Matiu 20 - Buka Blahi Ka Cheke Holo

U cheke naba eigna mae gloku kau nagare

¹ “Narane God te funei frunidi nogna naiknore jateula te eni ka thoutonu igne eghu. Kaisei fata, mae te khotogna nagare na jifla hamerane boibongi mala hata keha naikno mala tei loku ka nogna nagare na.

² Mana magnahaghei folidi nogna mae glokure kaisei sileni te gijadi mare kaisei narane. Aonu mana kuru teidi mare mala loku ka nogna nagare na.

³ “Ke jaola tanhi nhevai, mana jifla ne tei filodi keha mae te fiti au tafri teu ka vido mala maket na.

⁴ Aonu, mana ne cheke eghu ka mare, ‘Ghotilo eghu tei la mala loku ka nogu nagare iara ia. Iara na foli ghami ghotilo nihai nate gijami ghotilo na.’

⁵ Aonu, mare tei ne loku ka nagare na. “Mana jaola ne tei fei naublatha, nei tanhi thiloi. Ka phei vido narane tuare mana hata naikno mala tei loku ka nagare na.

⁶ Jame tanhi glimai fei grafi mana neke pulo mei ka vido mala maket na. Mana filodi keha mae kegra tafri neu jare. Mana ne cheke eghu ka mare, ‘Ne unha site fiti kegra tafri teu ghotilo agne narane tongana gnea?’

⁷ “Mare ne cheke eghu ka mana, ‘Naugna theo kaisei mae te foli ghami ghehati na.’ “Aonu mana ne cheke eghu ka mare, ‘Keli fara, ghotilo jaola tei loku ka nogu nagare iara na.’

⁸ “Rafi soru, mae khoto nagare na ne cheke eghu ka mae te reireghidi mae gloku re, ‘Eha meidi mae gloku ra, mala folidi nodi tabare. Iagho na fufunu folidi mae teke tei loku leghu lahu ra tei gnafa ka mae teke kulu tei loku ra.’

⁹ “Mae gloku teke tei funu loku tanhi glimai ra mei ne hata nodi tabare. Mare ne sopa hata kaisei sileni kolho.

¹⁰ Kate mei hata nodi tabare, mae teke kulu lokure ne cheke eghu ka gaoghathodire, ‘Mana ginauna foli ghita tahati sileni biꞌo ke uludi mae igrei.’ Nu mare jaola ne sopa hata kaisei sileni kolho.

^11-12 Kate hata nodi silenire, mare ne diꞌa tadi ka mae khoto nagare na. Mare ne funu buiburi ne cheke eghu, ‘Mae teke tei loku leghu lahu igre mare neke loku kaisei vido narane kolho. Nu iagho folidi mare na ne nanaba ka ghehati. Eghuteuna ghehati neke loku narane tongana na ke lamnagna naprai te brana fara na.’

¹³ “Mae khoto nagare na ne cheke eghu ka kaisei mae gloku, ‘Ghema kheraguo, iara theome chaghi nigho. Iagho neke magnahaghei loku kaisei narane malagna kaisei sileni kolho.

¹⁴ Eghume hata nou taba na tei ka sugamu na. Naugna iara magnahaghei te tabani mae teke tei loku leghu lahu igne jateula iagho eghu.

¹⁵ Iara tangomana te eni unha iara te magnahaghei ka nogu sileni thegu re. Ba iagho goghotu naugna te keli iara ranghidi naikno tuare sia?’ ”

¹⁶ Aonu, leghu lahu na mae Jisas ne cheke eghu, “Eghume, kmana naikno te au leghu lahu ka nakarha gognaro gne nake au ului. Eghuteuna kmana naikno te au ulu ka nakarha gognaro gne nake au leghui.”

Mae Jisas neke fatilo fachekeni u glehegna

¹⁷ Kate haghe Jerusalem, mae Jisas ne hata fadeleidi nabotho phei nogna mae fanomhore. Mana ne cheke eghu poru ka mare,

¹⁸ “Famane fanomho fakeli ghotilo ia. Tahati na haghe Jerusalem, eghuteuna ka namono tuana mare ginauna snakre lao ghau iara mae teke mei funu ka God gne ka khamedi hatimare mae pris ulu nei hatimare mae velepuhigna vetula nogna mae Moses. Mare ginauna fate falehe ghau iara.

