Matiu 21 - Buka Blahi Ka Cheke Holo

Mae Jisas haghe leghu lahu Jerusalem

¹ Mae Jisas baludi nogna mae fanomhore ne tei namo Jerusalem. Nu ulu lahu na, mare ne snoto ka namono ka thogele te kiloi Thogele Gaju Olivi. Funu jare mae Jisas ne kurudi phei nogna mae fanomhore mala tei ka namono na.

² Mana ne cheke eghu ka phiamare, “Tei ka namono te filo laoni ke ulu ana. Kate posa ka namono na, ghopa na filoni kaisei dongki reri teu mare jare balugna thugna na. Rurutha hata mei ka iara agne.

³ Jame kaisei naikno chekeni unha te eni ghopa na, ghopa cheke eghu, ‘Lord ne magnahaghedi’. Mana ginauna ghosei nake kuru meidi.”

⁴ Igne ne horoghoto fara ka gaoghathogna unha teke chekeni mae profet tifa ia,

⁵ “Cheke ka naiknodi Jerusalem, ‘Filo si ghotilo nomi King ghotilo na la mei ka ghotilo. Mana nhaꞌa faparini thegna la saghe ka dongki na. Mana saghe ka sua dongki na.’ ”

^6-7 Phei mae fanomho igre ne leghuni unha te chekeni mae Jisas na ne hata ne mei dongki ghe thugnare ka mana. Phiamare ne lilisei nodi phokore ka thagrudi dongki ghe thugnare mala saghe mae Jisas.

⁸ Kmana naikno fara ne ghatho tahuni mana ne pakra ka nabrou na nodi phokore ka nabrou na ke ulugna mae Jisas. Eghuteuna kehare ne kato grege gaju ne pakra soru pari ka nabrou na.

⁹ Aonu kehare tei ke ulugna mae Jisas. Eghuteuna kehare mei ke leghugna mana. Mare kafe thagru, ne cheke eghu, “Hosanna! Kilo fnaknoni vikegna mae Devet!” “God fablahini mana te mei ka nanghagna Lord!” “Kilo fnaknoni God te au kligna!”

¹⁰ Kate ruma haghe mae Jisas ka namono Jerusalem, naiknore ne nghali, ne ghusna eghu, “Mae ihei signea?”

¹¹ Naiknore ne cheke eghu, “Jisas, profet gna Nasaret ka nohi Galili.”

Mae Jisas ne tei ka Sugablahi na

¹² Mae Jisas ne tei ruma ka glalabagna Sugablahi na ne filodi naikno te foifoli ka vido tuana. Aonu, mana brue fajifladi ne gnafa naikno te foifoli nei sabiri teu jare igre. Mana fapogru nodi tevo mae te tutughu sileni te mala foli takis gna Sugablahi na nei nodi mala gnokro mae te sabiri balhu te mala fafara re.

¹³ Mana ne cheke eghu ka mare, “Ka grioriso te blahi ia, God ne cheke eghu, ‘Sugagu iara na suga mala tarai.’ Nu ghotilo ke eni suga igne mala porudi mae iheire te lase blau!”

¹⁴ Naikno te dofu nei naikno te blughu teure ne mei ka mae Jisas ka Sugablahi na. Eghuteuna mana ne fakelidi ne gnafa.

¹⁵ Hatimare mae pris ulu nei hatimare mae velepuhigna vetula nogna mae Moses ne diꞌa tadi fara ka mae Jisas. Naugna mare ne filodi gloku te nolaghi te edi mana re, nei nomhidi goro sua te thauthagru eghu ka glalabagna Sugablahi na, “Kilo fnaknoni vikegna King Devet!”

¹⁶ Aonu, mare ne cheke eghu ka mae Jisas, “Ghema, la nomhidi iagho unha te chekedi goro sua igrea?” Mana ne cheke eghu ka mare, “Uve, iara la nomhidihi. Ghotilo la iu'ijunihi grioriso te blahi ia, “ ‘Ghotilo farirhiudi goro sua nei gegeꞌe teure mala kilo fnaknoni mana.’ ”

¹⁷ Aonu, mae Jisas jifla ne tei Betani ne thuru kaisei bongi jare.

Mae Jisas ne tibrini gaju na

¹⁸ Hamerane boibongi, kate pulo Jerusalem na, mae Jisas ne rofo.

