na! Mana ginauna fate ghami ghotilo nei kuru tei ghami ghotilo Gehena.

³⁴ Eghume te chekeni iara ka ghotilo na. Iara ginauna kuru meidi ka ghotilo hatimare mae profet nei hatimare mae glalase nei hatimare mae velepuhi. Ghotilo ginauna falehedi keha naiknore. Ghotilo ginauna na tupijuru kehare kau gaju fafatha. Ghotilo ginauna puphuri kehare ke lamnadi nomi suga tharai re. Ghotilo ginauna ngolhi tafridi leuleghu namono.

³⁵ Naugna igne, God ginauna fate ghami ghotilo eigna glehedi nogna mae te doglore funu ka glehegna Abel mae te keli ia ghilei posa ka glehegna mae Sekaraea, thugna mae Barakia. Mae ku'emi ghotilo re neke faleheni mana rhegna olta na ka Sugablahi na.

³⁶ Tutuani fara, te chekeni iara ka ghotilo na. Ghotilo naikno gognaro gre God ginauna fate ghami ghotilo eidi gobigna lepo igre.”

Mae Jisas kokhoni ni Jerusalem

³⁷ Aonu mae Jisas ne cheke eghu, “Ghotilo naikno te au Jerusalem! Ghotilo falehedi hatimare mae profet ra nei fada falehedi ka thina mae teke kuru mei God ra. Kmana fata iara magnahaghei ghami ghotilo mala mei ka iara. Iara magnahaghei reireghi ghami ghotilo jateula khokorako gaꞌasegna te opo tafru thugnare ke pari baghigna ra eghu. Nu ghotilo tiromi magnahagheni ngala.

³⁸ Eghume gognarona God ginauna tei kokoni nomi namono ghotilo gne mala nagou.

³⁹ Te chekeni iara ka ghotilo na, ghotilo ginauna theome filo ghau iara ghilei thokeni narane te mala meigu iara na eghuteuna ghotilo na kafe cheke eghu, ‘God fablahini mana te mei ka nanghagna Lord!’ ”