Matiu 19 - Buka Blahi Ka Cheke Holo

Mae Jisas farirhiu eigna mae ihei te koko khetogna na

¹ Kate gnafa chekedi glepo igre, mae Jisas jifla Galili ne tei ka nohi Judia, ka keha phile Kho'u Jordan.

² Kmana naikno fara ne leghuni mana, eghuteuna jare mana ne fakelidi naikno te fogra re.

³ Keha mae Farasi mei ne fariu saosagroni mae Jisas. Mare ne ghusna eghu ka mana, “Ghema, snakreni ka noda vetula tahati na si mae te koko khetogna na ka keha puhi te magnahaghei mana na ia?”

⁴ Mae Jisas ne cheke eghu ka mare, “Uve, ghotilo iu'ijunihi kau grioriso te blahi ia, ‘Ka fufunu gna nauthoglu igne, God neke vuavuha nalhaꞌu ghe gaꞌase.

⁵ Naugna igne mae nalhaꞌu na mala jifla kokodi idogna kmagnare mala au fodu balugna khetogna na, repa phei naikno igre mala au fodu mala kaisei thini ngala.’

⁶ Eghume repa theome mala phei naikno nu kaisei ngala. Thono blahi fara kaisei naikno te fotadi repa teke salo fodudihi God.”

⁷ Hatimare mae Farasi ne cheke eghu ka mana, “Nou cheke iagho tuana thono doglo fara, nu naugna unha si mae Moses te snakreni mae nalhaꞌu na te mala koko khetogna na ke leghugna te tusu lao mana pepa te mala koko khetogna na gnea?”

⁸ Mae Jisas ne cheke eghu ka mare, “Mae Moses neke snakreni ka ghotilo te mala koko khetomire, naugna ghotilo ne tiromi fanomho fakeli ka nogna farirhiu God na. Nu neke theome eghu ka narane God teke vuavuhadi gaꞌase ghe nalhaꞌu gre.

⁹ Te chekeni iara ka ghotilo na, jame kaisei mae koko khetogna na, eghuteuna ke tolaghi ka keha gaꞌase delei ngau teuna, mana khale ka tolaghi pedo. Kaisei gaoghatho ngala mana tangomana te koko khetogna na, jame khetogna mana na neke thuru fodu balugna kaisei mae delei ngau.”

¹⁰ Mae fanomhore ne cheke eghu ka mana, “Te tuana ngala gaoghathogna te mala koko mana khetogna na, te keli na thosei tolaghi kolho eghu.”

¹¹ Mae Jisas ne cheke eghu ka mare, “Theome kmana naikno te laseni fakelini eigna tholaghi na. Nu God neke tusu ranghidi keha naiknoghu kolho glalase tangomana te mala laseni na.

¹² Naugna jare na soasopai gaoghatho te theome tolaghini keha naiknore. Keha naiknore neke karha mei baludi te mala theome tolaghi na. Eghuteuna keha naiknore neke eꞌei ka puhi naikno mala theome tolaghi. Eghuteuna keha naiknore theome tolaghi, naugna mare malagna nakarha te funei frunini God na. Nu naikno te magnahaghei tolaghi na mala leghuni farirhiu igne.”

Mae Jisas neke fablahidi goro suare

¹³ Ke leghugna igne, keha naiknore hata ne mei goro suare ka mae Jisas, mala habo mana ke klignadi mala taraidi nei fablahidi eghu. Kate filoni igne, mae fanomhore ne cheke faheta ka naiknore mala thosei hata mei goro suare ka mana.

¹⁴ Nu mae Jisas ne cheke eghu ka mare, “Snakre meidi goro suare ka iara. Thosei lhotidi, naugna naikno te funei frunidi God re jateula sua igre eghu.”

¹⁵ Ke leghugna te habo ka pha'udi goro suare, mae Jisas ne jifla jare.