¹⁹ Kate filoni kaisei gaju fig ka geri nabrou na, mana tei ne filo, eghuteuna theo kaisei sisi te au na, nu khogla khakla kolho. Mana ne cheke eghu ka gaju na, “Funu gognaro te haghe na iagho ginauna theo sisimu!” Aonu, gaju tuana ghosei ne brango soru.

²⁰ Mae fanomhore filoni igne ne jaglo nodi fara. Mare ne cheke eghu ka mana, “Ne faꞌunha site ghosei te brango soru gaju ignea?”

²¹ Mae Jisas ne cheke eghu ka mare, “Tutuani fara te chekeni iara ka ghotilo na. Te fatutuani ghotilo te theome ghatho peapea na, ghotilo ginauna tangomana te eni unha teke eni iara ka gaju igne. Eghuteuna ghotilo ginauna tangomana te edi glepo ke biꞌodi igrei. Ghotilo ginauna tangomana te cheke eghu ka thogele igne, ‘Kegra haghe tei krofu ka nhorora gno.’ Te fatutuani ghotilo na, thogele tuana na kegra tei krofu ka nhorora gno.

²² Eghume, jame fatutuani ghotilo na, God ginauna tusu ari unha te toreni ghotilo ka tharai na.”

Gusna eigna nogna nolaghi mae Jisas

²³ Mae Jisas pulo ka Sugablahi na Jerusalem ne farirhiudi naiknore. Kate farirhiu teu mana jare na, mae pris ulu nei mae biꞌo mala baubatudi naiknore eghu ne mei ka mana. Mare ne ghusna eghu ka mana, “Ghema, unha nafnata nolaghi site au ka iagho te edi iagho glepo igrea? Eghuteuna mae ihei teke tusu ari nolaghi ka iagho na?”

²⁴ Mae Jisas ne cheke eghu ka mare, “Iara na kulu ghusna ghu ka ghotilo kaisei gusna, mala kulu cheke mei ghotilo cheke tughugna na. Iara ginauna chekeni ka ghotilo unha nolaghi te edi iara glepo igre.

²⁵ Ba, nolaghi teke faꞌapublahi naikno mae Jone ia neke mei funu ka God, ba funu ka naikno kolho? Chekeni ka iara.” Aonu, mare ne funu fapoaphola fari thedi ne cheke eghu, “Jame cheke eghu tahati na, ‘God ngala teke tusu lao nolaghi ka mae Jone na,’ mana ginauna cheke eghu ka tahati, ‘Jame teuna, naugna unha ne theome leghuni ghotilo unha teke chekeni mae Jone na?’

²⁶ Nu jame cheke eghu tahati, ‘Naikno kolho teke tusu lao nolaghi ka mae Jone’, naiknore ginauna diꞌa tadi ka tahati naugna mare kafe fatutuani mae Jone na kaisei mae profet.”

²⁷ Aonu, mare ne cheke eghu ka mae Jisas, “Ghehati theome laseni cheke tughugna na.” Mae Jisas ne cheke eghu ka mare, “Uve, iara na jaola theome chekeni ka ghotilo unha nafnata nolaghi te au ka iara te edi glepo igre.”

Cheke nabadi phei mae thabusigna

²⁸ Mae Jisas ne toutonuni kaisei cheke naba eidi phei mae thabusigna. Mana ne cheke eghu ka mare, “Cheke meini ghotilo ka iara gaoghathogna cheke naba igne. Kaisei mae au phei thugna nalhaꞌu. Aonu, mana tei ne cheke eghu ka mae thugna ulu lahu na, ‘Thuguo, gognarona iagho tei mala loku ka nogu nagare iara ia.’

²⁹ Mae thugna na ne cheke eghu, ‘Mama, iara na theome tei.’ Nu ke leghu, mana tughu nagnafa neke tei.

³⁰ “Aonu mae kmagna na tei ne cheke eghu ka fapea thugna na, ‘Thuguo, gognarona iagho tei mala loku ka nogu nagare iara ia.’ Mae thugna na ne cheke eghu ka mae kmagna na, ‘Uve mama, iara na tei loku,’ nu mana ne theome tei loku.

³¹ “Mae ihei ka phia mae sua igre te leghuni chekegna mae kmagna na?” Hatimare mae pris nei hatimare mae biꞌo teu gre ne cheke eghu ka mana, “Mae sua ke ulu gne.” Mae Jisas ne cheke eghu ka mare, “Tutuani fara, te chekeni iara ka ghotilo na. Hatimare mae te diꞌa te salo takis nei goro gaꞌase vine teu igre ginauna au ke lamnadi naikno te funei frunidi God igre ame ghotilo nga eghu.

