Matiu 17 - Buka Blahi Ka Cheke Holo

U thinigna mae Jisas na ne tughu

¹ Ka fafamno narane ke leghugna igne, mae Jisas hata mae Pita nei phei mae thabusigna, mae Jemes ghe mae Jone, ne haghe ka kaisei thogele brahu ne au thedi jare.

² Kate filo teu thilomare na, thilomare ne filoni thinigna mae Jisas na ne tughu. Tathagna nei foflogna teu manare ne siasigla fara jateula naprai neu. Eghuteuna nogna pohere ne jaola ne thono vegha fara.

³ Aonu thilomare ne filodi mae Moses ghe mae Elija facheke neu balugna mae Jisas.

⁴ Aonu mae Pita ne cheke eghu ka mae Jisas, “Lord, keli fara te au tahati agne na. Jame magnahaghei iagho na, iara na horo thilo grorofe agne, kaisei malamu iagho, kaisei malagna mae Moses nei kaisei malagna mae Elija.”

⁵ Kate cheke mae Pita na, kaisei khoveo te siasigla ne kafe toku tafrudi mare. Eghuteuna ka vido tuana kaisei naogla ne mei funu ka khoveo na, ne cheke eghu, “Igne thofno mae Thugu iara na. Iara namhani mana nei keli taguni eghu mana. Ghotilo fanomho fakeli nei leghuni eghu mana!”

⁶ Kate nomhini thilo mae fanomhore cheke igne, thilomare mhaghu fara ne pogho soru pari.

⁷ Mae Jisas mei ne habo ka thilomare ne cheke eghu ranghidi, “Kegra haghe, thosei mhaghu.”

⁸ Kate efra haghe thilomare na, theo kaisei naikno te au jare na, thegna mae Jisas kolho te filoni thilomare na.

⁹ Kate soru mare ka thogele na, mae Jisas ne cheke faheta eghu ka thilo mae fanomhore, “Glepo te filoni ghotilo ka thogele na igne, thosei toutonuni ka iheinga ghilei thokeni narane iara mae teke mei funu ka God na teke karha fapulo ka glehe. Aonu, ame toutonuni nga ghotilo eghu.”

¹⁰ Thilomare ne ghusna eghu ka mana, “Naugna unha site chekeni mae velepuhigna vetula nogna mae Moses gre mae Elija gne na kulu mei ame mei nga mae Kraes teu gnea?”

¹¹ Mae Jisas ne cheke eghu, “Tuana tutuani fara, mae Elija gne na kulu mei mala fadodoglo gobigna lepore.

¹² Nu te chekeni iara ka ghotilo na, mae Elija na la meihi. Eghuteuna naiknore theome laseni ngala mana. Mare neke edi kmana glepo te diꞌa ranghini mana leghudi nodi gaoghatho thedire. Nu mare ginauna na jateula tuana eghu ranghi ghau iara mae teke mei funu ka God.”

¹³ Aonu, thilomare ne thofno laseni mae Jisas gne cheke eigna mae Jone Apublahi.

Mae Jisas brue naitu ka kaisei mae sua nalhaꞌu

¹⁴ Mae Jisas baludi mae fanomhore neke pulo mei ka nakhapru na. Kaisei mae mei ne tuturupuku ke ulugna mae Jisas.

¹⁵ Mana ne cheke eghu, “Lord, toghoni mae thugu nalhaꞌu iara gne! Mana au tagna khabru snosnogho ne thono au papara fara. Eghuteuna mana uka soru koba ke lamna khaꞌaghi ba ke lamna khoꞌu.

¹⁶ Iara neke hata meihi ka nou mae fanomho iagho gre, nu mare theome tangomanadi teke fakeli fapuloni mana na.”

¹⁷ Mae Jisas ne cheke eghu, “Tore, ghotilo naikno gre theome fatutuani ni God kolho! Puhimi ghotilo re thono kafe jafra fara! Niha fata au fabrahu iara balumi ghotilo sia? Iara hongo ghau fara ka ghotilo! Hata mei ka iara agne mae sitei na!”

¹⁸ Mae Jisas ne cheke faheta ka naitu te au ka mae sitei na. Aonu naitu na ne jifla mei. Eghuteuna ka vido tuana mae sitei na ghosei neke keli fapulo.

¹⁹ Ke leghugna igne, hatimare mae fanomhore megei nga ne mei ka mae Jisas ne ghusna eghu ka mana, “Naugna unha site theome tangomana ghami ghehati te brueni naitu ignea?”

²⁰ Mae Jisas ne cheke eghu ka mare, “Ghotilo theome tangomana ghami te brue teini naitu na, naugna nomi fatutuani ghotilo na theome naba. Tutuani fara te chekeni iara ka ghotilo na, neubane ikoi fara jateula sisi gaju mastad neu nomi fatutuani ghotilo na, ghotilo na tangomana te cheke eghu ka thogele igne, ‘Jifla agne mala tei jare.’ Teu ghotilo na, thogele tuana ginauna thugha tei. Eghume ginauna theo kaisei glepo nate ninhigrana ranghi ghami ghotilo na.

²¹ Nu nafnata naitu igne tangomana te jifla mei kolho kau tarai nei dangna.”

Mae Jisas ne fapea chekeni eigna glehegna

²² Ke leghugna igne, hatimare mae fanomhore ne kafe khapru ka kaisei vido jare Galili. Aonu, mae Jisas ne cheke eghu ka mare, “Iara mae teke mei funu ka God gne mare ginauna snakre lao ghau iara ka khamedi naiknore mala falehe ghau iara.

²³ Nu ka fatilo narane na iara ginauna nake kegra fapulo kau glehe.” Kate nomhini igne, mae fanomhore ne kafe diꞌanagnafadi fara.

Mae Jisas ne foli takis malagna Sugablahi nogna God Jerusalem

²⁴ Mae Jisas baludi nogna mae fanomhore ne tei ka namono Kapanam. Kate au teu mare jare na, keha mae mala salo takis gna Sugablahi na mei ne ghusna eghu ka mae Pita, “Ba, nomi mae velepuhi ghotilo gne foli takis langau signea?”

²⁵ Mae Pita ne cheke eghu ka mare, “Uve, mae Jisas gne foli takis.” Mae Pita tei ka suga aheva te au mae Jisas na. Mae Jisas ne ghusna eghu ka mae Pita, “Ba ghema Simon, unha eghu iagho gaoghathomu na? Mae King kau nauthoglu igne, mare salo kmana nafnata takis. Nu, salo ka mae iheire eghu si mare takis igrea? Salo ka mae khulumono gre, ba salo ka keha naikno delei?”

²⁶ Mae Pita ne cheke eghu, “Uve, mare salo ka keha naiknoi.” Mae Jisas ne cheke eghu, “Tuana gaoghathogna na, hatimare khulumono gre, mare theome foli takis kolho.

²⁷ Nu tahati theome magnahaghedi mare te diꞌa tadi ka tahati. Eghume iagho tei kau kholo gno mala koko soru nou thaotagho na. Eghuteuna korho haghe sasa te kulu chakhi ka iagho na, tothora ka foflogna na. Iagho ginauna filoni kaisei sileni naba te mala takis phia mae na au jare. Aonu iagho tei foli noda takis tapa na.”