Matiu 14 - Buka Blahi Ka Cheke Holo

U glehegna mae Jone Apublahi

¹ Ka narane te King Herod Antipas ka Provins Galili, mana nomhidi kmana thoutonu eigna mae Jisas.

² Aonu mae Herod ne cheke eghu ka nogna mae glokure, “Mae Jisas gne jame mae Jone Apublahi kela karha kela mei. Naugna tuana te au nolaghi mana te edi kofubobhoi igre.”

^3-5 Filo si ghotilo, tifa na mae Filip tahigna mae Herod neke tolaghi ka Herodias. Mae Herod magnahagheni Herodias neke tolaghi ka naꞌa. Aonu mae Jone Apublahi ne cheke fabrahu ka mae Herod. Mae Jone neke eni igne ka mana naugna thono blahi fara ka nodi vetula mae Jiu te tolaghi ka khetogna mae tahigna na kate karha nga teu mana na. Herodias ne diꞌatagna fara ka mae Jone, ne magnahaghei koko laoni mae Jone ka suga sosolo. Aonu mae Herod hatani mae Jone ne koko laoni mana ka suga sosolo. Mana magnahaghei te faleheni mae Jone, nu mana mhaghu te faleheni mae Jone na, naugna hatimare mae Jiu laseni mae Jone gne kaisei nogna mae profet God.

⁶ Kau narane ghatho fapulo teke karhagna mae Herod, thugna gaꞌase Herodias mei ne ragi ke ulugna mae Herod nei hatimare mae nogna tothoghei nafnaknore kau gaghamu na. Mae Herod ne thofno gleale'a fara ka naꞌa.

⁷ Aonu mana nhaꞌa cheke ka naꞌa unha te magnahagheni na.

⁸ Aonu Herodias ne cheke ka thugna gaꞌase na unha te mala toreni ka King Herod. Thugna Herodias igne ne cheke eghu ka mae Herod, “Iara magnahagheni pha'ugna mae Jone Apublahi kau tapera ao gognaro la.”

⁹ Mae King ne diꞌanagnafa fara. Nu mana neke nhaꞌa cheke ka naꞌa mala tusu ranghini unha te magnahagheni naꞌa na. Mana eni igne ke uludi mae tothoghei nafnakno teke ghamu balugna re, eghuteuna mare nomhinihi nogna nhaꞌa cheke mae Herod na. Aonu mae Herod cheke ka mae glokure mala eni unha te magnahagheni naꞌa na.

¹⁰ Mana kurudi mare mala tei ka suga sosolo na, mala kukusu pha'ugna mae Jone.

¹¹ Eghuteuna, hatimare hata ne mei kau tapera pha'ugna mae Jone na ne tusu lao ka thugna gaꞌase Herodias. Naꞌa hata ne tei ka idogna.

¹² Eghuteuna, hatimare nogna fanomho mae Jone re mei ka suga sosolo na ne hata thinigna mana na ne giugilu. Aonu mare tei ne toutonu ka mae Jisas.

Mae Jisas ne faghamudi glima thogha mae

¹³ Kate nomhini mae Jisas glehegna mae Jone Apublahi na, mana saghe ka mola na ne tei au thegna sopa lamna namono nagou. Kate nomhini naiknore te jifla te tei mae Jisas ka mola na, mare jifla ka namonodire ne liu mata ne tei ke leghugna mana.

¹⁴ Kate longa mata na, mae Jisas ne filoni kaisei nakhapru biꞌo. Aonu mana kokhoni nognadi fara ne fakelidi naikno te fogra re.

¹⁵ Namo rafi ka narane tuana, nogna mae fanomhore ne mei ne cheke eghu ka mana, “Mae biꞌo, igne namono nagou theo kaisei gano te mala faghamudi naikno igre. Nu gognarona la rafihi. Kuru teidi naiknore ka namono te au ka nohi igne mala foli ghedi gano thedi.”

¹⁶ Mae Jisas ne cheke eghu ka mare, “Naikno igre theome tangomana te tei na. Fei ghedi keha gano si ghotilo.”

