Matiu 12 - Buka Blahi Ka Cheke Holo

Mae Jisas mae funei gna narane Sabat

¹ Ke leghugna igne, kau narane Sabat mae Jisas ne tei baludi nogna mae fanomhore ne sala'u ka nagare sopho na. Nogna mae fanomho mana re ne rofo fara ne funu ukli keha sopho ne ghamu.

² Hatimare mae Farasi filoni igne ne cheke eghu ka mae Jisas, “Ghema, filo sagho ka nou mae fanomho are, mare loku kau narane Sabat. Nu narane igne thono blahi fara ka noda vetula tahati mae Jiu gre!”

³ Mae Jisas ne cheke eghu ka mare, “Ghotilo jame laseni unha teke eni mae King Devet baludi mae kheragnare kani teke rofo tifa ia. Uve, ghotilo lasenihi igne, naugna ghotilo neke iu'ijunihi ka grioriso te blahi ia eigna igne.

⁴ Kau narane tuana mae pris na neke snakreni mae Devet neke ruma ka Sugablahi na neke hata bret teke fafara ka God na neke ghamu baludi mae kheragnare. Igne thono blahi fara ka vetula nogna mae Moses, hatimare mae pris kolho tangomana te ima na nafnata bret tuana. Eghuteuna God neke theome diꞌatagna ka mae Devet.

⁵ Nu ghotilo lasenihi unha te chekeni ka nogna vetula mae Moses eidi mae pris te loku ka narane Sabat ia. Leuleghu narane Sabat na mare loku ka Sugablahi na, nu unha te eni mare igne mare huhughuni vetula na. Eghuteuna God theome fatedi mare.

⁶ Tutuani fara, te chekeni iara ka ghotilo na, nu kaisei glepo te biꞌo uluni Sugablahi na auhi agne.

⁷ Nu ka grioriso te blahi ia God ne cheke eghu, ‘Iara theome magnahaghedi nomi fafara ghotilo re, nu iara magnahaghe ghami ghotilo te kokhonidi nei taji fakelidi teu naiknore.’ Jame laseni ghotilo thofno gaoghathogna cheke igne na, ghotilo jame theome tangomana te fateni naikno te theome huhughuni kaisei phugra cheke ka vetula na.

⁸ Naugna iara mae teke mei funu ka God gne ngala mae funei gna narane Sabat na.”

⁹ Mae Jisas jifla jare ne tei ruma ka kaisei nodi suga tharai mae Jiu.

¹⁰ Eghuteuna jare ka suga tharai na au kaisei mae te lehe khamegna na. Eghuteuna mare magnahaghei te fathoethokeni mae Jisas ne mei cheke eghu ka mana, “Ba, vetula na snakre ghita tahati site fakarhani naikno te fogra na ka narane Sabat na?”

¹¹ Mae Jisas ne cheke eghu ka mare, “Jame kaisei mae ka ghotilo au nogna sipu. Eghuteuna sipu tuana snoꞌo lamna khora kau narane Sabat. Mana ginauna korho fajiflani kau khora na.

¹² Nu naikno na glepo uluni sipu na! Eghume vetula na snakre ghita tahati te mala eni unha te keli te mala toghoni naikno na kau narane Sabat.”

¹³ Aonu, mae Jisas ne cheke eghu ka mae te lehe khamegna na, “Fadodoglo sagho khamemu na!” Kate fariuriu fadodoglo teu mana khamegna na, khamegna mana tuana ghosei neke keli fapulo jateula keha khame na neu.

¹⁴ Ka narane tuana hatimare mae Farasi jifla kosi ne roghe mala faleheni mae Jisas.

Mae Jisas na mae gloku neke vavahi thegna God

¹⁵ Kate laseni mae Jisas te magnahaghei faleheni mare na, mana ne jifla kokoni vido tuana. Eghuteuna kmana naikno ne tei balugna mana, nu mana kafe fakelidi ne hui naikno te fogra re.

¹⁶ Aonu mae Jisas ne cheke faheta ka naiknore mala thosei toutonu eigna mana.

¹⁷ Te eni mana igne ne thono horoghoto fara kau chekegna God teke cheke eghu mae profet Isaia tifa ia:

¹⁸ “Igne nogu mae gloku teke vavahi iara na. Nu iara namhani nei gleꞌani eghu mana. Iara ginauna tusu ranghini mana Tharungagu na. Aonu mana ginauna chekeni chekegu iara na ka naikno te theome Jiu mala tughu nagnafa mare.

¹⁹ Mana ginauna na theome fapoaphola ba fnaja fabiꞌo, ba cheke fabiꞌo eghu tafri farihotei glalaba.

