Matiu 16 - Buka Blahi Ka Cheke Holo

Hatimare mae Farasi ne toreni kaisei fagaglana funu kligna

¹ Kaisei narane, keha mae Farasi nei keha mae Sadiusi, mare mei mala saosagroni mae Jisas. Aonu mare ne cheke eghu ka mana, “Iagho eni kaisei kofubobhoi. Igne fagaglana te mala laseni ghehati nolaghi teke funu ka God na.”

² Mae Jisas ne cheke eghu ka mare, “Keha fata, kate plulu naprai na ghotilo cheke eghu, ‘Uve, nathuꞌu na nake aho, naugna maloa gne kela khidiri.’

³ Eghuteuna fei hamerane na ghotilo cheke eghu, ‘Uve, ginauna nake nakhete naugna maloa gne kela ghoghomo fabrahu.’ Eghume ghotilo laseni fara gaoghathodi glepo igre kate filo glani ghotilo maloa gne. Neuba ghotilo theome laseni ngala puhigna God te doglo na! Nu ghotilo mae chaichaghi kolho, naugna ghotilo ne theome tangomana te filo glanidi kolho unha te edi God gognaro gre.

⁴ Icho idomi! Ghotilo naikno gognaro gre thono diꞌa fara puhimire. Ghotilo magnahaghei te filoni kaisei fagaglana. Nu iara ginauna na theome fakakhana kaisei fagaglana ka ghotilo. Nu kaisei fagaglana tangomana te filoni ghotilo ginauna fagaglana teke eni God ranghini mae profet Jona tifa ia.” Gnafa tuna, mana jifla kokodi mare ne tei nogna.

Nodi isi mae Farasi nei mae Sadiusi

⁵ Kate kasa mare ka keha phile kholo na, mae fanomhore ghatho iho ne theome hata keha bret baludi. Mae Jisas ne cheke eghu ka mare,

⁶ “Filo fakeli ghami ghotilo ia ka nodi isi hatimare mae Farasi nei hatimare mae Sadiusi igre.”

⁷ Mae fanomhore ne cheke eghu farithedi, “Mana jame cheke eghu naugna tahati theome hata baluda keha bret.”

⁸ Aonu mae Jisas ne laseni unha te chekeni mare na ne cheke eghu, “Naugna unha site chekeni ghotilo ne theome hata keha bret teu gnea? Nu nomi fatutuani ghotilo na ikoi fara.

⁹ Theome thofno glolau ngala ka ghotilo sia? Kela ghatho ihoni hila si ghotilo teke piepike iara glima bret teke faghamudi glima thogha mae ra? Ghotilo neke fafofodu nabotho phei khara'o ka vido gano teke salaꞌui ra.

¹⁰ Ba, kela ghatho ihoni hila si ghotilo teke piepike iara fitu bret teke faghamudi fati thogha mae ra? Ghotilo neke fafofodu fitu khara'o ka vido gano teke salaꞌui ra.

¹¹ Eghume iara neke theome cheke ka ghotilo eigna bret. Naugna unha site theome laseni ghotilo gnea? Iara neke cheke ka ghotilo mala filo fakeli ghami nei reireghi ghami eghu ka nodi isi hatimare mae Farasi nei hatimare mae Sadiusi.”

¹² Aonu mae fanomhore laseni mae Jisas theome chekeni ka mare mala reireghidi kau isi te mala horo bret. Nu mana neke cheke eidi nodi farirhiu hatimare mae Farasi nei hatimare mae Sadiusi.

Mae Pita ne cheke thakleni eigna mae Jisas

¹³ Mae Jisas ne tei ka nohi te au namono biꞌo Sisaria Filipae. Mana ne ghusna eghu ka nogna mae fanomhore, “Iara mae neke mei funu ka God. Ba, mae ihei eghu ghau iara si naikno grea?”

¹⁴ Mare ne cheke eghu ka mana, “Keha naiknore te chekei na iagho mae Jone Apublahi, eghuteuna keha naiknore te chekei na iagho mae profet Elija. Keha naiknore te chekeni na iagho mae profet Jeremaea, ba kaisei mae ka hatimare mae profet di tifa ra.”

