Matiu 15 - Buka Blahi Ka Cheke Holo

Nodi kastom farirhiu mae Jiu

¹ Ke leghugna igne, keha mae Farasi nei keha mae velepuhigna vetula nogna mae Moses eghu ne mei funudi Jerusalem. Mare ne ghusna eghu ka mana,

² “Naugna unha si nou mae fanomho iagho gre te theome leghuni nodi farirhiu mae kuꞌeda tifa ra? Mare ne theome kulu titihi fakeli khamedire ne ghamu nga.”

³ Mae Jisas ne cheke eghu ka mare, “Naugna unha site theome leghuni ghotilo nogna vetula God na nu leghuni kolho nomi kastom themi na teu gnea?

⁴ Naugna God na neke cheke eghu, ‘Ghatho tahudi idomu kmamure,’ nei ‘Ihei te cheke fadiꞌani idogna ba kmagna na, naikno tuana nabagna na mala falelehe.’

⁵ Nu te chekeni ghotilo na, naikno na tangomanau te cheke eghu ka kmagna ba idogna na, ‘Glepo naba te mala togho ghami ghopa na iara ginauna theome tusu ari ka ghopa. Nu iara na tusu ranghini God.’

⁶ Ghotilo farirhiuni naikno tuana mala thosei toghodi idogna kmagnare. Eghume, te leghuni ghotilo nomi kastom themi tuana, ghotilo theome ghatho tahuni kolho chekegna God na.

⁷ Ghotilo mae chaichaghi fara! Unha teke chekeni God ka mae profet Isaia eimi ghotilo tifa ia thono tutuani fara.

⁸ Mana neke cheke eghu: “ ‘Naikno igre fafnakno ghau iara ka chekedi kolho, nu nagnafadire theome namo ka iara.

⁹ Pogho soru te edi mare ka iara igre theo nafudi, naugna mare farirhiudi naiknore mala leghudi kolho nodi vetula teke horo haghe thedire.’ ”

Unha tangomana te mala fathonani naikno na

¹⁰ Mae Jisas cheke ka naiknore mala tugha mei namo ka mana. Mana ne cheke eghu ka mare, “Fanomho fakeli ghotilo ia mala lasedi unha te chekedi iara igre.

¹¹ Unha te nhaꞌa lao ka foflo na theome tangomana te fathonani kaisei mae. Nu unha te chekedi nei ghathodi teu mana ka nagnafagnare te fathonani mana ke ulugna God na.”

¹² Aonu, nogna mae fanomhore mei rhegna mana ne cheke eghu, “Ghema, mae Farasi gre ne diꞌa tadi ka unha te chekedi iagho ra.”

¹³ Mae Jisas neke cheke eghu, “Mae Farasi gre jateula gaju teke theome joꞌu mae Kmagu iara te au kligna ia eghu. Mana ginauna kafe rathu koko balu glathidi.

¹⁴ Eghume thosei ghatho tahudi ghotilo mae Farasi gre. Mare mala batudi mae te iho gre, eghuteuna mare thedi na jateula mae dofu eghu. Laseniu ngala ghotilo cheke igne, naikno te dofu nu ke batuni keha naikno te dofu la teuna, phiamare ginauna na kafe tei snoꞌo ka khora.”

¹⁵ Mae Pita ne cheke eghu ka mana, “Rurutha sagho ka ghehati gaoghathogna cheke naba igne.”

¹⁶ Mae Jisas ne cheke eghu ka nogna mae fanomhore, “Tore, kafe romnou ngala jateula mae Farasi gre eghu si ghotilo ia?

¹⁷ Ba, ghotilo theome laseniu ngala si gaoghathogna nogu cheke iara ignea? Glepo te ruma ka foflogna naikno na, doglo tei ka thi'a na. Eghuteuna ke leghu na glepo tuana nake jifla ka thini mana na.

¹⁸ Nu unha te chekeni mana ka foflogna na, jifla mei unha teke ghathoni mana ka nagnafagna na. Glepo igre te fathonani mana ke ulugna God na.

¹⁹ Naugna igre glepo te jifla mei ka nagnafagna mana re, gaoghatho te diꞌa, falehe naikno, tolaghi pedo, mhala, blau, chaichaghi, vuavuha cheke nei buiburini ihei.

²⁰ Igre glepo te fathonani naikno na ke ulugna God. Eghume nafnata kastom mala kulu titihi fakeli khame ame ghamu nga teu igne, theome tangomana te mala fathonani naikno na.”