²⁰ Naikno te nigra fei thini ba fatutuani, mare jateula fora te namo klopa ba juta te namo lehe ia eghu. Nu mae igne ginauna theome thododi naikno te nigra igre. Nu mana ginauna eni fabrahu igne ghilei thokeni narane naikno te theome Jiu gre nate hatani nakarha nogna God.

²¹ Nu mae igne te mala fatutuani ni naiknogna nauthoglu igne na.”

Mae Jisas au nolaghi biꞌo ke kligna gna mae Satan

²² Ke leghugna igne keha naiknore hata ne mei kaisei mae ka mae Jisas. Mae igne dofu nei iho cheke eghu, naugna kaisei naitu au ka mana. Aonu mae Jisas fakelini mae igne neke tangomana teke fifilo nei ke facheke teuna.

²³ Kate filoni mare igne, mare jaglo nodi fara ne cheke eghu, “Tore! Igne ngala jau si mae vikegna King Devet te ofoni tahati na.”

²⁴ Kate nomhini hatimare mae Farasi cheke igne, mare ne cheke eghu, “Mae Satan, nodi mae funei hatimare mae naitu are, site tusu ranghini mana nolaghi te mala bruedi naitu area.”

²⁵ Mae Jisas ne lasedi unha te au kau nagnafadi mae Farasi gre, ne cheke eghu ka mare, “Jame naiknogna kaisei namono mare magra fari thedi, namono tuana ginauna groꞌe kolho. Jame kaisei tharakna ba naiknogna kaisei namono biꞌo mare magra fari thedi, mare ginauna na theome au fakeli kolho.

²⁶ Eghume jateula tuana eghu, jame te brueni mae Satan nogna tothoghei naitu thegna na, nogna tothoghei naitu mana tuare ginauna magra farithedi. Eghume, jame te eghu mare na, nogna tothoghei mana tuare ginauna theome kegra maku kolho.

²⁷ Nu jame ne loku iara ka nogna nolaghi mae Satan ne bruedi naiture teuna, ka unha nolaghi si teke brue naitu nomi mae gloku ghotilo ra? Neu nga nu mare brue naitu la ka nogna nolaghi mae Satan. Eghume unha teke eni mare tura fagaglana gna te chaghi ghotilo na.

²⁸ Nu te loku iara ka nogna nolaghi God na te brue fajifladi naiture, igne ngala fagaglana gna u narane God te funei frunidi nogna naiknore la meihi ka ghotilo teuna.

²⁹ “Jateula tuana eghu theome tangomana kaisei naikno te ruma ka nogna suga mae te nheta na te blau nogna glepore. Mana na kulu haru famaku ghu mae te nheta na ame tangomana nga mana te ruma ka suga na te blau nogna famane glepore.

³⁰ “Tutuani, mae ihei te theome leghu ghau iara na, mana tirogna ghau iara. Eghuteuna mae ihei te tirogna togho ghau iara te mala hata meidi naiknore ka God na, mana jateula te brue fadeleidi eghu naiknore ka God.

³¹ Naugna tuana, te chekeni iara ka ghotilo na, ihei te loku jafra ba cheke faparini God na, God ginauna tangomana te hata fadeleidi nakhibogna mana re. Nu ihei te cheke faparini Tharunga te Blahi na, God ginauna theome tangomana te hata fadeleidi nakhibogna mana re.

³² Nu ihei te cheke fadiꞌa ghau iara mae teke mei funu ka God na, God ginauna tangomana te hata fadeleidi nakhibogna mana re. Nu ihei te cheke fadiꞌani mae Tharunga te Blahi na, God ginauna theome hata fadeleidi nakhibogna mana re, kau nauthoglu gognaro gne ba nathuꞌu nauriha na.

³³ “Gaju te keli na ginauna ure sisi te keli, nu gaju te diꞌa na ginauna ure sisi te diꞌa. Tutuani, gaju te gnafare tahati kafe filo glanidi kau sisidire. Eghume ginauna jateula tuana eghu tahati laseni naikno tuana ka nakarhagna nei puhigna teure.

³⁴ Ghotilo gne jateula mogo eghu, naugna ghotilo lase chaichaghi fara! Ninhigrana fara ranghi ghami ghotilo te chekeni kaisei glepo te keli na, naugna puhimi ghotilo re theome keli. Unha te fodu ka nagnafagna naikno na, tuana ngala te jifla mei ka chekegna mana re.

³⁵ Eghume naikno te keli na au gaoghatho te keli ka nagnafagna na, eghuteuna mana tangomana te chekedi glepo te kelire. Naikno te diꞌa na au gaoghatho te diꞌa ka nagnafagna na, eghuteuna mana tangomana te chekedi glepo te diꞌare.