Kaisei mae dedei majaghani

¹⁶ Kaisei mae dedei majaghani ne mei ka mae Jisas, ne cheke eghu, “Velepuhi, unha glepo te keli gne nate eni iara te mala hatini nakarha fei tifa na?”

¹⁷ Mae Jisas ne cheke eghu ka mana, “Ghema, naugna unha sagho te mei hironi ka iara glepo te keli gnea? Kaisei thegna God ngala mae te keli na. Nu te magnahaghei hatini iagho nakarha fei tifa na, iagho leghudi vetula igre.”

¹⁸ Mana ne cheke eghu ka mae Jisas, “Vetula aheva gre?” Mae Jisas ne cheke eghu ka mana, “Thosei falehe naikno. Thosei tolaghi pedo. Thosei blau. Thosei chaghi eigna kaisei mae kau fate.

¹⁹ Ghatho tahudi idomu kmamure. Namhani kheramu fofodu na jateula iagho te namha nigho themu eghu.”

²⁰ Mae majaghani igne ne cheke eghu ka mae Jisas, “Velepuhi, iara kafe leghudi mei ngala vetula igre. Unha glepo gne site theome eni teu iara na ia?”

²¹ Mae Jisas ne cheke eghu ka mana, “Te magnahaghei keli fara iagho ke ulugna God na, ulu lahu na iagho tei fofoli nou gobigna lepore, eghuteuna tei tufa sileni are ka naikno te kumare eghu. Te eghu iagho na, iagho ginauna au nou dedei keli fara te au teu kligna. Aonu iagho tangomana te mei te leghu ghau iara na.”

²² Kate nomhini cheke igne mae majaghani na, diꞌanagnafagna fara, naugna mana kaisei mae dedei fara. Aonu mana ne tei kokoni mae Jisas.

²³ Mae Jisas ne cheke eghu ka nogna mae fanomhore, “Tutuani fara, te chekeni iara ka ghotilo na. Ninhigrana fara ranghini naikno te dedei na te ruma baludi naikno te funei frunidi God re.

²⁴ Uve, te chekeni iara ka ghotilo na, theome tangomana kamel na te ruma ka khoragna nili na. Eghuteuna ke ninhigrana gna tuanai mae dedei nate ruma baludi naikno te funei frunidi God re.”

²⁵ Kate nomhini cheke mana igne, mae fanomhore jaglo ne faꞌihodi fara. Aonu mare ne ghusna eghu ka mana, “Tore! Te eghu na, mae ihei ngala si nate hatani u thofno nakarha na ia?”

²⁶ Mae Jisas ne filo tutu ka mare ne cheke eghu, “Tutuani fara, God na tangomana te eni unha te theome tangomana te eni naikno na.”

²⁷ Mae Pita ne cheke eghu ka mana, “Lord, ghehati neke lisei soru nomi gobigna lepore mala leghu nigho iagho. Eghume unha nate hatini ghehati na eghu?”

²⁸ Mae Jisas ne cheke eghu ka mare, “Tutuani fara, te chekeni iara ka ghotilo na. Kate thoke mei nogna nauthoglu majaghani God na iara mae teke mei funu kligna na ginauna gnokro ka sape nafnakno. Eghuteuna ghotilo te gnafa te leghu ghau iara gre ginauna jaola gnokro ka nabotho phei sape nafnaknore. Eghuteuna ghotilo ginauna funei frunidi nabotho phei vikegna Israel.

²⁹ Eghuteuna mae ihei te lisei faleghu sugagna, tahigna, greghagna, kmagna, idogna, goro thugna, ba nogna vido glose, te leghu ghau iara na, mana ginauna hata kaisei gobi fata ke uludi gobigna lepo teke lisei faleghu mana igre. Eghuteuna mana ginauna hatini nakarha fei tifa na.

³⁰ Kmana naikno te au ului ka nakarha gognaro gne nake au leghui. Eghuteuna kmana naikno te au leghui ka nakarha gognaro gne ginauna nake au ului.”