¹⁹ Mare ginauna snakre lao ghau iara ka khamedi hatimare mae te theome Jiu. Eghuteuna mae igre ginauna maꞌe ghau nei puri ghau ka phukri nei tupi juru ghau eghu iara kau gaju fafatha. Nu ka fatilo narane na, God nake fakarha fapulo ghau iara kau glehe.”

Nogna thore kheto mae Sebedi

²⁰ Aonu, kheto mae Sebedi na ne tei ka mae Jisas baludi phei thugnare. Naꞌa pogho soru ke ulugna mae Jisas ne toreni mana mala eni glepo te magnahagheni naꞌa na.

²¹ Mae Jisas ne ghusna eghu ka naꞌa, “Unha te magnahagheni iagho na?” Naꞌa ne cheke eghu ka mana, “Iara magnahaghedi phei thugu nalhaꞌu igre te gnokro kau nafnakno biꞌo, kaisei fei nhetamu nei kehana fei mairimu eghu ka narane te King iagho na.”

²² Mana ne cheke eghu ka retilo, “Ghotilo theome laseni unha te toreni ka iara na. Ba tangomana ngau si ghopa te au papara ka nafnata nate au papara iara gnea?” Phiamare ne cheke eghu ka mana, “Uve, ghepa tangomana.”

²³ Mae Jisas ne cheke eghu ka phiamare, “Uve, tutuani fara, ghopa ginauna au papara, ka nafnata glepo nate au papara iara gne. Nu te mala gnokro fei nhetagu nei mairigu teu na theome nogu gloku iara te mala snakreni ka ihei na. God Mama ginauna tusu lao vido tuare ka naikno teke kulu vavahi mana thegna re.”

²⁴ Keha nabotho mae fanomhore nomhini igne ne diꞌa tadi fara ka phia mae thabusigna igre.

²⁵ Aonu, mae Jisas ne kafe kilo fodudi mare ne cheke eghu, “Ghotilo lasedi nodi funei naikno te theome mae Jiu gre mare magnahaghei te falalase nodi nolaghi na ke kligna gna nodi mavitu na. Eghuteuna nodi mae baubature magnahaghei te kafe falalase nodi nolaghi re.

²⁶ Nu ghotilo thosei jateula tuana eghu fari hoteimi themi. Mae ihei te magnahaghei mae biꞌo ka ghotilo na, mana mala jateula mae gloku eghu ka ghotilo.

²⁷ Mae ihei te magnahaghei mae kligna lahu ka ghotilo na, mana mala jateula kaisei mae sneka eghu ka ghotilo gnafa.

²⁸ Jateula tuana eghu iara mae teke mei funu ka God, iara theome mei mala loku ranghi ghau naiknore neku. Nu iara gne mei mala loku ranghidi mare nei snakre ghau thegu mala lehe mala fofoli nakhibodi naikno te kmanare.”

Mae Jisas ne fakelidi phei mae te dofure

²⁹ Kate jifla mae Jisas Jeriko baludi nogna mae fanomhore, kmana naikno fara ne tei ke leghudi mare.

³⁰ Jare phei mae te dofu gnokro ka geri nabrou na. Phiamare nomhini mae Jisas te tei sala'u na. Aonu phiamare ne funu eha, “Lord, vikegna mae King Devet, togho ghami ghepa!”

³¹ Naikno te gnafare ne cheke faheta ka phiamare mala megei. Aonu phei mae te dofu igre heta ghedi ne eha ne eha, “Lord, vikegna King Devet, togho ghami ghepa!”

³² Mae Jisas kegra snoto ne kilodi phei mae te dofure mala mei ka mana. Aonu, mana ne cheke eghu ka phiamare, “Unha te magnahagheni ghopa te mala eni iara ranghi ghami na?”

³³ Phiamare ne cheke eghu ka mana, “Lord, ghepa magnahaghei teke fifilo fapulo.”

³⁴ Mae Jisas ne kokhonidi phei mae te dofu igre. Mana habo ka tathadi phei mae igre, neke ghosei fifilo fapulo. Aonu phiamare ne leghuni mae Jisas.