³⁶ Nu te chekeni iara ka ghotilo na, kau narane fate na, naiknore ginauna na rurutha ka God eidi nafnata cheke te theo nafudi teke chekedi thedire.

³⁷ God ginauna jateula tuana eghu fate ghami ghotilo ka unha te chekedi ghotilo re. Jame te chekedi ghotilo glepo te kelire mana ginauna chekeni ne theome jafra ghotilo teuna. Nu jame te chekedi ghotilo glepo te diꞌare mana ginauna chekeni ne jafra ghotilo teuna.”

Nogna farirhiu mae Jisas na famane fara

³⁸ Aonu, keha mae Farasi nei mae velepuhigna vetula nogna mae Moses teure ne mei cheke eghu ka mae Jisas, “Ghehati magnahaghe nigho iagho te eni kaisei gloku biꞌo te nolaghi. Igne fagaglana te mala laseni ghehati nolaghi teke mei funu ka God na.”

³⁹ Eghuteuna mae Jisas ne cheke eghu ka mare, “Icho idomi! Puhimi ghotilo naikno gognaro gre thono diꞌa fara. Ghotilo toreni koba kaisei fagaglana, nu iara ginauna na theome fakakhana kaisei fagaglana funugna ka God ka ghotilo. Nu fagaglana tangomana nate filoni ghotilo na u fagaglana teke eni God ranghini mae profet Jona tifa ia kolho.

⁴⁰ Mae Jona neke au ka thi'agna sasa te biꞌo fara na thilo narane nei thilo bongi. Eghuteuna ginauna na jateula tuana eghu iara mae teke mei funu ka God na ginauna au ke lamna glose thilo narane nei thilo bongi eghu.

⁴¹ Jaola ka narane God nate fatedi naikno te gnafare, naiknodi Ninive igre ginauna kegra haghe mala cheke thakle ghami ghotilo naikno gognaro gre te thono jafra tutuani ghotilo na. Naugna ka narane teke toutonu mae Jona na mare neke tughu nagnafa! Eghuteuna te chekeni iara ka ghotilo na, kaisei mae te biꞌo uluni fara mae Jona na auhi agne!

⁴² Kau narane tuana God ginauna fatedi naikno te gnafare, nakrupe biꞌo gna Siba na kegra haghe mala cheke thakle ghami ghotilo naikno gognaro gre te thono jafra tutuani ghotilo na. Naugna naꞌa neke mei funugna ka namono te khaba fara mala fanomho ka nogna farirhiu te keli mae King Solomon. Eghuteuna te chekeni iara ka ghotilo na, kaisei mae te biꞌo uluni mae King Solomon na auhi agne mala toutonuni chekegna God na!”

Ke pulo meigna naitu

^43-44 Mae Jisas ne cheke eghu, “Kate brue fajifladi mare naitu teke au ka naikno na, naitu tuana ginauna tei tafri ke lamna namono te moja na mala deni vido aheva te mala au na. Aonu jame te theome deni kaisei vido na, mana na cheke eghu, ‘Iara gne nake pulo ngala ka nogu suga thegu ka mae teke tei kokoni ia.’ Aonu kate pulo ka naikno tuana, mana filoni naikno tuana jateula suga te famane snagla nei haglu fagae te doglo hira eghu ke lamna na.

⁴⁵ Eghuteuna naitu na tei ne hata mei keha fitu naitu te thono diꞌa fara ke tulao gna thegnai. Mare tei ne au ke lamnagna naikno na jare. Eghuteuna gognarona nakarhagna naikno tuana thono diꞌa fara ke tulao gnai teke tifa na. Eghume jateula tuana eghu ghotilo naikno te diꞌa gognaro gre naugna ghotilo ne theome magnahaghei ghau iara, mae teke mei funu ka God na.”

Vikegna tutuani mae Jisas

⁴⁶ Kate facheke teu mae Jisas ka naiknore, idogna nei thabusigna teu mana re ne posa mei kegra neu kosi. Mare magnahaghei te mei cheke ka mana.

⁴⁷ Kaisei mae ka nakhapru na ne cheke eghu ka mana, “Ghema, idomu nei thabusimu teu iagho re kegrau kosi, mare magnahaghei te cheke balumu iagho.”

⁴⁸ Mae Jisas ne cheke eghu ka mana, “Ihei idogu iara na? Iheire thabusigu iara re?”

⁴⁹ Aonu mana ne tusu lao ka nogna mae fanomhore ne cheke eghu, “Igre ngala jateula idogu nei thabusigu teu iara re!

⁵⁰ Ihei te eni unha te magnahagheni mae Kmagu iara te au kligna na thofno thabusigu nei greghagu nei idogu eghu iara.”