³² Naugna mae Jone Apublahi neke mei falalasehi ka ghotilo nabrou te doglo te mala leghuni ghotilo na. Eghuteuna ghotilo theome fatutuani ni chekegna mana na. Nu hatimare mae te salo takis nei goro gaꞌase vine teu igre neke fatutuani ni mana. Ghotilo neke filonihi igne. Nu ghotilo heta ghemi ne tiromi tughu nagnafa nei fatutuanidi eghu chekegna mana re.”

Cheke naba eigna Thugna God

³³ Mae Jisas ne cheke eghu ka mare, “Fanomho ka cheke naba igne. Kaisei fata, kaisei mae khoto glose na ne joꞌu kaisei nagare. Mana bara faligoho nagare na nei dokha kaisei khora mala poji sisi grep mala eni waen. Aonu, mana babana kaisei suga ikoi kligna mala toetoe. Gnafa teuna, mana snakre lao nagare igne ka hatimare mae greireghi nagare mala loku. Aonu, mana jifla ne tei au ka keha namono delei fara.

³⁴ Kate thokeni ghanogna nagare na, mana kuru teidi nogna mae glokure mala tei mare ka mae greireghi nagare igre mala hata keha ghegna sisi.

³⁵ “Hatimare mae greireghi nagare igre ne lokidi mae gloku igre. Kaisei ne puphuri, keha na ne falelehe nei fatilo na ne fada falehe ka thina.

³⁶ Aonu, mae khoto nagare na jaola ne kuru tei keha mae gloku ka mae greireghi nagare gre. Gognarona mana ne kuru tei kmana mae gloku uludi mae teke tei ululahu ra. Nu mae greireghi nagare igre jateula mae ululahu ra neu ka mae glokure.

³⁷ Leghu lahu na mae khoto nagare na ne magnahaghe kuru teini mae thofno thugna na. Mana ne cheke eghu, ‘Uve, mare ginauna ghatho tahuni mae thugu iara gne.’

³⁸ “Kate filoni mare meigna thugna mana na, mare ne cheke eghu fari thedi, ‘Igne thofno thugna mae khoto nagare ia. Mei ghotilo mala falehe nodani, mala ke khotogna theda nagare igne!’

³⁹ Eghuteuna mare ne hata fajiflani mana ke kosi nagare, ne faleheni mana.”

⁴⁰ Kate gnafa cheke naba igne, mae Jisas ne ghusna eghu ka mare, “Eghume, kate meigna mae khotogna nagare na, unha nate eni mana ka mae greireghi nagare igre?”

⁴¹ Hatimare mae pris nei hatimare mae biꞌo teure ne cheke eghu ka mana, “Mana na kafe falelehe naikno te diꞌa tuare. Eghuteuna mana na snakre lao ka keha mae delei nagare tuana. Mare ginauna na tusu fapulo ka mana unha teke nabagna mana ka narane te ghanogna nagare tuana.”

⁴² Mae Jisas ne cheke eghu ka mare, “Uve, ghotilo iu'ijunihi igne kau grioriso te blahi ia, “ ‘Thina teke tirodini mae iheire te horo suga na, kela kegra haghe kaisei thina ulu fara ka suga na. Glepo igne Lord teke eni gnana, thofno keli fara ka tahati filogna na.’

⁴³ “Eghume te chekeni iara ka ghotilo na. God ginauna hata fadelei nolaghi na ka ghotilo naikno teke funei frunidi mana re. Aonu God ginauna ke tusu lao nolaghi igne ka naikno te edi unha te magnahaghedi mana re.

⁴⁴ Mae ihei te uka ke kligna thina igne, thina igne ginauna fadidiꞌani mana. Nu te soru thina igne ke kligna gna mana na, mana ginauna nghuja vuhai nakrofu kolho.”

⁴⁵ Hatimare mae pris ulu nei hatimare mae Farasi nomhidi cheke naba te edi mae Jisas igre. Mare laseni mana chekedi kolho mare.

⁴⁶ Aonu, mare magnahaghei te lokini mana. Nu mare mhaghu te eni tuana, naugna naiknore fatutuani ni mae Jisas gne kaisei mae profet.