Kaisei thau bongihehe ne fatutuani ni mae Jisas

²¹ Ke leghugna igne, mae Jisas jifla ka vido tuana baludi nogna mae fanomhore ne tei ka nohi te au phei namono biꞌo Taea ghe Sidon.

²² Kaisei naikno biꞌogna Kenan te mei au ka nohi tuana mei ne eha eghu ka mae Jisas, “Lord, vikegna mae King Devet! Kokhoni ghau iara! Thugu gaꞌase iara na kaisei naitu ne parani fara.”

²³ Mae Jisas ne theome cheke ka naꞌa. Nogna mae fanomhore mei ne cheke eghu ka mana, “Ghema, chekeni sagho naikno biꞌo tuana mala tei delei! Naugna naꞌa leghu ghita ne eha fabrahu.”

²⁴ Mae Jisas ne cheke eghu, “God neke kuru mei ghau iara mala mei fakarhidi naiknodi Israel gre kolho, naugna mare jateula sipu te theo greireghidi ra eghu.”

²⁵ Aonu naikno biꞌo na mei ne tuturupuku soru ke ulugna mae Jisas ne cheke eghu, “Lord, togho ghau iara!”

²⁶ Mae Jisas ne cheke naba eghu ka naꞌa, “Theome doglo te hata ghedi gano suare te koko lao ka khumare.”

²⁷ Naikno biꞌo na ne cheke eghu ka mana, “Uve Lord, nu neuba ngau, khumare tangomanau te ghamu vido gano te khoko soru ke parigna tevo nodi funei na.”

²⁸ Aonu mae Jisas ne cheke eghu ka naꞌa, “Naikno biꞌo, iagho kaisei naikno fatutuani ghau iara fara! Unha te magnahagheni iagho na ginauna eni tutuani ranghi nigho.” Eghuteuna, ka vido tuanala thugna gaꞌase naꞌa na neke keli fapulo.

Mae Jisas ne kafe fakelidi naikno te fogra re

²⁹ Mae Jisas jifla jare ratha ne tei ka glilihigna Kholo Galili. Mana haghe ka thogele na ne gnokro pari.

³⁰ Ka vido tuana, kmana naikno ne mei ka mae Jisas. Mare hata ne mei lilisei soru ke ulugna mana naikno te lehe ghahedi, naikno te dofu, naikno te blughu, naikno te iho cheke nei iheire langau te au kmana nafnata khabru. Mae Jisas kafe fakarhidi ne gnafa.

³¹ Aonu, naiknore jaglo nodi fara kate filodi iheire teke iho chekere neke lase cheke, iheire teke blughure neke keli fapulo, iheire teke lehe ghahedire neke nonolo, nei iheire teke dofure neke fifilo fakeli. Aonu mare ne kilo fnaknoni nodi God mae Israel eigna igne.

Mae Jisas neke faghamudi fati thogha mae

³² Mae Jisas kilo meidi nogna mae fanomhore ne cheke eghu ka mare, “Iara kokhoni nogudi naikno igre. Naugna mare auhi baluda tahati thilo narane. Eghuteuna gognarona mare theo ghedi ganohi te mala ghamu na. Eghuteuna iara theome magnahagheni te kuru fapulodi ka namonodire, ka vido te theome ghamu teu mare na, na eghunu fnuda mare kate tei ka nabrou na eghu.”

³³ Nogna mae fanomhore ne ghusna eghu ka mana, “Vido igne namono nagou theo kaisei naikno te au agne na. Eghuteuna, agne na theo kaisei vido aheva te mala tei hata naba gano te mala faghamudi naikno te kmana fara igre.”

³⁴ Mae Jisas ne ghusna eghu ka mare, “Niha bret te au ka ghotilo na?” Mare ne cheke eghu ka mana, “Fitu bret nei keha sasa ikodi eghu.”

³⁵ Mae Jisas ne cheke ka naiknore mala gnokro pari.

³⁶ Mana hata fitu bret nei sasa teure ne cheke fakelidi ka God. Mana piepike ne tufa ka nogna mae fanomhore. Eghuteuna mae fanomhore ne tufa ka naiknore.

³⁷ Mare kafe ghamu ne boho. Aonu mae fanomhore ne fafofodu fitu khara'o ka vido gano teke salaꞌui ka naiknore.

³⁸ Mae teke ghamu ka narane tuana naba fati thogha. Eghuteuna gaꞌase nei sua teke au baludi mare ka narane tuana neke theome kahadi.

³⁹ Ke leghugna te ghamu naikno re, mae Jisas chekedi naiknore mala ke pulo ka namonodire. Aonu, mana saghe ka mola na ne tei ka nohi Magadan.