¹⁷ Mare ne cheke eghu ka mana, “Ghehati au glima bret nei phei sasa eghu kolho.”

¹⁸ Mae Jisas ne cheke eghu ka mare, “Hata mei ka iara bret nei sasa teu are.”

¹⁹ Aonu mana chekedi naiknore mala gnokro ka buburu na. Mana hata ka mare glima bret nei phei sasa teu igre ne filo haghe kligna ne cheke fakelidi ka God. Mana piepike bret re ne tusu lao ka nogna mae fanomhore mala tufa ka naiknore.

²⁰ Naikno te gnafare kafe ghamu ne boho. Aonu ke leghugna te gnafa ghamu na mae fanomhore ne salofodu vido gano teke sala'uire ne fafofodu nabotho phei khara'o.

²¹ Mae teke ghamu ka narane tuana naba glima thogha mae, eghuteuna goro gaꞌase nei goro sua teke au baludire neke theome kahadi.

Mae Jisas nonolo ke tagru kholo

²² Ke leghugna igne, mae Jisas ne cheke ka nogna mae fanomhore mala kulu kasa ka keha phile kholo na. Mae Jisas au neu jare mala chekedi naiknore ke pulo ka namonodire.

²³ Ke leghugna pulo te gnafa naiknore, mana haghe ka thogele na ne tarai. Kate rafi soru na, mana au neu jare thegna.

²⁴ Ka narane igne, mola na la tei gaꞌuhi farihotei kholo. Aonu mola mare na ne namo lodu, naugna ne galo biꞌo fara, eghuteuna nuri na au ke uludi mare.

²⁵ Farihotei tanhi thiloi nei tanhi namnoi hamerane, mae fanomhore au ngala ka mola na. Mae Jisas mei ka mare, nonolo ne mei ke tagru kholo.

²⁶ Kate filoni mare nonolo te mei mana ke tagru kholo na, mare mhaghu ne eha eghu fabiꞌo, “Tore, kaisei naitu!”

²⁷ Mae Jisas ghosei ne cheke eghu mei ka mare, “Thosei nanga nomi! Iara mae Jisas! Thosei mhaghu!”

²⁸ Mae Pita ne cheke eghu ka mae Jisas, “Lord, te iagho tutuani na, cheke ghau iara mala ari ka iagho ke tagru kholo!”

²⁹ Mae Jisas ne cheke eghu ka mae Pita, “Mei!” Mae Pita jifla ka mola na ne funu nonolo ke tagru kholo na ne tei ka mae Jisas.

³⁰ Nu kate filoni mae Pita nuri blahi nei galo teuna, mana mhaghu fara ne funu plulu soru. Mana ne eha eghu fabiꞌo ka mae Jisas, “Lord, fakarhi ghau!”

³¹ Mae Jisas ngafa lao ne loku ka mae Pita. Mae Jisas ne cheke eghu ka mana, “Ghema, nou fatutuani iagho na ikoi fara! Thosei ghatho peapea!”

³² Kate saghe phiamare ka mola na, nuri na snoto neke muana.

³³ Aonu mae fanomhore pogho soru ka mae Jisas ne cheke eghu, “Tutuani fara, iagho thofno Thugna God!”

Mae Jisas ne fakarhidi naiknodi Genesaret te fogra re

³⁴ Ke leghugna te kasa mare ka keha phile kholo na, mare mei ne longa ka nohi te kiloi Genesaret.

³⁵ Eghuteuna naikno jare re ne filo glani mae Jisas. Aonu mare toutonu ka naikno te gnafa te au falithui vido tuana mala mei ka mae Jisas jare. Aonu mare kafe hata ne mei naikno te fogra re ka mana.

³⁶ Mare toreni mae Jisas mala snakredi mala habo kolho ka khukrudi nogna pohere, mala ke keli fapulo nodi. Aonu naikno te gnafa teke habo ka nogna pohe mana re neke keli fapulo.