¹⁵ Mae Jisas ne ghusna eghu ka mare, “Nu ghotilo ba? Mae ihei eghu ghau iara ghotilo?”

¹⁶ Ka vido tuana mae Simon Pita ne cheke eghu, “Iagho mae Kraes, Thugna God te karha fabrahu te tifa.”

¹⁷ Mae Jisas ne cheke eghu ka mae Simon, “Iagho keli tamu, ghema Simon, thugna mae Jone. Theo kaisei naikno teke farirhiu nigho tuana. Nu mae Mama te au kligna neke falalase nigho eigu iara.

¹⁸ Eghume te chekeni iara ka iagho na, iagho mae Pita jateula kaisei thina eghu. Kate babana iara nogu khiloau na, thina igne ginauna na famamhaku hi. Eghuteuna, nogna nolaghi glehe na ginauna na theome tangomana nate tapla soruni nogu khiloau iara na.

¹⁹ Iara ginauna na tusu ari ka iagho nolaghi mala jateula ki gna eghu grengathagna nogna nauthoglu majaghani God na. Eghume unha nate theome snakreni iagho ka nauthoglu igne, God ginauna theome snakreni la kligna. Eghuteuna unha nate snakreni iagho ka nauthoglu igne, God ginauna snakreni la kligna na.”

²⁰ Ke leghugna igne mae Jisas ne cheke farheta ka nogna mae fanomhore mala thosei toutonu ka ihei nga te mana ngala mae Kraes na.

Mae Jisas ne chekeni eigna glehegna thegna na

²¹ Funu ka narane tuana te haghe na mae Jisas ne funu cheke eghu ka nogna mae fanomhore, “Iara na tei Jerusalem. Hatimare mae biꞌodi mae Jiu nei hatimare mae pris ulu nei hatimare mae velepuhigna vetula nogna mae Moses mare ginauna na para ghau nei eꞌei puhi mala falehe ghau iara. Eghuteuna ka fatilo narane na God nake fakarha fapulo ghau iara kau glehe.”

²² Mae Pita hata fadeleini mae Jisas ne cheke farheta eghu ka mana, “Lord, thosei cheke eghu sagho! God jame theome snakreni tuana ka iagho!”

²³ Mae Jisas figri ne cheke eghu ka mae Pita, “Iagho mae Satan, tei nou! Iara kilo nigho iagho mae Satan naugna iagho magnahaghei fanagra ghau iara te mala eni unha te magnahagheni God na. Unha te chekeni iagho igne theome mei funu ka God, nu nogna gaoghatho naikno kolho.”

²⁴ Ke leghugna igne mae Jisas ne cheke eghu ka nogna mae fanomhore, “Mae ihei te magnahaghei mei ke leghugu iara na, mana thosei ghathoni kolho nakarhagna thegna na, nu mana sasaꞌa mala pala nogna gaju fafatha na, eghuteuna mei leghu ghau iara.

²⁵ Naugna mae ihei te magnahaghei taji fakelini kolho nakarhagna thegna na, mana lisa laoni kolho thofno nakarhagna na. Nu mae ihei te snakreni nakarhagna na malagu iara teuna, mana na loku famaku thofno nakarhagna na.

²⁶ Jame kaisei mae khotodi gobigna lepo fateo kau nauthoglu igne, eghuteuna lisa laoni thofno nakarhagna na teuna, ba gobigna lepo fateo igre ginauna na toghoni mana? Thono theo fara! Nu unha gne nate tusu lao mana mala teke hata fapuloni nakarhagna na? Thono theo fara!

²⁷ Tutuani fara, iara mae teke mei funu ka God na ginauna nake pulo mei ka nauthoglu igne balu nogna nolaghi biꞌo mae Mama. Eghuteuna, nogna engel mae Mama re ginauna mei balugu iara. Ka narane tuana iara ginauna tabadi naiknore eidi unha gloku teke edi mare.

²⁸ “Tutuani fara te chekeni iara ka ghotilo na. Keha mae ka ghotilo au teu balugu iara gognaro igre, mare ginauna na theome leheu ghilei filo ghau iara mae teke mei funu ka God nate mei te mala funei frunidi nogu naiknore.”