Matiu 18 - Buka Blahi Ka Cheke Holo

Mae ihei te biꞌo lahu ke lamnadi naikno te funei frunidi God

¹ Ka narane tuana mae fanomhore mei ne ghusna eghu ka mae Jisas, “Ba, mae ihei nate mae biꞌo lahu ke lamnadi naikno te funei frunidi God igre?”

² Mae Jisas kilo meini kaisei sua ikoi ne fakegrani ke uludi mae fanomhore.

³ Mana ne cheke eghu, “Tutuani fara, te chekeni iara ka ghotilo na. Te theome tughu ghotilo puhimire nei nhaꞌa fapari ghami themi jateula sua teuna, ghotilo ginauna thono theome nabami te au ke lamnadi naikno te funei frunidi God igre.

⁴ Eghume mae ihei te nhaꞌa faparini thegna jateula sua igne teuna, mana ngala kaisei mae biꞌo te thofno nabagna te au ke lamnadi nogna naikno God igre.

⁵ Ihei te toghoni kaisei sua jateula sua igne teu ka nanghagu iara na, mana togho ghau la iara.”

Ihei te baubatu fadiꞌani nogna fatutuani keha naikno na

⁶ Mae Jisas ne cheke eghu, “Ihei te batu fadiꞌani nogna fatutuani kaisei sua ikoi ka igre te mala theome fatutuani ghau iara na, naikno tuana nabagna te haru kaisei thina biꞌo ka graragna na mala tei faknoknoho ka nhorora gno. Tutuani, jame te eghu mana na, puhi igne keli fara uluni God te parani mana ginauna, naugna mana neke batu fadiꞌani sua ikoi tuana.

⁷ Thono diꞌa fara naiknogna nauthoglu igne, naugna kmana glepo te batu fadiꞌadi nodi fatutuani naiknore. Glepo igre ginauna edi fabrahu ngala, nu thono diꞌa fara mae ihei te edi glepo igre.

⁸ Jame khamemu ba ghahemu iagho na batu fadiꞌa nigho mala theome fatutuani iagho teuna, kusu koko. Te keli na hata koko vido thinimu te diꞌa tuana, eghuteuna ke leghu na iagho ginauna hata thofno nakarha te theo ka huigna. Igne ke keligna te kafe au teu phei khamemu nei phei ghahemu teu te koko lao nigho mare ka khaꞌaghi te theo ka lehegna na.

⁹ Jame tathamu na batu fadiꞌa nigho mala theome fatutuani iagho teuna, kusu koko. Te keli na kaisei tathamu kolho te hata iagho thofno nakarha te theo ka huigna na. Igne ke keligna te kafe au teu phei tathamure te koko lao nigho mare Gehena ke lamnagna khaꞌaghi te theo ka glehegna na.”

Cheke naba eigna sipu te snivi

¹⁰ Mae Jisas ne cheke eghu, “Fiofilo ghami ghotilo ia, thosei filo soruni kaisei sua ka igre. Nu te chekeni iara ka ghotilo na, nodi engel sua igre au fabrahu kligna balugna mae Mama.

¹¹ Naugna iara mae teke mei funu ka God gne neke mei kau nauthoglu igne mala fakarhidi naikno te snivi te theo tadi thofno nakarha na.

¹² “Jame kaisei mae au nogna kaisei gobi sipu, eghuteuna dofi kaisei tadi, na faneha eghu mana? Mana na lisa laodi nhevasalei nheva sipu are ka thogele na mala hironi ghu te snivi na.

¹³ Tutuani fara te chekeni iara ka ghotilo na. Kate filo deni mana sipu tuana, mana ginauna gleale'a fara eigna sipu tuana ke tulaodi nhevasalei nheva sipu teke theome snivi igre.

¹⁴ Jateula tuana eghu mae Kmami ghotilo te au kligna na. Mana theome magnahagheni kaisei ka sua igre te snivi ka nabrougna thofno nakarha te tutuani na.”

Kaisei mae kheramu khiloau te fadiꞌa ranghi nigho

¹⁵ Mae Jisas ne cheke eghu, “Jame kaisei mae kheramu iagho ka khiloau eni fadiꞌa ranghi nigho kaisei glepo, iagho tei cheke ka mana eigna unha teke eni fadiꞌa mana ranghi nigho iagho na. Ghopa eni poru glepo igne farihoteimi themi. Te magnahaghei fanomho fakeli mana ka iagho na, iagho toghoni mana mala ke fofodu fapulo ghopa.

¹⁶ Te tirogna fanomho fakeli mana ka iagho na, iagho ke pulo ka mana fapea fata na. Nu iagho toreni kaisei ba phei naikno mala tei balumu. Naugna grioriso te blahi na cheke eghu, ‘Kate fathoethoke kaisei mae eigna keha mae na, phei ba thilo naikno au balugna mana mala fanomho ka unha te chekeni mana na, nei kaisei gaoghatho ka unha te chekeni mana na.’

¹⁷ Te tirogna fanomho fakeli mana ka unha te chekeni mare na, keli kolho, iagho ke chekeni puhi tuana ka khiloau. Te tirogna fanomho mana ka nogna cheke khiloau na, keli kolho, ghotilo ghatho laoni mae tuana jateula kaisei mae bongihehe ba kaisei mae te diꞌa mala salo takis eghu.

¹⁸ “Tutuani fara, te chekeni iara ka ghotilo na, unha te theome snakreni ghotilo kau nauthoglu igne na, God ginauna theome snakre nila kligna na. Nu unha te snakreni ghotilo kau nauthoglu igne na, God ginauna snakre nila kligna na.

¹⁹ “Tutuani fara keha glepo te chekeni iara ka ghotilo na. Jame phei naikno ka ghotilo kaisei gaoghatho ngala ka unha te toreni phiamare na, mae Kmagu iara te au kligna na, ginauna eni unha te toreni phiamare na.

²⁰ Igne tutuani fara, naugna jame phei ba thiloi naikno te salo fodu mei naugna mare te nogu mae gloku iara na, iara na au jare baludi mare.”

U cheke naba eigna hata fadelei nakhibo

²¹ Ke leghugna igne mae Pita mei ne ghusna eghu ka mae Jisas, “Lord, jame mae kheragu iara na eꞌei puhi diꞌa ranghi ghau iara fabrahu, niha fata nate hata fadelei iara nakhibogna manare? Thokei fitu fata kolho?”

²² Mae Jisas ne cheke eghu ka mana, “Ghema, te chekeni iara ka iagho na, theome thokei fitu fata kolho, nu fitu fata fitui, nei fitu fata fitui eghu fabrahu tifa tifa.

²³ “Gaoghathogna te hata fadelei nakhibore teu igne jateula te filoni iagho ka cheke naba eigna God te funei frunidi nogna naiknore. Kaisei fata, kaisei mae funei magnahaghei teke efradi nodi kaoni mae nogna glokure.

²⁴ Ka narane te funu eni mana igne, hatimare hata ne mei kaisei nogna mae gloku mana teke kaoni ka mana mola mola dola.

²⁵ Nu mae gloku igne theome tangomanani teke tughu fapulo sileni te biꞌo fara igne. Aonu mae funei na ne cheke faheta ka mare mala fofoli mae igne jateula mae sneka eghu baludi nogna glepo teke khotodi mana re, baludi khetogna nei thugna teu mana re. Mae funei na eni igne mala ke tughu fapulo sileni biꞌo fara teke kaoni mana na.

²⁶ “Nu mae gloku igne mei ne tuturupuku soru ne thuru pari ke ulugna mae funei na ne cheke eghu, ‘Mae funei, ginau sagho, iara nake tughu fapulo ka iagho gobigna lepo teke kaoni iara ra.’

²⁷ Mae funei na kokhoni nognani, ne ghiha koko nogna kaoni mana re, ne snakre teini.

²⁸ “Nu kate jifla te tei na, mana ne ludeni kaisei mae kheragna gloku teke kaoni ka mana keha gobi dola. Mana ne lao sarakini mae kheragna tuana ne loku ka graragna na ne cheke faheta eghu, ‘Ke tughu fapulo ka iara unha teke kaoni iagho ka iara ra!’

²⁹ “Mae kheragna na ne turupuku soru ne cheke eghu ka mana, ‘Ginau sagho, iara nake tughu fapulo ka iagho gobigna lepo teke kaoni iara ra.’

³⁰ “Mae gloku ululahu igne ne tirogna fanomho ka unha te chekeni mana na. Aonu mana ne koko laoni mae kheragna na ka suga sosolo mala ke ghilei tughu fahui mana gobigna lepo teke kaoni mana re.

³¹ Keha nogna mae gloku mae funei igre, filoni unha te eni mana ka keha mae gloku na. Mare jaglo nodi fara ne diꞌanagnafani mae kheradi na. Mare tei ne cheke ka nodi mae funei na unha te eni ka vido tuana.

³² “Mae funei na kilo meini nogna mae gloku tuana ne cheke eghu ka mana, ‘Ghema, iagho mae igne naikno diꞌa fara. Iara neke ghiha koko nou kaoni iagho ra naugna iagho neke tore ghau iara.

³³ Iara neke kokhoni nogu nigho sia. Iagho jame jaola kokhoni ni mae kheramu gloku na!’

³⁴ Mae funei na ne diꞌatagna fara, ne snakre teini mae gloku tuana ka suga sosolo mala au papara fabrahu mana jare ghilei tughu fahui mana gobigna lepo teke kaoni mana re.

³⁵ “Nu te chekeni iara ka ghotilo na, na jateula tuana eghu mae Kmagu iara te au kligna na ranghi ghami ghotilo te theome hata fadelei ghotilo ka nagnafamire nakhibodi kherami fofodu re.”